Fa’ahōho’ara’a nō Elisaia i te fa’a’itera’a i te mau pere’o’o auahi i tōna tāvini, © Review & Herald Publishing/licensed i roto goodsalt.com

4–10 nō Tiurai

Te mau Ari’i 2 2–7

« E peropheta tei ’Īserā’ela nei »

’Ua fa’ata’ahia te mau ’ohipara’a i roto i teie arata’ira’a nō te fa’atupu i tō ’outou mau mana’o ta’a ’ē. Nā roto i te tuatāpapara’a nā roto i te pure, e nehenehe ’outou e fāri’i i te fa’aurura’a nō te pāhono i te mau hina’aro o te mau tamari’i tā ’outou e ha’api’i ra.

Pāpa’i i te mau mana’o e tae mai

Tītau i te mana’o

Nō te fa’aitoito i te mau tamari’i ’ia fa’a’ite mai i te mea tā rātou i ’ite nō ni’a i te peropheta Elisaia, ’a ani ia rātou ’ia pāpa’i i te hō’ē hōho’a nō te hō’ē mea tāna i rave.

Ha’api’i i te ha’api’ira’a tumu : Te mau tamari’i ’āpī a’e

Te mau Ari’i 2 4–5

E nehenehe te Atua e fa’atupu i te mau temeio i roto i tō’u ’orara’a.

Nā roto i te peropheta Elisaia, ’ua ha’amaita’i te Fatu e rave rahi ta’ata nā roto i te mau rāve’a temeio. E tauturu i te mau tamari’i ’ia ’ite i te mau temeio a te Fatu i roto i tō rātou orara’a.

Mau ’ohipari’i e nehenehe e rave

• ’A fa’a’ite hō’ē o te mau temeio ’aore rā, hau atu, tei pāpa’ihia i roto i te Te mau Ari’i 2 4–5 (hi’o « Elisaia te peropheta » ’e « ’Ua fa’aora Elisaia ia Naamana » i roto Te mau ’ā’amu o te Faufa’a Tahito). ’A vaiiho i te mau tamari’i ’ia fa’a’ite mai i te mau mea tā rātou i au i roto i teie mau ’ā’amu. ’A ani ia rātou ’ia fa’ati’a fa’ahou i te mau ’ā’amu i te tahi ’e te tahi.

• ’A fa’a’ite pāpū e nehenehe te Fatu e fa’a’ohipa i tōna mana nō te rave i te mau mea rarahi nō te tauturu ia tātou. Tē parau nei tātou i teie mau mea e mau temeio. ’A fa’a’ite e mea nāhea tō te Fatu fa’a’itera’a i tōna here ia ’outou nā roto i te mau rāve’a rarahi ’e te ha’iha’i. E hīmene ’āmui i te hō’ē hīmene nō ni’a i te here o te Atua, mai te « Mon Père Celeste m’aime » (Chants pour les enfants, 16–17). ’A ani i te mau tamari’i ’ia fa’a’ite mai e mea nāhea tō rātou ’itera’a tē here nei te Atua ia rātou.

Te mau Ari’i 2 5:1–15

E nehenehe au e mā’iti i te rave i tā te Atua e fa’aue mai nā roto i Tāna peropheta.

’Aita i ’ōhie nō Naamana ’ia fāri’i, a parau ai te peropheta Elisaia iāna nāhea ’oia e ora ai i te ma’i lepera. ’A feruri e nāhea e nehenehe ai ia ’outou ’ia tauturu i te mau tamari’i ’ia māramarama i te mau ha’amaita’ira’a e tae mai nā roto i te ha’apa’ora’a.

Mau ’ohipari’i e nehenehe e rave

• ’A fa’ati’a i te ’ā’amu ’o Naamana (hi’o Te mau Ari’i 2 5:9–14 ; « ’Ua fa’aora Elisaia ia Naamana » i roto Te mau ’ā’amu o te Faufa’a Tahito; hi’o ato’a te hōho’a ’o Naamana i roto te arata’ira’a nō teie hepetoma i roto Mai, pe’e mai—nō te ta’ata hō’ē ’e te ’utuāfare). ’A ha’apāpū i te ha’amatara’a ’aita ’o Naamana i hina’aro e horoi iāna i roto i te ’ānāvai nō Ioridana, noa atu te parau a Elisaia e fa’aora te reira i tōna ma’i. ’A parau nō ni’a i te hō’ē taime ’aita ’outou i pāpū e hina’aro ’outou e rave i te ’ohipa ti’a, ’e ’a tauturu i te mau tamari’i ’ia feruri i tō rātou iho hi’ora’a. I muri iho, ’a fa’a’ite e mea nāhea Naamana i te ha’amaita’ira’ahia ’a rave ai ’oia i te mā’itira’a ti’a.

• ’A tai’o i te Te mau Ari’i 2 5:13 i te mau tamari’i, ’e ’a fa’ata’a ’ua tauturu te mau tāvini ’o Naamana iāna ’ia fa’aoti e ha’apa’o i te parau a te peropheta Elisaia. Tauturu i te mau tamari’i ’ia feruri i te mau rāve’a e nehenehe ai rātou e tauturu i tō rātou mau hoa ’aore rā, i te mau melo o te ’utuāfare ’ia fa’aro’o ’e ’ia ha’apa’o i te parau a te peropheta.

