“22–28 ʻAokosi. Saame 102–103; 110; 116–119; 127–128; 135–139; 146–150: ‘Ke Fakamālō [ki he ʻEikí] ʻa e Meʻa Kotoa Pē ʻOku Mānava,’ ” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“22–28 ʻAokosi. Saame 102–103; 110; 116–119; 127–128; 135–139; 146–150,” Haʻu, ʻo Muimui ʻIate Au—Maʻá e Palaimelí: 2022
ʻE Peluki ʻa e Tui Kotoa Pē, tā ʻe J. Kirk Richards
22–28 ʻAokosi
Saame 102–103; 110; 116–119; 127–128; 135–139; 146–150
“Ke Fakamālō [ki he ʻEikí] ʻa e Meʻa Kotoa Pē ʻOku Mānava”
Kapau ʻokú ke fie maʻu ha toe ngaahi fakakaukau kehe lolotonga hoʻo teuteu ke akoʻí, vakai ki he “Maʻuʻanga Tokoni Makehe ki hono Akoʻi ʻo e Fānaú” mo e “Ko Hono Feau ʻo e Ngaahi Fie Maʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení.
Lekooti Hoʻo Ngaahi Ongó
Fakaafeʻi e Feʻinasiʻakí
Fakaʻaliʻali ha konga ʻo e ngaahi fakatātā mei he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau talanoa fekauʻaki mo e meʻa ʻoku nau sio ki ai ʻi he fakatātaá. Tokoniʻi ke nau sio ki he ngaahi fehokotaki ʻi he ngaahi fakatātā ko ʻení mo e meʻa ʻoku nau ako ʻi he tohi ʻa Sāmé.
Akoʻi e Tokāteliné: Fānau Iiki Angé
ʻOku hangē e folofola ʻa e ʻOtuá ko ha māmá.
Ko e fānau ʻokú ke akoʻí ʻoku nau ʻi he hala ʻoku fai ai e foki ki he Tamai Hēvaní. ʻE lava ke tokoni e folofola ʻa e ʻOtuá ke nau nofomaʻu ʻi he hala ko iá ʻi he taimí ni pea mo hono kotoa ʻenau moʻuí.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e ngaahi meʻa ne ʻasi ʻi he Saame 119:105, pea fakaafeʻi e fānaú ke fokotuʻutuʻu fakahokohoko e ngaahi fakatātaá lolotonga hoʻo lau e vēsí. Kole ki he fānaú ke nau angimui ki he ngaahi kupuʻi lea mei he vēsí ʻi hoʻo tuhu ki he ngaahi fakatātaá.
-
Fakaafeʻi e fānaú ke nau talanoa fekauʻaki mo e ongo ʻokú te maʻu ʻi he fakapoʻulí. Ko e hā ha ngaahi meʻa ʻoku faingataʻa ke fakahoko ʻi he fakapoʻulí? ʻE lava ke ke fakaafeʻi ha taha ʻi he fānaú ke feinga ke fakahoko ha meʻa kae kuikui pē hono matá, hangē ko hano tā ha fakatātā. Ko e hā ʻoku faingofua ange ai hono fakahoko e ngaahi meʻá ni ʻi he taimi ʻoku maama aí? Tokoni ki he fānaú ke mahino e founga ʻoku fakamaama ai ʻe he folofola ʻa e ʻOtuá hotau hala ʻoku fai ai e foki ki he Tamai Hēvaní, ʻo hangē ko ʻene ʻasi ʻi he folofolá mo e ngaahi lea ʻa e kau palōfita moʻuí.
ʻOku ʻafioʻi mo ʻofaʻi au ʻe he Tamai Hēvaní mo Sīsū Kalaisi.
ʻI hono kotoa ʻetau moʻuí, ʻoku fie maʻu ke fakamanatu mai kiate kitautolu ʻoku ʻafioʻi fakataautaha kitautolu ʻe he Tamai Hēvaní mo Sīsū Kalaisi. ʻE lava ke tokoniʻi koe ʻe he Saame 139 ke akoʻi ki he fānaú, ʻokú Na ʻafioʻi mo ʻofaʻi kinautolu.
Ngaahi ʻEkitivitī ʻe Ala Fakahokó
-
Hiki ha lisi nounou ʻo e ngaahi meʻa ʻokú ke ʻilo fekauʻaki mo e fānau takitaha. ʻI hoʻo lau tahataha e lisí, kole ki he fānaú ke nau mateʻi pe ko hai ʻokú ke fakamatalaʻí. Lau ʻa e Saame 139:1–3, pea tokoni ke mahino ki he fānaú e ngaahi lea he ʻikai ke nau ala ʻiló. Fakamoʻoni ange ʻoku ʻafioʻi lelei kinautolu ʻe he Tamai Hēvaní mo Sīsū—ʻokú Na ʻafioʻi honau hingoá, meʻa ʻokú ne fakafiefiaʻi mo fakamamahiʻi kinautolú, mo e ngaahi meʻa te nau fakahoko leleí.
