“Aokati 15–21. Taian Areru 49–51; 61–66; 69–72; 77–78; 85–86: ‘I a Tuangkami ae Karaoia nakon Tamneiu” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Aokati 15–21. Taian Areru 49–51; 61–66; 69–72; 77–78; 85–86,” Nakomai, Iriirai–Ibukiia Aomata n Tatabemaniia ao Utu: 2022
Kamaiua are e Bua Ngkoa, iroun Michael T. Malm
Aokati 15–21
Taian Areru 49–51; 61–66; 69–72; 77–78; 85–86
“I a Tuangkami ae Karaoia nakon Tamneiu”
Te kamataata aio e kaoti tabeua atuun reirei aika a maroroakinaki inanon taian areru aikai. Ngkai ko kamatebwai, taeka tabeua, tamnei, ke iango ake a teretere iroum. Tera ae ko namakinna ae kataia n reireiniko iai te Uea?
Korei Am Namakin
Taan koroi Taian Areru a tibwai oin aia namakin aika a nano n aia otooto. A koroi taekan namakin ni bwarannano, ni maaku, ao n raraoma. N taai tabetai, a taku bwa a kitanaki iroun te Atua, ao tabeua areru a uoti bwana ni uruaki n nano ke ni maroa. Ngkana ko a tia n taonaki n aeka namakin aika, warekan taian areru a na kona ni buokiko n ataia bwa ti aki ti ngkoe. Ma ko na kona naba ni kunei taian areru aika a na kaungako ngkana ko a roko n aeka n namakin aikai ibukina bwa taan otoi areru a neboa te Uea ibukin tamaroana, a miakina mwaakana, ao a kukurei n ana nanoanga. A ataia bwa e karawawataaki te aonaaba n te buakaka ao n te bure ma te Uea e raoiroi ao e kan kabwarai bure” (Taian Areru 86:5). A ataia bwa te onimaki iroun te Uea e aki nanonaki bwa ko na aki boo ma kangaangan te raraoma, te bure, ke te maaku. E nanonna bwa ko ata ae kona rairaki nakoina ngkana ko karaoia.
Iango ibukin te Kamatebwai i bon Iroum ni Koroboki aika Tabu
E roko te kamaiuaki mairoun Iesu Kristo.
Taian Areru 49 iai te rongorongo ibukiia ”aika a mangori ao aika a kakannato naba, ma aika a kaubwai ao aika akea aia bwai” (te kibu 2). Tera ae ko na taekinna ibukin te rongorongo aei? Tera ae ko namakinna Taian Areru 62:5–12 are e reitia nakon te rongorongo anne?
Warekan taian areru aikai e na bae n anaa nanom ni miakin kawai ake aomata tabemwaang a katuka aia onimak ni bwaai tabeua n tiaki iroun te Atua ibukin te kamaiuaki (taraa Taian Areru). E na kanga maium n rotakin am kakoaua bwa te “Atua e na kamaiua [tamneiu] man te rua ni mate”? (te kibu 15).
Taraa naba Taeka n Rabakau 28:6; Aramwa 34:8–17.
Ibukin ana nanoanga te Tia Kamaiu, a kona ni kabwaraaki au bure.
Te bubuti ibukin te nanoanga inanon Taian Areru 51 a kaineti nakon te Uea ae Tawita, are e bure ni wene ni bure ao n tiri aomata (taraa 2 Tamuera 11). E ngae ngke a bebete ara bure, ti kona ni kairekerekea nakon kainnanoan te nanoanga are e mwaneweaki n te areru aio. Ti kona naba n reiakina te bwai teuana tera ae nanonaki n te rairannano. N aron te katoto taeka raa ke kibun taeka raa n Taian Areru 51 e reireiniko taekan te anua ae ti kainnanoia bwa ti aonga n rairinanora? Tera ae ko reiakinna n mwiin ana Mwakuri ni Kamaiu te Tia Kamaiu ae e reke mwiina nakon maium?
Ko kona naba n tabeka te titiraki aei n tain warekan Taian Areru 85–86. Ko kona naba n tarai kibu n taeka ae a kabwarabwara taekan te Uea. A na kanga kibun taeka aikai ni mwakuri ni kamatoa am onimaki bwa E na kabwarai am bure (taraa, ibukin te katooto, Taian Areru 86:5, 13, 15).
Taraa naba Aramwa 36; Russell M. Nelson, “Ti Kona ni Karaoa ae Tamaroa ao ni Katamaroaki Riki,” Riaona, Meei 2019, 67–69; Carole M. Stephens, “The Master Healer,” Liahona, Nobembwa. 2016, 9–12.
Taian Areru 51:13–15; 66:16–17; 71:15–24
Au kakoaua iroun Iesu Kristo e kona ni buokiia temwangina bwa a na Nakoina.
