“Aokati 22–28. Taian Areru 102–103; 110; 116–119; 127–128; 135–139; 146–150: “Ke a Bane Ni Kamoamoa Iehova Akana Iai Ikeikeia,’” Nakoma, Iriirai—ibukin te Moanrinan: O Tetemanti 2022 (2021)
“Aokati 22–28. Taian Areru 102–103; 110; 116–119; 127–128; 135–139; 146–150,” Nakomai, Iriirai—Ibukin te Moanrina: 2022
A na Katorobubua Bubua Ni Wae Ni Bane, iroun J. Kirk Richards
Aokati 22–28
Taian Areru 102–103; 110; 116–119; 127–128; 135–139; 146–150
“Ke a Bane Ni Kamoamoa Iehova Akana Iai Ikeikeia”
Ngkana ko kainnanoi iango riki n am tai ni katauraoi n anga reirei, taraa “Bwaai n Ibuobuoki riki tabeua ibukin Reiakinaia Ataei” ao “Tobwaan Kainnanoia ataei aika a uarereke” ni moan te boki ni kairi aei.
Korei Am Namakin
Kaunga te Tibwatibwa
Kaota tabeua tamnei man te kabwarabwara n te wiiki aio n Nakomai, Iriirai—Ibukiia Aomata n Tatabemaniia ao Utu, ao kaoiia ataei bwa a na maroroakina taekan bwa tera ae a nooria n taian tamnei. Buokiia n taraa te reitaki imarenan tamnei aikai ao tera are a reiakinna inanon te boki ae Taian Areru.
Reirei te Reirei: Ataei aika a Uarereke
Ana taeka te Atua kaanga ai aron te ota.
Ataei ake ko reireiniia a mena iaon te kawai n oki nakon Tamaia are i Karawa. Ana taeka te Atua e konaa ni buokiia n tiku iaon te kawai anne n oki nakon Tamaia are i Karawa.
Waaki ni Kakukurei aika a Kona ni Karaoaki
-
Kaoti tamnei ake a taekinaki inanon Taian Areru 119:105, ao kaoiia ataei ni katukui tamnei ni baireia raoi ngkai ko wareka te kibu. Tuangiia ataei bwa a na kaokioka kiibuntaeka man te kibu ma ngkoe ngkai ko kotokotei taian tamnei.
-
Kaoiia ataei n taetae iaona bwa tera aron te namakin n te tiku inanon te rootongtong. Baikara bwaai are a matoatoa karaoaia inanon te rootongtong? Ko na riai ni kaoa te ataei ni kataia ni karaoa te bwai teuana ma matana aika in, n aron korean te tamnei. Bukin tera bwaai aikai a bebete ni karaoaki ngkana iai te oota? Buokiia ataei ni mataata bwa e kanga ana taeka te Atua, n aron a kuneaki inanon koroboki aika tabu ao ana taeka te burabeti ae maiu, ni kaotaa kawaira n oki nakon Tamara are i Karawa.
Tamara are i Karawa ao Iesu Kristo a kinaai ao a tangirai.
Rinanon maiura, ti kainanoia ni kakauringaki bwa Tamara are i Karawa ao Iesu Kristo a kinaira. Taian Areru 139 konaa ni buokiko n reireia ataei are A kinaia ao a tangiriia.
Waaki ni Kakukurei aika a Kona ni Karaoaki
-
Karaoa am riiti ni karinani bwaai ake ko atai n taekaia ataei n tatabemania. Ngkai ko wareka te riiti teuana imwin teuana, tuangiia ataei ni ketinna antai are e kabwarabwaraki. Wareka Taian Areru 139:1–3, ao buokiia ataei ni mataata n taian taeka ake aki atai. Kakoaua bwa Tamara are i Karawa ao Iesu Kristo a kinaia raoi—A atai araia, tera are a kukurei iai ao nanokawaki, ao bwaai ake a karaoia raoi.
-
Wareka Taian Areru 139:23, ao kaoiia ataei ni katukui baia iaon burooia ngkana ko taekina “nano” ao n riinga atuuia ngkana ko taekina “iango.” Tibwa te tai ngke ko namakina te Atua n ataa nanom ao am iango.
I kona n kamoamoa te Uea.
Ni kamoamoa te Uea e nanonaki ni kaota ara kakaitau ao ara tangira Ibukina. Buokiia ataei bwa a na reiakinna are ti Kamoamoa ngkana ti karaoi bwaai n aron, anene, tataro, ao ongotaeka nakon Ana reirei.
Waaki ni Kakukurei aika a Kona ni Karaoaki
-
Kaoiia ataei bwa a na tibwauai taneiai ngke temanna e kamoamoiia ke n tuangiia ae a karaoa te mwakuri ae tamaroa. Tibwai tabeua bwaai aika a tamaroa man Taian Areru 146:6–9 are te Uea e a tia ni karaoia, ao kaoiia ataei ni marooro n taekan bwaai tabeua are E karaoi ibukira. Buokiia n iangoi kawai ake a kona ni Kamoamoa ibukin bwaai akanne.
-
Anenea te anene n ikotaki te anene ni kamoamoa, n aron “Beauty Everywhere” (Aia Boki n Anene Ataei, 232). Kabwarabwara bwa ibukiia kaain Iteraera ngkoa, Taian Areru kanga ai aron te anene are ti aneneia n te bong aei n nebonebo ao kamoamoa te Atua.
