Te ’aro nei ’o ’Elia i te mau tahu’a ’o Baala, nā Jerry Harston

27 nō Tiunu–3 nō Tiurai

Te mau Ari’i 1 17–19

« ’O Iehova te Atua ra, ’a pe’e Iāna »

Te rahira’a ’o te mau tamari’i e mea au nā rātou i te mau ’ā’amu. E tauturu i te mau tamari’i ’ia ’imi i te mau parau mau i roto i te mau ’ā’amu e ’itehia i roto i 1 Te mau Ari’i 17–19 ’o tē ha’apūai i tō rātou fa’aro’o ia Iesu Mesia.

Pāpa’i i te mau mana’o e tae mai

Tītau i te mana’o

E fa’a’ite i te mau tamari’i i te mau hōho’a i roto i te arata’ira’a nō teie hepetoma i roto i te Mai, Pe’e mai—Nō te Ta’ata hō’ē ’e te ’Utuāfare. ’A ani ia rātou ’ia fa’a’ite mai i te mea tā rātou i ’ite nō ni’a i te mau ’ā’amu i fa’a’itehia i roto i te mau hōho’a. E aha tā tātou e ’apo mai i roto i teie nā ’ā’amu ?

Ha’api’i i te ha’api’ira’a tumu : Te mau tamari’i ’āpī a’e

1 Te mau Ari’i 17

E ha’amaita’i te Fatu i te feiā e fa’aro’o tō rātou.

Te fa’a’ite mai nei1 Te mau Ari’i 17 e rave rahi hi’ora’a ’o te fa’aro’o rahi. ’Ei fa’ahōpe’ara’a nō te fa’aro’o rahi, ’ua fa’a’amuhia ’o Elia nā te mau oreba i te hō’ē pu’e tau o’e, ’ua fa’arahihia te mā’a a te hō’ē vahine ’ivi ’e tāna tamaiti, ’e ’ua fa’ati’a mai ’o Elia i te tamaiti a te vahine ’ivi mai te pohe mai.

Mau ’ohipa e nehenehe e rave

• ’A pia i te mau hōho’a ’aore rā, te mau tao’a e tū’ati i ni’a i te mau ’ā’amu i roto i 1 Te mau Ari’i 17, mai te mau manu, te faraoa, ’aore rā, hō’ē tamaiti. A fa’ati’a i teie mau ’ā’amu i te mau tamari’i (« Elia te peropheta » i roto i Te mau ’ā’amu ’o te Faufa’a Tahito e nehenehe e tauturu), ’e e ani ia rātou ’ia ’imi i te hōho’a ’aore rā, te tao’a e tano i ni’a i te ’ā’amu tāta’itahi. A ha’apāpū ē, e fa’aro’o tō Elia ’e tō te vahine ’ivi ia Iesu Mesia ’e ’ua fāri’i i te mau ha’amaita’ira’a rahi.

• ’A tauturu i te mau tamari’i ’ia feruri i te mau rāve’a e nehenehe ai ia rātou ’ia fa’a’ite ē, e fa’aro’o tō rātou i te Metua i te Ao ra ’e ia Iesu Mesia, ’oia ho’i, e fa’aro’o tō rātou ia rāua ’e e ti’aturi ho’i ia rāua. ’A hīmene ’e o rātou i te hō’ē hīmene nō ni’a i te fa’aro’o, mai te «’Ua ’ite au tē ora nei tō’u metua » (Chants pour les enfants,8).

1 Te mau Ari’i 18:17–39

E nehenehe au e mā’iti e pe’e ia Iesu Mesia.

’Ua fa’aitoito ’o Elia i te mau ta’ata ’o Iseraela ’ia rave i te hō’ē fa’aotira’a nō te pe’e ia Iesu Mesia. ’A tauturu i te mau tamari’i ’ia ’ite e nehenehe rātou e rave ato’a i teie fa’aotira’a.

Mau ’ohipa e nehenehe e rave

• ’A fa’ata’a i te mau tamari’i ’aita te mau ta’ata i te ’anotau ’o Elia i pāpū e hina’aro ānei rātou e pe’e i te Fatu. ’A fa’a’ite i te ’ā’amu nō tō Elia anira’a ia rātou ’ia mā’iti ’ia pe’e i te Fatu, e ’itehia i roto i te 1 Te mau Ari’i 18:17 – 39 (’a hi’o ato’a « Elia ’e te mau tahu’a nō Baala » i roto i Te mau ’ā’amu nō te Faufa’a Tahito). ’A parau i te mau tamari’i nō te aha ’outou e mā’iti ai ’ia pe’e ia Iesu Mesia, ’e ’a ani ia rātou nō te aha rātou e mā’iti ai ’ia pe’e Iāna.

• E tai’o i te mau tamari’i i te mea tā Elia i parau i te ta’ata: « ’O Iehova te Atua ra, ’a pe’e iāna » (1 Te mau Ari’i 18:21). E aha te auraʼa e pe’e ’ia Iesu Mesia ? E tauturu i te mau tamari’i ’ia feruri i te mau ’ohipa pāpū tā rātou e rave nō te pe’e ia Iesu Mesia, ’e ’a ani ia rātou ’ia pāpa’i i tō rātou iho hōho’a tē rave ra i te reira mau ’ohipa.

