“30 Mē–5 Sune. Kau Fakamaau 2–4; 6–8; 13–16: ‘Naʻe Fokotuʻu Hake ʻe [he ʻEikí] ha Fakamoʻui,’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“30 Mē–5 Sune. Kau Fakamaau 2–4; 6–8; 13–16,” Haʻu, ʻo Muimui ʻIate Au—Maʻá e Palaimelí: 2022
Fakatātā ʻo Tēpola ʻi heʻene taki atu e kau tau ʻa ʻIsilelí, © Lifeway Collection/licensed mei he goodsalt.com
30 Mē–5 Sune
Kau Fakamaau 2–4; 6–8; 13–16
“Naʻe Fokotuʻu Hake ʻe [he ʻEikí] ha Fakamoʻui”
ʻOku lahi ha ngaahi talanoa fakalaumālie ʻi he Kau Fakamaau 2–4; 6–8; 13–16. Fakalaulauloto ki he founga te ke lava ai ʻo fakaʻaongaʻi e ngaahi talanoá ni ke tokoni ki he fānaú ke nau ʻunu ofi ange ai ki he Fakamoʻuí mo fili ke muimui ʻiate Ia.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaafeʻi e fānaú takitaha ke nau vahevahe ha talanoa mei he folofolá kuo nau toki ako kimuí ni mai. Kole leva ke nau vahevahe e meʻa ne nau ako mei he ngaahi talanoá ni.
Akoʻi e Tokāteliné: Fānau Iiki Angé
Ko Sīsū Kalaisi ʻa hoku Fakamoʻuí.
ʻI he taimi ne lotu ai e kakai ʻIsilelí ki he ʻEikí, naʻá Ne fokotuʻu hake ha fakamoʻui maʻanautolu. Tokoni ke ʻilo ʻe he fānaú ko Sīsū Kalaisi ʻa e Fakamoʻui naʻe fokotuʻu hake ʻe he ʻOtuá maʻatautolú.
Ngaahi ʻEkitivitī ʻe Ala Fakahokó
-
Fakamatalaʻi ki he fānaú ko e taimi ne ngata ai hono tauhi ʻe he kakai ʻIsilelí e ngaahi fekau ʻa e ʻOtuá, ne toʻo ʻEne maluʻi kinautolú pea ikunaʻi kinautolu ʻe honau ngaahi filí. Lau mei he Kau Fakamaau 3:9 ʻa e kupuʻi lea “[naʻe] tangi ʻa e fānau ʻa ʻIsilelí ki [he ʻEikí].” Ko e hā naʻe fakahoko ʻe he kau ʻIsilelí ʻi he taimi ne nau fie maʻu tokoni aí? Vahevahe ha aʻusia ʻi ha taimi naʻá ke lotua ai ha tokoni pea tali ʻe he ʻOtuá hoʻo lotú.
-
Lau mei he Kau Fakamaau 3:9 ʻa e kupuʻi lea “naʻe fokotuʻu hake [ʻe he ʻEikí] ʻa e fakamoʻui,” pea fakaafeʻi e fānaú ke mou toutou lea ʻaki ia. Fakamatalaʻi ange ko e fakamoʻuí ko ha tokotaha ʻokú ne fakahaofi kitautolu. Fakaʻaliʻali ki he fānaú ha ngaahi fakatātā ʻo ha kakai, kau ai ha fakatātā ʻo Sīsū Kalaisi, pea fakafoʻohifoʻi ʻa e ngaahi fakatātaá ki he falikí. Tuku ke taufetongi e fānaú ʻi hono fulihi hake e fakatātaá, kumi e fakatātā ʻo Sīsuú, mo puke hake iá. Fakamoʻoni ko Sīsū Kalaisi ʻa e Fakamoʻui naʻe fokotuʻu hake ʻe he ʻOtuá ke fakahaofi kitautolu mei he angahalá mo e maté.
