“Aokati 1–7. Iobi 1–3; 12–14; 19; 21–24; 38–40; 42: ‘I a Bon Kantanigaia Naba,’” Nakomai, Iriirai—Ibukin te Moanrinan: Te O Tetemanti 2022 (2021)
“Aokati 1–7. Iobi 1–3; 12–14; 19; 21–24; 38–40; 42,” Nakomai, Iriirai—Ibukin te Moanrinan: 2022
Kaetan Taekan Iobi, iroun Joseph Brickey
Aokati 1–7
Iobi 1–3; 12–14; 19; 21–24; 38–40; 42
“I a Bon Kantanigaia Naba”
Ngkai ko kamatebwaia rongorongon Iobi, tera rongorongo aika ko kunei ibukin oin maium? Tera rongorongo aika ko namakinna bwa a riai n ongo ataei ake ko reireiniia?
Korei Am Namakin
Kaunga te Tibwatibwa
Kaota tamnein Iobi (tara te kabwarabwara n te wiki aei i nanon Nakomai, Iriirai—Ibukiia Aomata n Tatabemaniia ao Utu). Tuangiia ataei bwa a na iangoia bwa tera ana namakin te mwaane ane n te tamnei. Kaoiia bwa a na tibwaua te bwai teuana ae a ataia iroun Iobi.
Reirei te Reirei: Ataei aika a Uarereke
Tamara are i Karawa ao Iesu Kristo a na buokai n taai aika matoatoa ngkana I onimakinia.
Iobi e onimakina te Atua ao e teimatoa ni kakaonimaki e ngae ngke e kaitarai kakatai aika matoatoa. Karakinan Iobi e kona ni buokiia ataei ni kakorakora aia onimaki iroun Tamara are i Karawa ao Iesu Kristo bwa aonga n tauraoi ni kaitarai oin kataakia.
Waaki ni Kakukurei aika a Kona ni Karaoaki
-
Kaoia ataei bwa a kaoti bwaai aika a atai ibukin Iobi, ao buokiia bwa a na oota n te bwai are riki nakoina (tara Iobi 1–2; “Iobi” i nanon Karakin te O Tetemanti). Tuangiia ataei bwa tera ae a na namakinna ngke arona bwa ngaiia Iobi. Antai ae kona ni buokiira ngkana a kaoti bwaai aika kananokawaki inanon maiura? Kaota tamnein Iesu Kristo., ao kabwarabwara bwa ana onimaki Iobi iroun te Uea bon ngaia ae buokia i nanon kataakina (tara Iobi 1:21).
-
Wareka nakoia ataei ana taeka Iobi Iobi 13:15: “I onimakinna.” Buokiia ataei bwa a na mataata bwa tera nanon onimakina te Atua, man maroorakinaia aomata ake a onimakinia. N aron te katooto, tera ae ti onimakinna bwa a na karaoia ara karo? Tera ae ti onimakinna bwa a na karaoia ara taan reirei? Tera ae ti onimakinna bwa a na karaoia Tamara are i Karawa ao Iesu Kristo? Kaota am onimaki iroun Tamara are i Karawa ao Iesu Kristo, ao buokiia ataei n iangoi kawai ake a kona iai ni kaota aia tangira ao aia onimaki Irouia.
Iesu Kristo bon te Tia Kaboa Maiu.
E kona moan kataakina ao marakina Iobi ibukin ana onimaki iroun te Uea. Ko na kanga ni buokiia ataei n katea aia onimaki iroun Iesu Kristo, ara Tia Kaboi Maiura?
Waaki ni Kakukurei aika a Kona ni Karaoaki
-
Kaota tamnein Iesu i aon te kaibangaki ke ngke e taunaki n te bwaro (tara Gospel Art Book, nambwa. 57, 58). Tuangiia ataei bwa tera ae e riki n te tamnei. Wareka nakoia ataei ana koaua Iobi i nanon Iobi 19:25. Kaota tamnein te Tia Kamaiu ae e Mangauti (tara Gospel Art Book, nambwa 59, 60; tara naba te iteraniba ibukin te mwakuri ni kauring n te wiki aei), ao kaota am koaua bwa e a tia n uti Iesu Kristo ao e maiu ngkai. Bukin tera ti kakaitau ngkai e a tia n uti Iesu?
-
Kaota tamnein Iobi, ao kabwarabwara bwa e mena Iobi inanon te maraki ae korakora ibukina bwa e ni kaboaboa kunna. E a tia ni bua mwengana, ao a mate natina. Ma Iobi e ataa te bwai ae rang kakaawaki are e anganna te rau n nano. Wareka Iobi 19:25, ao tuangiia ataei bwa tera ae e ataia Iobi. Tibwaia ma ataei arom n ataia bwa e maiu Iesu Kristo, ao e kaoiia bwa a na tibwa aia koaua Irouna.
Tamneite mwaane ae tararakeIobi, iroun Gary L. Kapp
-
Tuangiia ataei bwa a na karana te iteraniba ibukin te mwakuri ni kauring n te wiki aei. N aia tai ni kara, katanga ke anenea te kuna ae kaota Mangautin Iesu, n aron “Did Jesus Really Live Again?” ke “Jesus Has Risen” (Aia Boko n Anene Ataei, 64, 70). Tuangiia bwa ana tibwa aia namakin ibukin Iesu, ao buokiia bwa a na mataata bwa ti kona ni karekei namakin aika raoiroi mairoun te Tamnei ae Raoiroi ni buokiia n ataia bwa bon iai Iesu Kristo.
