Fa’ahōho’ara’a o te hiero nō Zerubabela, nā Sam Lawlor

18-24 nō Tiurai

Ezera 1 ; 3–7 ; Nehemia 2 ; 4–6 ; 8

« E ’ohipa rahi tā’u e rave nei »

’A tuatāpapa ai ’outou, ’a feruri ē, e aha te parau poro’i i roto i te Ezera ’e te Nehemia e hina’aro-rahi-hia a’e nā te mau tamari’i tā ’outou e ha’api’i ra. ’A hāmani i te hō’ē fa’anahora’a tei roto te mau mana’o tā ’outou i fāri’i nō roto mai i te Vārua Maita’i.

Pāpa’i i te mau mana’o e tae mai

Tītau i te mana’o

’A pāpa’i i ni’a i te tāpura ’ere’ere Zerubabela, Ezera, ʼe Nehemia. ’A pāpa’i ’aore rā, ’a fa’a’ite i te tahi mau hōho’a nō ni’a i teie mau ta’ata, mai te hō’ē hiero, te mau pāpa’ira’a mo’a, ’e te mau patu o Ierusalema. E tauturu i te mau tamari’i ’ia fa’atū’ati i te mau i’oa i ni’a i te mau hōho’a, ’e ’a vaiiho ia rātou ’ia fa’a’ite mai i te mea tā rātou i ’ite nō ni’a i te ’ohipa tā teie mau ta’ata i rave.

Ha’api’i i te ha’api’ira’a tumu : Te mau tamari’i ’āpī a’e

Ezera 3:8–13

E nehenehe te hiero e hōro’a mai i te ’oa’oa iā’u.

E nehenehe te ’ā’amu nō Zerubabela ’e te mau ’āti Iuda e patu fa’ahou ra i te hiero, e tauturu i te mau tamari’i tā ’outou e ha’api’i ra, ’ia ’oa’oa i te mau ha’amaita’ira’a e tae mai maoti te fare o te Fatu.

Mau ’ohipari’i e nehenehe e rave

• E ani i te mau tamari’i ’ia paraparau mai nō ni’a i te hō’ē mea e fa’a’oa’oa ia rātou. ’A fa’a’ite i te hō’ē hōho’a nō te hō’ē ta’ata e ’ata ra i mua i te hō’ē hiero (mai te hōho’a i roto i teie arata’ira’a), ’e ’a ani i te mau tamari’i nō te aha teie ta’ata i ’oa’oa ai. ’A fa’a’ite pāpū ē, te hiero, ’o te fare ïa o te Fatu, ’e ’a fa’ati’a nō ni’a i te hō’ē taime ’a ’oa’oa ai ’outou maoti te hiero.

• ’A tai’o i mua i te mau tamari’i i te tuha’a hope’a o te Ezera 3:12, ma te fa’ata’a ē, i te taime ’a ha’amau ai te ’āti Iuda i te niu ’o te hiero, « e rave rahi ato’a ho’i tei ’ūmere noa i te ’oa’oa ». E ani i te mau tamari’i ’ia ’ūmere i te ’oa’oa. ’A tauturu ia rātou ’ia feruri i te mau tumu e nehenehe ai tātou e ’oa’oa nō ni’a i te hiero. ’Ei hi’ora’a, i roto i te hiero e rave tātou i te mau fafaura’a i mua i te Atua ’o tē fa’ati’a i tō tātou ’utuāfare ’ia vai hō’ē ’e ’a muri noa atu.

• Hīmene e te mau tamari’i i te hō’ē hīmene nō ni’a i te hiero, mai te « Oh, J’aime voir le temple » Chants pour les enfants, 99). I muri iho i te rēni tāta’itahi, ’a fa’aea nō te ani i te hō’ē tamari’i ’ia fa’a’ite mai i te hō’ē mea tāna i here nō ni’a i te hiero.

  

  E nehenehe te hiero e riro ’ei tumu nō te ’oa’oa i roto i tō tātou orara’a.

