“Aokati 22–28. Taian Areru 102–103; 110; 116–119; 127–128; 135–139; 146–150: ‘Ke a Bane Ni Kamoamoa Iehova Akana Iai Ikeikeia,’” Nakomai, Iriirai—Ibukiia Aomata n Tatabemaniia ao Utu: Te O Tetemanti 2022 (2021)
“Aokati 22–28. Taian Areru 102–103; 110; 116–119; 127–128; 135–139; 146–150,” Nakomai, Iriirai—Ibukiia Aomata n Tatabemaniia ao Utu: 2022
A na Katorobubua Bubua Ni Wae Ni Bane, iroun J. Kirk Richards
Aokati 22–28
Taian Areru 102–103; 110; 116–119; 127–128; 135–139; 146–150
“Ke a Bane Ni Kamoamoa Iehova Akana Iai Ikeikeia”
Taian Areru 119:105 e reirei bwa ana taeka te Atua bon “te ota [nakon] kawaim.” Ngkana ko wareka Taian Areru, koroi kibuntaeka ao iango aika ana kaungako ao ni buokiko ni kabebetea kawaim n oki nakon Tamara are i Karawa.
Korei Am Namakin
Aran ana boki Taian-Areru n te katei n I-Iutaia bon te taeka n Ebera are nanona “kamoamoa.” Te taeka anne, Tehillim, e irekereke naba ma te takarua “hallelujah” (nanona “kamoamoa Iehova” ke “kamoamoa te Uea”). Ngkana ko na rinea teuana te taeka ni kauarerekea oin te rongorongo inanon Taian Areru, “kamoamoa” te rinerine ae tamaroa. Tabeua Taian Areru iai inanona te kakao ni “kamoamoa te Uea” (taraa riki Taian Areru 146–50), ao ni kabane ngaia a kona ni kaunga te namakin n nebonebo ao ni kamoamoa. E kaoira Taian Areru bwa ti na taraa riki mwakan te Uea, ke Ana nanoanga, ao iaon bwaai aika tamaroa aika E a tia ni karaoi. Ti aki kona ni kabwara ara tarau Irouna ibukin bwaai aikai, ma ti kona ni Kamoamoa ibukina. Te kibuntaeka anne e kona ni kabwarabwaraaki ni kawai aika kaokoro ibukiia aomata aika kaokoro—e kona n irekereke ma te anene, tataro, ke te kaoti koaua. E kairi n tainako nakon te motinnano ae nano nakon te Uea ao n iri Ana reirei. Bwa tera nanon “kamoamoaan te Uea” ni maium, ko kona ni karekea riki te kamoamoa anne ngkana ko wareka ao n iangoi Taian Areru.
Iango ibukin te Kamatebwai i bon Iroum ni Koroboki aika Tabu
E kona te Uea ni buokai n au kangaanga.
Taraia bwa e kanga Taian Areru 102:1–11 ni kabwarabwarai namakin n tabeaianga ao ni kaokoroaki are e roko n tainako man rawawatam. Tao ko a tia n rinanon namakin aikanne, ao kamataata aikai ana buokiko n atai am taneiai n ae nako raoi riki. Ke ana buokiko kiibu aikai n atai aia namakin tabeman aika iai rawawataia.
Ngkana ko wareka Taian Areru 102:12–28; 103; 116, tarai kibuntaeka are e na anganiko te onimaki bwa ko kona “ni wetea aran te Uea” ni katakim (Taian Areru 116:13). Ko na bae n tangiria ni mwaken, kauring, ke n tibwauai ma tabeman kibuntaeka ake e anganiko te kantaninga Ibukina.
Taraa naba Itaia 25:8; 2 I-Korinto 1:3–7; Ebera 2:17–18; Aramwa 7:11–13; Evan A. Schmutz, “God Shall Wipe Away All Tears,” Liahona, Nobembwa. 2016, 116–18.
Healing (Kamaiuaki), iroun J. Kirk Richards
A kona Taian Areru ni kaotai nakon te Tia Kamaiu.
Iai inanon Taian Areru kibuntaeka aika a kaoti maiun ao ana mwakuri Iesu Kristo. Aikai tabeua katooto:
-
Taian Areru 110:1–4 (taraa Mataio 22:41–45; Ebera 5:4–10; 6:20)
-
Taian Areru 118:22 (taraa Mataio 21:42; Makuri 4:10–11; 1 Betero 2:7)
-
Taian Areru 118:25–26 (taraa Mataio 21:9)
Tera koaua aika e reireiniko kiibu aikai ibukin Iesu Kristo? A kanga atakin koauaia aikai ni kakabwaiako?
Ngkana ko wareka Taian Areru n te wiiki aei, waaki ni koroi taekan kibuntaeka ake tabeua aika a reireiniko taekan te Tia Kamaiu. Ko na bae naba ni wareka ke n ongora nakon tabeua anene aika mamaten nanom are e na buokiko n Iangoia.