-
Lau ʻa e Saame 139:23, pea fakaafeʻi e fānaú ke ʻai honau nimá ki honau fatafatá ʻi he taimi te ke lea ʻaki ai e “lotó” pea ala ki honau ʻulú ʻi hoʻo lea ʻaki ʻa e “fakakaukau.” Vahevahe ki ha taimi naʻá ke ongoʻi ai ne ʻafioʻi ʻe he ʻOtuá ho lotó mo hoʻo ngaahi fakakaukaú.
Te u lava ʻo fakahikihikiʻi e ʻEikí.
ʻOku ʻuhinga e fakahikihikiʻi e ʻEikí ko hono fakahaaʻi ʻetau loto houngaʻia mo e ʻofa kiate Iá. Tokoni ki he fānaú ke nau ʻilo ʻoku tau fakalangilangiʻi ia ʻi he taimi ʻoku tau fakahoko ai ha ngaahi meʻa hangē ko e hiva, lotu, mo e talangofua ki Heʻene ngaahi akonakí.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau vahevahe ha ngaahi aʻusia ʻo ha taimi ne fakahikihikiʻi ai kinautolu ʻe ha taha pe talaange ne nau fakahoko ha ngāue lelei. Vahevahe ha konga ʻo e ngaahi meʻa lelei mei he Saame 146:6–9 kuo fakahoko ʻe he ʻEikí, pea fakaafeʻi e fānaú ke nau talanoa fekauʻaki mo e ngaahi meʻa kehe ʻokú Ne fakahoko maʻatautolú. Tokoni ke nau fakakaukau ki ha ngaahi founga te nau lava ai ʻo fakalangilangiʻi Ia koeʻuhi ko e ngaahi meʻa ko iá.
-
Hivaʻi fakataha ha foʻi hiva fakalāngilangi, hangē ko e “ʻI he ʻAiʻangakai ʻo e Manú” (Tohi Hiva ʻa e Fānaú, 144). Fakamatalaʻi ange ko e kau ʻIsileli ko ia ʻo e kuonga muʻá, ne hangē e Sāmé ko e ngaahi hiva ʻoku tau hivaʻi he ʻahó ni ke moihū mo fakalāngilangiʻi ai e ʻOtuá.
Akoʻi e Tokāteliné: Fānau Lalahi Angé
ʻOku foaki mai ʻe he ʻEikí ha fiemālie mo ha ʻamanaki lelei.
ʻOku ʻafioʻi ʻe he ʻOtuá hotau ngaahi ʻahiʻahí mo e mamahí, ʻokú Ne finangalo ke fakafiemālieʻi mo poupouʻi kitautolu. Tokoni ke fakatupulaki e tui ʻa e fānaú kiate Iá, ke nau lava ʻo tafoki kiate Ia ʻi he taimi ʻo e faingataʻá.
Healing (Fakamoʻui Mahakí), tā ʻe J. Kirk Richards
Ngaahi ʻEkitivitī ʻe Ala Fakahokó
-
Kole ki ha taha ʻo e fānaú ke ne lau ʻa e Saame 102:1–2. ʻE tokoniʻi fēfē kitautolu ʻe he ʻEikí ʻi he taimi ʻo ʻetau faingataʻaʻiá? ʻOku tau kolea fēfē nai ʻEne tokoní? Vahevahe ha aʻusia naʻá ke ongoʻi ai ne ongoʻi ʻe he ʻOtuá hoʻo ngaahi lotú ʻi hoʻo faingataʻaʻiá, pea fakaafeʻi e fānaú ke vahevahe ʻenau ngaahi aʻusiá mo e fakamoʻoní.
-
Fakaafeʻi e fānaú ke nau kumi ha ngaahi lea fakafiemālie mo ʻamanaki lelei ʻi he Saame 103. ʻE tokoniʻi fēfē ʻe he ngaahi lea ko ʻení e kakai ʻoku fehangahangai mo e faingataʻá? Poupouʻi e fānaú ke nau hiki ha ngaahi kupuʻi lea ne nau pehē ʻoku ʻuhingamālie, ke fakamanatu ange ʻe lava ke tokoniʻi kinautolu ʻe he ʻEikí ʻi heʻenau faingataʻaʻiá.
ʻOku tokoni e ngaahi folofola ʻa e ʻOtuá ke u muimui ʻi Hono halá.
Neongo ʻoku ngali fakapoʻuli e māmaní he ngaahi taimi ʻe niʻihi, ka ʻe lava ke fakamaama ʻe he ngaahi folofola ʻa e ʻOtuá hotau halá mo tokoniʻi kitautolu ke tau foki hake kiate Ia.
Ngaahi ʻEkitivitī ʻe Ala Fakahokó
-
Tā ʻi he palakipoé ha fakatātā ʻo ha maama (hangē ko ha maama tuʻu) mo ha fakatātā ʻo e folofolá. Fakaafeʻi e fānaú ke nau lau ʻa e Saame 119:105. ʻOku tokoniʻi fēfē nai kitautolu ʻe he māmá? ʻOku tokoniʻi fēfē nai kitautolu ʻe he ngaahi folofola ʻa e ʻOtuá? Kole ki he fānaú ke hiki ʻenau ngaahi talí ʻi he palakipoé ʻi he tafaʻaki ʻo e ngaahi fakatātaá. ʻOku tatau fēfē nai e folofola ʻa e ʻOtuá mo ha maama? ʻOku tokoni fēfē nai ke tau nofo maʻu ʻi he hala ke tau foki ai ki he Tamai Hēvaní?