Reirei te Reirei: Ataei aika a Ikawai Riki
Te Uea e anganai te kabebete ao te kantaninga.
Te Atua e bon atai kataakira ao nanokawakira, ao E tangiria ni kabebeteira ao ni kaungaiira. Buokiia ataei ni katea aia onimaki Irouna n te aro are a na rairaki nakoIna n taai ni kainano.
Kakamaiu, iroun J. Kirk Richards
Waaki ni Kakukurei aika a Kona ni Karaoaki
-
Tuanga temanna te ataei ni wareka Taian Areru 102:1–2. E na kanga te Uea ni buokiira inanon taai ni kangaanga? Ti kangaa ni bubuti ibukin Ana ibuobuoki? Tibwaua te taneiai n aron are ko namakinna are te Atua e ongo am tataro ngkana iai kainanom, ao kaoiia ataei n tibwai aia taneiai ao kakoaua.
-
Kaoiia ataei ni kakaai taeka ni kabebete ao kantaninga inanon Taian Areru 103. A na kanga taeka aikai ni buokiia aomata ni rinanon kangaanga? Kaungaiia bwa a na korei kiibuntaeka ake a kunei bwa a uaana ni kauringiia are te Uea e kona ni buokiia ngkana iai kataakiia.
Ana taeka te Atua e buokai n iriira Kawaina.
E ngae ngke te aonaaba e na taraa n roo n taai tabetai, ana taeka te Atua e kaotaa kawaira ao ni buokiira n oki Nakoina.
Waaki ni Kakukurei aika a Kona ni Karaoaki
-
Korea tamnein te oota (n aron te taura) ao tamnein booki aika tabu. Kaoiia ataei ni wareka Taian Areru 119:105. E kanga te oota ni buokiira? E kanga ana taeka te Atua ni buokiira? Kaoiia ataei bwa a na koroi aia reke iaon te burakibooti irarikin te tamnei. E kanga ana taeka te Atua n riki bwa ai aron te oota? E kanga ni buokiira n tiku iaon te kawai are kairi n oki nakon Tamara are i Karawa?
-
Kamaenakoia ataei nakon kakauoma, ao anganiia n tatabeman teuana man koroboki aika tabu: Taian Areru 119:47–48; Taian Areru 119:105; 1 Nibwaai 11:25; 2 Nibwaai 31:20. Kaoiia ataei bwa a na wareki kibuntaeka ao taraia bwa tera ae e a tia n anganiira Tamara are i Karawa ni buokiira n tiku iaon te kawai n oki nakoIna. Kaoiia ataei n iangoia raoi ao n tibwauaia bwa tera are a namakina te kaungaaki ni karaoia ibukina bwa a tia n reiakinna.
-
Anene n ikotaki n anenea taekan iriiran kawain te Atua, n aron are “I Will Walk with Jesus” (ChurchofJesusChrist.org). Tera ae ti reiakinna man te anene aei bwa ti na tiku iaon te kawai ae eeti?
Tamara are i Karawa ao Iesu Kristo a kona ni buokai n ataia bwa n a kanga ni rikirake.
Taian Areru 139 reireia bwa te Atua e atai bwaai ni kabane n taekara, n ikotaki ma korakorara ao mamaarara. Ngkana ti rairaki nakoIna, E kona n reireiniira bwa tera ae ti kainanoaia ni karaoia bwa ti na riki n ai Arona.
Waaki ni Kakukurei aika a Kona ni Karaoaki
-
Korei taeka man Taian Areru 139:23–24 iaon te burakibooti, ao kaoiia ataei bwa a na rainii taeka ake e kabwarabwarai bwaai ake e konaa ni karaoi te Atua ibukira. Bukin tera ti tangira te Atua bwa e na karaoi bwaai aikai? Ti na kanga ni kona ni Kaoa bwa e na “kairi[ra] n te kawai ae akea tokina?
-
Kaungaiia ataei ni “ukera” oin maiuia ibukin kawai are a konaa ni karikirakeia inanon aua taabo ake a boboto inanon aia buroukuram Ataei ao Kairake—maiu n tamnei, irekereke, rabwata, ao wanawana. Kauringiia bwa te Uea e ataia bwa a na kanga ni konaa ni karikirakeia inanon taabo aikai, ao kaungaiia ni ukera Ana tararua.
-
Anenea te anene n taekan Tamara are i Karawa ni konaa ni buokiira ni karikirakeira, n aron te kauoua ni kibu man “Help Me, Dear Father” (Aia Boki n Anene Ataei, 99). Tibwauaia bwa e kanga Tamara are i Karawa ao Iesu Kristo n tia ni buokiko n karikirakeko.
Kaungaa te Kamatebwai n te Mweenga
Marenantai, ko kona ni kaoa temanna te ataei ao temanna man aia utu teuanne ke neienne n tibwaia ma te kiraati bwa a kanga n reiakina te euangkerio ni mweengaia. Kaungaiia nikiraia ataei n tibwai iango aikai ma aia utu.
Kanakoraoan Ara Anga reirei
Kabongana te katangitang. Kuna n te Moanrinan ao anene n taromauri e kona ni buokiia ataei ni kaotaia ao ni katabangaka koauan te euangkerio n te kawai ae e na ururingaki. Te anene e kona naba ni kateimatoaia ataei ni katabeaki n te reirei. (Taraa Reirei n ana Kawai te Tia Kamaiu,22.)