Iangoia ko na kanga ni karekea am kakoaua iroun Iesu Kristo ao mwakana n kamaiu. Ngkanne, ngkai ko kamatebwaia Taian Areru 51:13–15; 66:16–17; 71:15–24, iangoia bwa ko na kanga ni kaoia tabemwaang ni “mai nori ana mwakuri te Atua” (Taian Areru 66:5). Tera nanona iroum “e na tataekina [Ana] raoiroi ni kabongnga”? (Taian areru 71:24). Ko na kanga n tuangiia temwangina ”ae karaoia nakon [tamneim]“? (Taian areru 66:16).
Taraa naba Motiaea 28:1–4; Aramwa 26.
Ti kona n tibwaia ma tabemwaang ara kakoaua bwa tera ae e a tia ni karaoia te Uea ibukira.
E na buokai te Uea n au tai are I rangi ni kainnanoa iai te buoka.
Tabeua areru a kabwarabwara n te taetae ae e teretere bwa aekakira te namakin ngkana ko raroanako ma te Atua ao man rangi ni kainnanoa Ana buoka. Ko na iangoia ni kakaei aekan kabwarabwara aikai n Taian Areru 63:1, 8; 69:1–8, 18–21; 77:1–9. Tera ae ko kunea inanon Taian Areru 63; 69; 77–78 are e anganiia taan oto areru aikai te raunnano?
Ngkana ko a un, e na kanga ni buokiko ni”uringa ana mwakuri te uea” ao ana “bwai ni kamamimi ake ngkoangkoa”? (Taian Areru 27:1). Tabeua mai buakon kamimi aikai a kabwarabwaraaki n Taian Areru 78. Ngkai ko wareki taekaia, iangoia bwa tera ae e buokiko “ni kaki [am] kantaninga iroun te Atua” (te kibu 7). Baikara taneiai man rongorongoia am utu ae e kaunga nanom??
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Taian Areru 51:17.Iangoia bwa ko na kanga n reireiniia am utu tera nanon ae e na reke te uruaki n nano. N aron te katoto, kaain te utu a kona n ikaruoruo ni kauka te bwai ae iai nanana ae e matoatoa n aron te bunnimoa ke te uaa. A na kanga nanora n tabetai n riki bwa kanga te nana anne? Ti na kanga ni kauka nanora nakon te Uea? Warekan Taian Areru 51 ni kabane a kona ni katauraoi tabeua iango.
-
Taian Areru 61:2–3.Kaain te utu tao a na kukurei ni korean tamnei aika kanikina n kiibu aikai ao ni maroroakinna bwa e na kanga Iesu n riki bwa te “bwaa”, te katan [ibukira],” ao “te taua ae e matoatoa.”
-
Taian Areru 71:17; 78:5-7.Tera ae tangiria te Uea bwa “kam na … kaoti baikai [nakoia] natimi”? (Taian Areru 78:5). Tao a kona kaain te utu teuana ma teuana n tibwa ana katooto te Uea “mwakuri aika kamimi,” n aron karaki ni koroboki aika tabu, ke ana kakoaua temanna n onoti, are e buokiia “ni kaki aia kantaninga iroun te Atua” (Taian Areru 71:17; 78:7).
-
Taian Areru 72.Taian Areru 72 e koreaki iroun Tawita ibukin natina te mwaane ae Toromon, ma angiina e kona n kaeineti ma Iesu Kristo. Ngkai kaain am utu a wareka te areru aei, a kona tabekarake tamnein te Tia Kamaiu ngke a kunei kiibu are a kauringaki taekan Iesu Kristo. Ti na kanga ni buoka kakoroan nanon te kai n nano bwa “te aonnaba ni kabane e na kaonrakeaki ma te mimitong”? (Taian areru 72:19; taraa naba Reirei ao Berita aika Tabu 65:2).
-
Taian Areru 85:11.Te kibu aio e na kona ni kauekea te maroro iaon bwaai ake a riki ni Kaokan te euangkerioi—n aron ana Boki Moomon bwa kakoauan ae ”[taonanako] te aonaaba” ao a kanga taan uarongorongo mai karawa n ruo’ rikaaki mai i karawa” (taraa naba Mote 7:62). Te witeo “Preparation of Joseph Smith: Tutored by Heaven” (ChurchofJesusChrist.org) kabwarabwarai tabeua man bwaai aika riki aikai.
Ibukin iango aika a mwaiti riki ibukin reirenakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae katauaki: “I Kainnanoiko Ngai,” Boki n Anene, nambwa. 98.
Kanakoraoan Ara Anga Reirei
Kabonganai anga n aekaia nako. “”Tarai kawai ake ko konai ni karakai aanga nakon am kekeiaki n reiakina te euangkerio. Ni karaoan anne ena karaka te kaubwai ao te tamaroa nakon te taneia. … Iangoia bwa e na kanga kabonganan te katangitang, karaki, tamnei ao aekani koroboki korobanna ake a kona ni kaoa te Tamnei” (Reirei n ana Kawai te Tia Kamaiu, 22).
Tai Nanououa, Tooma, iroun J. Kirk Richards