Te mau Ari’i 2 6:8–17

Tē ara nei te Fatu i ni’a iā’u.

I te ’itera’a te tāvini o Elisaia i te nu’u Siria i te hā’atira’a ia rātou, ’ua ri’ari’a roa ’oia. Terā rā, ’ua parau atura Elisaia iāna « ’eiaha e mata’u » nō te mea tei pīha’i iho te Fatu ia rātou (Te mau Ari’i 2 6:16).

Mau ’ohipari’i e nehenehe e rave

• E tai’o i Te mau Ari’i 2 6:15 i te mau tamari’i, ’aore rā, ’a fa’ahiti i te reira nā roto i tā ’outou iho parau ’ia māramarama rātou. ’A ani i te mau tamari’i ’ia feruri ’ua hā’atihia rātou nā te hō’ē nu’u rahi, ’e te mau pua’ahorofenua ’e te mau pere’o’o, mai tei tupu i ni’a i te tāvini o Elisaia. E aha tō rātou mana’o ? E aha tā rātou e rave ? ’A ani ia rātou ’ia tāpiri i tō rātou mata ’a tai’o ai ’outou i Te mau Ari’i 2 6:16–17 ia rātou. ’Ia tae ana’e ’outou i ni’a i te mau parau ra « e fa’a’ara’ara ’oe i tōna mata »; ’a ani i te mau tamari’i ’ia ’ara’ara i tō rātou mata. ’A fa’ata’a ia rātou i te mea tā te tāvini i ’ite tei pāruru iāna ’e ia Elisaia. ’A fa’a’ite e mea nāhea ’outou i te ’itera’a te ara nei te Fatu i ni’a ia tātou.

• ’A hīmene ’āmui i te hō’ē hīmene nō ni’a i te aupurura’a a te Atua ia tātou, mai te ’īrava mātāmua o « E te tamari’i here e » (Te mau Hīmene, no. 48). ’A mono i te mau ta’o i roto i te hīmene i te mau i’oa ’o te mau tamari’i nō te ha’apāpū te ara nei te Atua i ni’a ia rātou.

Ha’api’i i te ha’api’ira’a tumu : Te mau tamari’i pa’ari a’e

Te mau Ari’i 2 4–5

E nehenehe te Atua e fa’atupu i te temeio i roto i tō’u orara’a.

I roto i tāna tau tāvinira’a, ’ua fa’aora ’e ’ua ha’amaita’i Elisaia i te mau ta’ata e rave rahi. Nāhea te mau temeio i roto i te Te mau Ari’i 2 4–5 i te tauturu i te mau tamari’i ’ia ’ite i te rima o te Metua i te Ao ra i roto i tō rātou orara’a ?

Mau ’ohipari’i e nehenehe e rave

• E ani i te mau tamari’i ’ia pāpa’i i ni’a i te tāpura ’ere’ere i te rahira’a temeio e roa’a ia rātou ’ia ha’amana’o nō roto mai i te mau pāpa’ira’a mo’a. I muri iho, ’a hōro’a i te taime ia rātou nō te hi’o fa’ahou i Te mau Ari’i 2 4–5 ’e ’ia ’āmui atu i tā rātou tāpura (hi’o Te mau Ari’i 2 4:1–7, 14–17, 32–35, 38–41, 42–44 ; 5:10–14). E aha tā teie mau temeio e ha’api’i nei nō ni’a i te mana’o ’o te Metua i te Ao ra nō ni’a ia tātou ?

• ’A ani i te mau tamari’i ’ia paraparau mai nō ni’a e aha te hō’ē temeio. Mai te mea e hina’aro rātou i te tauturu, e nehenehe tā rātou e hi’o fa’ahou i te « Temeio » i roto i te buka arata’i nō te mau pāpa’ira’a mo’a (scriptures. ChurchofJesusChrist.org). ’A ani ia rātou ’ia fa’a’ite mai i te tahi mau temeio tā Iesu i rave. ’A ’āparau e mea nāhea tō ’outou ’itera’a i te mana’o ’o te Atua i roto i tō ’outou orara’a. E nehenehe ’outou e ’āmui mai i te mau temeio o te mau mahana ato’a, mai te mana’o hau, te hōro’a o te orara’a i te mau mahana ato’a, ’aore rā, te tauturu i roto i te mau ’ohipa o te mau mahana ato’a. E ani i te mau tamari’i ’ia paraparau mai nō ni’a i te mau temeio i roto i tō rātou orara’a, te mea rarahi ’e te mea na’ina’i.

Te mau Ari’i 2 5:1–15

E nehenehe au e mā’iti ’ia vai ha’apa’o maita’i, te ha’eha’a, ’e te ha’apa’o i te parau.