Naʻe falala ʻa Kitione ki he ʻEikí. © Lifeway Collection/licensed mei he goodsalt.com
ʻE lava ke fakaʻaongaʻi ʻe he ʻEikí ha fanga kiʻi meʻa iiki ke fakahoko ha ngāue maʻongoʻonga.
Naʻe fakakaukau ʻa Kitione ʻokú ne feifeiavale mo ʻikai hano mahuʻinga, ka naʻe ʻafioʻi ʻe he ʻOtuá ko ha “tangata mālohi mo toʻa” (Kau Fakamaau 6:12). Tokoniʻi ke ʻilo ʻe he fānaú kapau ʻoku nau ongoʻi taʻe malava ha meʻa, ʻe lava ke ngāue ʻa e ʻOtuá ʻiate kinautolu ke nau fai ha ngaahi meʻa mahuʻinga (vakai, ʻAlamā 37:6–7).
Ngaahi ʻEkitivitī ʻe Ala Fakahokó
-
Talaange ki he fānaú naʻe fie maʻu ʻe he ʻEikí ha tokotaha ke tokoni kiate Ia ke fakahaofi ʻa ʻIsileli mei honau ngaahi filí, ko e kau Mitiané, pea naʻá ne fili ai ʻa Kitione. Lau ki he fānaú ʻa e Kau Fakamaau 6:15 pea ʻeke ange kiate kinautolu ʻa e ʻuhinga naʻe ʻikai ongoʻi ai ʻe Kitione te ne lava ʻo fakahoko e finangalo ʻo e ʻEikí. Lau ʻa e veesi16, pea ʻeke ange ko hai naʻe folofola e ʻEikí ʻe tokoni kia Kitioné. Talanoa ki he fānaú fekauʻaki mo ha taimi naʻe kole atu ai e ʻEikí ke ke fai ha meʻa faingataʻa Maʻana peá ke ongoʻi ʻEne tokoniʻi koé.
-
Fakaʻaliʻali ha ngaahi fakatātā ʻo ha fānau pe toʻu tupu ʻoku nau fakahoko ha ngaahi meʻa lahi ʻi he ngāue ʻa e ʻOtuá (vakai, Tohi Fakatātā ʻo e Ongoongoleleí, fika 19, 23, 90, 102), pe talanoa ki ha ngaahi sīpinga kuó ke mātā tonu. Tokoni ki he fānaú ke nau fakakaukau ki ha ngaahi founga te nau lava ai ʻo kau ki he ngāue ʻa e ʻOtuá, pea fakaafeʻi ke nau tā hanau ngaahi fakatātā ʻoku nau fakahoko e ngaahi meʻá ni.
-
Fakaʻaongaʻi e peesi ʻekitivitī ʻo e uike ní ke akoʻi ki he fānaú hono hanga ʻe he ʻEikí ʻo ʻai ke ongoʻi tailiili e kau tau ʻa ʻIsilelí koeʻuhí ke ʻilo ʻe he kau ʻIsilelí ko Hono mālohí naʻa nau hao ai mei honau ngaahi filí. Vahevahe ha ngaahi sīpinga ʻo ha fanga kiʻi meʻa iiki ʻoku nau fai ha ngāue maʻongoʻonga, hangē ko hono tānaki ʻe he fanga honé ʻa e huʻamelié ke ngaohi e huhuʻa honé. Vahevahe hoʻo fakamoʻoní ki he lava ke tokoniʻi kitautolu ʻe he ʻOtuá ke tau fakahoko ha ngāue maʻongoʻonga, ʻo aʻu ki he taimi ʻoku tau ongoʻi taʻefeʻunga aí.
Akoʻi e Tokāteliné: Fānau Lalahi Angé
Ko Sīsū Kalaisi ʻa hoku Fakamoʻuí.
ʻOku fakamatalaʻi ʻe he Kau Fakamaau 3 ha sīpinga te ke lava ʻo fakaʻaongaʻi ke akoʻi ki he fānaú, ʻoku fakamoʻui kitautolu ʻe he ʻOtuá mei he angahalá ʻo fakafou ʻi he Fakamoʻui ko Sīsu Kalaisí.
