“Turai 4–10. 2 Uea 2–7: ‘Bon iai te Burabeti ibuakoia Iteraera,’” Nakomai, Iriirai—Ibukin te Moanrinan: Te O Tetemanti 2022 (2021)
“Turai 4–10. 2 Uea 2–7,” Nakomai, Iriirai—Ibukin te Moanrinan: 2022
Kamataata n te korotamnei iaon Eritai ngke e kaota te kaa te ai nakon ana toro, © Review & Herald Publishing/licensed from goodsalt.com
Turai 4–10
2 Uea 2–7
“Bon Iai te Burabeti ibuakoia Iteraera”
Te waaki ni kakukurei inanon te kabwarabwara aei e bon nanonaki ni karika am iango bwa e na kakamwakuri. Rinanon te tataromwaaka ni kamatebwai, ko kona ni karekea te kairaki mai ieta n tobwa kainanoia ataei ake ko reireiniia.
Korei Am Namakin
Kaunga te Tibwatibwa
Kaungaiia ataei n tibwaua bwa tera ae ataia n taekan te burabeti Eritai, ngkanne kaoiia ni korea tamnein te bwai teuana are e karaoia.
Reirei te Reirei: Ataei aika a Uarereke
Te Atua e konaa ni mwakurii kakai inanon maiu.
Rinanon te Burabeti Eritai, te Uea e kakabwaiaiia aomata aika mwaiti ni kawai aika kamimi. Buokiia ataei ni kinaa ana kakai te Uea inanon maiuiia.
Waaki ni Kakukurei aika a Kona ni Karaoaki
-
Tibwaua teuana ke raka riki man te kakai ae koreaki inanon 2 Uea 4–5 (taraa “Eritai te Burabeti“ ao “Eritai e Kamarurunga Naaman” inanon Karaki man Te O Tetemanti). Kaoiia ataei bwa a na tibwauai baike a tangirii man taekan te karaki aikai. Kaoiia ataei bwa a na manga karakina te karaki nakoia n tatabeman.
-
Kakoaua bwa te Uea e konaa ni kabongana Mwaakana ni karaoi bwaai ni buokiira. Ti atong bwaai aikai bwa kakai. Tibwaia bwa e kanga te Uea n tia ni kaota Ana tangira ibukim ni kawai aika bubura ke a uarereke. Anenea te anene n ikotaki n taekan ana tangia te Atua, n aron “My Heavenly Father Loves Me” (Aia Boki n Anene ataei, 228–29). Tuangiia ataei n tibwaua bwa a kanga n ataia are Tamaia are i Karawa e tangiriia.
I kona n rineia ni karaoa te bwai are e tua te Atua rinanon Ana burabeti.
Naaman e reke bwa ana kangaanga n ongotaeka ngke te burabeti Eritai e tuangnga bwa e kanga katokan reberana. Iangoia raoi bwa ko na kanga ni buokiia ataei n atai kakabwaia ake a roko man te ongotaeka.
Waaki ni Kakukurei aika a Kona ni Karaoaki
-
Karakina karakin Naaman (taraa 2 Uea 5:9–14; “Eritai E Katoka Aorakin Naaman” inanon Karaki man te O Tetemanti; taraa naba tamnein Naaman inanon kabwarabwara inanon te wiiki aei n Nakomai, Iriirai—Ibukiia Aomata n Tatabemaniia ao Utu). Katuruturua bwa n te moan tai Naaman e rawa n tebokia inanon Karaangan Ioretan, e ngae ngke Eritai e tuangnga bwa aio e na bon kamarurunga aorakina. Tuangiia te tai are ko aki koaua raoi ni kan karaoa te bwai ae eeti, ao buokiia ataei n iangoa oin aia katooto. Ngkanne tibwaia bwa e kanga Naaman ni kakabwaiaki ngke e karaoa te rinerine ae eeti.
-
Wareka 2 Uea 5:13 nakoia ataei, ao kabwarabwara bwa ana toro Naaman e buokia n iangoia n ongotaeka nakon te burabeti Eritai. Buokiia ataei n iangoi kawai ake a kona ni buokiia raoraoia ke kaain aia utu n ongo nakon ao ongotaeka nakon te burabeti.
Te Uea e bon tarataraai.
Ngke ana toro Eritai e noriia ana taanga ni buaka I-Turia n otabwaniniaki irouia, e bon rang ni maaku. E ngae n anne, Eritai e tuangnga n “aki maaku” ibukina te Atua e mena irarikiia (2 Uea 6:16).
Waaki ni Kakukurei aika a Kona ni Karaoaki
-
Wareka 2 Uea 6:15 nakoia ataei, ke kabwaranakoa n te aro are a na konaa n oot iai. Kaoiia ataei n iangoia bwa aongkoa a otabwaniniaki irouia taanga ni buaka ae bubura ma taian aoti ao kaa ni buaka, n aron are e nooria ana toro Eritai. Tera aron aia namakin? Tera ae a na karaoia? Tuangiia bwa a na kamatuui mataia ngkai ko wareka 2 Uea 6:16–17 nakoia. Ngkana ko roko n te taeka “kaure mataia,” tuangiia ataei bwa a na kaurei mataia. Kabwarabwara nakoia bwa tera ae e nooria te toro bon kamanoana ma Eritai. Tibwaia bwa ko kanga n ataia ae te Uea e bon tarataraiira.
-
Anene n ikotaki n anenea taekan tabeakinara iroun te Atua, n aron moan kibun “Dearest Children, God Is Near You” (Anene n Taromauri, nambwa. 96). Onei mwiin taian taeka n te anene ma araia ataei ni katuruturua bwa te Atua e bon tarataraiia.
