e fa’aru’e nei te ta’ata i te ’oire tei ha’amouhia

Te horo-’ē-ra’a o te mau mau ’auri, nā James Tissot ‘e vetahi ’ē

11–17 nō Tiurai

Te mau Ari’i 2 17–25

« Ua ti’aturi ’oia i te Atua o ’Īserā’ela ia Iehova »

’A fa’anaho ai ’outou i te mau ’ohipara’a ha’api’ira’a nā te mau tamari’i, ’a ha’amana’o ē, te mau ’ohipara’a nō te mau tamari’i ’āpī a’e i roto i teie arata’ira’a, e nehenehe ïa e fa’aauhia nō te mau tamari’i pa’ari a’e, ’e nā reira ato’a i te tahi pae.

Pāpa’i i te mau mana’o e tae mai

ītona fa’a’itera’a

Tītau i te mana’o

’A pāpa’i i te i’oa o te tamari’i tāta’itahi i ni’a i te hō’ē ’api parau, ’e ’a tu’u i te mau ’api parau i roto i te hō’ē fa’ari’i. I te ’ōmuara’a o te piha ha’api’ira’a, a vaiiho i te mau tamari’i, te tahi i muri i te tahi, ’ia mā’iti i te hō’ē i’oa. ’Ia huti-ana’e-hia te i’oa ’o te hō’ē tamari’i, ’a ani i te reira tamari’i ’ia fa’a’ite i te hō’ē mea tāna i ha’api’i mai nō ni’a i te ’evanelia ’aore rā, nō ni’a ia Iesu, ’aita i maoro a’e nei. ’A nā reira noa e tae roa atu, ’ua fāri’i te tamari’i tāta’itahi i te taime nō te fa’a’ite mai.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te mau Ari’i 2 18:3, 5

E nehenehe au e ti’aturi i te Metua i te Ao ra ’e ia Iesu Mesia.

E nehenehe te hi’ora’a o Hezekia i roto i te Te mau Ari’i 2 18:3, 5 e tauturu i te mau tamari’i tā ’outou e ha’api’i nei ’ia ti’aturi i te Atua.

Mau ’ohipari’i e nehenehe e rave

• ’A fa’a’ite i te tahi mau mea tā te hō’ē ari’i maita’i e rave ’e te tahi mau mea tā te hō’ē ari’i ’ino e rave. ’A ani i te mau tamari’i ’ia ti’a i ni’a ’e ’ia ha’apōpou i te mau ’ohipa maita’i ’e ’ia pārahi i raro nō te mau ’ohipa ’ī’ino. ’A fa’ata’a i te mau tamari’i e rave rahi tō ’Īserā’ela ari’i, e mea parau ti’a te tahi, e ’ere te tahi i te mea parau ti’a. ’A ani i te mau tamari’i ’ia fa’aro’o i te mau mea tei fa’ariro ia Hezekia ’ei ari’i maita’i ’a tai’o ai ’outou i te Te mau Ari’i 2 18:3, 5. ’A tauturu ia rātou ’ia feruri i te mau rāve’a e nehenehe ai tātou e fa’a’ite tē ti’aturi nei tātou i te Fatu mai ia Hezekia.

• ’A tauturu i te mau tamari’i ’ia māramarama i te aura’a nō te parau ra e ti’aturi i te hō’ē ta’ata. ’A paraparau nō ni’a i te mau ta’ata tā ’outou e ti’aturi nei, ’e a vaiiho i te mau tamari’i ’ia nā reira ato’a. Fa’a’ite i te hō’ē hōho’a ’o Iesu Mesia. Nō te aha tātou e nehenehe ai e ti’aturi ia Iesu Mesia ? ’A fa’a’ite i tō ’outou ti’aturi ē, tē here nei Iesu Mesia ia tātou ’e e tauturu ’oia ia tātou ’ia ho’i fa’ahou e ora i pīha’i iho i te Metua i te Ao ra ’e a muri noa atu.

