Kamataata n te korotamnei n te Tembora ae Terubwabera, iroun Sam Lawlor

Turai 18–24

Etira 1; 3–7; Neemia 2; 4–6; 8

“I tabe ni Karaoa te Mwakuri ae Abwabwaki”

Ngkai ko kamatebwai, iangoia bwa rongorongo raa inanon Etira ao Neemia aika a rang kainanoaki irouia ataei ake ko reireiniia. Karaoa te baire n angareire are e reita te namakin are ko na karekea mairoun te Tamnei ae Raoiroi.

Korei Am Namakin

Kaunga te Tibwatibwa

Koreia iaon te burakibooti Terubwabera, Etira, ao Neemia. Korea ke kaotii tabeua tamnei ake a irekereke nakoia aomata aikai, n aron te temboa, booki aika tabu, ao oon Ierutarem. Buokiia ataei ni kaboraoi aara ma tamnei, ao tuangiia bwa a na tibwaia bwa tera ae ataia ae a karaoia aomata aikai.

Reirei te Reirei: Ataei aika a Uarereke

Etira 3:8–13

Te tembora e kona ni uota nakoiu te kimwareirei.

Rongorongon Terubwabera ao Iutaia ni manga katean te tembora e kona ni buokiia ataei ake ko reireiniia ni kukurei ni kakabwaia ake a roko ibukin ana auti te Uea.

Waaki ni Kakukurei aika a Kona ni Karaoaki

• Kaoiia ataei bwa a na taekin bwaai ake a kukurei iai. Kaota tamnein temanna ae moangare imatan te tembora (n aron kabwarabwarana n te tamnei), ao titirakiniia ataei bukin tera te aomata e riai n rangi kukurei. Kakoaua bwa te tembora bon ana auti te Uea, ao tuangiia taekan te tai ngke ko na namakina te kukurei ibukin te tembora.

• Warekia nakoia ataei te kabanea ni mwakoro n Etira 3:12, kabwarabwara are ngke Iutaia a kawenea aan te tembora, “a mwaiti aika a takarua ibukin te kimwareirei.” Kaoiia ataei bwa a na takarua ni kimwareirei. Buokiia n iangoaia bwa teraa bukina are ti na konaa ni kimwareirei iai ibukin te tembora. Ibukin te katooto, inanon te tembora ti karaoi berita ma te Atua are e kariaia ara utu ni kabaeaki n aki toki.

• Aneneia ma ataei te anene n taekan te tembora, n aron ae “I Love to See the Temple” (Aia Boki n Anene Ataei, 95). Imwiin rain tatabeua, tooki n titirakina te ataei n tibwaua te bwai teuana are a tatangiria n taekan te tembora.

  

  Te tembora e kona n riki bwa te bwai ni kakukurei inanon maiura.

Neemia 2:17–20; 6:1–9

E na buokai te Uea ni karaoa Ana mwakuri.

Ngke Neemia e karaoa mwakurian oon Ierutarem ni katobibia, ana kairiribai a kataia ni katokia, ma e teimatoa ni kakaonimaki nakon ana mwakuri. Tera bwaai tabeua aika kakawaki are te Uea e tangiriia ataei ni karaoia, ao ko na kanga ni kaungaiia ni kakaonimaki nakon te mwakuri anne?

Waaki ni Kakukurei aika a Kona ni Karaoaki

• Tibwaia ma ataei karakinan Neemia (taraa Neemia 2:17–20; 6:1–9; Dieter F. Uchtdorf, “We Are Doing a Great Work and Cannot Come Down,” Riaona, Meei 2009, 59–62). Tuangiia ataei bwa tera ae taku Neemia ngke aomata a bwainingareia ibukin kan karaoan oon Ierutarem: “Atuan Karawa, e na katekeraoiira; ngaia are ti na teirake ngaira ana toro ao ti na kateitei” (Neemia 2:20). Kaoiia ataei bwa a na teirake ao aongkoa a na buoka karaoan oon Ierutarem.

• Uotii tabeua buriki nakon te kiraati, ao anganiia ataei ni kabongana ni buoka katean te oo (ke korea tamnei te oo iaon te burakiboti). Buokiia ataei n iangoi tabeua bwaai are Tamaia are i Karawa e na riai n tuangiia ni karaoia, n aron reiakinan warekan koroboki aika tabu. Ma iango n tatabeua ake a tibwai, kaoiia n ikota te buriki nakon te oo. Kabwarabwara are ngke Neemia e karaoa te mwakuri ae kakawaki ni karaoan oon Ierutarem, aomata a kataia ni katokia. Wareka Neemia 6:9, ao kaoiia ataei ni katei baia ngkana ko wareka “kakorakora baiu.” Tuangiia ataei taekan te tai ngke ko namakina iai te Atua ni kakorakora baim ni karaoa Ana mwakuri.

Neemia 8:1–12

Koroboki aika tabu bon kakabwaia.

Ko kona ni kabongana karakinan Etira ngke e wareka te tua ni buokiia ataei n iangoa taekana bwa ti kanga ni kakabwaiaaki ngkai ti karekei booki aika tabu.

Waaki ni Kakukurei aika a Kona ni Karaoaki

• Tuangiia ataei are Etira e wareki koroboki aika tabu nakoia aomata. Warekia ni kabaibati tabeua kiibuntaeka man Neemia 8:2–3, 5–6, 8–9, 12 are e kabwarabwara bwa tera ae a karaoia aomata ngke a ongo koroboki aika tabu, ao kaoiia ataei bwa a na mwakurii kiibuntaeka akanne. Bukin tera ti kakaitau n reken koroboki aika tabu?

