Tēvita mo Kolaiate, tā ʻe Steve Nethercott

13–19 Sune

1 Samuela 8–10; 13; 15–18

“He ʻOku [ʻa e ʻEikí] ʻa e Taú”

Neongo ʻoku fokotuʻutuʻu e ngaahi ʻekitivitī ʻi laló ki he fānau iiki angé pe lalahi angé, ka te ke lava ʻo liliu hanau niʻihi ke feau e ngaahi fie maʻu ʻa kinautolu ʻokú ke akoʻí.

Lekooti Hoʻo Ngaahi Ongó

Fakaafeʻi e Feʻinasiʻakí

Fakaʻaliʻali e fakatātā ʻo Tēvita mo Kolaiate mei he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakaafeʻi e fānaú ke nau vahevahe ʻa e meʻa ʻoku nau ʻilo fekauʻaki mo e talanoá, pea fai ha ngaahi fehuʻi ke tokoni kiate kinautolu ke nau manatuʻi e ngaahi konga ʻo e talanoá ne ʻikai ke nau lave ki aí.

Akoʻi e Tokāteliné: Fānau Iiki Angé

1 Samuela 16:1–13

ʻOku ʻafioʻi ʻe he ʻEikí ʻa e meʻa ʻi hoku lotó.

ʻI hono vahevahe e talanoa ʻo e founga ne folofola ai e ʻEikí kia Samuela ke fili ʻa Tēvita ko e tuʻí, ʻe lava ke tokoni ia ki he fānaú ke nau ʻiloʻi ʻoku ʻafioʻi fakafoʻituitui kitautolu ʻe he ʻEikí.

Ngaahi ʻEkitivitī ʻe Ala Fakahokó

• Vahevahe e founga naʻe fakahā ai ʻe he ʻEikí kia Samuela ʻe hoko ʻa Tēvita ko e tuʻi ʻo ʻIsilelí (vakai, 1 Samuela 16:1–13). Lolotonga hoʻo fai e talanoá, ʻe lava ke ke ʻai ha tokotaha ke ne fakafofongaʻi ʻa Samuela. Te ne lava ʻo foaki ha kalauni pepa ki ha kiʻi tamasiʻi ʻe taha, ʻokú ne fakafofongaʻi ʻa Tēvita. Vahevahe hoʻo fakamoʻoni, naʻe ʻafioʻi ʻe he ʻEikí ʻa e loto ʻo Tēvitá pea ʻokú Ne ʻafioʻi kitautolu takitaha.

• Vahevahe ha aʻusia naʻá ke ongoʻi ai naʻe ʻafioʻi koe ʻe he ʻEikí. Hivaʻi ha foʻi hiva ʻokú ne akoʻi ʻoku ʻafioʻi mo ʻofaʻi kitautolu ʻe he Fakamoʻuí, hangē ko e “Sīsū Hotau Kaumeʻa ʻOfá” (Tohi Hiva ʻa e Fānaú, 37).

1 Samuela 17:10–54

ʻE lava ke tokoniʻi au ʻe he tui kia Sīsū Kalaisí ke u loto-toʻa.

ʻOku faingofua ki he fānaú ʻenau fekauʻaki mo Tēvitá koeʻuhí neongo naʻá ne siʻisiʻi, ka naʻá ne ikunaʻi ha faingataʻa lahi. Tokoni ke nau ʻilo ko e tupuʻanga ʻo ʻene loto-toʻá mo e mālohí, ko ʻene tui kia Sīsū Kalaisí.

