te aikaon ibukin iango

Iango Aika a na Ururingaki ao ni Iangoaki

Warekan te Otooto n te O Tetemanti

Ni booki n te O Tetemanti ake a kaoti imwaain Iobi, angiin ae ti kunei bon taian karaki—rongorongo aika koreaki ake a kabwarabwara taai aika a kakaongora man te nonoori n tamnei. Noa e kabaaa te ake, Mote e kainaomataia tibun Iteraera, Anna e tataro bwa e a reke natina te mwaane, ao a mwaiti riki. Ni moa mairoun Iobi, ti kunei tein koroboki aika a kakaokoro, n aroia taan korea te O Tetemanti a rairaki nakon te taetae n otooto ni kabwarabwara aia namakin ae nano ke taetae ni burabeti aika rangi ni kakawaki n te kawai ae na rangi n ururingaki.

Ti a kaman tia n noori tabeua katooto n te otooto aika a uamae ni kabutai booki aika rongorongo ngkoa n te O Tetemanti. Ao man ana boki Iobi nako mooa, e na mwaiti riki mai iai ae ti na noori. Ao man ana boki Iobi, Taian Areru, ao Taeka n Rabakau e kuri angiina taian otooto, bwa mwakoron aia koroboki burabeti n aron Itaia, Ieremia, ao Amota. Ibukina bwa warekan te otooto e kaokoro man warekan te karaki, matataam iai e kainnanoa te anga ae kaokoro. Aikai tabeua iango are a na kona ni karaoa am wareware n te O Tetemanti bwa e na rangi ni uaana riki.

Kinaakin Riki te Otooto n Ebera

Te moan, e na kona ni buokiko ni kaaki n am iango bwa te otooto n Ebera inanon te O Tetemanti e aki boboto iaon te kuna, n aekakin nako otooto tabeua. Ao e ngae ngke tangin te taeka, takakaro iaon taian taeka, ao kaokiokan tangina bon bwaai aika e taneiai te aba iai n te otooto n Ebera n taai ake ngkoa, tabeua nanona a bon aki rairaki nakon taian taetae tabeua. Teuana te bwai ae ko na nooria, e ngae n anne, bon kaokiokan taeka ni katautau ke iango, n tabetai aranaki bwa “te booraoi.” Te kibu aei man Itaia iai inanona te katooto ae bebete:

• Karina korakoram, O Tion;

• karini kunnikaim aika tamaroa, O Ierutarem (Itaia 52:1).

Te ka 29 n Areru e mwaiti inanona rain aika ti te arona—aio teuana te katooto:

• E mwaaka bwanaan te Uea;

• moan te mimitong bwanaan te Uea (Taian Areru 29:4).

Ao aio te katooto n ataakina bwa te kauoua n rain titebo ma are te moan are e kabebetea ni kamataata raoi te rongorongo:

• I anganingkami itiaki ni wii n ami kaawa ni kabane,

• ao n tangira te amwarake n ami tabo ni kabane (Amota 4:6).

N taian katooto aikai, e kaokiokaki te iango ma kakaokoro aika a uarereke. Te aro aei e kona ni katuruturua te iango are e kaokiokaki ngkae e kabonganaaki taian kakaokoro nakon kabwarabwaraana riki ae bwanin ke ni karikirakea.

N tabeua keiti, kibun taeka aika uoua aika ti te arona a kabongana te taetae ae bebete ni katerei iango aika kauntaba, n aron ae inanon te katooto aio:

• E raira nako te un te kaeka ae nimamanei:

• ma e karika te un te taeka ae kananomaraki (Taeka n Rabakau 15:1).

Te booraoi aei e aki n ae e a bon karina naba n riki. Taan korokaraki a bon karaoia ma nanoia. E anganiia te kona ni kaoti aia namakin n tamnei ke koaua n te kawai are taraana irouia a uaia ni korakora ao n tamaroa. Ngaia are ngkana ko ataa te boraoi n te koroboki n te O Tetemanti, titirakiniko i bon iroum e kanga ni buokiko bwa kona mataata n ana rongorongo te tia korokaraki. N aron te katooto, tera ae kataia n taekinna Itaia ni kairekerekean “korakora” ma “kunnikai aika tamaroa” ao “Tion” ma “Ierutarem”(Itaia 52:1). Tera ae ti na kona n taekina te kibun taeka ae “te kaeka ae nimamanei” ngkana ti ataia bwa “taeka aika kananomaraki” bon kaitaraana? (Taeka n Rabakau 15:1).

