Etita, iroun James Johnson

Turai 25–31

Etita

“Koa Roko … ibukin te Tai ae ai Aron Aei”

Ni kabane koroboki aika tabu a kakoaua Iesu Kristo. Iangoia bwa ko na kanga ni buokia ataei n nora korakoran te Tia Kamaiu ni karakinan Etita.

Korei Am Namakin

Kaunga te Tibwatibwa

Kabuta tamnein Etita (tara te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu). Ngke a taua te tamnei ataei, kaoiia bwa a na tibwa te bwai teuana ae a ataia ni karakinan Etita.

Reirei te Reirei: Ataei aika a Uarereke

Etita 2:5–7

I kona ni beku ibukin au utu.

Ngke a mate ana karo Etita, ai mwanena ae Moretekai e tabeakinna. Ko kona ni kabongana te tai aei n marooroakina te beku ibukiia kaain ara utu.

Waaki ni Kakukurei aika a Kona ni Karaoaki

• Iaon te burakibooti, korei tamnei are e tei ibukin Etita, ana karo, ao ai mwanena ae Moretekai. Kabwarabwara bwa a mate ana karo Etita, ao Etita e kainnanoa temanna ae e na tabeakinna. Wareka Etita 2:7 nakoia ataei, ao tuangiia ataei bwa a na ongora nakon te bwai ae karaoia Moretekai. Buokia ataei n iangoi kainnanoia kaain aia utu are a kona ni ibuobuoki iai ataei.

• Kaoia tabeman ataei bwa a na karaoa te mwakuri n akoi ni beku ibukin temanna n aia utu, ao tuangiia ataei ake tabeman bwa a na ketina bwa tera ae a karaoia. Kaoia bwa a na maroroakini bwaai ake a karaoia ni kakabwaiai aia utu, ao tuangiia tabeua bwaai ake ko karaoi.

• Anenea te kuna ae kaota buokakiia ara utu, a aron “When We’re Helping” (Aia Boki n Anana Ataei, 198). Kaota am koaua bwa buokakiia ara utu e kakukureira.

Etita 4:15–16

I kona n ninikoria.

Ataei ake ko reireiniia a na kaitara ma taai ake e na kainnanoia iai te Uea bwa a na ninikoria. Ko na kanga ni buokiia n reirei man ana katooto Etita n ninikoria?

Waaki ni Kakukurei aika a Kona ni Karaoaki

• A ataa nanon te ninikoria ataei ake ko reireiniia? Kaota nanona ae bebete, n aron “Te ninikoria nanona karaon ae eti e ngae ngke ko maaku.” Tibwa karakinan Etita (tara “Te Ueannaine ae Etita” i nanon Karakin te O Tetemanti), ao buokiia ataei n noria bwa e kanga n ninikoria Etita. Anga te tai nakoia ataei bwa ana kabonganai tamnei n te iteraniba ibukin te mwakuri ni kauring ni manga karakina te karaki.

• Kaota tamnein Etita (taraa te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu). Anene ma ataei n te kuna ae taekina te ninikoria, n aron “I Will Be Valiant” (Aia Boki n Anene Ataei, 162). Katebenakoi taeka ao kibuntakea n te kuna are e kabwarabwara Etita, ao kaota am koaua bwa e kona te Tia Kamaiu ni buokia ataei n ninikoria.

• Kaotia nakoia ataei taai ake e ninikoria iai Iesu Kristo: n aron te katooto, ngke E maraki ibukin ara bure, i Ketetemwane ao i aon te kaibangaki (tara Mataio 26:36–39; 27:33–35). Tuangiia ataei bwa a na karakina te tai are a ninikoria iai (iangoa reitakim ma aia utu imwain te tai n tuangiia bwa tera ae a tia ni karaoia). Tera ae e buokiia n ninikoria? Tuangiia ataei aron te Uea ni buokiko n ninikoria ngke ko maaku.

  

  Etita i matan te Ue, iroun Minerva K. Teichert

Reirei te Reirei: Ataei aika a Ikawai Riki

Etita 4:14

I kona n riki bwa te bwai ni mwakuri ni bain te Atua.

Ngke e maaku Etita, E kaungaaki iroun Moretekai man reiakinana bwa tao e a tia ni karikia te Uea bwa te Ueanaine “ibukin te tai aio” (Etita 4:14). Iangoa aron te Uea ni katauraoia ataei ake ko reireiniia nakon taai ni kakabwaia tabeman.

Waaki ni Kakukurei aika a Kona ni Karaoaki

• Kaoa temanna bwa e na katanga te kuna ibukiia ataei n te bwai ni katangitang, ke kaota tamnein temanna ae katanga te bwai ni katangitang. Maroroakinna bwa tera nanon te riki bwa te bwai ni mwakuri ni bain te Atua. Manga taraa karakinan Etita ma ataei (tara “Te Ueanaine ae Etita” i nanon Karakin te O Tetemanti), ao kaoia bwa ana marooroakinna bwa e kanga n riki Etita bwa te bwai ni mwakuri ibukin te Uea bwa e na kakoroi Ana kantaninga. Ti na kanga n riki bwa ana bwai ni mwakuri te Uea?

