tōļ

Juon tōļ ilo Ijipt kar tōmak ilo imminene bwe ej Tōļ Sainai.

Eprōļ 18–24

Exodus 18–20

“Men Otemjej Irooj ear Kōnono, Kōmnaaj Kōm̧m̧ani”

Ilo am̧ riiti Exodus 18–20, ļōmņak kōn pedped in katak ko me enaaj lukkuun ļap meļeļein n̄an ajri ro. Kwomaron̄ en̄jake im̧we n̄an kwaļo̧k juon pepded in katak ijjeļo̧k elmakot ko ilaļ.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k juon iaan Kien ko Jon̄oul (ak etale jejjo kien ko ippāer) im etke rej en̄jake bwe eaorōk n̄an pokake kien ko.

pija ej bōk jikin katakin

Katakin Katak eo: Ajri ro Reddikļo̧k

Exodus 18:8–12

Kwaļo̧k aō naan in kam̧ool emaron̄ kōjeraam̧m̧an ro jet.

Jethro ekar lan̄lōn̄ ke Moses ekar kwaļo̧k ta eo Irooj ekar kōm̧m̧ane n̄an ajri ro nejin Israel. Bwebwenato in emaron̄ im̧we ajri ro kwoj katakin er n̄an kwaļo̧k n̄an ro jet ta eo rejeļā bwe em̧ool.

M̧akūtkūt ko Maron̄ Kōm̧m̧ani

• Riit ļo̧k n̄an ajri ro naan kein rej ellaajrak jān Exodus 18:8: “Im Moses ear kōnnaanōk jemān lio pāleen men ko otemjej Irooj ear kōm̧m̧ani.” Kajjitōk ippān ajri ro eļan̄n̄e rej keememej ta eo Irooj ekar kōm̧m̧ane n̄an jipan̄ ajri ro nejin Israel ko jān Ijipt. (N̄an jipan̄ keememej, kwaļo̧k pija ko ak peij in m̧akūtkūt jān katak ko m̧oktaļo̧k). Ta men ko Irooj ekar kōm̧m̧ani n̄an jipan̄ kōj? Jipan̄ ajri ro jeļā bwe āinwōt Moses, jemaron̄ ba n̄an armej ro jet kōn men ko rem̧m̧an Irooj ekar kōm̧m̧ani n̄an kōj.

• Būraimere kūlaaj emaron̄ erom̧ juon jikin em̧m̧an n̄an ajri ro n̄an kaminene kwaļo̧k naan in kam̧ool ko aer reļam waan. Kwaļo̧k naan in kam̧ool eo am̧ ippāer, im jipan̄ er kwaļo̧k n̄an doon m̧ool ko an gospel eo me rej tōmak kake.

Exodus 20:3–17

Anij ej letok kien ko kōnke Ekōņaan bwe jen m̧ōņōņō.

Kien ko rej katak in tōl ko an Jemedwōj Ilan̄ n̄an kappukot aeņōm̧m̧an ilo mour in im lan̄lōn̄ ilo mour indeeo. Ekōjkan am̧ maron̄ kōketak ajri ro n̄an pokake kien ko an Anij?

M̧akūtkūt ko Maron̄ Kōm̧m̧ani

• Kwaļo̧k pija ko jān “Kakien ko Jon̄oul” (ilo Old Testament Stories), im kajjitōk ippān ajri ro n̄an kwaļo̧k ta eo rejeļā kake kōn bwebwenato in. Jipan̄ er meļeļe jabdewōt m̧ōttan ko ilo bwebwenato eo me rejjab lukkun jeļā kake.

• Ilo am̧ riit jejjo iaan kien ko jān Exodus 20:3–17 n̄an ajri ro (ak kōkaduiki naan ko bwe ren maron̄ meļeļe), kajjitōk ippāer n̄an kajutak juon kajutak addi pā kileplep eo eļan̄n̄e kien eo ej kōn juon men je jaikuj kōm̧m̧an im addi pā kileplep eo ej jitōn̄ laļļo̧k laļ eļan̄n̄e ej juon men jejjab aikuj kōm̧m̧ane. Kwaļo̧k naan in kam̧ool eo am̧ kōn m̧ōņōņō me je itok jān pokake kien ko an Anij (lale Mosaia 2:41).