Reirei te Reirei: Ataei aika a Ikawai Riki
Tamara are i Karawa ao Iesu Kristo a na buokai n tokanikai i aon kataakiu ngkai I onimakinia.
Aomata ni kabane iai aia bong aika kaangaanga, ao tabeman iai kataakia ae rang maan. Ana onimaki Iobi iroun te Atua e buokia rinanon kataakina. Iangoia bwa e na kanga te karaki aei ni buokiia ataei ni katea aia onimaki iroun Tamara are i Karawa ao Iesu Kristo bwa aonga ni kaitarai kataakia, ngkai ao n tai aika a na roko.
Waaki ni Kakukurei aika a Kona ni Karaoaki
-
Tuangiia ataei bwa a na tibwa te bwai ae a ataia ni karakinan Iobi. Te aeka n aomata raa ngaia? Tera ae riki nakoina? Tera arona nakon kataakina? Kairiia nakon kiibu Iobi 1–2 ni buokiia ni karakina te karaki (tara Iobi 1:1, 13–22; 2:7–10; tara naba “Iobi” i nanon Karakin te O Tetemanti). Kaoia ataei bwa ana tibwa aia namakin bwa tera oin raoi te rongorongo ni karakinan Iobi.
-
Kaoti tabeua tamnein Iesu Kristo ngke e reitaki ma aomata, ao tuangiia ataei bwa tera ae a reirei taian tamnei bwa antai Iesu Kristo ao Aekara Ngaia. Tera riki ae ti ataia n Rongorongona? Kaoia ataei bwa ana wareki tabeua kiibu aikai ni karekei bwaai ake e atai Iobi iroun te Uea: Iobi 12:10, 13, 16; 19:25–27. Bukin tera e kakaawaki ataakin bwaai aikai i aon te Tia Kamaiu?
-
Kaoia ataei bwa a na wareka Iobi 19:14–19, ao tuangiia bwa tera ae a reirei kiibu aikai i aon aroia aomata nakon Iobi. Tera ara namakin ngkana e karaoaki aei nakoira? Kaoia ataei bwa a na wareka Iobi 19:23–27 n noria bwa e kanga Iobi ni kunea te raunano n te waaki aei. Tera ae a reireiniira kiibu aikai i aon te Tia Kamaiu? Bukin tera e kakaawaki bwa ti ataia bwa E maiu ao e tangiriira? (tara Ioane 17:3).
-
Botaki anenea te kuna ae kakoaua Iesu Kristo, n aron “I Know That My Redeemer Lives” (Anene n Taromauri,, nambwa 136). Tera ae mwaneweia te anene i aon kakawakin karekean te koaua bwa e maiu te Tia Kamaiu? Tuangiia ataei bwa ko kanga n ataia ae E maiu te Tia Kamaiu ao bukin tera ko kakaitau ibukin te ataibwai anne. Kaungaia bwa ana tibwai aia namakin ao aia koaua naba.
Rao aika raoiroi a kakaunga ao boutoka i marenaia.
Ngke e rawawata Iobi, raoraona a taku bwa e a katueaki iroun te Atua ibukina bwa e a tia ni bure. Te karaki aei e kona n buokiko n reireiniia ataei te kawai ae tamaroa riki ngkana iai ana kaangaanga raoraoia (tara Iobi 16:1–5).
Waaki ni Kakukurei aika a Kona ni Karaoaki
-
Tuangiia ataei bwa a na manga tarai bwaai aika kaangaanga ake a riki nakon Iobi (tara Iobi 1:13–19; 2:7). Botaki wareka Iobi 19:14, 19, n nora aroia raoraon Iobi i nanon kataakina (tara naba Iobi 22:1–5). Kaoia ataei bwa a na iangoia bwa aongkoa ngaiia raoraon Iobi—tera aroia ni buokia? Kaungaia bwa a na iangoa raoraoia are e rinanon te tai ni kaangaanga ao ni bairea te bwai ae a kona ni karaoia ni kaota te tangira ao te boutoka nakon raoraoia anne.
-
Tuangiia ataei bwa a na korei anuan te rao ae raoiroi ao ni kakaea raoraoia ae iai irouna anua aikai. Kaota tamnein Iesu Kristo. N te aro raa ae Iesu bon te rao ae raoiroi nakoira n tatabameniira? Ti na kanga ni kona ni ira Ana katooto?
Kaungaa te Kamatebwai n te Mweenga
Kaoia ataei bwa a na tibwaia ma kaain aia utu ke raoraoia te kawai are Tamara are i Karawa ao Iesu Kristo e kona ni buokiia ngkana a rinanon te tai ae kaangaanga.
Kanakoraoan Ara Anga reirei
Kaota am koaua bwa iai kakabwaia aika a taekinaki n te berita. Ngkana e anga te tua te Uea, n angiin te tai E berita taian kakabwaia man kawakinan te tua anne. Ngkai ko kaoiia ataei bwa a na maiuakina reirein te euangkerio, tibwauai berita ake e karaoi te Atua nakoia naake a maiuakina te reirei anne. Ko kona naba ni kaota am koaua i aon kakabwaia ake ko karekei man maiuakinan te reirei anne.