’Ua hina’aro Naamana ’ia fa’aorahia ’oia i te lepera, ’aita rā ’oia i feruri a’e i te arata’ira’a ’ōhie tā Elisaia i hōro’a atu iāna : « ’A haere ’a hopu, ’e ia hitu hopura’a i loridana » (Te mau Ari’i 2 5:10). ’A feruri nāhea e nehenehe ai ia ’outou ’ia fa’a’ohipa i teie ’ā’amu nō te ha’api’i i te mau tamari’i nō ni’a i te fa’aro’o ia Iesu Mesia, te ha’eha’a, ’e te ha’apa’o.

Mau ’ohipari’i e nehenehe e rave

• ’A pāpa’i fa’aro’o, ha’eha’a, ’e ha’apa’o i ni’a i te tāpura ’ere’ere, ’e ’a ani i te mau tamari’i e aha te aura’a teie mau ta’o (hi’o Mau māite i te Fa’aro’o, 54–56, 86–87, 108–9). ’A ani i te mau tamari’i ’ia tai’o i Te mau Ari’i 2 5:9–14. E nehenehe ato’a ’outou e fa’a’ite i te tahi tuha’a o te video « Naamana ’e ’o Elisaia » (ChurchofJesusChrist.org). E mea nāhea tō Naamana fa’a’itera’a i te fa’aro’o i te Fatu, te ha’eha’a, ’e te ha’apa’o ? Nō te aha e mea faufa’a nō tātou ’ia fāri’i i teie mau huru ?

• ’A ani i te mau tamari’i ’ia parau mai nō ni’a i te hō’ē taime a tauturu ai te hō’ē hoa ia rātou ’ia mā’iti i te maita’i. ’A fa’a’ite ato’a i te hō’ē ’itera’a tō ’outou iho. ’A tai’o ’āmui i Te mau Ari’i 2 5:10–13 nō te ha’api’i mai e mea nāhea te mau tāvini o Naamana i te tauturura’a iāna ’ia mā’iti ’ia ha’apa’o i te parau a te peropheta. E aha tā tātou e nehenehe e rave nō te pe’e i tō tātou peropheta i teie mahana ?

• ’A ani i te mau tamari’i ’ia fa’a’ī i te ’api ’ohipara’a ’e ’ia fa’a’ite i te hō’ē melo ’o te ’utuāfare ’aore rā, i te hō’ē hoa i te hō’ē mea tā rātou i ha’api’i mai i roto i te ’ā’amu ’o Naamana i roto i Te mau Ari’i 2 5:1–15.

Te mau Ari’i 2 6:8–17

’Aita vau i vai ’ōtahi noa.

I te tahi taime, e riro te mau tamari’i tā ’outou e ha’api’i ra i te mana’o mai te tāvini o Elisaia— aita i ’ite nāhea ’ia pāhono i te mau tītaura’a i mua ia rātou. E nehenehe tā ’outou e fa’a’ohipa i te ’ā’amu i roto i Te mau Ari’i 2 6:8–17 nō te ha’api’i ia rātou « ’eiaha e mata’u » nō te mea ’aita te Fatu e vaiiho ia rātou ’ia vai ’ōtahi noa.

Mau ’ohipari’i e nehenehe e rave

• ’A tai’o ’āmui Te mau Ari’i 2 6:15–17. ’A ani i te hō’ē o te mau tamari’i ’ia fa’ahua e tāvini ’oia nō Elisaia, ’a ui ai te tahi atu mau tamari’i i te mau uira’a nō ni’a i tōna ’itera’a, mai te huru, e aha tōna huru i te hā’atira’a te nu’u Siria i te ’oire, ’aore rā, e aha te huru i te ’itera’a i te nu’u o te Atua. ’A paraparau i te mau tamari’i nō ni’a i te mau taime ’a vai ’ōtahi ai rātou i te tāmatara’a i te ora i te ’evanelia. Nāhea te Fatu i te tauturu ia tātou ’ia ’ite ’aita tātou i vai ’ōtahi noa ?

• ’A hīmene i te hō’ē hīmene nō ni’a i te ti’aturira’a i te Fatu, mai te « When Faith Endures » (Hymns, no. 128). E aha tā teie hīmene e ha’api’i mai nei ia tātou nō ni’a i te ti’aturira’a i te Fatu ?

Fa’aitoito i te ’apora’a mai i te fare

E ani i te mau tamari’i ’ia fa’a’ite mai i te mau ’itera’a ’e tō rātou ’utuāfare ’a ’ite ai rātou i te rima o te Atua i roto i tō rātou orara’a. Fa’aitoito ia rātou ’ia ani i te mau melo o tō rātou ’utuāfare ’ia fa’a’ite mai i te mau ’itera’a mai te reira.

Ha’amaita’ira’a i tā tātou ha’api’ira’a

E ’apo mai te mau tamari’i nā roto i te mau rāve’a e rave rahi. « E maita’i a’e tā ’outou mau tauto’ora’a nō te ha’api’i i te mau tamari’i mai te mea e fa’a’ohipa ’outou i te mau rāve’a ha’api’ira’a rau », mai te mau ’ā’amu, te mau rāve’a ’ite-mata-hia, ’e te mau hīmene (Te ha’api’ira’a mai tā te Fa’aora,25