• Al ippān ajri ro juon al kōn ekōjkan an Jemedwōj Ilan̄ kōjeraam̧m̧an kōj n̄e jej pokake kien ko, āinwōt “Keep the Commandments” (Al ko Al in Ajri, 146–47). Kajjitōk ippān ajri ro n̄an ron̄jake naan ko n̄an kappukot ta kōjeraam̧m̧an ko jemaron̄ bōki n̄e jej pokake.

Exodus 20:12

Imaron̄ kautiej ro jinō im jema.

Pokake ro jined im jemed ekitbuuj eļapļo̧k jān pokake wōt. Jipan̄ ajri ro meļeļe wāween ko jet remaron̄ kautiej ro jineer im jemāer.

M̧akūtkūt ko Maron̄ Kōm̧m̧ani

• Jipan̄ ajri ro ekkatak naan eo “Kwōn koutiej jemam̧ im jinōm̧” (Exodus 20:12). Eļan̄n̄e emenin aikuj, kōmeļeļe bwe n̄an “kautiej” juon armej emaron̄ meļeļein n̄an kwaļo̧k kautiej n̄an er n̄an bōktok n̄an er m̧ōņōņō. Ta eo Jisōs ekar kōm̧m̧ane n̄an kautiej Jemān Ilan̄? Elmen an kar kautiej Jinen? (lale Luk 2:48–51; Jon 19:26–27). Jipan̄ ajri ro ļōmņake men ko me remaron̄ kōm̧m̧ani n̄an kautiej ro jineer im jemāer, im kajjitōk ippāer n̄an kōm̧m̧ani ta ko rej ļōmņaki.

• Karuwaineneik ajri ro n̄an kōm̧m̧an juon kaat in kam̧m̧oolol n̄an ro jineer im jemāer. Remaron̄ je ak jin̄n̄aik ilowaan kaat eo juon me renaaj kōm̧m̧ane n̄an kautiej ro jineer im jemāer.

pija ej bōk jikin katakin

Katakin Katak eo: Ajri ro Rerūttoļo̧k

Exodus 18:13–26

Imaron̄ jipan̄ “ineek eddo in” n̄an kōm̧m̧an jerbal in an Irooj.

Moses ekar ekkatak bwe kajjeon̄ n̄an tōl ajri ro nejin Israel ippān make ekar “jab em̧m̧an” (Exodus 18:17). Iakwe im jipan̄ doon emaron̄ jipan̄ kōmerāikļo̧k eddo ko an ritōl ro ad.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an jin̄n̄aik bwijin doulul ioon bo̧o̧t n̄an bōk jikin membōr ro ilo ward eo. Jin̄n̄aik juon doulul im kōkaļļeiki bishop. Etke enaaj juon būrabļōm eļan̄n̄e bisop eo wōt ej jipan̄ aolep armej? Riit ippān doon Exodus 18:13–26 n̄an kappukot ta naan in kapilōk eo Jethro ekar leļo̧k n̄an Moses ke ekar kajjeon̄ kōm̧m̧ani aolep men ko make iaan. Kajjitōk ippān ajri ro n̄an kōkaļļeiki doulul ko jet n̄an bōk jikin ritōl ro jet an ward ko im membōr ro rej jipan̄ bisop eo n̄an jipan̄ ro jet. Ekōjkan an ritōl rein jet im membōr ro kōm̧m̧an bwe en mera ļo̧k eddo ko an bisop eo? Ekōjkan ad maron̄ kōm̧m̧ane ejja jekjek in wōt n̄an ritōl ro ilo ward eo ad? n̄an ro jined im jemād ilo m̧weo?

• Jipan̄ ajri ro kōm̧m̧ane juon laajrak in ritōl ro ilo ward eo am̧. Āinwōt juon kūlaaj, kāālet juon im ekkōnono kōn ta eo armej eo ej kōm̧m̧ane n̄an kōttōbrak jerbal eo an Irooj im ta eo ajri ro remaron̄ kōm̧m̧ane n̄an jipan̄.

  juon em̧m̧aan ej idik pein juon kōrā

  Jipan̄ armej ro jet ej juon wāween jemaron̄ jipan̄ ilo jerbal in an Irooj.

Exodus 20:1–7

Elukkuun aorōk n̄an likūt Irooj m̧oktata ilo mour eo am̧.

Ewōr ippād wōj men ko me jemaron̄ po ie n̄an likūt Anij m̧oktata ilo mour ko ad. Elmen am̧ maron̄ jipan̄ ajri ro meļeļe ta meļeļein n̄an likūt Jemedwōj Ilan̄ m̧oktata?