• Imwin manga warekan karakinan Etita, kanimwa te beba are mwakoro iai aran temanna kaain te karaki i akuuia ataei n tatabeman. Kaoia ataei bwa ana kataia ni kakaea te ara are i akuuia man tabekan titiraki n aron “E raoiroi te aomata aei?” ke “Te aine te aomata aei?” Ngkanne maroroakina bwa a kanga Moretekai ao Etita n riki bwa te bwai ni mwakuri ibukin te Uea bwa e na kamaiuia Iutaia.

Etita 3:1–11; 4:10–17

Tamara are i Karawa e kona ni buokai ni karekea te ninikoria ngkana I maaku.

Ningai ae ko a tia n noria iai ataei n ninikoria? Tera bwaai ae ko kona n tibwai ngke ko kainnanoa ana ibuobuoki te Uea bwa ko na ninikoria?

Waaki ni Kakukurei aika a Kona ni Karaoaki

• Korea i aon te burakibooti Moretekai e kaota te ninikoria man … ao Etita e kaota te ninikoria man … Kaoia tabeman ataei bwa a na wareka Etita 3:1–11 ao tabeman bwa a na wareka Etita 4:10–17. Tuangiia bwa a na kabonganai bwai ake a wareki ni kabwanini kibuntaeka ake i aon te burakibooti. Ngkanne korea N na kaota te ninikoria man … ao kaoiia ataei bwa a na taekin bwaai ake e tangiri Tamara are i Karawa bwa a na karaoi ae kainnanoa te ninikoria. Ti na kanga n riki n ai aron Moretekai ao Etita?

• Kaoia ataei bwa a na iangoi taai ake a kaitarai ae tao e matoatoa iai karaoan ae eti. Korea i aon te burakibooti ana taeka n ninikoria Etita “, … ao ngkana N na mate, N na mate” (Etita 4:16). Buokiia ataei ni karaoa nanon ana taeka Etita ibon irouia man onean mwin “nako nakon te uea” ma te rinerine ae raoiroi ma e matoatoa are tao a na karaoia. Ngkanne kaoiia bwa a na onea mwin “mate” n te bwai ae aki raoiroi are e kona n riki man karaoan ae eti. Bukin tera e tamaroa riki karaoan ae eti, e ngae ngke e kaangaanga mwiina?

• Kaota te tamnei ae “Choose the Harder Right” (ChurchofJesusChrist.org), ao kaoiia ataei bwa a na rinea ae “eti ma e matoa” inanon maiuia. Maroroakina aron Iesu Kristo n riki bwa bannan te reirei aei.

Etita 4:1–3, 10–17

E kona ni buokai te aki mamatam ao ni buokiia tabeman.

Inanon te tai ni kainnano, a aki mamatam Etita ao I–Iutaia. Ko na kanga ni buokiia ataei ake ko reireiniia n oota ni kakabwaia n tamnei man te aki mamatam?

Waaki ni Kakukurei aika a Kona ni Karaoaki

• Kaoiia ataei bwa a na korei bwaai ake a kona n aki mamatam ibukina (ngkana e kainnanoaki, a kona n taraa “Fasting ao Fast Offerings” n Koaua nakon te Onimaki, 66–69). Ngkanne tuangiia bwa a na wareka Etita 4:1–3, 10–17 n nora oin bukin aia aki mamatam Iutaia ao Etita. Kaungaia ataei bwa a na iangoa te bwai ae a kainnanoa iai te ibuobuoki mairoun te Uea, ao a karika anne bwa mwakoron bukin aia aki mamatam nakon te Tabati n aki mamatam are imwina.

• Kaoa temanna te ataei bwa e na kabwarabwara nakon temanna raoraona oin bukin te aki mamatam. Tera ae a na taekinna? Kairiia nakon Bwai ni Kairi nakon Koroboki aika Tabu, “Aki Mamatam, Te Aki Mamatam” (scriptures.ChurchofJesusChrist.org) ngkana a kainnanoa te ibuobuoki. Tibwa karakinam ngke ko aki mamatam ni karekea ana ibuobuoki te Uea. Kaoiia ataei bwa a na tibwai karakinaia ngke a karaoa te aki mamatam.

Kaungaa te Kamatebwai n te Mweenga

Botaki anenea te kuna i aon te reirei are ko reiakinna n te kiraati n te bong aei (tara te topic index n te Children’s Songbook ibukin taian iango). Kaoia ataei n anenea te kuna anne ma aia utu.

Kanakoraoan Ara Anga Reirei

Maiuakina are ko reireia. Am angareirei e na rang ni korakora riki ngkana ko kakoaua man am taneiai i aon te kakabwaia ni maiuakinan te euangkerio. Ngkai ko rinei reirei ake kona reireiniia ataei, iangoia bwa kona kanga ni maiuakin reirei akanne n ae bwanin riki. (Tara Reirei n ana Kawai te Tia Kamaiu, 13–14.)