Ngaahi ʻEkitivitī ʻe Ala Fakahokó
-
Hiki ʻeni ʻi he palakipoé: “fai kovi,” “tangi [ki he ʻEikí],” mo e “fokotuʻu hake … ha fakamoʻui.” Fakaafeʻi ha niʻihi ʻo e fānaú ke nau kumi e ngaahi kupuʻi leá ni ʻi he Kau Fakamaau 3:7–9, pea fakaafeʻi e niʻihi kehé ke nau kumi ʻi he Kau Fakamaau 3:12–15. Fakamatalaʻi ki he fānaú, ʻa e toutou fakamatalaʻi ʻi he tohi ʻa e Kau Fakamāú, e “fai kovi” ʻa e kau ʻIsilelí. Pea ʻi he ʻoho atu honau ngaahi filí, ne nau “tangi ki he ʻEikí,” pea naʻe “fokotuʻu hake [ʻe he ʻEikí] ha fakamoʻui” ke tokoni kiate kinautolu. Ko e hā ʻoku tau ako ki he ʻEikí mei he sīpingá ni?
-
Hivaʻi fakataha ha foʻi hiva ʻoku tokoni ke mahino ki he fānaú ko Sīsū Kalaisi honau Huhuʻí mo e Fakamāú, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20–21). Fakaafeʻi e fānaú ke vahevahe ʻenau ngaahi ongo fekauʻaki mo e meʻa kuo fakahoko ʻe he Fakamoʻuí ke fakahaofi kitautolu mei he angahalá, ngaahi faingataʻá, mamahí mo e maté.
Te u lava ʻo tauhi faivelenga ki he ʻEikí, neongo ʻoku ʻikai ke fai pehē ʻa e niʻihi kehé.
Neongo ne hē ha niʻihi tokolahi ʻo e kakai ʻIsilelí mei he ʻEikí, naʻe kei faitōnunga pē ha niʻihi kiate Ia pea lava ke nau tokoni ki ha niʻihi kehe tokolahi ke nau foki ʻo angatonu. Te ke poupouʻi fēfē nai e fānaú ke nau tuʻu maʻu ʻi he ʻEikí tatau ai pē ko e hā ʻoku fai ʻe he niʻihi kehé?
Ngaahi ʻEkitivitī ʻe Ala Fakahokó
-
Fakamatalaʻi ki he fānaú neongo e kei faiangahala ʻa e kakai ʻIsilelí, ka naʻe fakahaofi ʻe ha fefine angatonu ko Tēpola mo e taki tau ʻo e kakai ʻIsilelí, Pēlaki, ʻa ʻIsileli mei honau ngaahi filí (vakai, Kau Fakamaau 4:1–15). Lau fakataha e Kau Fakamaau 4:14, pea kole ki he fānaú ke nau kumi ha meʻa ne lea ʻaki ʻe Tēpola ne hā mei ai ʻene tui mālohi ki he ʻEikí. Kole ange leva ke nau lau ʻa e Tokāteline mo e Ngaahi Fuakava 84:88 ke ʻilo ha tefitoʻi moʻoni ʻoku toe maʻu ʻi he Kau Fakamaau 4:14. Poupouʻi ke nau vahevahe e ʻuhinga ʻo e talaʻofa ʻa e ʻEikí kiate kinautolu ʻo pehē “Te u muʻomuʻa ʻi homou ʻaó.”
-
Hivaʻi ha foʻi hiva fekauʻaki mo e talangofua ki he ngaahi fekaú, hangē ko e “Fili ʻa e Moʻoní” (Ngaahi Himí, fika 146) pe “Fili e Hala Totonú” (Tohi Hiva ʻa e Fānaú, 82). Te tau tuʻu maʻu fēfē ʻi he angatonú mo talangofua ki he ngaahi fekaú neongo ʻoku ʻikai fai pehē ʻa e niʻihi ʻoku tau feohí?