Te mau Ari’i 2 22:8–11 ; 23:2

E ha’amaita’ira’a te mau pāpa’ira’a mo’a.

Noa atu ‘aita te mau tamari’i ’āpī a’e e nehenehe e tai’o ’aore rā e māramarama i te mau mea ato’a i roto i te mau pāpa’ira’a mo’a, e nehenehe rātou e ha’amaita’ihia nā roto i te mana ’o te mau pāpa’ira’a mo’a. E aha tā ’outou e nehenehe e rave nō te tauturu ia rātou ’ia roa’a te hina’aro ’ia ha’amaita’ihia nā te parau a te Atua.

Mau ’ohipari’i e nehenehe e rave

• ’A huna i te hō’ē buka pāpa’ira’a mo’a i te hō’ē vāhi i roto i te piha, ’e ’a ani i te mau tamari’i ’ia ’imi i te reira. ’A fa’ata’a i te ’anotau ’o te ari’i Iosia, e rave rahi ta’ata ’aita e ha’api’i mai i te mau pāpa’ira’a mo’a tae roa i te taime a ’itehia mai ai te reira i te hō’ē tahu’a i roto i te hiero (hi’o Te mau Ari’i 2 22:8–11). E aha te mau pāpa’ira’a mo’a ? Nō te aha e tītauhia ai te mau pāpa’ira’a mo’a nō tātou ? ’A parau i te mau tamari’i nō te aha ’outou e ’oa’oa ai ’ia fāri’i tātou i te mau pāpa’ira’a mo’a i teie mahana, ’e ’a vaiiho ia rātou ’ia fa’a’ite mai i tō rātou mau mana’o nō ni’a i te mau pāpa’ira’a mo’a.

• E tai’o i  Te mau Ari’i 2 23:2 i te mau tamari’i, ’e ’a ani ia rātou ’ia fa’aro’o e aha tā te ari’i i rave nō te mau pāpa’ira’a mo’a. Nō te aha e mea faufa’a nō te ta’ata hō’ē ’ia fa’aro’o i te mau mea tei pāpa’ihia i roto i te mau pāpa’ira’a mo’a ? ’A hīmene i te hō’ē hīmene nō ni’a i te mau pāpa’ira’a mo’a, mai te « Quand je lis l’Ecriture sainte » (Chants pour les enfants, 66), ’e ’a ani i te mau tamari’i ’ia paraparau nō ni’a i tō rātou mana’o ’ia fa’aro’o ana’e rātou i te mau ha’api’ira’a ’e te mau ’ā’amu i roto i te mau pāpa’ira’a mo’a.

  e ’utuāfare e tuatāpapa ra i te mau pāpa’ira’a mo’a

  E nehenehe te mau pāpa’ira’a mo’a e tauturu ’ia fa’afāriu i tō tātou ’ā’au i ni’a i te Fatu.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

Te mau Ari’i 2 18:3–6 ; 19:14–19

E nehenehe au e ti’aturi i te Metua i te Ao ra ’e ia Iesu Mesia.

I te taime ’a ha’ape’ape’a ai te mau ta’ata nō Asiria ia Ierusalema, ’ua fāriu atu te ari’i parauti’a ’o Hezekia i te Fatu ra ma te fa’aro’o. E nehenehe te hi’ora’a o Hezekia e tauturu ia ’outou ’e i te mau tamari’i ’ia paraparau nō ni’a i te huru e nehenehe ai ia tātou ’ia fa’a’ite i tō tātou fa’aro’o i te Fatu, noa atu tē ha’ape’ape’ahia ra taua fa’aro’o ra.