• Kaoiia ataei ni karanii iteraniba ibukin waaki ni kakukurei n te wiiki aei. Ngkai a karaoia, tibwaia ma ataei e kanga warekan koroboki aika tabu n tia ni uotiko ni kaan nakon te Tia Kamaiu.

Reirei te Reirei: Ataei aika a Ikawai Riki

Etira 3:8–13; 6:16–22

Te tembora e anganai bukina bwa e aera n a kimwareirei.

Ngkai ko manga rinanoi ma ataei rongorongon Terubwabera ao Iutaia ni manga katea te tembora, kakaai kawai ni kakoauai kimwareirei ake a roko nakoira ibukina ti karekei tembora n te bong aei.

Waaki ni Kakukurei aika a Kona ni Karaoaki

• Kaoiia ataei ni kaai ni mwakuri ni kakaai kiibuntaeka inanon Etira 3:10–13 are e kaotaki bwa a kanga aia namakin Iutaia ngke te tembora i Ierutarem e a manga kateaki. Ti na kanga ni kaota kimwareireira ni karekean tembora iaon te aba n te bong aei? Buokiia ataei n iangoi kawai ake a na kona iai ni katauraoi bwa a na nakon te tembora.

• Tibwaia ma ataei am namakin ibukin te tembora. E na kanga te tembora n tia ni buokiiko n namakina kaanim nakon Tamara are i Karawa ao te Tia Kamaiu? Bukin tera ae ti bukamarua ngke e kateaki te tembora? Angania ataei te tai ni koreia bwa e kanga aia namakin n taekan te tembora, ao kaungaiia n tibwaua bwa tera are a koreia ma aia utu.

Neemia 2; 4; 6

Te Uea e na kakorakoraai ni karaoa “te mwakuri ae abwabwaki.”

Te Uea iai ana mwakuri ae kakawaki ibukiia ataei ake ko reireiniia. Tera ae a kona n reiakinna mairoun Neemia n taekan kakoroan tiaan te mwakuri e ngae ngke a kaaitara ma totoko?

Waaki ni Kakukurei aika a Kona ni Karaoaki

• Manga rinanon te karaki ma ataei ni karakinan Neemia ni karaoa te mwakuri n oon Ierutarem ni katobibia, n ikotaki ma totoko are e rinanona. Warekia n ikotaki Neemia 2:19, ao tuangiia ataei n tibwauai aroaro n te aro are temanna e na ngareakiniira ibukin karaoan te bwai ae eeti. Ni kaeineti nakon Neemia 2:20, e kanga Neemia ni kaeka? Ti na kanga ni kaeka ngkana aomata a bainingareira ke n taetae n aki akaka nakoira ibukin karaoan te bwai ae eeti?

• Warekia n ikotaki Neemia 6:1–9. A kanga ana kairiribai Neemia n okioki ni kataia ni katoka te mwakuri iaon te oo, ao e kanga ana kaeka? Tera te mwakuri ae e tangiriira te Atua ni karaoia? (taraa, ibukin te katooto, Motiaea 18:8–10). Ti na kanga n iriira ana katooto Neemia inanon kibu 9 ngkana e kangaanga karaoan te bwai are e tuangiira te Atua?

Neemia 8:1–12

I kakabwaiaaki ngkana I kamatebwaia koroboki aika tabu.

Aomata ake i Ierutarem a tuai n ongongo ana taeka te Atua inanon te tai ae maan imwain Etira ngke e warekia nakoia aomata. Karakinan Etira e kauringiira bwa e kanga kakawakin koroboki aika tabu i bon iroura.

Waaki ni Kakukurei aika a Kona ni Karaoaki

• Kaoiia ataei ni kakaai inanon Neemia 8:1–12 taeka ke kiibuntaeka are e kaotaki bwa a kanga aomata n namakina taekan ongoraean ana taeka te Atua. Tuangiia ataei bwa a na tibwaua aron aia namakin ngke a wareki koroboki aika tabu, ao tibwauai am namakin naba iai.

• Kaoa temanna te ataei ni wareka Neemia 8:8, ao tuangiia ataei tera ae buokiia n mataata ni koroboki aika tabu. Kaotia nakoia aron kabonganan buoka ibukin kamatebwaian koroboki aika tabu n aron Bwai ni Kairi nakon Koroboki aika Tabu ao Gospel Topics (ChurchofJesusChrist.org). Kaoiia ataei n tibwaua te bwai teuana are a reiakinna n taekan te Tia Kamaiu man koroboki aika tabu.

Kaungaa te Kamatebwai n te Mweenga

Kaoiia ataei bwa a na rinea te bwai teuana are a reiakinna n te bong aei are a tangiria n tibwaia ma aia utu.

Kanakoraoan Ara Anga reirei

Katauraoi n te Maiu n Tamnei. “Te anga reirei n te euangkerio ae korakora tiaki tii te katauraoi n te reirei ma katauraoara naba. … Taan reirei n te euangkerio aika korakora—imwain iangoan kanoan tain te kiraati—a kabanea nanoia ni kaonan nanoia ma te Tamnei ae Raoiroi” (Reirei n Ana Kawai te Tia Kamaiu, 12).