Lute mo Nāomi

Feituʻu Te Ke ʻAlu Ki Aí, fai ʻe Sandy Freckleton Gagon

6–12 Sune

Lute; 1 Samuela 1–3

“ ʻOku Fiefia Hoku Lotó [ʻi he ʻEikí]”

ʻI hoʻo lau ʻa e Lute mo e 1 Samuela 1–3, ʻeke ki he Tamai Hēvaní ʻa e founga ʻe lava ke ke tokoniʻi ai e fānaú ke nau ako mei he ngaahi moʻoni ʻi he ngaahi vahé ni. Hiki e ngaahi ongo ʻokú ke maʻú.

Lekooti Hoʻo Ngaahi Ongó

fakaʻilonga feʻinasiʻakí

Fakaafeʻi e Feʻinasiʻakí

Kole ki he fānaú ke nau vahevahe ʻa e meʻa ʻoku nau ʻilo fekauʻaki mo Lute, Naomi, ʻAna mo Samuelá. ʻE ala tokoni haʻo fakaʻaliʻali ange ha ngaahi fakatātā, hangē ko ia ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

fakaʻilonga akoʻí

Akoʻi e Tokāteliné: Fānau Iiki Angé

Lute

Te u lava ʻo fakahaaʻi ʻeku ʻofá mo e angaʻofá ki he niʻihi kehe ʻoku mau feohí.

ʻI he taimi ne mālōlō ai e husepāniti ʻo Luté, naʻe mei lava pē ke ne nofo ʻi hono fonua tupuʻangá, ka naʻá ne fili ke ʻalu mo ʻene faʻē uitou ʻi he fono ko Naomí, ʻo tokangaʻi ia. Fakakaukau ki he founga ʻe lava ke ueʻi ai e fānau ʻokú ke akoʻí ʻe he sīpinga faka-Kalaisi ʻa Luté, ke nau angaʻofa ki he niʻihi ʻoku nau feohí.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakafofongaʻi ʻa Naomi, Lute mo Poasi, pe niʻihi kehé ʻi hoʻo fakahoko e talanoá mei he tohi ʻo Luté (vakai foki “Lute mo Naomi” ʻi he Ngaahi Talanoa ʻo e Fuakava Motuʻá). Fakaafeʻi e fānaú ke hiki honau nimá ʻi he taimi kotoa pē ʻoku nau fanongo ai ki ha ngāue lelei ʻi he talanoá. ʻOku tau ongoʻi fēfē nai ʻi he taimi ʻoku angaʻofa mai ai e kakaí kiate kitautolú? ʻOku tau ongoʻi fēfē nai ʻi he taimi ʻoku tau angaʻofa ai ki he niʻihi kehé?

• Hivaʻi fakataha ha foʻi hiva fekauʻaki mo e angaʻofá, hangē ko e “ ʻI heʻetau Tokoní” (Tohi Hiva ʻa e Fānaú, 108). Tokoni ki he fānaú ke nau fakakaukau ki ha ngaahi founga ʻe lava ke nau angaʻofa ai ki honau fāmilí mo e ngaahi kaungāmeʻá. Kapau ʻoku nau fie maʻu tokoni, fakaʻaliʻali kiate kinautolu ha ngaahi fakatātā ʻo ha kakai ʻoku nau angaʻofa. Tuku ke tā ʻe he fānaú ha foʻi haati ʻi he palakipoé ʻi he taimi kotoa pē ʻoku lau hake ai ha foʻi fakakaukau.

1 Samuela 1:1–18

ʻOku fanongo mai ʻa e Tamai Hēvaní mo tali ʻeku ngaahi lotú.

ʻI he taimi naʻe loto mamahi ai ʻa ʻAna koeʻuhí koe ʻikai lava ke ne fanaú, naʻá ne tafoki ki he ʻEikí ʻi he tui pea naʻá Ne tali ʻene lotú. Tokoni ki he fānaú ke nau ʻilo te nau lava maʻu pē ʻo lotu ki he Tamai Hēvaní, tautautefito ki he taimi ʻoku nau loto-mamahi aí.

Ngaahi ʻEkitivitī ʻe Ala Fakahokó

• Talaange ki he fānaú ʻa e ʻuhinga naʻe mamahi ai ʻa ʻAná ʻi he ngaahi lea pē ʻaʻau (vakai, 1 Samuela 1:2–8; vakai foki, “Samiuela” ʻi he Ngaahi Talanoa ʻo e Fuakava Motuʻá). Ko e hā te tau lava ʻo fai ʻi he taimi ʻoku tau mamahi aí? Lau ki he fānaú ʻa e 1 Samuela 1:10, pea fakaafeʻi e fānaú ke nau fakafanongo ki he meʻa naʻe fai ʻe ʻAná. ʻEke ki he fānaú e meʻa ʻoku nau ongoʻi ʻi he taimi ʻoku nau lotu aí. Laukonga mei he veesi 18 ke fakamatalaʻi ʻi he hili e lotu ʻa ʻAná, naʻe “ ʻikai kei matapeko ia.”