-
Vahevahe e fānaú ke nau tau hoa, pea ʻoange ki he hoa takitaha ha taha ʻo e ngaahi potufolofola ko ʻení: Saame 119:47–48; Saame 119:105; 1 Nīfai 11:25; 2 Nīfai 31:20. Fakaafeʻi ke nau lau e potufolofolá mo kumi e meʻa kuo foaki mai ʻe he Tamai Hēvaní ke tokoniʻi kitautolu ke nofo maʻu ʻi he hala ʻoku foki ai kiate Iá. Fakaafeʻi e fānaú ke nau fakalaulauloto mo vahevahe e meʻa ʻoku nau ongoʻi ʻoku ueʻi kinautolu ke fai koeʻuhí ko e meʻa kuo nau akó.
-
Hivaʻi fakataha ha foʻi hiva fekauʻaki mo e muimui ʻi he hala ki he ʻOtuá, hangē ko e “ʻEiki, te U Muimui Atu” (ChurchofJesusChrist.org). Ko e hā ʻoku tau ako mei he hivá ni fekauʻaki mo e founga ke nofo maʻu ai ʻi he hala totonú?
ʻE lava ke tokoniʻi au ʻe he Tamai Hēvaní mo Sīsū Kalaisi ke u ʻilo e founga ke tupulaki aí.
ʻOku akoʻi ʻe he Saame 139 ʻoku ʻafioʻi ʻe he ʻOtuá e meʻa kotoa pē fekauʻaki mo kitautolu, kau ai hotau ngaahi mālohingá mo e vaivaiʻangá. Kapau te tau foki kiate Ia, te Ne lava ʻo akoʻi mai e meʻa ʻoku fie maʻu ke tau fai ke hoko ʻo hangē ange ai ko Iá.
Ngaahi ʻEkitivitī ʻe Ala Fakahokó
-
Hiki ʻi he palakipoé e ngaahi lea ʻo e Saame 139:23–24 pea fakaafeʻi e fānaú ke laineʻi e ngaahi lea ʻokú ne fakamatalaʻi e ngaahi meʻa ʻe lava ke fakahoko ʻe he ʻOtuá maʻatautolú. Ko e hā te tau fie maʻu ai ke fakahoko ʻe he ʻOtuá e ngaahi meʻá ni? Te tau lava fēfē ʻo fakaafeʻi Ia ke “tataki [kitautolu] ʻi he hala taʻengatá”?
-
Poupouʻi e fānaú ke “vakai” ki heʻenau moʻui takitahá ki ha ngaahi founga ʻe lava ke nau fakalakalaka ai ʻi he ngaahi tafaʻaki ʻe fā ʻoku fakatefito ai e polokalama Fānaú mo e Toʻu Tupú—fakalaumālie, fakasōsiale, fakatuʻasino mo fakaʻatamai. Fakamanatu ange ʻoku ʻafioʻi ʻe he ʻEikí ʻa e founga ʻe lava ke nau fakalakalaka ai ʻi he ngaahi tafaʻakí ni takitaha, pea poupouʻi kinautolu ke kolea ʻEne tatakí.
-
Hivaʻi ha foʻi hiva fekauʻaki mo e founga ʻe lava ke tokoniʻi ai kitautolu ʻe he Tamai Hēvaní ke tau tupulakí, hangē ko e veesi hono ua ʻo e “Tokoniʻi Au Tamai” (Tohi Hiva ʻa e Fānaú, 52). Vahevahe e founga kuo tokoniʻi ai koe ʻe he Tamai Hēvaní mo Sīsū Kalaisi ke ke fakalakalaká.
Poupouʻi e Ako ʻi ʻApí
ʻE lava pē ke ke fakaafeʻi ʻi ha taimi ʻe niʻihi ha taha ʻo e fānaú mo ha taha ʻo e kau mēmipa hono fāmilí ke vahevahe mo e kalasí ʻa e meʻa ʻoku nau fai ke ako ai e ongoongoleleí ʻi ʻapí. Poupouʻi e toenga ʻo e fānaú ke vahevahe e ngaahi fakakaukau ko ʻení mo honau fāmilí.
Fakatupulaki ʻEtau Founga Akoʻí
Fakaʻaongaʻi e hivá. ʻE lava ke tokoni e ngaahi hiva palaimelí mo e himí ke mahino ki he fānaú mo nau moʻui ʻaki e ngaahi moʻoni ʻo e ongoongoleleí ʻi ha ngaahi founga fakangalongataʻa. ʻE lava foki ʻe he hivá ʻo pukepuke e fānaú ke nau longomoʻui ʻi heʻenau akó. (Vakai, Ko e Faiako ʻi he Founga ʻa e Fakamoʻuí, 22.)