“Tebetembwa 5–11. Te Otinako 1–12: ‘Bon au Tia Kamaiu te Atua,’” Nakomai, Iriirai—Ibukin te Moanrinan: Te O Tetemanti 2022 (2021)
“Tebetembwa 5–11. Itaia 1–12,” Nakomai, Iriirai—Ibukin te Moanrinan: 2022
Te Burabeti ae Itaia e a Kaman Taekina Bungiakin Kristo, iroun Harry Anderson
Tebetembwa 5–11
Itaia 1–12
“Bon Au Tia Kamaiku te Atua”
Ana taeka Itaia e kona ni kangaanga te ota iai. Ngkana ko iangoia bwa ko na kanga n reireiniia ataei taekan Itaia, kabanea am iango iaon koaua aika bebete aika kona ni kakorakorai aia koaua iroun Iesu Kristo.
Korei Am Namakin
Kaunga te Tibwatibwa
Kaoia ataei bwa ana tibwaua te bwai ae a tia ni karaoia n te tai ae aki maan n nako ni maiuakina te euangkerio, n aron taekinan te tataro, kaotan te akoi nakon temanna, ke karinean tuua ake tabeua.
Reirei te Reirei: Ataei aika a Uarereke
Inanon te tembora ti reirei taekan Iesu Kristo.
Itaia e a kaman nora te tai ibukin katean te tembora, “maungan ana auti te Uea,” e na katika mataia aomata man “aaba ni kabane.” Ko kona ni kabongana te taetae ni burabeti aei ni buokiia ataei ni kaingaingai nanoia nakon te tai are a na kona iai n nakon te tembora.
Waaki ni Kakukurei aika a Kona ni Karaoaki
-
Tuangiia ataei bwa ana korea tamnein mwengaia. Imwiina ao warekia mangaia Itaia 2:2, ao tuangiia bwa ana korea tamnein “ana auti te Uea,” are bon te tembora. Wareka te kibu3 ni botaki, ao kaoia bwa ana karinna n aia tamnei aomata aika mwaiti n nakon te tembora, n raonaki ma aia utu. Bukin tera ti tangiria n nakon ana auti te Uea? Tibwaua am koaua iaon kakabwaia aika ana reke ngkana ti reirei taekan te Uea n Ana auti.
-
Tuanga te ataei bwa e na taua tamnein te tembora, ao tuangiia ataei bwa ana maroroakina te bwai ae a noria inanon te tamnei. Titirakiniia te bwai ae a tangiria n taekan te tembora. Botaki ni wareka Itaia 2:2–3 ao tuangiia bwa ana kakauongo nakon bukina riki tabeua ngkai ti kona n tangira te tembora. Tuangiia ataei tera bukina ngkai ko tangira te tembora.
-
Aneneia ma ataei te kuna ibukin te tembora, n aron “I Love to See the Temple” (Aia Boki n Anene Ataei,95). Buokiia ni kakaei taeka ao mwakoro n taeka n te anene are e reirei taekan te tembora ao tera are e karaoaki ikekei.
-
Korea te kawai iaon te burakibooti, ao katuka tamnein te tembora ke te Tia Kamaiu n te itera are teuana (taraa Personal Development: Children’s Guidebook, 2–3). Tuangiia ataei bwa ana koroi tamneia n nakonako iaon te kawai temanna imwiin temanna. Ngkana a karaoia, tuangiia bwa ana kaokioka te mwakoro n taeka aei man Itaia 2:3: “Ti na nakonako ni kawaina nako.” Tera ae ti kona ni karaoia n nakonako ni kawain te Uea?
“Bwa E bungiaki te tei i bukira, ti anganaki te nati te mwaane” (Itaia 9:6).
Itaia e taetae ni burabetiia Iesu Kristo.
Ni kabane burabeti a kakoaua Iesu Kristo, ma naake a maeka n te tai ae maan imwain ae E bungiaki, n aron Itaia. Iangoa te bwai ae a kona ataei n reiakinna ibukin Iesu man ana taeka ni burabeti Itaia inanon Itaia 9:6.
Waaki ni Kakukurei aika a Kona ni Karaoaki
-
Tibwauaia ma ataei “Isaiah the Prophet” (in nanon Karaki man Te O Tetemanti). Kamotirawaa n tainako teutana te tai bwa aonga ataei n taekina taekan te bwai ae ataia Itaia ibukin Iesu Kristo n ririki aika mwaiti n nako imwain ae E bungiaki. Warekia nakoia ataei Itaia 9:6, ao tuangiia bwa ana kaokiokia ma ngkoe “aara” n tatabeua nako are e taku Itaia bwa e taekinna Iesu Kristo “bwa e na aranaki iai.”
-
Koroi iaon te beeba tabeua aran Iesu Kristo aika kuneaki n Itaia 9:6 (taraa te iteraniba ibukin te waaki ni kakukurei n te wiiki aei). Kaoia ataei n tatabemaniia nako bwa ana anaa teuana, ao buoka te ataei bwa e na wareka te ara nakoia kaain te kiraati. Taekinna nakoia ataei nanon aara aikanne nakoim. Angan temanna te ataei tamnein Kristo, ao titirakina teuanne ke neienne bwa e na tibwaua te bwai teuana ibukin Iesu ao manga bwaatina te tamnei nakon temanna te ataei. Kaokioka te waaki ni kakukurei aei ni karokoa a bane n reke aia tai ataei n tibwauaia.