  ʻAna mo Samuela

  Ne u Lotú Maʻá e Tamasiʻí ni, fai ʻe Elspeth Young

• Fakaʻaongaʻi e peesi ʻekitivitī ʻo e uike ní ke akoʻi ki he fānaú, ʻe lava ke nau lotu ki he Tamai Hēvaní pea te Ne tokoniʻi kinautolu. Lolotonga e valivali ʻa e fānaú, hivaʻi pe tā ha foʻi hiva ʻokú ne akoʻi ʻa e lotú, hangē ko e “Lotu ʻa ha Kiʻi Tamasiʻí” (Tohi Hiva ʻa e Fānaú, 6).

1 Samuela 2:1–10

Kuo fakahoko ʻe he ʻEikí ha ngaahi meʻa fungani maʻaku.

Naʻe fakahaaʻi ʻe ʻAna ʻene loto houngaʻia ki he ʻEikí ʻaki ha foʻi maau fakaʻofoʻofa ʻo e fakafetaʻí. ʻE lava ke tokoni ʻene sīpingá ki he fānaú ke nau fakakaukau ki he ngaahi meʻa lahi ʻe lava ke nau fakamālō ai ki he Tamai Hēvaní.

Ngaahi ʻEkitivitī ʻe Ala Fakahokó

• Lau ki he fānaú ha niʻihi ʻo e meʻa ne lea ʻaki ʻe ʻAna hili hono tāpuekina ʻe he ʻEikí ia ʻaki ha fohá (vakai, 1 Samuela 2:1–2). Vahevahe mo e fānaú ha tāpuaki kuó ke maʻu mei he ʻEikí mo e anga hoʻo ongó. Fakaafeʻi e fānaú ke nau talanoa ki ha ngaahi tāpuaki kuo nau maʻu mei he ʻEikí. Te tau lava fēfē ʻo fakahaaʻi ʻetau loto houngaʻia kiate Iá?

• Hivaʻi fakataha ha foʻi hiva ʻokú ne fakamatalaʻi ha niʻihi ʻo e ngaahi tāpuaki ʻoku foaki mai ʻe he ʻEikí, hangē ko e “ ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16). Fakaafeʻi e fānaú ke tā ha ngaahi fakatātā ʻo e ngaahi tāpuaki kuo nau maʻu mei he ʻEikí.

fakaʻilonga akoʻí

Akoʻi e Tokāteliné: Fānau Lalahi Angé

Lute

Te u lava ʻo tui ki he ʻEikí.

Naʻe fakahoko ʻe Lute ha ngaahi feilaulau ke tauhi faivelenga ki he ʻEikí mo kei mateaki pē kia Naomi. Te ke lava fēfē ʻo tokoni ki he fānaú ke nau ako mei he ngaahi ngāue ʻa Lute ʻi he tuí?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Lute mo Naomi (vakai, lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Hili iá pea hiki ha ngaahi kaveinga ʻe tolu ʻi he palakipoé: Ngaahi ʻAhiʻahí, Ngaahi Ngāué, Ngaahi Tāpuakí. Fakaafeʻi e fānaú ke nau lau ʻa e Lute 1:3–5, 8, 16; 2:1–3, 8–12; 4:13–17, pea hiki ʻi lalo he ngaahi kaveingá ʻa e meʻa ʻoku nau maʻu ʻi he ngaahi veesi ko ʻení. Naʻe fakahaaʻi fēfē ʻe Lute ʻene tui ki he ʻEikí? Vahevahe ha sīpinga ʻo e founga kuo faitāpuekina ai koe koeʻuhí ʻokú ke tui kia Sīsū Kalaisi, pea tuku ke vahevahe ʻe he fānaú ʻenau ngaahi aʻusiá.

• Hivaʻi fakataha ha foʻi hiva fekauʻaki mo e tuí, hangē ko e “Ko e ʻEikí ko ʻEku Maama” (Ngaahi Himí fika 45) pe Ko e Tuí” (Tohi Hiva ʻa e Fānaú, 50). Ko e hā ʻoku akoʻi mai ʻe he foʻi hivá fekauʻaki mo e falala ki he ʻEikí? Te tau lava fēfē ʻo tui kia Sīsū Kalaisi neongo e ngaahi taimi faingataʻá?

1 Samuela 1

ʻOku fanongo mai ʻa e Tamai Hēvaní mo tali ʻeku ngaahi lotú.

ʻI he taimi naʻe “mamahi lahi [ai e] laumālie” ʻo ʻAná, naʻá ne tafoki ki he Tamai Hēvaní ʻi he lotu (1 Samuela 1:10). Te ke lava fēfē ʻo poupouʻi e fānau ʻokú ke akoʻí ke nau fakahoko ʻa e meʻa tatau?

