Feituʻu Te ke ʻAlu Ki Aí,tā ʻe Sandy Freckleton Gagon

Sune 6–12

Lute; 1 Samuela 1–3

“ʻOku Fiefia Hoku Lotó ʻi [he ʻEikí]”

ʻI hoʻo ako ki he moʻui ʻa Luté, Nāomi, ʻAná, mo ha niʻihi kehe ʻi he uiké ni, fanongo fakalelei ki he Laumālié pea lekooti ha faʻahinga ongo ʻokú ke maʻu. Ko e hā ʻa e meʻa ʻoku ueʻi fakalaumālie koe ke ke fakahokó?

Lekooti e Ngaahi Ongo ʻOkú ke Maʻú

ʻOku ʻi ai e taimi ʻe niʻihi ʻoku tau fakakakau ʻoku totonu ke muimui ʻetau moʻuí ʻi ha hala pau mei he kamataʻangá ki he ngataʻangá. Hili ko iá, ko e mamaʻo nounou taha ʻi he vahaʻa ʻo ha ongo meʻa ʻe ua ko ha foʻi laine hangatonu. Ka ʻoku mohu pole mo faingataʻa e moʻuí ʻo tau aʻu ai ki ha ngaahi feituʻu ne ʻikai ʻamanekina. Mahalo te tau sio ki he makehe ʻetau moʻuí mei he meʻa ne tau fakakaukau ʻoku totonu ke aʻu ki aí.

Naʻe mahino moʻoni ia kia Lute mo ʻAna. Naʻe ʻikai ko ha fefine ʻIsileli ʻa Lute, ka naʻe mali ki ʻIsileli, pea ʻi he mālōlō hono husepānití, naʻe ʻi ai ha fili ke ne fai. ʻE foki nai ki hono fāmilí mo e moʻui motuʻa ne anga ki aí, pe ko ʻene tali e tui faka-ʻIsilelí mo ha fonua foʻou mo ʻene faʻē he fonó? (vakai, Lute 1:4–18). Ko e palani ʻa ʻAna ki heʻene moʻuí ke maʻu ha fānau, pea koeʻuhi ko e ʻikai ke ne lava ʻo fanaú naʻe “ʻi he mamahi ‘a hono laummālié ”(vakai, 1 Samuela 1:1–10). ʻI hoʻo laukonga fekauʻaki mo Lute mo ʻAná, fakakaukau ki heʻena tui ke falala kakato ki he toʻukupu ʻo e ʻEikí pea fononga ʻi ha hala ne taʻe-ʻamanekina. Mahalo te ke fakakaukau leva ki he anga hoʻo fonongá. Mahalo ʻe kehe ia meia Lute mo ʻAna—mo ha toe taha kehe. Ka ʻi he ngaahi faingataʻa mo e meʻa fakatuʻupakē ʻi heni mo ho ikuʻanga taʻengatá, te ke ako ke lea fakataha mo ʻAna ʻo pehē, “ʻOku fiefia hoku lotó ʻi he ʻEikí” (1 Samuela 2:1).

Ke vakai fakalūkufua ki he tohi ʻa Luté mo e 1 Samuelá, vakai, “Lute” mo e “tohi ʻa Samuelá” ʻi he Fakahinohino ki he Ngaahi Folofolá.

Ngaahi Fakakaukau ki Hono Ako Fakatāutaha ʻo e Folofolá

Lute

‘E lava ke liliu ʻe Kalaisi ʻa e mamahí ko ha fiefia.

ʻI he mālōlō e husepāniti ʻo Luté, ko e nunuʻa ʻo e meʻa fakamamahi ne hoko kiate iá naʻe lahi ange ia ʻi ha meʻa ʻe fehangahangai mo ha uitou he ʻahó ni. Ko e tukufakaholo ʻa ʻIsileli he taimi ko iá, ʻoku ʻikai ha totonu ʻa ha fefine ʻoku ʻikai hano husepāniti pe foha ki ha koloa pe ko ha faʻahinga founga ke maʻu ai ha moʻui. ʻI hoʻo lau e talanoa ʻo Luté, fakatokangaʻi hono hanga ʻe he ʻEikí ʻo liliu e meʻa fakamamahí ki ha ngaahi tāpuaki maʻongoʻonga. Ko e hā ‘okú ke fakatokangaʻi meia Lute naʻe mei lava ke ne tokoniʻi ia? Ko e hā e fatongia ʻo Pōasi ʻi hono huhuʻi ʻa Lute mei hono tūkunga faingataʻaʻiá? (vakai, Lute 4:4–7). Ko e hā ha ngaahi ‘ulungaanga faka-Kalaisi ʻokú ke vakai ʻoku fakatou maʻu ʻe Lute mo Pōasi?