Reirei te Reirei: Ataei aika a Ikawai Riki
Ibukin Iesu Kristo, I kona n rairanou ao ni kaitiakaki.
E maeka Itaia n te tai are a mwaiti iai ana aomata aika a tannako mairoun te Uea. Ma e berita te Uea nakoia bwa a kona ni kabwaraaki aia bure ngkana a rairi nanoia. E karaoa naba te berita aei nakoira.
Waaki ni Kakukurei aika a Kona ni Karaoaki
-
Tuanga te ataei bwa e na wareka Itaia 1:2–4 ao taekin tabeua bukina ngkai e aki rang ni kukurei te Uea ma ana aomata Iuta. Imwiina botaki ni wareka Itaia 1:16–19 n reirei te bwai ae kaoia ana aomata te Uea bwa a na karaoia. N aron kainnanoana, buokiia ataei bwa ana atai taeka ao mwakoro n taeka aika kangaanga. Ni buokiia ni kamatenanoa te kibu18, katea te bwai ae takiakia urana ao te bwai ae mainaina. Tera ae ti reiakinna man kiibu aikai iaon taekan ana nanoanga Iesu Kristo? Kaoia ataei bwa a na tibwaua aron aia namakin ibukin ana bwaintituaraoi Iesu Kristo ni kabwarai buure, ao n tibwauai am namakin naba iai.
-
Buokiia ataei ni kamatenanoa Itaia 1:18. Korea te kibu iaon te burakibooti, ao kaoia ataei bwa ana kaokiokia n taekinna tabeua te tai, ni kamauna teuana te taeka ni katoa tai ni karokoa ae a kona n taekinna man aia iango. Ko kona naba ni kabongana mwakoro ni beeba ma taeka man te kibu ni koreaki iaoia. Bukin tera e kakawaki bwa ko na ururinga n tainako te bwai ae e reirei te kibu aei? Maoroakinna bwa e kanga te bwabetito ao tauakin te toa ni karika te berita aei bwa e na tauraoi nakoira.
Inanon te tembora ti reirei taekan Iesu Kristo.
Ana taetae ni burabeti Itaia ibukin “maungan maneaban te Uea” e kaoti tabeua kakabwaia aika roko man te nebonebo n te tembora, n raonaki ma kakabwaia ake tabeua n roko ni boong aika kaitira. Iangoia bwa ko na kanga ni kaungaia ataei ni ukoukori kakabwaia aikai.
Waaki ni Kakukurei aika a Kona ni Karaoaki
-
Tuangiia ataei bwa ana wareka taekan te bwai ae noria Itaia n Itaia 2:2–3 ao korea tamnein te bwai ae a taku bwa ti tebo tarakina ma ngaia. Kabwarabwaraa bwa Itaia e aranani tembora bwa “maungan mwaneaban te Uea.” Bukin tera te maunga bon te kanikina ae tamaroa ibukin te tembora?
-
Tuangiia ataei bwa ana wareka Itaia 2:2–3,5 ao kinai man kiibu aikai bwaai aika a kaungaia bwa ana nakon te tembora n te tai teuana. Ngkanne wareka te kibu4 ni botaki, ao maroroakinna bwa e kanga te tembora ni buokiia ni uota te rau ae kabwarabwaraaki n te kibu aei. Buokiia ataei n iangoi kawai ake a na kona iai ni katauraoia ngkai n nakon te tembora.
Itaia e taetae ni burabetiia Iesu Kristo.
Itaia e taetae ni burabetiia bungiakin te ataei are e na tekateka iaon ana kaintokaniuea Tawita ao ni katea abanueana ae akea tokina. Ko na kanga ni buokiia ataei ake ko reireinia bwa a na ota n taetae ni burabeti aikai ibukin Iesu Kristo?
Waaki ni Kakukurei aika a Kona ni Karaoaki
-
Tuangiia ataei bwa ana anga aia katooto n aran te aomata ae na karekea, n aron aara aika a irekereke ma te mwakuri, te wewete, te tiim, ke te utu. Tera ae a taekin aara aikai ibukin te aomata are iai irouna? Buokiia ataei ni kakaea aran Iesu Kristo n Itaia 7:14 ao 9:6–7. Tera ae ti reiakinna man aara aikai Ibukina? Tera riki ae ti reiakinna man kiibu aikai ibukin Iesu Kristo?
-
Bootaki ni wareka Mataio 1:21–23 ao Ruka 1:31–33, ao maroroakinna bwa a kanga ana taetae ni burabeti Itaia n Itaia 7:14; 9:6–7 ni koro bukiia ngke e bungiaki Iesu Kristo.
Kaungaa te Kamatebwai n te Mweenga
Tuangiia ataei bwa a na iangoa te bwai ae a reiakinna ibukin te Tia Kamaiu aonga ni kona n tibwauaia ni mwengaia ma aia utu, n aron Arana riki teuana.
Kanakoraoan Ara Anga reirei
Buokiia ataei bwa a na aki karekea te aki nanououa. Tabeman ataei a kona n aki namakina te konabwai n reiakina te euangkerio i bon irouia. Teuana te kawai ni buokiia ni karekea te aki nanououa bon kamoamoakiia ngkana a iri waaki n te kiraati. Berita nakoia ataei bwa te Tamnei ae Raoiroi e na buokiia ngkai a kamatebwai.