Ngaahi ʻEkitivitī ʻe Ala Fakahokó

• Ke tokoni ki he fānaú ke nau ako fekauʻaki mo ʻAna mei he 1 Samuela 1, ʻoange ki he fānau takitaha ha ngaahi veesi ʻe niʻihi ke nau lau mei he vahé. Hili iá, lī ha foʻi pulu pe ha meʻa siʻisiʻi ki ha tokotaha kehe pea fakaafeʻi ia ke ne talaatu ha konga ʻo e talanoá kimuʻa peá ne paasi e foʻi pulú ki he tokotaha hono hokó ke ne fai ha konga ʻo e foʻi talanoá. ʻI he kakato ʻa e foʻi talanoa ko ʻení, kole ki he fānaú ke nau vahevahe ha meʻa ne nau ako mei he sīpinga ʻa ʻAná.

• Lau fakataha ʻa e 1 Samuela 1:15, pea aleaʻi ʻa e ʻuhinga ʻo e lilingi hotau laumālié ʻi he ʻao ʻo e ʻEikí. Hiki mo e fānaú ha lisi ʻo e ngaahi meʻa te tau lava ʻo talanoa ki ai fekauʻaki mo e ʻOtuá ʻi he taimi ʻoku tau lotu aí. Hivaʻi fakataha ha foʻi hiva fekauʻaki mo e lotú, hangē ko e “Lotu ʻa ha Kiʻi TamasiʻiTohi Hiva ʻa e Fānaú, 6). Fakamoʻoni ki he ʻofa ʻa e ʻOtuá maʻa ʻEne fānaú mo ʻEne finangalo ke fanongo mo tali ʻenau ngaahi lotú.

• Kole ki he fānaú ke lisi (fakafoʻituitui pe fakakulupu) ha ngaahi sīpinga ʻo ha kakai ʻi he folofolá ne nau lotu ki he Tamai Hēvaní. (Kapau ʻoku nau fie maʻu tokoni, te ke lava ʻo fakahinohino kinautolu ki he Luke 22:41–43; ʻĪnosi 1:2–6; Siosefa Sāmita—Hisitōlia 1:14–17.) Kole ange ke nau vahevahe e meʻa ʻoku nau ako mei he ngaahi talanoa ko ʻení.

1 Samuela 3:1–10

Te u lava ʻo fanongo mo talangofua ki he leʻo ʻo e ʻEikí.

ʻI he kei tamasiʻi ʻa Samuelá, naʻá ne fanongo ki he leʻo ʻo e ʻEikí ka naʻe ʻikai ke ne tomuʻa ʻiloʻi ia. Te ke tokoni fēfē nai ki he fānau ʻokú ke akoʻí ke nau fanongo mo ngāueʻi e ngaahi ueʻi fakalaumālie ʻoku nau maʻú?

Ngaahi ʻEkitivitī ʻe Ala Fakahokó

• Fakaafeʻi ha tokotaha ke pehē pē ko Samuela ia pea mo ha tokotaha ʻe taha ke pehē pē ko ʻĪlai ia ʻi hoʻo lau ʻa e 1 Samuela 3:1–10. Ko e hā te tau lava ʻo ako meia Samuela fekauʻaki mo e founga ke fanongo ai ki he leʻo ʻo e ʻEikí? ʻOku tau fakahaaʻi fēfē ʻoku tau loto-fiemālie ke fanongo ʻi he taimi ʻoku folofola mai ai e ʻEikí kiate kitautolú?

• Fakaafeʻi e fānaú ke nau fakakaukau ki he founga te nau fakamatalaʻi ai ki ha tokotaha ʻa e founga ʻoku folofola ange ai e ʻEikí kiate kinautolú. Fakaafeʻi ke nau kumi ha ngaahi tali mei ha taha pe ngaahi veesi folofola ko ʻení: Tokāteline mo e Ngaahi Fuakava 6:22–23; 8:2–3; 9:7–9.

fakaʻilonga akó

Poupouʻi e Ako ʻi ʻApí

Poupouʻi e fānaú ke nau fakakaukau ki ha tokotaha pe ha meʻa te nau lava ʻo lotua ʻi he uiké ni. Tuku ange hanau ngaahi faingamālie ʻi he kahaʻú ke nau vahevahe e founga naʻe tali ai ʻe he Tamai Hēvaní ʻenau ngaahi lotú.

Ko Hono Fakatupulaki ʻEtau Founga Akoʻí

Fānau ʻoku faingataʻaʻia fakaesino. Kātaki ʻo ʻaʻahi ki he disability.ChurchofJesusChrist.org ke ʻiloʻi e founga ʻe lava ke ke feau lelei ange ai e ngaahi fie maʻu ʻa e fānau ʻoku faingataʻaʻia fakaesinó.

peesi ʻekitivitií: ʻOku fanongoa mo tali ʻe he Tamai Hēvaní ʻeku ngaahi lotú