Lute; 1 Samuela 1

ʻOku ou falala ʻe tataki mo tokoniʻi au ʻe he ʻOtuá ʻi ha faʻahinga tūkunga pē te u ʻi ai.

ʻOkú ke lava ʻo sio ʻiate koe ʻi ha meʻa te ke tatau ai mo e talanoa ʻo Lute, Nāomi, mo ʻAná? Mahalo kuó ke foua ha fuʻu mole lahi, ʻo hangē ko Lute mo Nāomí (vakai, Lute 1:1–5). Pe mahalo, te ke hangē ko ʻAná, ʻo fakaʻamua ha ngaah tāpuaki ʻoku teʻeki ai ke ke maʻu (vakai, 1 Samuela 1:1–10). Fakalaulauloto ki ha ngaahi pōpoaki te ke lava ʻo ako mei ai ha ngaahi sīpinga ʻa e houʻeiki fafine faivelenga ko ʻení. Naʻe fakahaaʻi fēfē ʻe Lute mo ʻAna ʻena tui ki he ʻOtuá? Ko e hā e ngaahi tāpuaki ne nau maʻú? Te ke lava fēfē ʻo muimui ki heʻena ngaahi sīpingá? Fakakaukau ki he anga hoʻo “haʻu ke falala” ki he ‘Eikí (Lute 2:12) ʻo aʻu ki he taimi ʻoku faingataʻa ai e moʻuí.

Vakai foki, Reyna I. Aburto, “Lolotonga e Ngaahi Faigataʻá, ʻEiki Ta Feʻao Pē!” Liahona,Nōvema 2019, 57–60.

For This Child I Prayed (ʻOku Ou Lotua e Fānaú ni), tā ʻe Elspeth Young

1 Samuela 2:1–10

ʻOku fiefia hoku lotó ʻi he ʻEikí.

Hili hono ‘ave ʻe ‘Ana ʻa Samuela ki he temipalé, naʻá ne lea ʻaki ha ngaahi lea fakaʻofoʻofa ʻo e fakafetaʻi ki he ʻEikí, ʻa ia ʻoku tohiʻi ʻi he 1 Samuela 2:1–10. ‘Oku ongo ange ʻa e ngaahi lea ia ko ʻení ʻi hoʻo fakakaukau atu ki ha taimi nounou pē kimuʻa, “naʻe mamahi lahi hono laumālié, … pea tangi lahi”(1 Samuela 1:10). ʻI hoʻo ako ʻa e ngaahi veesi ko ʻení, ko e hā ha ngaahi pōpoaki ʻokú ne fakatupulaki hoʻo ongoʻi fakafetaʻi mo e houngaʻia ki he ʻEikí? Mahalo ʻe ueʻi fakalaumālie koe ʻe he hiva ʻa ʻAná ke maʻu ha founga lelei ke fakahaaʻi ai hoʻo houngaʻia ki he ʻEikí—ko ha fo‘i hiva, tā valivali, ko ha ngāue tokoni, pe ko ha faʻahinga meʻa ʻokú ne fakafetuʻutaki hoʻo ngaahi ongo kiate Iá.

Ko hono moʻoní, ʻoku ʻikai ke tali ʻa e lotu fakamātoato kotoa pē ʻi he founga ne tali ai e lotu ʻa ʻAná. Ko e hā ʻokú ke maʻu mei he pōpoaki ʻa Palesiteni Dieter F Uchtdorf “Loto Fakafetaʻi ʻi ha Faʻahinga Tūkunga Pē” e lava ke ne tokoniʻi koe he taimi ʻoku ʻikai ke tali ai hoʻo lotú ʻi he meʻa naʻá ke ʻamanaki ki aí? (Liahona, Mē 2014, 70–77).

1 Samuela 3

ʻOku ou lava ke fanongo mo talangofua ki he leʻo ʻo e ʻEikí.