Te Atua e na kateimatoako inanon Kawaina.
Te areru aei iai inanona kibuntaeka aika mwaiti aika a kabotaui maiura nakon te mwananga rikaaki nakon Tamara are i Karawa. Ngkana ko wareware, tarai taeka n aron nakonako, te kawai, kawai, wae ao te kamiimi. Iangoa oin kawaim ni maium—ko mena ia ngkoa, ko mena ia ngkai, ao te tabo raa ae ko nako iai. Tera ae ko reiakinna man te areru ibukin kawaim n okira mwengam? Ni kaineti ma te areru aei, tera ae e a tia ni katauraoia te Atua ni buokiko n tiku n te kawai ae eti?
Ko na bae n tangiria n ataa te bwai are n te moan n Ebera, moan kiibu aika waniua inanon Taian Areru 119 ae moa man moan manin taeka n te taetae n Ebera. Kiibu aika waniua ake imwiina a moanaki ma manin te taeka, ao e nako riki nakon tokin manin taeka.
Taraa naba Itaia 42:16; 2 Nibwaai 31:17–21; Aramwa 7:19–20.
E mwaaka riki te Uea nakoia bouananti.
Taraa bukina aika kaotaki inanon Taian Areru 135:15–18 bwa bukin tera bon te nanobaba onimakinan atua aika kewe. Tera ae e na anaaki iai nanom n onimakina are ti tebo ma kameanti ae kabwarabwaraaki inanon kiibu aikai?
Ko kona ni koroi rinanin bwaai aika mwaaka aika e kona ni karaoi te Uea, n aron are e kabwarabwaraaki inanon Taian Areru 134–36. Tera bwaai aika mwaaka ae E a tia ni karaoia ibukim?
“Kamoamoaa te Uea.”
Ngkana ko wareki kabanean kibuntaeka n taian areru aikai, iangoi bukina ngkai ko na riai ni kamoamoaa te Uea. Bukin tera e kakawaki bwa ko na anga te karinerine nako Ina? Tera kawai aika ko kona ni Kamoamoaa iai?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Taian Areru 119:105.Tao a kona kaain am utu ni karaoa te kawai ao n nakonako iai n te roo, ni kabongana te taura ni kaota kawaimi. N am tai n nakonako, ko kona n titirakiniko titiraki n aron “Tera te bwai ni maiura aei ae titebo ma te rotongitongo aei?” ke “E kanga ana taeka te Atua n riki kanga te ota?” Anenean te anene iaon otan te Atua, n aron “Teach Me to Walk in the Light” (Aia Boki n Anene Ataei, 177), e kona ni buokiko ni kakorakora te reirei ae reiakinaki inanon Taian Areru 119:105.
-
Taian Areru 127–28.Tera ae nanonaki bwa e na buokira te Uea ni “katei [ara] auti”? (Taian Areru 127:1). Ti na kanga ni Kairekerekea riki n ara kekeiaki ni katea mweengara ae raoiroi? Ni buoka am utu ni kaeka te titiraki aei, korea tamnein te auti iaon te mwakoro ni beeba ao koroia nakon mwakorokoro. Itinanikun mwakorokoro aikanne, a kona kaain te utu ni koroia ke ni korotamnei kawai ae na kariki te Uea bwa mwakoron mweengam. Imwiina ao ko kona ni katomatomai bwaai ni kamwaninga. Tera riki ae ti na kainnanoia n taian areru aikai aika ana kaungaira bwa ti na nakonako ni kawain te Uea?
-
Taian Areru 139.Imwiin warekan kiibu 1–4, a kona kaain te utu ni maroroakinna bwa a kanga n ataia ae e kinaia te Atua (taraa naba kiibu 14–15, 23–24).
-
Taian Areru 146–50.Ko kona ni kaoia am utu bwa ana wareki tabeua kibun Taian Areru 146–50 ni kabaibati, ni kataia ni kaota ana namakin te tia koroboki. Ti na kanga ni kaota ara kamoamoa nakon te Uea? A kona kaain te utu ni kimwareirei ni koroi oin aia areru ni kamoamoa ao n tibwauai ma ngaia n tatabemaniia nako.
Ibukin iango aika a mwaiti riki ibukin rereinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene aika katauaki: “Teach Me to Walk in the Light,” Aia Boki n Anene Ataei, 177.
Kanakoraoan Ara Anga Reirei
Kabonganai bwaai n rawerawe. Ngkai ko reireiniia am utu, iangoia n ongora nakon taian rawerawe ni booki aika tabu, aika kuneaki iaon ChurchofJesusChrist.org ke inanon te Gospel Library app. Te ongora nakon taian areru a kona n rangi ni korakora bukina bwa a bon nanonaki bwa ana tangi mwaaka.
“Kairai inanon kawain am tua; Ba i kukurei iai” (Taian Areru 119:35).