Ko Hoku Tauhí [ʻa e ʻEikí], tā ʻe Yongsung Kim, havenlight.com

8–14 ʻAokosi

Ngaahi Saame 1–2; 8; 19–33; 40; 46

“Ko Hoku Tauhí [ʻa e ʻEikí]”

ʻOku fokotuʻu atu ʻe he lēsoni ko ʻení ha ngaahi potufolofola lelei ʻi he Ngaahi Sāmé te ne tāpuekina e fānaú, ka ʻe malava pē ke ke ngāue ʻaki ha ngaahi potufolofola kehe. Muimui ki he fakahinohino ʻa e Laumālié.

Lekooti Hoʻo Ngaahi Ongó

Fakaafeʻi e Feʻinasiʻakí

Tomuʻa fakaafeʻi ha fānau ʻe niʻihi ke nau omi ki he kalasí mo ha ngaahi tā fakatātā ʻokú ne fakafofongaʻi ha ngaahi meʻa ʻoku nau lau fekauʻaki mo ia mo honau fāmilí ʻi he Sāmé he uiké ni, hangē ko e tauhi sipí (vakai, Saame 23:1), ko ha ipu (vakai, Saame 23:5), pe ko ha foʻi haati (vakai, Saame 24:4). Fakaafeʻi kinautolu ke talanoa fekauʻaki mo ʻenau ngaahi fakatātaá mo ha veesi mei he Sāmé ʻokú ne fakamatalaʻi ʻenau fakatātaá.

Akoʻi e Tokāteliné: Fānau Iiki Angé

Saame 19:1; 33:5

“ ʻOku fakahā ʻe he ngaahi langí ʻa e nāunau ʻo e ʻOtuá.”

ʻOku akoʻi mai ʻe he Saame 19 mo e 33 te tau lava ʻo maʻu ha fakamoʻoni ʻa e nāunau mo e lelei ʻo e ʻOtuá mei hotau ʻātakaí kotoa mo ʻEne ngaahi fakatupu fakaʻofoʻofá. Tokoni ki he fānaú ke nau ako ke ʻilo e toʻukupu ʻo e ʻOtuá ʻi he māmani ʻoku nau nofo aí.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha ngaahi fakatātā ʻe niʻihi ʻo e ngaahi meʻa fakaʻofoʻofa kuo fakatupu ʻe he ʻOtuá, pe sio fakataha ki tuʻa ʻi ha matapā sioʻata ki he ngaahi meʻá ni. ʻEke ki he fānaú pe ko e hā ʻoku nau saiʻia ai ʻi he ngaahi fakatupu ʻa e Tamai Hēvaní. Lau ʻa e Saame 19:1 pe 33:5, pea ʻeke ki he fānaú e ongo ʻoku nau maʻu fekauʻaki mo e Tamai Hēvaní ʻi heʻenau vakai ki Heʻene ngaahi fakatupú.

• Hivaʻi fakataha ha foʻi hiva fekauʻaki mo e ngaahi fakatupu ʻa e ʻOtuá, hangē ko e “Fakaʻofoʻofa ʻa Māmaní” (Tohi Hiva ʻa e Fānaú, 123). Fakaafeʻi e fānaú ke nau fili ha meʻa kuo fakatupu ʻe he ʻOtuá (hangē ko ha meʻa ne ʻasi ʻi he hivá) pea tā hano fakatātā ke vahevahe mo honau ngaahi fāmilí.

Saame 23

“Ko hoku tauhí ʻa [e ʻEikí].”

Kapau ʻe lava ke ako kei iiki ʻe he fānaú ko e ʻEikí honau tauhí, ʻe ngalingali te nau muimui ʻiate Ia “ ʻi he ngaahi hala ʻo e māʻoniʻoní.”

Ngaahi ʻEkitivitī ʻe Ala Fakahokó

• ʻOange ki he fānau takitaha ha tatau ʻo e peesi ʻekitivitī ʻo e uike ní, pe ʻoange kiate kinautolu takitaha ha fakatātā mei he peesi ʻekitivitií. Fakaafeʻi ke nau fanongo ki hoʻo lau ʻa e Saame 23. Kole ke nau tuhu pe puke hake ha fakatātā ʻi heʻenau fanongo ʻoku ʻasi mai mei he sāmé. Fai hoʻo fakamoʻoni ʻoku tokangaʻi kitautolu ʻe Sīsū, ʻo hangē pē ko hano tokangaʻi ʻe ha tauhi sipi ʻene fanga sipí.

• Talaange ki he fānaú ha ngaahi founga ʻokú ke ʻilo ʻoku ʻofa ai e Fakamoʻuí ʻiate koe. Fakaafeʻi kinautolu ke tuʻu tahataha hake ʻo vahevahe ha ngaahi founga ʻe niʻihi ʻoku nau ʻilo ai ʻoku ʻofa ʻa Sīsū ʻiate kinautolu. Hivaʻi fakataha ha foʻi hiva te ne ala ʻoange ha ngaahi fakakaukau kiate kinautolu, hangē ko e “ʻOku Ongo ʻa e ʻOfá” (Tohi Hiva ʻa e Fānaú, 42).