M̧akūtkūt ko Maron̄ Kōm̧m̧ani

• Riiti ippān doon Exodus 20:1–7, im kōmeļeļeik bwe jabdewōt men jej likūt im̧aan Anij ilo mour ko ad emaron̄ erom̧ “anij raņ” im “jekjek ekjab [ko]” kar kwaļo̧k ilo eoon ko 3–4. Kajjitōk ippān ajri ro etke Jemedwōj Ilan̄ ekōņaan bwe jen likūt E m̧oktata. Ta kōjeraam̧m̧an ko Ekar kallim̧ur kaki eļan̄n̄e jej kōm̧m̧ani? Kajjitōk ippān ajri ro ekōjkan ad maron̄ kwaļo̧k n̄an Jemedwōj Ilan̄ bwe E eļapļo̧k eaorōk jān jabdewōt men ilo mour ko ad.

• Ļōmņak kōn juon jerbal eo me ewōr bun̄tōn ko jinoin raorōk, āinwōt kwaļkwōļ pā m̧okta jān ad m̧ōn̄ā ak likūt jitokin ko m̧okta jān ekkanōk juuj ko. Ta eo emaron̄ kar waļo̧k eļan̄n̄e jekar jab kōm̧m̧ane men ko raorōk m̧oktata? Ej āinwōt ta ilo ad likūt Jemedwōj Ilan̄ m̧oktata ilo mour ko ad? Kwaļo̧k am̧ naan in kam̧ool kōn wāween ad likūt Anij m̧oktata kōjeraam̧m̧an eok, im kajjitōk ippān ajri ro n̄an bar kwaļo̧k naan in kam̧ool ko aer.

• Al juon al kōn Jemedwōj Ilan̄, āinwōt “My Heavenly Father Loves Me” (Children’s Songbook, 228–29). Ta eo jej ekkatak jān al eo kōn etke eaorōk n̄an likūt Jemedwōj Ilan̄ m̧oktata ilo mour ko ad?

Exodus 20:3–17

Anij ej letok kien ko kōnke Ekōņaan bwe jen m̧ōņōņō.

Ajri ro enaaj pidodo aer kōjparok kien ko eļan̄n̄e rej loi āinwōt kōkaļļein iakwe eo an Anij im iien ko rem̧m̧an n̄an kwaļo̧k iakwe eo aer n̄an E.

M̧akūtkūt ko Maron̄ Kōm̧m̧ani

• Kōpooj pepa jidik ko em̧ōj am̧ je kien ko ilo Exodus 20:3–17 ioon pepa ko. Je nōm̧ba juon n̄an jon̄oul ioon bo̧o̧t eo, im kajjitōk ippān ajri ro n̄an likūt pepa jidik ilo laajrak eo ejim̧we ioon bo̧o̧t eo. Kōnono kōn ewi wāween ad ļoor kien kein. N̄an aitia ko jet, remaron̄ lale bwebwenato eo ilo Unin Kōnono ko an Gospel eo “Ten Commandments” (topics.ChurchofJesusChrist.org).

• Kajjitōk ippān ajri ro n̄an jin̄n̄aik pija ko ak naan ko ralikkar jān kien ko n̄an jipan̄ er keememeji.

• Ba bwebwenato eo kōn Chloe jān ennaan eo an Sister Carole M. Stephens “Eļan̄n̄e Kwoj Iakwe Eō, Kōjparok Kien ko Aō” (Liaona, Nob. 2015, 118–20). Ekōjkan an bwebwenato in jipan̄ kōj meļeļe etke Irooj ej letok n̄an kōj kien ko? Ekōjkan ilo ad pokake kwaļo̧k iakwe eo ad n̄an Anij?

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an ļōmņak kōn men ko remaron̄ kōņaan kōm̧m̧ane kōnke ta eo rekar ekkatak kake ilo kūlaaj eo. Jipan̄ er kōm̧m̧ane juon kein kakeememej epidodo kōn ta eo renaaj kōm̧m̧ane me remaron̄ bōke n̄an m̧ōko m̧weer.

Kōkm̧anm̧anļo̧k Ad Katakin

Jipan̄ ajri ro kile Jetōb eo. Ajri ro remaron̄ kile im̧we eo an Jetōb. Katakin ajri ro bwe en̄jake in aenōm̧m̧an, iakwe, im okmāneen eo im rej en̄jake ilo aer kōnono ak al kōn Jisōs Kraist im gospel eo An ej itok jān Jetōb Kwojarjar.

peij in m̧akūtkūt eo: Imaron̄ pokake kien ko