  

  E nehenehe tātou e mā’iti ’ia pe’e ia Iesu Mesia.

1 Te mau Ari’i 19:9–12

E paraparau mai te Vārua Maita’i iā’u ma te reo iti ha’iha’i.

Nā roto i te tahi arata’ira’a, e nehenehe te mau tamari’i ’āpī e ’ite i te fa’aurura’a a te Vārua Maita’i i roto i tō rātou orara’a. ’A feruri e nāhea e nehenehe ai ia ’outou ’ia tauturu ia rātou.

Mau ’ohipa e nehenehe e rave

• Nō te mau tamari’i, ’a ha’apoto i te ’ā’amu e ’itehia i roto i 1 Te mau Ari’i 19:9 – 12, ’e ’a tai’o i te mau ’īrava 11 – 12. E ani ia rātou ’ia rave i te mau ’ohipa nō te fa’ahōho’a i te mata’i pūai, te ’āueuera’a fenua, ’e te auahi. I muri iho, ’a ani ia rātou ’ia pārahi noa mā te māniania ’ore ’a tai’o ai ’outou i te hope’a ’o te ’īrava 12 mā te reo marū: « e oti a’era te auahi, e reo iti ha’iha’i maira. » ’A ani ia rātou ’ia tāmata i te paraparau ma te reo iti ha’iha’i. ’A parau ia rātou nō ni’a i te mau taime ’a fāri’i ai ’outou i te hō’ē muhumuhu nō ’ō mai i te Vārua Maita’i ra.

• ’A tauturu i te mau tamari’i ’ia ’ite e aha te taime i fāri’i ai rātou i te fa’aurura’a a te Vārua Maita’i. Ei hi’ora’a, ’a ha’uti ’aore rā ’a hīmene i te hō’ē hīmene tura nō ni’a ia Iesu, ’e ’a ani ia rātou e aha tō rātou mana’o ’ia feruri ana’e rātou iāna. ’A ui ia rātou e aha tō rātou mana’o i roto i te tahi atu mau ’ohipara’a tura, mai te purera’a ’e tō rātou ’utuāfare, ’aore rā, te ravera’a i te ’oro’a mo’a. ’A fa’ata’a nō ’ō mai teie mau mana’o i te Vārua Maita’i ra. ’A parau i te mau tamari’i e mea nāhea te mana ’o te Vārua Maita’i i te ha’amaita’ira’a i tō ’outou orara’a.

Ha’api’i i te ha’api’ira’a tumu : Te mau tamari’i pa’ari a’e

1 Te mau Ari’i 17:8–16

’Ia ani mai te Fatu iā’u ’ia fa’atusia, e nehenehe au e ha’apa’o mā te fa’aro’o.

’Ua ti’aturi te vahine ’ivi nō Zarephate i te Fatu ’e i Tāna peropheta, noa atu ’ua tītauhia iāna ’ia rave i te hō’ē fa’atusiara’a rahi. E nehenehe teie ’ā’amu e tauturu i te mau tamari’i i te taime e ani mai ai te Fatu ia rātou ’ia fa’atusia.

Mau ’ohipa e nehenehe e rave

• E tai’o i te mau tamari’i i te 1 Te mau Ari’i 17:8 – 16. ’A ani ia rātou ’ia ha’uti i te ’ā’amu ’a tai’o ai ’outou i te reira nō te piti ’o te taime. ’A fa’aea i ni’a i te mau tuha’a rau ’e ’a ui ia rātou e aha tō rātou mana’o ’āhani ē, ’o rātou ’o Elia ’aore rā, te vahine ’ivi. E ani ia rātou ’ia fa’a’ite mai i te mea tā rātou i ha’api’i mai nā roto mai i teie ’ā’amu.

• ’A ani i te hō’ē tamari’i ’ia pāpa’i i ni’a i te tāpura ’ere’ere i te hō’ē hōho’a ’o te mea tā te Fatu i ani i te vahine ’ivi ’ia hōro’a nā Elia (’a hi’o i te 1 Te mau Ari’i 17:12 – 13). ’A ani i te tahi atu tamari’i ’ia pāpa’i hōho’a i te mea tā te vahine ’ivi i fāri’i ’ei fa’aho’ira’a (’a hi’o i te 1 Te mau Ari’i 17:15–16). E aha te tahi mau mea tā te Fatu e ani mai nei ia tātou ’ia fa’atusia ? E ani i te mau tamari’i ’ia fa’a’ite mai e mea nāhea rātou i te ha’amaita’ira’ahia nō te fa’atusiara’a.

1 Te mau Ari’i 18:17–39

E nehenehe au e mā’iti e pe’e ia Iesu Mesia.

’Aita te ’āti Iseraela i pāpū e pe’e ānei i te Fatu. ’A feruri e nāhea ’outou ’ia fa’auru i te mau tamari’i ’ia riro ’ei mau tamari’i ha’apa’o i roto i tō rātou ti’ara’a pipi.