Saame 30:5

ʻE lava ke liliu ʻe Sīsū Kalaisi ʻa e mamahí ki he fiefia.

Fakalaulauloto ki he founga te ke tokoni ai ki he fānaú ke maʻu ʻenau fakamoʻoni ki he fiefia ʻoku ʻomi ʻe Sīsū Kalaisi ʻi he taimi ʻoku tau mamahi aí.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau pehē pē ʻoku nau tangi lolotonga hoʻo lau mei he Saame 30:5, “Kapau ʻe ai ha tangi ʻi he poó.” Kole ange leva ke nau fiefia ʻi hoʻo lau ʻa e “ ʻE hoko ʻa e fiefiá ʻi he pongipongí.” Toutou fakaongo ange e kupuʻi lea ko ʻení, pea fakamoʻoni ki he fānaú koeʻuhí ko Sīsū Kalaisi, ʻe lava ke fetongi ʻa e mamahi ʻoku tau ongoʻi ʻi he moʻuí ni ʻaki ʻa e fiefia.

• Fakaʻaliʻali ha fakatātā ʻo e Fakamoʻuí, pea fakamatala ki he fānaú kau ki ha niʻihi ʻo e ngaahi meʻa kuó Ne fai maʻau ʻokú ne fakafiefiaʻi ai koe. ʻOange ha faingamālie ki he tokotaha takitaha ke pukepuke e fakatātaá mo vahevahe e meʻa kuo fai ʻe Sīsū ʻo nau fiefia aí.

Akoʻi e Tokāteliné: Fānau Lalahi Angé

Ngaahi Saame 23; 27–28; 32; 46

ʻOku foaki mai kiate au ʻe he ʻEikí ʻa e melinó, mālohí mo ha fakahinohino.

ʻOku fakamoʻoni ha konga lahi ʻo e Sāmé ki he ngaahi tāpuaki ʻa e ʻEikí ʻi heʻetau moʻuí. ʻE lava ke ke fakaʻaongaʻi e Sāmé ke tokoni ki he fānaú ke nau ako ke falala mo tafoki kiate Ia.

Ngaahi ʻEkitivitī ʻe Ala Fakahokó

• Hiki ʻi he palakipoé Ko e ʻEikí ʻoku . Tuku ke fili ʻe he fānaú ha potufolofola ʻe taha pe lahi ange mei heni ke lau: Saame 23:1; 27:1; 28:1; 28:7; 32:7; 46:1. Kole ange ke nau fakakakato e sētesi ʻi he palakipoé ʻo fakaʻaongaʻi e meʻa ʻoku nau ako mei heʻenau folofolá. Tokoniʻi kinautolu ke aleaʻi e meʻa ʻoku akoʻi mai ʻe he ngaahi fakataipe ko ʻení fekauʻaki mo e ʻEikí.

• Fakaʻaliʻali ki he fānaú ha fakatātā ʻo ha sipi. Kole ange ke nau talaatu ha ngaahi meʻa ʻe niʻihi ʻe fie maʻu ʻe ha lami ke malu mo moʻui lelei ai, pea poupouʻi ke nau kumi ha ngaahi fakakaukau mei he Saame 23:1–4. Fakaʻaliʻali ange leva ha fakatātā ʻo ha kiʻi tamasiʻi/taʻahine. Ko e hā ʻoku tau fie maʻu ke tau malu mo moʻui lelei fakalaumālie aí? Lau fakataha ʻa e Saame 23, pea ʻeke ki he fānaú e founga ʻe lava ke fakahoa ai e ngaahi meʻa ʻoku fai ʻe he tauhi sipí he potufolofola ko ʻení ki he meʻa ne fakahoko ʻe Sīsū Kalaisi maʻatautolú.

Kuo pau ke tau maʻa mo haohaoa fakalaumālie ke hū ki he ʻao ʻo e ʻEikí.

Saame 24:3–4

ʻOku tau fie maʻu ha “nima maʻa, mo [ha] loto māʻoniʻoni,” kae toki hū ki he temipalé.