Ngaahi ʻEkitivitī ʻe Ala Fakahokó

• Toe vakaiʻi mo e fānaú ʻa e talanoa ʻo Tēvita mo Kolaiaté (vakai, “Tēvita pea mo Kolaiate” ʻi he Ngaahi Talanoa ʻo e Fuakava Motuʻá), pea tuku ke nau taufetongi hono fakatātaaʻi e talanoá. ʻAi e tokotaha ʻoku pehē ko Kolaiate iá ke ne lea, “Tuku mai ha tangata ke [tau] mo au” (1 Samuela 17:10). ʻAi e tokotaha ʻoku pehē ko Tēvitá ke ne lea, “ ʻOku ou ʻalu atu kiate koe ʻi he huafa ʻo [e ʻEikí]” (1 Samuela 17:45). Fakamoʻoni ʻi he taimi ʻoku tau tui ai ki he ʻEikí, te Ne tokoniʻi kitautolu ke tau loto-toʻa ʻo hangē ko Tēvitá.

• Fakaʻaongaʻi e peesi ʻekitivitī ʻo e uike ní ke fakaʻaliʻali e māʻolunga ne ʻi ai ʻa Kolaiaté ʻi hono fakafehoanaki ki ha kiʻi tamasiʻi siʻisiʻi hangē ko Tēvitá. Fakamatalaʻi ange naʻe manavahē e kau tau ʻa ʻIsilelí ʻia Kolaiate. Kole ange ki he fānaú ke pehē pē ʻoku nau ilifia. Fakaʻaliʻali ange leva ha fakatātā ʻo Sīsū Kalaisi, pea talaange ki he fānaú koeʻuhi ne tui ʻa Tēvita ki he ʻEikí, naʻá ne lava ʻo maʻu ʻa e loto-toʻá. Kole ange ke nau tuʻu hangatonu hake, ʻo hangē ʻoku nau loto-toʻá.

• Fakaafeʻi e fānaú ke nau laka hangē ko Tēvitá ke tau mo Kolaiate lolotonga hono hivaʻi ha foʻi hiva fekauʻaki mo e loto-toʻá, hangē ko e “Te u Loto-toʻa” (Tohi Hiva ʻa e Fānaú, 85).

1 Samuela 18:1–4

ʻE lava ke hoko e ngaahi kaungāmeʻa leleí ko ha tāpuaki kiate au.

Ko e vā fakakaungāmeʻa ʻa Sonatane mo Tēvitá ko ha sīpinga lelei ia ʻo e ngaahi tāpuaki ʻe lava ke maʻu mei he ngaahi kaungāmeʻa leleí.

Ngaahi ʻEkitivitī ʻe Ala Fakahokó

• Tā ha ongo tangata ʻi he palakipoé, taha ke ne fakafofongaʻi ʻa Tēvita mo ha taha ke fakafofongaʻi ʻa Sonatane. Lau ki he fānaú ha ngaahi kupuʻi lea ʻe niʻihi mei he 1 Samuela 18:1–4 ʻokú ne fakafofongaʻi e ʻofa naʻe ongoʻi ʻe he ongo kaungāmeʻá ni ʻiate kinauá. ʻOange ki he tokotaha takitaha ha foʻi haati laʻipepa, pea ʻeke ange e founga te nau lava ai ʻo fakahaaʻi ʻa e ʻofá ki hanau kaungāmeʻa. Hili hono vahevahe ʻe he tokotaha takitaha ha fakakaukaú, fakaafeʻi ha tokotaha ke fakapipiki e haati laʻipepá ki he palakipoé.

• Talanoa ki he fānaú fekauʻaki mo hao kaungāmeʻa lelei naʻe tokoni atu ke ke moʻui ʻaki e ongoongoleleí pe fakatupulaki hoʻo tui kia Sīsū Kalaisí, pea fakaafeʻi e fānaú ke nau vahevahe pe ko hai ʻokú ne tokoniʻi kinautolú. Fakaafeʻi e fānaú ke nau fakatātaaʻi hono fakahoko ha ngāue lelei ki ha kaungāmeʻa.

Akoʻi e Tokāteliné: Fānau Lalahi Angé

1 Samuela 8:6; 9:15–17; 10:1–24; 16:1–13

Naʻe uiuiʻi ʻe he ʻOtuá ʻa kinautolu ʻoku ngāue ʻi he Siasí.