Nehemia 2:17–20 ; 6:1–9

E tauturu te Fatu iā’u ’ia rave i tāna ’ohipa.

’A tātā’i ai Nehemia i te papa’i e hā’ati ra ia Ierusalema, ’ua tāmata tōna mau ’enemi i te tāpe’a iāna ’ia fa’aea, terā rā, ’ua ha’apa’o tāmau noa ’oia i tāna ’ohipa. E aha te tahi mau mea faufa’a tā te Fatu e hina’aro nei i te mau tamari’i ’ia rave, ’e nāhea e nehenehe ai ia ’outou ’ia fa’auru ia rātou ’ia ha’apa’o maita’i i taua ’ohipa ra ?

Mau ’ohipari’i e nehenehe e rave

• ’A fa’a’ite i te mau tamari’i i te ’ā’amu ’o Nehemia (hi’o Nehemia 2:17–20 ; 6:1–9; Dieter F. Uchtdorf, « E ’ohipa rahi tā mātou e rave nei ’e e’ita mātou e nehenehe e haere atu i raro », Liahona, Mē 2009, 59–62). ’A parau i te mau tamari’i i te mea tā Nehemia i parau i te taime a tāhitohito ai te ta’ata iāna nō te hina’arora’a e tātā’i i te mau papa’i o Ierusalema : « Nā te Atua i te ra’i e fa’atupu i tō mātou hina’aro; ’e teienei, e ti’a mātou ’o tōna mau tāvini e rave e patu » (Nehemia 2:20). E ani i te mau tamari’i ’ia ti’a i ni’a ’e ’ia fa’ahōho’a i te tauturura’a i te tātā’ira’a i te mau papa’i o Ierusalema.

• ’A hōpoi mai i te tahi mau ’ōfa’i i roto i te piha ha’api’ira’a, ’e ’a vaiiho i te mau tamari’i ’ia fa’a’ohipa i te reira nō te tauturu ia ’outou i te patura’a i te hō’ē papa’i (’aore rā, a pāpa’i i te hō’ē papa’i i ni’a i te tāpura ’ere’ere). E tauturu i te mau tamari’i ’ia feruri i te tahi mau mea faufa’a tā te Metua i te Ao ra e nehenehe e ani mai ia rātou ’ia rave, mai te ha’api’ira’a ’ia tai’o i te mau pāpa’ira’a mo’a. Nō te mana’o tāta’itahi tā rātou e fa’a’ite mai, ’a ani ia rātou ’ia tu’u i te hō’ē ’ōfa’i i ni’a i te papa’i. ’A fa’ata’a ē, ’a rave ai Nehemia i tāna ’ohipa faufa’a nō te tātā’ira’a i te mau papa’i o Ierusalema, ’ua tāmata te ta’ata i te tāpe’a iāna. E tai’o i te Nehemia 6:9, ’e e ani i te mau tamari’i ’ia ’āfa’i i tō rātou rima i ni’a ’ia tai’o ana’e ’outou « ’eta’eta atu ra rā tō’u rima i reira ». ’A parau i te mau tamari’i nō ni’a i te hō’ē taime ’a ’ite ai ’outou i tō te Atua ha’apūaira’a i tō ’outou rima nō te rave i tāna ’ohipa.

Nehemia 8:1–12

E ha’amaita’ira’a te mau pāpa’ira’a mo’a.

E nehenehe ’outou e fa’a’ohipa i te ’ā’amu ’o Ezera i te tai’ora’a i te ture nō te tauturu i te mau tamari’i ’ia feruri i tō tātou ha’amaita’ira’a rahi i te fāri’ira’a i te mau pāpa’ira’a mo’a.