Mau ’ohipari’i e nehenehe e rave

• Ma te fa’a’ohipa i te hōho’a 3 o te Bibilia, « te vāhira’a ’o nā ’ōpū 12 » ’a fa’ata’a poto noa i te mau tamari’i ē, te bāsileia apato’erau o ’Īserā’ela ’ua haruhia ïa ’e te mau ta’ata tei parauhia te mau ta’ata Asiria. ’A fa’ata’a ē, i muri a’era, ’ua tāmata te mau Asiria i te haru i te bāsileia apato’a o Iuda. E ani i te mau tamari’i ’ia feruri e aha te mana’o e tupu i roto ia rātou ’āhiri ē, tē ora ra rātou i Iuda, ’e tē ’ite ra rātou ē, tē haere mai ra te Asiria e ha’amou i te ’oire. ’A ani i te mau tamari’i ’ia tai’o Te mau Ari’i 2 18:3, 5–6 nō te ’ite ē, nō te aha i ti’a ai ia Hezekia, te ari’i nō Iuda, ’ia itoito i te taime ’a tae mai ai te mau ta’ata Asiria.

• E ani i te mau tamari’i ’ia tai’o Te mau Ari’i 2 19:14–19, mā te ’imi i te mea tā Hezekia i rave ’a ha’ape’ape’a mai ai te mau ta’ata Asiria i tōna bāsileia. Nāhea te ravera’a i teie mau mea i te fa’a’ite ē, ’ua ti’aturi ’oia i te Fatu ? E aha tā tātou e nehenehe e rave nō te fa’a’ite i tō tātou ti’aturi i te Fatu ’ia hina’aro ana’e tātou i te tauturu ?

Te mau Ari’i 2 22:8–13 ; 23:2–3

Tē ha’api’i mai nei te mau pāpa’ira’a mo’a iā’u nāhea ’ia pe’e ia Iesu Mesia.

I muri a’e e rave rahi matahiti i roto i te pōiri pae vārua, ’ua fa’a’āpī te mau ’āti Iuda i tā rātou fafaura’a i te Fatu. ’Ua tupu te reira nō te mea ’ua ’itehia i te ari’i Iosia te buka ture ’e ’ua tai’o i te reira i te mau ta’ata. E nehenehe teie ’ā’amu e tauturu i te mau tamari’i ’ia māramarama nō te aha e mea faufa’a rahi te mau pāpa’ira’a mo’a.

Mau ’ohipari’i e nehenehe e rave

• ’A parau i te mau tamari’i ’ua parau te ari’i Iosia i tōna nūna’a ’ia tātā’i i te hiero, ’e ’a rave ai rātou i te reira, ’ua ’itehia ia rātou te tahi mea faufa’a roa. ’A ani i te mau tamari’i ’ia tai’o Te mau Ari’i 2 22:8–11 nō te ’ite e aha te reira. ’A fa’ata’a ē, te buka tei ’itehia ia rātou, tei roto i te reira te mau fafaura’a ’e te mau fa’auera’a ’aita te mau tamari’i o ’Īserā’ela i ’ite. E aha te tupu i ni’a ia tātou ’āhiri ’aita tā tātou e pāpa’ira’a mo’a ? ’A ani i te mau tamari’i nō te aha rātou i māuruuru ai i te fāri’ira’a i te mau pāpa’ira’a mo’a. Nō te aha e mea fifi a’e ’ia pe’e i te Fa’aora ’āhiri ’aita tātou i fāri’i i te mau pāpa’ira’a mo’a ?

• ’A horo’a i te tamari’i tāta’itahi i te hō’ē tuha’a ’api parau, ’e ’a ani ia rātou ’ia pāhae i te reira. ’A fa’ata’a ē, i te ’anotau o te ari’i Iosia, i te tahi taime, ’ua pāhaehae, ’aore rā, ’ua « hahae » te ta’ata i tō rātou mau ’ahu ’ia riri ana’e rātou. ’A ani i te mau tamari’i ’ia ’imi i te ta’o « hahae » i roto Te mau Ari’i 2 22:11. Nō te aha Iosia i riri ai ? ’A tauturu i te mau tamari’i ’ia ’imi i te hō’ē pāhonora’a i roto i te ’īrava 13. Nō te aha e mea faufa’a nō tātou ’ia tai’o tāmau noa i te mau pāpa’ira’a mo’a ?