ʻOku kehe e founga ʻa e ʻEikí mei he founga ʻa e māmaní.
Naʻe kole e ʻEikí kia Kitione ke ne fai ha ngaahi meʻa naʻe ʻikai mahalo ke mahino kiate ia ʻi he taimi ko iá. Ko e hā ʻokú ne ueʻi fakalaumālie koe ʻi he talanoa kiate iá? ʻOkú ke ongoʻi te ne tāpuekina fēfē nai e fānau ʻokú ke akoʻí?
Ngaahi ʻEkitivitī ʻe Ala Fakahokó
-
Kole ki he fānaú ke nau fakalaulauloto ʻoku fie maʻu ke nau tānaki fakataha ha kau tau ke ō ʻo tau. Ko e kakai nai ʻe toko fiha te nau fie maʻu ʻi heʻenau kau taú? ʻI hono fakaʻaongaʻi ʻo e Kau Fakamaau 7:4–7, fakaafeʻi e fānaú ke nau fakatātaaʻi ʻa e founga naʻe tokoniʻi ai ʻe he ʻEikí ʻa Kitione ke fili e kau tau te nau fakahaofi ʻa ʻIsileli mei he kau Mitiané. Ko e hā naʻe finangalo ai e ʻEikí ke tokosiʻi pē e kau tau ʻa Kitioné? (vakai, Kau Fakamaau 7:2). Ko e hā ka ngali faingataʻa ai kia Kitione mo ʻene kau taú ke nau talangofua ki he fekau ʻa e ʻEikí? Fakaafeʻi e fānaú ke nau vahevahe ha ngaahi aʻusia ʻo ha taimi ne nau ako ai ke falala ki he ʻEikí neongo ʻene faingataʻá.
-
Fakaafeʻi e fānaú ke nau tā ha ngaahi fakatātā ʻo ha heletā, pā, meʻaifi, maama, mo e ipu. ʻEke ki he fānaú pe ko e fē ʻi he ngaahi meʻá ni te nau fie ō mo ia ki ha tau. Fakaafeʻi ke nau lau ʻa e Kau Fakamaau 7:16 ke ʻilo e meʻa ne ʻalu mo e kau tau ʻa Kitioné. Ko e hā ka fie maʻu ai e loto-toʻá ki hono fakahoko ʻení? Lau fakataha ʻa e Kau Fakamaau 7:19–21 ke ako e founga naʻe fakaʻaongaʻi ai ʻe he kau taú e ngaahi meʻa leá mo e ngaahi ipú ki hono ikunaʻi ʻo e kau Mitiané. Ko e hā ʻoku tau ako kau ki he ʻEikí mei he talanoa ko ʻení?
Poupouʻi e Ako ʻi ʻApí
Fakaafeʻi e fānaú ke nau vahevahe mo ha mēmipa ʻo e fāmilí ha meʻa ne nau ako he ʻahó ni ʻokú ne ʻai ke nau fie tauhi e ngaahi fekaú.
Fakatupulaki ʻEtau Akoʻí
Liliu ʻa e ngaahi ʻekitivitií ke feau e ngaahi fie maʻú. ʻOua te ke vakai ki he ngaahi fokotuʻutuʻu ko ʻení ko ha ngaahi fakahinohino kuo pau ke ke muimui ki ai. Ka ke fakaʻaongaʻi kinautolu ko ha maʻuʻanga fakakaukau ke fakatupu ai ha ueʻi fakalaumālie kiate koe ʻi hoʻo fakalaulauloto ki he ngaahi fie maʻu ʻo e fānau ʻokú ke akoʻí. Hangē ko ʻení, mahalo te ke ongoʻi fakalaumālie ʻi ha taimi ʻe niʻihi ke fulihi ha ʻekitivitī maʻá e fānau iiki angé ke akoʻi e fānau lalahi angé, pe ko e fulihi e ʻekitivitī maʻá e fānau lalahi angé ke akoʻi e fānau iiki angé.