ʻOku hangē pē ʻa Samuela ko kitautolú, naʻe pau ke ne ako ke fakatokangaʻi e leʻo ʻo e ʻEikí. ʻI hoʻo ako ʻa e 1 Samuela 3, ko e hā ʻokú ke ako mei he kiʻi tamasiʻí ni ʻo kau ki he fanongo mo talangofua ki he leʻo ʻo e ʻEikí? Ko e hā ha ngaahi aʻusia kuó ke maʻu ʻi he fanongo ki Hono leʻó? Ko e hā ha ngaahi faingamālie ‘okú ke maʻu, ʻo hangē ko ʻĪlaí, ʻo tokoniʻi ha niʻihi kehe ke nau fakatokangaʻi e taimi ʻoku folofola mai ai ʻa e ʻEikí kiate kinautolú? (vakai, 1 Samuela 3:7).

Vakai foki, Sione 14:14–21; David P. Homer, “Fanongo ki Hono Leʻó,” Liahona, Mē 2019, 41–43.

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Lute 1:16–18; 2:5–8, 11–12.ʻE lava ke kumi ho fāmilí ha ngaahi sīpinga ʻo e angaʻofá mo e mateakí ʻi he ngaahi veesi ko ʻení. ʻOku tau fakahaaʻi fēfē ʻa e angaʻofá mo e moʻui mateaki kia Sīsū Kalaisí ki hotau fāmilí mo e niʻihi kehé? ʻE lava ke tokoni ki ho fāmilí ʻa e vahe ko e “Lute mo Nāomi” (‘i he Ngaahi Talanoa ʻo e Fuakava Motu‘á) ke nau ako mei he sīpinga ʻa Luté.

1 Samuela 1:15Mahalo te ke huaʻi ha meʻa mei ha ʻaiʻanga vai ke tokoni ke fakakaukauloto e fāmilí ki he meʻa ne ʻuhinga ki ai ʻa ʻAna ʻi heʻene pehē, “naʻá ku … lilingi hifo ‘a hoku laumālié ʻi he ‘ao ʻo e ‘Eikí.” Ko e hā ʻoku hoko ai ʻeni ko ha founga lelei ke ne fakamatalaʻi e founga ʻoku totonu ke fakahoko ʻaki ʻetau lotú? Te tau fakatupulaki fēfē ʻetau ngaahi lotu fakatāutahá mo fakafāmilí?

1 Samuela 2:1–10.ʻE lava ke tataki koe ʻe he foʻi maau ʻo e fakafetaʻi ʻa ʻAná ki he ʻEikí ke ke fakakaukau ki he ngaahi hiva te ke ngāueʻaki ke fakavikivikiʻi ai e ʻEikí. Te mou lava ʻo hivaʻi fakataha ha niʻihi ʻo kinautolu. Mahalo ʻe fakakaukauʻi ʻe he kau mēmipa ho fāmilí ha ngaahi founga kehe ke fakahaaʻi ai ʻenau ongo kia Sīsū Kalaisí. Hangē ko ʻení, te nau lava ʻo tā ha fakatātā ke fakahaaʻi e ʻuhinga ʻoku nau ʻofa ai he Fakamoʻuí.

1 Samuel 3:1–11.ʻE fakafiefia ke fakafaivaʻi ha talanoa ki hono ui ʻe he ʻEikí ʻa Samuelá, pe ko e mamataʻi ʻe hoʻo fāmilí e foʻi vitiō “Samuela mo ʻĪlai” (ChurchofJesusChrist.org). ʻE lava ke talanoa e kau mēmipa ʻo e fāmilí ki he ngaahi taimi naʻa nau ongoʻi ai e folofola ange ʻa e ʻEikí kiate kinautolu mo e anga ʻenau fakafeangai ki Heʻene ngaahi folofolá.

Ki ha ngaahi fakakaukau lahi ange ki hono akoʻi ‘o e fānaú, vakai ki he lēsoni ʻo e uike ko ‘eni ʻi he Haʻu, ‘o Muimui ʻIate Au—Maʻá e Palaimeli.

Hiva ʻoku fokotuʻu atú: “Lolotonga ʻEku Nofó,” Ngaahi Himi, fika 133.

Fakatupulaki e Ako Fakatāutahá

Tuku ke tataki ʻe he Laumālié hoʻo akó. Lotua ke tataki koe ʻe he Laumālie Māʻoniʻoní ki he ngaahi meʻa ʻoku fie maʻu ke ke akó. Tokanga ʻaupito ki Heʻene fanafaná, neongo kapau ʻe tataki ai koe ke ke lau ha kaveinga naʻe ʻikai te ke ʻamanaki ki ai pe ako ʻi ha founga kehe.

Fakatātā ʻo e fanongo ʻa Samuela ki he ʻEikí, tā ʻe Sam Lawlor