Reirei te Reirei: Ataei aika a Ikawai Riki
Te Atua e konaa ni mwakurii kakai inanon maiu.
Inanon ana tai ni mwakuri, Eritai e kamarurungiia ao e kakabwaiaiia aomata aika a mwaiti. E kanga taian kakai inanon 2 Uea 4–5 ni buokii ataei ni kinaa bain Tamaia are i Karawa inanon maiuia?
Waaki ni Kakukurei aika a Kona ni Karaoaki
-
Kaoiia ataei bwa a na korei iaon te burakiboti taian kakai n aron ae a konaa ni uringa man koroboki aika tabu. Ngkanne anganiia aia tai ni manga rinanoi 2 Uea 4–5 ao ikoti nakon are a karinani (taraa 2 Uea 4:1–7, 14–17, 32–35, 38–41, 42–44; 5:10–14). Tera ae a reireia kakai aikai n taekana bwa e kanga ana namakin Tamara are i Karawa ibukira?
-
Tuangiia ataei n taetae iaona bwa tera te kakai. Ngkana a tangira buokaia, a na konaa ni manga rinanoi “Kakai” inanon Bwai ni Kairi nakon Koroboki aika Tabu (scriptures.ChurchofJesusChrist.org). Tuangiia bwa a na tibwauai tabeua kakai are e karaoi Iesu. Taetae iaona bwa ko kanga n tia noora mwaakan te Atua inanon maium. Ko kona n reitii kakai ni katoa bong n aron namakinan te rau, te bwaintangira ni maiu ni katoabong, ke ibobuoki iaon mwakuri ni katoabong. Kaoiia ataei ni taetae n taekan kakai inanon maiuiia, iaon aika bubura ao aika a uarereke.
I kona n rineia ni kakaonimaki, nanorinano, ao n ongotaeka,.
Naaman e tangiria ni kamarurungaki man te rebera, ma e aki kantaninga te kaetieti ae bebete are e anga Eritai nakoina: “Naako ao kaitiua tebotebom i Ioretan” (2 Uea 5:10). Iangoia bwa ko na kanga ni kabongana te karaki aei nakoia ataei n taekan te onimaki iroun Iesu Kristo, nanorinano, ao te ongotaeka.
Waaki ni Kakukurei aika a Kona ni Karaoaki
-
Korea onimaki, nanorinano, ao ongotaeka iaon te burakiboti, ao tuangiia ataei bwa tera nanon taeka aikai (taraa True to the Faith, 54–56, 86–87, 108–9). Kaoiia ataei bwa a na wareka 2 Uea 5:9–14. Ko kona naba ni kaota mwakoron te witeo “Naaman and Elisha” (ChurchofJesusChrist.org). E kanga Naaman ni kaota te onimaki iroun te Uea, nanorinano, ao te ongotaeka? Bukin tera e bon kakawaki ibukira bwa ti na karekei tamaroa aikai?
-
Tuangiia ataei n taetae iaon te tai ngke raoraoia a buokiia n rinea ae eeti. Ngkoe naba tibwaua am taneiai. Warekia n ikotaki 2 Uea 5:10–13 n reiakinna bwa e kanga ana toro Naaman ni buokiia n rinea te ongotaeka nakon te burabeti. Tera ae ti na kona ni karaoia ni buokiira n tatabeman n irira ara burabeti ae ngkai?
-
Kaoiia ataei ni katabwanina te iteraniba ibukin waaki ni kakukurei ao n tibwaia ma kaain te utu ke raoraoia te bwai teuana are a reiakinna man karakinan Naaman inanon 2 Uea 5:1–15.
I aki tiku n tii ngai.
Ataei ake ko reireiniia n tabetai a na kona n namakina kanga ana toro Eritai—n aki koaua ni kaaitara ma kangaanga aika imwaia. Ko kona ni kabonganai taeka inanon 2 Uea 6:8–17 n reireiniia bwa a na “aki maaku” ibkina te Uea e aki katikuiia n tii ngaiia.
Waaki ni Kakukurei aika a Kona ni Karaoaki
-
Warekia n ikotaki 2 Uea 6:15–17. Kaoa temanna te ataei n riki bwa aongkoa ana toro Eritai ngke temanna te ataei e titiraki n taekan ana taneiai, n aron ae e kangaa ana namakin ngke ana taanga ni buaka I-Turia a katobibia te kaawa ke tera aekakin tarakiia ana taanga ni buaka te Atua. Taetae ma ataei n taekan taai ngkana a namakina te tiku n tii ngaiia ni kataia ni maiuakina te euangkerio. E kanga ni buokiira te Uea n ataia are ti aki tiku n tii ngaira?
-
Anenea te anene n taekan te onimaki iroun te Uea, n aron “When Faith Endures” (Anene n Taromauri, nambwa. 128). Tera ae e reireiniira te anene aei ibukin onimakinan te Uea?
Kaungaa te Kamatebwai n te Mweenga
Kaoiia ataei bwa a na tibwaua aia taneiai ma aia utu ngkana a kinaa bain te Atua inanon maiuia. Kaungaiia bwa a na tuangiia kaain aia utu bwa a na tibwaua ae aekakin naba anne.
Kanakoraoan Ara Anga reirei
A reiakinii bwaai ataei n aanga aika a mwaiti. “Am mwakuri n reireiniia ataei a na rangi n nakoraoi ngkana ko kabonganai katei n anga reirei aika kaokoro,”n raonaki n taian karaki, bwaai n ibuobuoki aika a nooraki, ao te katangitang (Reirei n Ana Kawai te Uea, 25).