ʻE lava ke tokoni e talanoa ʻo hono fili ʻe he ʻOtuá ʻa Saula mo Tēvita ke hoko ko ha ongo tuʻí, ke mahino ki hoʻo kalasí ʻa e founga ʻoku uiuiʻi ai e kakaí ke ngāue ʻi he Siasí ʻi he ʻaho ní. ʻE lava ke fakatupulaki ʻe he ngaahi talanoá ni ha tui ko e ngaahi uiuiʻí ʻoku haʻu mei he ʻOtuá ʻo fakafou mai ʻi Heʻene kau tamaioʻeiki kuo fakamafaiʻí.

Fakatātā hono fakanofo ʻe Samuela ʻa Saulá, © Lifeway Collection/licensed mei he goodsalt.com

Ngaahi ʻEkitivitī ʻe Ala Fakahokó

• Hiki ʻi ha laʻipepa kehe e ngaahi fakamatala mo e veesi folofola ko ʻení: naʻe fie maʻu ʻe he kakaí ha tuʻi (1 Samuela 8:6); naʻe folofola e ʻEikí kia Samuela ʻe hoko ʻa Saula ko e tuʻi (1 Samuela 9:15–17); naʻe fakanofo ʻe Samuela ʻa Saula (1 Samuela 10:1); naʻe ʻoatu ʻe Samuela ʻa Saula ke vakai ki ai e kakaí (1 Samuela 10:24). Kole ki he fānaú ke nau lau e ngaahi potufolofolá pea fakahokohoko kinautolu ki heʻene tonú.

• Ako fakataha e tefito ʻo e tui hono nimá. Fakamatalaʻi nounou ki he fānaú ʻa e founga naʻá ke maʻu ai ho uiuiʻi ke faiako ʻi he Palaimelí. ʻOkú ke ʻilo fēfē naʻe uiuiʻi koe ʻe he ʻOtuá? Fakamoʻoni ʻoku ueʻi fakalaumālie ʻe he ʻOtuá e kau takí ke uiuiʻi e kakaí ke ngāue.

1 Samuela 16:1–13

“ ʻOku ʻafioʻi ʻe (he ʻEikí) ʻa e lotó.”

ʻOku fakanatula ke fakamaauʻi e niʻihi kehé ʻi he meʻa ʻoku tau lava ʻo sio ki aí, ka ko e hoko lahi ange ʻo hangē ko Sīsū Kalaisí ʻa hono ako e founga ke vakai ai ki he niʻihi kehé ʻo hangē ko Iá—ʻaki ʻetau sio ki he “lotó” (1 Samuela 16:7).

Ngaahi ʻEkitivitī ʻe Ala Fakahokó

• Fakaafeʻi e fānaú ke nau fakakaukauloto naʻe kole ange ke nau fili ha taha ke hoko ko ha tuʻi. Ko e hā ha ngaahi ʻulungaanga te nau fekumi ki ai? Lau fakataha ʻa e 1 Samuela 16:6–7 ke ʻiloʻi e meʻa naʻe folofola ʻaki ʻe he ʻEikí kia Samuela ʻi heʻene fekumi ki ha tuʻi foʻou maʻa ʻIsilelí? Ko e hā ʻoku tau ako mei he ngaahi fakahinohino ʻa e ʻEikí?

• Fakahoko ha lēsoni fakataumuʻa ke fakatātaaʻi ki he fānaú ʻoku ʻikai ke faʻa tonu ʻa e ngaahi fakamaau ʻoku tau fakahoko ʻo makatuʻunga ʻi he “anga ʻoku hā ʻi tuʻá” (veesi 7). Hangē ko ʻení, ʻe lava ke ke fakaʻaliʻali ange kiate kinautolu ha meʻakai pe ha tohi pe meʻa kofukofu pe takafi ʻo ha meʻa ʻoku ʻikai fenāpasi mo e meʻa ʻi lotó. Ko e hā ʻoku fokotuʻu mai ʻe he 1 Samuela 16:7 mo e lēsoni fakataumuʻa ko ʻení fekauʻaki mo e founga ʻoku totonu ke tau vakai ai kiate kitautolu mo e kakai kehé?