Mau ’ohipa e nehenehe e rave

• ’A fa’aue i te tamari’i tāta’itahi ’ia tai’o e rave rahi ’īrava i roto i te 1 Te mau Ari’i 18:17–39 ’e ’ia pāpa’i i te hō’ē hōho’a nō te mea tā tāna mau ’īrava e tātara ra. ’A tauturu i te mau tamari’i ’ia māramarama i te mau ’īrava mai te peu e tītauhia. I muri iho, ’a vaiiho ia rātou ’ia fa’a’ohipa i tā rātou hōho’a nō te fa’ati’a i te ’ā’amu. E aha tā teie ’ā’amu e ha’api’i nei ia tātou nō ni’a i te Fatu ?

• ’A ani i te mau tamari’i ’ia paraparau mai nō ni’a i te mau taime ’a tītauhia ai ia rātou ’ia rave i te fa’aotira’a i rotopū e piti nā mea ta’a ’ē. E aha te mea i tauturu ia rātou ’ia fa’aoti ? ’A tauturu ia rātou ’ia feruri i te mau taime e tītauhia ai ia rātou ’ia fa’aoti e pe’e ānei ia Iesu Mesia ’aore rā, ’eiaha. E aha te mau parau mau i roto i te ’ā’amu i roto i te 1 Te mau Ari’i 18:17–39 e nehenehe e tauturu ia rātou ’ia fa’aoti ?

1 Te mau Ari’i 19:9–12

E paraparau mai te Vārua Maita’i iā’u ma te reo iti ha’iha’i.

’Ua ’ī te ao nei i te mau māniania fa’anevaneva ’o tē ha’afifi ’ia fa’aro’o i te reo iti ha’iha’i ’o te Vārua. Nāhea ’outou i te tauturu i te mau tamari’i ’ia fa’aro’o i te reira ?

Mau ’ohipa e nehenehe e rave

• ’A ani i te mau tamari’i ’ia fa’aro’o maitai ’a taio’ ai ’outou ia rātou ma te marū i te 1 Te mau Ari’i 19:11–12 . ’A ani ia rātou ’ia ’imi i te 1 Te mau Ari’i 19 nō te ’ite mai i te mau ’īrava tā ’outou e tai’o ra ’e ’ia ha’api’i mai e aha tā Elia i rave. ’A ’āparau e aha tei ti’a ia rātou ’ia rave nō te fa’aro’o i te mea tā ’outou i parau, ’e ’a tauturu ia rātou ’ia fa’aau i teie i ni’a i te mea ’o tē ti’a ia tātou ’ia rave nō te fa’aro’o i te « reo iti ha’iha’i » ’o te Vārua. ’A vaiiho i te mau tamari’i, te tahi i muri i te tahi ’ia tai’o ma te marū i te tahi atu mau ’īrava i roto i te 1 Te mau Ari’i 19 ‘a imi ai te tahi atu mau tamari’i i taua mau ’īrava i roto i te mau pāpa’ira’a mo’a.

• ’A fa’a’ite i te mau tamari’i i te tahi atu mau pāpa’ira’a mo’a ’o tē fa’ata’a e mea nāhea te Vārua ’ia paraparau mai ia tātou (’a hi’o i te buka arata’i nō te mau pāpa’ira’a mo’a, « fa’aurura’a, fa’auru», scriptures.ChurchofJesusChrist.org). ’A ani i te mau tamari’i ’ia paraparau mai nō ni’a i te mau taime ’a fāri’i ai rātou i te Vārua Maita’i i te arata’ira’a ia rātou ’aore rā, i te fa’a’ite-pāpū-ra’a ia rātou. E aha tā rātou e rave ra ? E aha te mea e nehenehe e fa’anevaneva ia tātou i te ’itera’a i te Vārua ? E tai’o ’āmui i te Moroni 4:3, ’e e fa’aitoito i te mau tamari’i ’ia mā’iti i te hō’ē mea tā rātou e rave « ’ia vai noa tōna vārua i roto ia rātou ».

Fa’aitoito i te ’apora’a mai i te fare

E ani i te mau tamari’i ’ia feruri i te hō’ē mea tā rātou e hina’aro e rave nō te mea tā rātou i ’apo mai i teie mahana. ’Ei hi’ora’a, e nehenehe rātou e ha’amau i te hō’ē ’ōpuara’a i te pae vārua, te pae ferurira’a, te pae tino, ’aore rā, te pae tōtiare nō te riro hau atu mai ia Iesu Mesia.

Ha’amaita’ira’a i tā tātou ha’api’ira’a

Tauturu i te mau tamari’i ’ia ’ite i te Vārua. « Hō’ē ’o te mau mea faufa’a rahi roa e nehenehe tā ’outou e rave ’ei ’orometua ha’api’i, ’o te tauturura’a ïa i te feiā tā ’outou e ha’api’i nei ’ia ’ite i te fa’aurura’a a te Vārua Maita’i. ’A tauturu [i te mau tamari’i] ’ia ’āpiti i tō rātou mau mana’o pae vārua i te fa’aurura’a a te Vārua Maita’i. »(Ha’api’ira’a mai tā te Fa’aora,11).