Mau ’ohipari’i e nehenehe e rave

• ’A parau i te mau tamari’i ē, ’ua tai’o Ezera i te mau pāpa’ira’a mo’a i te ta’ata. ’A tai’o pūai i te tahi mau pereota i roto i te Nehemia 8:2–3, 5–6, 8–9, 12 ’o tē fa’ata’a nei i te mea tā te mau ta’ata i rave ’a fa’aro’o ai rātou i te mau pāpa’ira’a mo’a, ’e ’a ani i te mau tamari’i ’ia ha’uti i teie mau pereota. Nō te aha tātou i māuruuru ai i te fāri’ira’a i te mau pāpa’ira’a mo’a ?

• E ani i te mau tamari’i ’ia fa’a’ū i te ’api ’ohipara’a nō teie hepetoma. ’Ia rave ana’e rātou i te reira, ’a fa’a’ite i te mau tamari’i e mea nāhea te tai’ora’a i te mau pāpa’ira’a mo’a i te ha’afātatara’a ia ’outou i te Fa’aora.

Ha’api’i i te ha’api’ira’a tumu : Te mau tamari’i pa’ari a’e

Ezera 3:8–13; 6:16–22

Tē hōro’a mai nei te hiero iā’u i te tumu nō te ’oa’oa.

’A hi’o fa’ahou ai ’outou ’e te mau tamari’i i te ’ā’amu ’o Zerubabela ’e te mau ’āti Iuda i te patu-fa’ahou-ra’a i te hiero, ’a ’imi i te mau rāve’a nō te fa’a’ite pāpū i te ’oa’oa tā tātou e fāri’i nō te mea e hiero tō tātou i teie mahana.

Mau ’ohipari’i e nehenehe e rave

• ’A ani i te mau tamari’i ’ia ’ohipa ’āmui nō te ’imi i te mau pereota i roto i te Ezera 3:10–13 ’o tē fa’a’ite nei e aha te mana’o o te mau ’āti Iuda ’a patu-fa’ahou-hia ai te hiero i Ierusalema. Nāhea e ti’a ai ’ia tātou ’ia fa’a’ite i tō tātou ’oa’oa i te vaira’a te mau hiero i ni’a i te fenua nei i teie mahana ? E tauturu i te mau tamari’i ’ia feruri i te mau rāve’a e nehenehe ai rātou e fa’aineine ’ia haere i te hiero.

• ’A fa’a’ite i te mau tamari’i i tō ’outou mau mana’o nō ni’a i te hiero. E mea nāhea te hiero i te tauturura’a ia ’outou ’ia vai fātata i tō tātou Metua i te Ao ra ’e i te Fa’aora ? Nō te aha tātou e fa’ahanahana ai ’ia ha’amo’a-ana’e-hia te hō’ē hiero ? ’A hōro’a i te taime i te mau tamari’i nō te pāpa’i i tō rātou mana’o nō ni’a i te hiero, ’e ’a fa’aitoito ia rātou ’ia fa’a’ite i tō rātou ’utuāfare i te mea tā rātou i pāpa’i.

Nehemia 2; 4; 6

E ha’apūai te Fatu iā’u ’ia rave i « te ’ohipa rahi ».

E ’ohipa faufa’a tā te Fatu nā te mau tamari’i tā ’outou e ha’api’i ra. E aha tā rātou e nehenehe e ha’api’i mai i roto i te Nehemia nō ni’a i te fa’aitoitora’a i roto i taua ’ohipa ra, noa atu ē, te vai ra te pāto’ito’ira’a.

Mau ’ohipari’i e nehenehe e rave

• ’A hi’o fa’ahou ’e te mau tamari’i i te ’ā’amu nō ni’a ia Nehemia i te tātā’ira’a i te mau papa’i e hā’ati ra ia Ierusalema, ’e tae noa atu i te pāto’ito’ira’a tāna i fa’aruru. ’A tai’o ’āmui i te Nehemia 2:19, ’e ’a ani i te mau tamari’i ’ia fa’a’ite i te mau tupura’a e nehenehe te hō’ē ta’ata e ’ata ia tātou nō te ravera’a i te ’ohipa maita’i. Mai te au i te Nehemia 2:20, e aha te pāhonora’a a Nehemia ? Nāhea tātou e nehenehe ai e pāhono ’ia fa’ao’ō’o mai te ta’ata ia tātou ’aore rā, ’ia fa’a’ino mai ia tātou nō te ravera’a i te ’ohipa maita’i ?