• Vahevahe ha aʻusia naʻá ke ako ai e ʻuhinga ʻoku totonu ke ke “[mamata ki he] lotó,” kae ʻikai ko e “anga ʻoku hā ʻi tuá” (veesi 7). Tuku ke vahevahe ʻe he fānaú ha ngaahi aʻusia faitatau kuo nau maʻu. Hivaʻi ha foʻi hiva ʻokú ne fakamamafaʻi e tefitoʻi moʻoni ko ʻení, hangē ko e “Te u ʻAʻeva Pea mo Koe” (Tohi Hiva ʻa e Fānaú, 78).

1 Samuela 17:20–54

ʻE lava ke tokoniʻi au ʻe Sīsū Kalaisi ke ikunaʻi ha faʻahinga faingataʻa pē.

ʻE lava ke fehangahangai ʻa e fānaú mo ha ngaahi faingataʻa ʻoku hangē ko hano ikunaʻi ha saieniti hangē ko Kolaiaté. ʻE lava ke ʻoange ʻe he sīpinga ʻa Tēvitá ha ʻamanaki lelei ʻe tokoniʻi kinautolu ʻe he ʻEikí ke ikunaʻi ʻenau ngaahi taú.

Ngaahi ʻEkitivitī ʻe Ala Fakahokó

• Vahe ki he fānaú ke nau tā ha ngaahi fakatātā ki he ngaahi konga kehekehe ʻo e talanoa ʻi he 1 Samuela 17:20–54. Fakaʻaliʻali e ngaahi fakatātaá ʻi hono hokohoko totonú ʻi he palakipoé, pea fakaafeʻi e fānaú ke nau vahevahe e talanoá ʻaki ʻenau talanoa fekauʻaki mo e fakatātā takitaha ne nau taá. Ko e hā ʻoku finangalo e ʻEikí ke tau ako mei he talanoa ko ʻení?

• Tokoni ki he fānaú ke nau hiki ʻi he palakipoé ha lisi ʻo e niʻihi e ngaahi faingataʻa ʻe ala fehangahangai mo ha taha. Fakaafeʻi kinautolu ke kumi e ngaahi meʻa naʻe lea ʻaki ʻe Tēvita te ne lava ʻo poupouʻi ha taha ʻoku fehangahangai mo ha ngaahi faingataʻa hangē ko ʻení (vakai, 1 Samuela 17:26, 32, 34–37, 45–47). Fakahā ki he fānaú e anga hono tokoniʻi koe ʻe Sīsū Kalaisi lolotonga e ngaahi faingataʻá.

Poupouʻi e Ako ʻi ʻApí

ʻEke ki he fānaú ha fehuʻi ki ha meʻa ne nau ako he ʻaho ní. Hiki ʻa e fehuʻí, pea ʻoange ha tatau ki he fānaú takitaha ke foki mo ia ki ʻapi ʻo aleaʻi ai mo hono fāmilí.

Ko Hono Fakatupulaki ʻEtau Founga Akoʻí

Tokoni ki he fānaú ke nau fakakaukauloto ki he folofolá. ʻOku faʻa tokanga ange e fānaú ki ha lēsoni ʻi he taimi ʻoku nau lava ai ʻo sio ki ha ngaahi fakatātā ʻoku felāveʻi mo e ngaahi talanoa pe akonaki ʻo e folofolá. Fakakaukau ke fakaʻaongaʻi e ngaahi fakatātā ʻi he Tohi Fakatātā ʻo e Ongoongoleleí pe ʻi he ChurchofJesusChrist.org.