• E tai’o ’āmui i Te mau Ari’i 2 23:2–3, ’e e ani i te mau tamari’i ’ia ’imi e mea nāhea te mau pāpa’ira’a mo’a i te tauturura’a ia Iosia ’e i tōna nūna’a. ’A fa’a’ite i te mau tamari’i i te hō’ē pāpa’ira’a mo’a tei fa’auru ia ’outou « ’ia pe’e i te Fatu » (’īrava 3), ’e ’a ani i te mau tamari’i ’ia fa’a’ite mai i te mau pāpa’ira’a mo’a tei tauturu ia rātou. ’A hīmene ’amui « Je marche avec Jésus » (ChurchofJesusChrist.org).

Te mau Ari’i 2 23:3

E ha’apa’o vau i tā’u mau fafaura’a i te Atua.

I te ha’api’ira’a mai Iosia ’e tōna mau ta’ata i te mau fa’auera’a a te Atua, ’ua fafau rātou ’ia ha’apa’o i te reira. E nehenehe ’outou e tauturu i te mau tamari’i tā ’outou e ha’api’i ra ’ia hina’aro ia ha’apa’o tāmau noa i te mau fafaura’a tā rātou i rave i te bāpetizora’a.

Mau ’ohipari’i e nehenehe e rave

• E ani i te mau tamari’i ’ia tai’o Te mau Ari’i 2 23:3 ’e ’ia ’imi i te mau ta’o ’aore rā, i te mau pereota ’o tē fa’a’ite ra i te mana’o o te ta’ata nō ni’a i te mau fa’auera’a a te Fatu. ’A ani ia rātou ’ia ti’a i ni’a ’e ’ia paraparau mai nō ni’a i te aura’a ’o te parau « ha’apa’o māite i taua faufa’a ra ». ’A ani ia rātou ’ia haere noa i te vāhi hō’ē ’e ’ia paraparau nō ni’a i te aura’a « ’ua fafau ihora i te tahi faufa’a i te aro ’o Iehova ». E ani ia rātou ’ia tu’u i tō rātou rima i ni’a i tō rātou māfatu ’e ’ia fa’a’ite mai i te mau rāve’a e nehenehe ai ia tātou ’ia ha’apa’o i te mau fa’auera’a « ma tō [tātou] ’ā’au ato’a ».

• E tauturu i te mau tamari’i ’ia hāmani i te hō’ē tāpura nō te mau parau fafau tā rātou i rave i te bāpetizora’a (hi’o Mosia 18:10 ; Te Parau Ha’api’ira’a ’e te mau Parau Fafau 20:37, 77, 79). E aha tā te Atua e fafau mai ia tātou mai te mea ē, e ha’apa’o tātou i tā tātou mau fafaura’a ? E aha tā tātou e ha’api’i mai nei i roto i te Te mau Ari’i 2 23:3 nō ni’a i te huru ’o tā tātou ha’apa’ora’a i tā tātou mau fafaura’a ?

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia fa’a’ite i te hō’ē melo o te ’utuāfare i te hō’ē ’īrava o te pāpa’ira’a mo’a ’aore rā, i te hō’ē ’ā’amu i roto i te mau pāpa’ira’a mo’a tei ha’amaita’i ia rātou.

Ha’amaita’ira’a i tā tātou ha’api’ira’a

’A patu i te ti’aturira’a i te mau tamari’i. Hō’ē rāve’a nō te tauturu i te mau tamari’i ’ia noa’a te ti’aturira’a ’oia ho’i, ’ia ’ārue ia rātou ’ia paraparau ana’e mai rātou i roto i te piha ha’api’ira’a. ’A parau fafau i te mau tamari’i ē, e tauturu te Vārua Maita’i ia rātou ’a ha’api’i mai ai rātou.

’api ’ohipara’a : E ha’amaita’ira’a te mau pāpa’ira’a mo’a