• E tai’o ’āmui i te Nehemia 6:1–9. E mea nāhea te mau ’enemi o Nehemia i te tāmaura’a i te tāpe’a iāna ’ia fa’aea i te rave i te ’ohipa i ni’a i te papa’i, ’e e aha tāna pāhonora’a ? E aha te ’ohipa tā te Atua e hina’aro nei ’ia rave tātou ? (hi’o, ’ei hi’ora’a, Mosia 18:8–10). Nāhea e ti’a ai ia tātou ’ia pe’e i te hi’ora’a ’o Nehemia i roto i te ’īrava 9 , mai te mea ē, e mea fifi ’ia rave i te mea tā te Atua i ani ia tātou ’ia rave ?

Nehemia 8:1–12

E ha’amaita’ihia vau ’ia tuatāpapa ana’e au i te mau pāpa’ira’a mo’a.

’Aita te mau ta’ata i Ierusalema i fa’aro’o i te mau parau a te Atua i roto i te hō’ē tau maoro hou a tai’o ai Ezera i te reira i te mau ta’ata. Tē fa’aha’amana’o mai nei te ’ā’amu ’o Ezera ia tātou i te faufa’a o te mau pāpa’ira’a mo’a nō tātou.

Mau ’ohipari’i e nehenehe e rave

• E ani i te mau tamari’i ’ia ’imi i te Nehemia 8:1–12 nō te mau ta’o ’aore rā, te mau pereota ’o tē fa’a’ite mai ē, e aha te mana’o o te ta’ata nō ni’a i te fa’aro’ora’a i te parau a te Atua. ’A ani i te mau tamari’i ’ia fa’a’ite mai i tō rātou mana’o ’ia tai’o ana’e rātou i te mau pāpa’ira’a mo’a, ’e a fa’a’ite ato’a i tō ’outou mau mana’o.

• E ani i te hō’ē tamari’i ’ia tai’o i te Nehemia 8:8, ’e e ani i te mau tamari’i e aha tē tauturu ia rātou ’ia hāro’aro’a i te mau pāpa’ira’a mo’a. ’A fa’a’ite ’ia rātou nāhea ’ia fa’a’ohipa i te mau tauturu o te tuatāpapara’a pāpa’ira’a mo’a mai Te arata’i pāpa’ira’a mo’a ’e te mau Tumu parau o te ’evanelia (ChurchofJesusChrist.org). E ani i te mau tamari’i ’ia fa’a’ite mai i te hō’ē mea tā rātou i ha’api’i mai nō ni’a i te Fa’aora mai roto mai i te mau pāpa’ira’a mo’a.

Fa’aitoito i te ’apora’a mai i te fare

E ani i te mau tamari’i ’ia mā’iti i te hō’ē mea tā rātou i ha’api’i mai i teie mahana tā rātou e hina’aro e fa’a’ite i tō rātou ’utuāfare.

Ha’amaita’ira’a i tā tātou ha’api’ira’a

Fa’aineine i te pae vārua « Te ha’api’ira’a i te ’evanelia ma te mana rahi, e ’ere noa ïa i te fa’aineinera’a i te hō’ē ha’api’ira’a, ’o te fa’aineine-ato’a-ra’a rā ia tātou iho nei… Te mau ’orometua ha’api’i ’evanelia maita’i—hou ’a feruri ai rātou i te fa’a’īra’a i te taime nō te piha ha’api’ira’a—e fa’atumu rātou i ni’a i te fa’a’īra’a i tō rātou ’ā’au i te Vārua Maita’i » (Ha’api’ira’a mai tā te Fa’aora, 12).