te mwaane ae koroboki iaon te ninira ni boki

E Kamaiua Tamneiu, iroun Walter Rane

Te Otooto n Ebera kanga te Rao ae Boou

E na taraa n ibuobuoki nakoim ngkana ko kabotaua warekan te otooto ma kaitiboakim ma te aomata ae boou. N aron te katooto, ko na bae ni kabotaua warekan te otooto n te O Tetemanti ma temanna man te aba ae raroa nako ao katei n ianena are e kaokoro ara taetae ma ngaia—ao taraan ae e riaon uoua tengaa ana ririki ni maiu. Te aomata aio e na bae n taekin bwaai aika akea ara atatai iai n te moan tai, ma tiaki nanon anne bwa akea bonganan te bwai are e na taekinna teuanne ke neienne. Ma tabeua te taotaonakinnano ao te nanoanga, n tokin te tai ao ara ikikina ae boou e na riki bwa te rao ae ti tatangiria. Ti bon tii kainnanoia ae ti na kabanea tabeua te tai ni kabane, ni kataia n taraai bwaai man ana iango teuanne ke neienne. Ti na bon kunea naba bwa mai nanora ti ataira raoi i bon imarenara.

Ngaia are n te moan tai ngkana ko wareka te rongorongo mairoun Itaia, n aron te katooto, iangoia bwa am moan kabwarabwara nakon am ikikina ae boou. Titirakiniko i bon iroum, “Tera au namakin ae bwanin?” E kanga am namakin n te rongorongo—e ngae ngke ko aki atai taeka ni kabane? Ngkanne manga moan warekia riki, tabeua riki te tai ngkana e riai. Tabeman aomata a kunei tabeua nanoia aika a karinaki man warekan te rongorongo ni kabaibati. Atai taeka aika a onoti ake e rinei Itaia, ai moarara riki ana taeka are ko a katamneia te bwai ae rangi n itiaki n am iango. Tera am namakin ae reke man tamnei akanne? Tera am kaotiango ni katamneian bwaai n am iango n aron ana namakin Itaia? Ni kamwaita riki am kamatebwai iaon aia taetae taan otooto aikai n te O Tetemanti, e na mwaiti riki ae ko na kunea bwa a bon rinei aia taeka ma aia anga ni kamataata aia rongorongo ae nano n te maiu n tamnei.

Taian boem a kona n riki bwa raao aika kakateke ibukina bwa a buokiira bwa ti na mataata n ara namakin ao ara taneiai. Taian boem n te O Tetemanti a bon rangi n onoti, ibukina bwa a buokiira bwa ti na mataata n ara namakin ao ara taneiai aika a rangi ni kakawaki—baike iai rekerekeia n aron ara reitaki ma te Atua.

Ngkai ko kamatebwaia te otooto n te O Tetemanti, uringnga bwa kamatebwaian booki aika tabu e bon rangi ni bongana ngke e kairiira nakon Iesu Kristo. Tarai kanikina, taeka aika katamneiaki n te iango, ao koaua ake a katea am onimaki Irouna. Kakauongo nakon ana wirikiriki te Tamnei ae Raoiroi.

Rabakau iaon Booki ao Koroboki

Teuana te karinan n otooto n te O Tetemanti e aranaki irouia taan rabakau bwa “rabakau iaon booki ao koroboki.” Iobi, Taeka n Rabakau, ao te Minita a bwaka iaan te karinan aei. Ngkai taian areru a kabwabwara aron te namakin n nebonebo, tanginiwenei, ao n taromauri, rabakau iaon booki ao koroboki a boboto iaon taeka n reirei aika akea tokina ke aia titiraki taan rabakau aika a nano. Ana boki Iobi, n aron te katooto, e kunea ana motiraoi te Atua ao oin bukina itinanikun marakin te aomata. Taeka n rabakau anga reirei iaon ae kona kanga ni kanakoraoa maium, n raonaki ma taeka n reirei aika rikorikoaki ao ni bwaatinaki man rooro ake mangkoa. Ao taian minita a taraa n nanououa n aia titiraki bwa tera oin bukin te maiu i bon irouna—ngkai a taraa ni uarereke bwaai ao ni karina n riki, ti na kunea iaa nanona ni koaua? Ko bae n iangoi booki ao koroboki kanga marooro aika iango raoi ma taan kairiiri aika kaunganano ake a kan tibwai tabeua aia nonoori ibukin te Atua ao te Aonaaba are E karikia—ao a na bae ni buokiko ni kamataatako riki ni bwaai aikai nakon are mai imwaaina.