ʻI he ʻamanaki lelei atu ʻa e fānaú ke hū ki he temipalé ʻi ha ʻahó, tokoni ke mahino kiate kinautolu ʻe lava ke nau teuteu, ʻaki ʻenau feinga ke maʻa fakalaumālie ʻo fakafou ʻi he Fakalelei ʻa e Fakamoʻuí.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha fakatātā ʻo ha temipale. Fakaafeʻi ke nau lau ʻa e Saame 24:3 mo kumi ha ngaahi lea ʻokú ne fakamanatu ange ʻa e temipalé. Hili iá pea lau fakataha ʻa e veesi 4 ke ʻilo pe ko hai ʻe lava ʻo hū ki he temipalé (fakaʻuhingaʻi ha faʻahinga foʻi lea foʻou pē). ʻOku anga fēfē ʻa e ʻuli fakatuʻasino hotau ngaahi nimá? ʻOku anga fēfē ʻa e ʻuli fakalaumālie hotau ngaahi nimá mo e lotó? ʻOku tau fakamaʻa fakatuʻasino fēfē hotau ngaahi nimá? ʻOku tokoni fēfē nai e Fakamoʻuí ke fakamaʻa fakalaumālie hotau ngaahi nimá mo e lotó? (Kapau ʻoku ʻaonga, fakamatalaʻi ange ʻe lava ke fakafofongaʻi ʻe he “nima” ʻi he veesi ko ʻení ʻetau ngaahi ngāué, pea lava ke fakafofongaʻi ʻe he “lotó” ʻetau ngaahi holí.)

• Toe vakaiʻi mo e fānaú e ngaahi fie maʻu ke maʻu ha lekomeni temipalé (vakai, Russell M. Nelson, “Lea Tuku,” Liahona, Nōvema 2019, 120–22; pe fakaafeʻi ha mēmipa ʻo e kau pīsopelikí ke aleaʻi mo e kalasí e ngaahi fie maʻu ko ʻení). Fakaafeʻi e fānaú ke nau fili ha meʻa ʻe taha ʻoku nau ongoʻi ʻoku ueʻi kinautolu ke fakahoko ke teuteu ai ke taau ke hū ki he temipalé.

Saame 46:10

“Mou longo pē, pea ʻilo ko au ko e ʻOtuá”

ʻE lava ke tokoni ʻetau tukutaimi ke ʻapasia mo nonga neongo e femoʻuekiná, ke tau fakatupulaki ha ngaahi fakamoʻoni ʻoku moʻui ʻa e ʻOtuá.

Ngaahi ʻEkitivitī ʻe Ala Fakahokó

• Tokoni ke ako maʻuloto ʻe he fānaú e laine ʻuluaki mei he Saame 46:10: “Mou longo pē, pea ʻilo ko au ko e ʻOtuá.” Talanoa mo kinautolu kau ki he ʻuhinga ʻo e “longo pē,” fakatuʻasino mo e fakaeʻatamaí fakatouʻosi. Vahevahe mo e fānaú ha aʻusia ʻa ia naʻe fakamālohia ai ʻe he “longo peé” hoʻo fakamoʻoni ki he Tamai Hēvaní. Kole ki he fānaú ke nau vahevahe ha faʻahinga aʻusia kuo nau maʻu. Ko e hā ʻoku hoko ai e longo peé ko ha founga mahuʻinga ke ʻilo ʻoku moʻui ʻa e ʻOtuá?

• Fakaafeʻi e fānaú ke mou toe vakaiʻi e meʻa ʻoku nau fai ʻi ha ʻaho angamaheni. Tokoniʻi ke nau fakakaukau ki ha ngaahi taimi lolotonga honau ʻahó ʻe lava ke nau feinga ai ke “longo pē” mo ongoʻi ofi ki he Tamai Hēvaní. Poupouʻi ke nau fokotuʻu ha taumuʻa ke fakaʻaongaʻi e ngaahi taimi pehē ʻi he uike ka hoko maí ke fakamālohia ʻenau fakamoʻoni ki he Tamai Hēvaní.

• Fakaafeʻi e fānaú ke nau lisi ha ngaahi meʻa ʻe niʻihi ʻe lava ke tau fai ke tau ʻilo ai ʻoku moʻoni ʻa e Tamai Hēvaní pea ʻokú Ne ʻofa ʻiate kitautolu. Fakaafeʻi ke nau fili ha meʻa mei he lisí ʻoku nau fie fakahoko.

Poupouʻi e Ako ʻi ʻApí

Fakaafeʻi e fānaú ke nau fili ha veesi ʻoku nau saiʻia ai mei he ngaahi saame ne nau talanoaʻi ʻi he ʻaho ní. Poupouʻi ke nau vahevahe e veesi ko iá mo ha mēmipa ʻo e fāmilí pe kaungāmeʻá.

Ko Hono Fakatupulaki ʻEtau Founga Akoʻí

Tokanga taha ki he ngaahi fie maʻu ʻa e fānaú. ʻI hoʻo hoko ko ha faiakó, ʻokú ke ʻi ha tuʻunga makehe ai ke mahino kiate koe e ngaahi fie maʻu ʻa kinautolu ʻokú ke akoʻí. ʻE tokoni hoʻo aʻusiá, feangai mo e fānaú, mo e fakahinohino ʻa e Laumālié ke ke ʻilo pe ko e ngaahi ʻekitivitī ako fē ʻoku ngalingali te ne langaki ʻenau tui ki he Tamai Hēvaní mo Sīsū Kalaisí.