“Tebetembwa 19–25. Itaia 40–49: ‘I Uringa au Berita,’” Nakomai, Iriirai—Ibukin te Moanrinan: Te O Tetemanti 2022 (2021)
“Tebetembwa 19–25. Itaia 40–49,” Nakomai, Iriirai—Ibukin te Moanrinan: 2022
Healing the Blind Man, iroun Carl Heinrich Bloch
Tebetembwa 19–25
Itaia 40–49
“Kam na Kabebetei Nanoia Au Aomata”
A mwaiti kiibu man booki aika tabu inanon Itaia 40–49 aika a kona ni buokiia ataei ni karikirakea aia tangira ibukin te Uea ao aia onimaki Irouna. Ukoukora ana kairi te Tamnei ni kakaei mwakoro n taeka aikanne n am tai ni kamatebwai.
Korei Am Namakin
Kaunga te Tibwatibwa
Wareka Itaia 40:9 ma ataei, ao kaoia bwa aongkoa a tamwarakea te “maunga ae rietaata” ao n anganiia aia tai temanne imwiin temanna n taekinna ae a na tibwaua te bwai ae a reiakinna man booki aika tabu n te tai ae aki maan n nako—tao ni mwengaia ke n te taromauri.
Reirei te Reirei: Ataei aika a Uarereke Riki
I kona n riki bwa ana tia kakoaua te Uea.
Te Uea e kauringiia kaain Iteraera ae a tia ni kakoauai bwaai aika mwaiti aika tamaroa ae E a tia ni karaoi ibukiia. E tangiriia (ao ngaira) bwa ti na riki bwa Ana tia kakoaua, ni buokiia tabeman n ataa Mwaakana ao raoiroina.
Waaki ni Kakukurei aika a Kona ni Karaoaki
-
Tuangiia ataei taekan te bwai ae ko a tia ni kakoauaa. Buokiia bwa ana iangoi bwaai aika a tia n rinanoi are a kona n taekin bon imarenaia taekan ke n riki bwa taan “kakoaua—n aron te katooto, te amwarake ae kangkang ae a tia ni katongnga, te tabo ae a tia ni kawaria, ke te aomata ae a kina. Wareware nakoia ataei man Itaia 43:10: “Bon taani kakoaua au taeka ngkami, ao au tia makuri ae I rineia.” Tuangiia ataei bwa ngkana ti bwabetitoaki ti berita bwa ti na riki bwa ana tia kakoaua Iesu Kristo (taraa Motiaea 18:9). Tera ae nanonaki bwa ko na riki bwa ana tia kakoaua te Uea?
-
Tuangiia ataei bwa a na tibwai baike a atai ibukin Iesu Kristo ao Ana euangkerio. Kaoti nakoia tamnei aika ana anganiia iango (te katooto, tamnein Manga-utin te Tia Kamaiu, Ana Boki Moomon, te tembora, ao te burabeti ae maiu). Kaoia bwa ana taekina te bwai ae a kona n tibwauaia ma tabeman ngkai ngaia bon ana taan kakoaua te Uea.
“Akea naba te tia kamaiu i rarikiu.”
Bon ti Iesu Kristo ae kona ni kamaiura man ara bure ao te mate. Iangoia bwa ko na kanga ni kaungaia ataei bwa ana katuka aia onimaki Irouna.
Waaki ni Kakukurei aika a Kona ni Karaoaki
-
Kaoia ataei bwa ana iangoa te kangaanga ae ana kona iai ni kainnanoa te ibuobuoki (n aron te aoraki ke n reke n te angibuaka). Kaoti bwaai ni kabane (ke tamnein bwaai), tabeua are e na buokiia n taian kangaanga ao tabeua aika a na aki kona. Te katooto, te kiaba e na buokiia n tain te angibuaka, ma te kiraati n ran ao te bentira aki kona. Tuangiia ataei bwa ana rinea te bwai ae na buokiia n te kangaanga anne. Kaoti tamnein te Tia Kamaiu aika a na buokiia ataei n taekina aron buokaia Irouna.
-
Warekia nakoia ataei Itaia 43:11, ao tuangiia bwa ana kotea tamnein Iesu ngkana a ongo te taeka te “tia kamaiu.” Kakoaua bwa bukina ngkai Iesu Kristo e korakai, ao e mate ibukira ao e mangauti, ti Ngaia ae kona ni kamaiura man ara bure ao man te mate.
Ti kona ni karekea “naon marawa bwa ami raoiroi” (Itaia 48:18).
Kawakinan ana tua te Atua e uota te rau.
Te Uea e beritana te rau n aron te “te karaanga” ao te raoiroi n aron “naon taari” nakoia ake a kawakin Ana tua.
Waaki ni Kakukurei aika a Kona ni Karaoaki
-
Warekia nakoia ataei Itaia 48:18. Kaoia bwa ana kakamwakuri baia ao angaia kanga aron te karaanga ao naao. Taetae iaon aron buokam man kawakinan ana tua te Atua n namakina te rau n aron te nao ae korakora.
-
Korea tamnein te karaanga iaon te burakibooti. Buokiia ataei n iangoi tuua aika e a tia te Atua n anganiira. Koroi tuua aikanne iaon mwakorokoron beeba (ke koroi tamneia aika bebete), ao kariaia ataei bwa ana ikaruoruo ni kanim tuua nakon te karaanga iaon te burakibooti. Buokiia ataei n reirei aron karekean te rau man kawakinan tuua.
-
Baane anenea te anene ibukin te tua, n aron “Keep the Commandments” (Aia Boki n Anene Ataei, 146–47). Tera te bwai ae reireiniko te anene aei bwa bukin tera ngkai ti riai ni kawakin ana tua te Atua?
Reirei te Reirei: Ataei aika a Ikawai Riki
I kona n ibuobuoki ni katauraoa “kawain te Uea.”
Ti ibuobuoki ni kakoroa nanon te taetae ni burabeti inanon Itaia 40:3–5 man buokakiia tabeman ni karekea te Uea inanon maiuia.
Waaki ni Kakukurei aika a Kona ni Karaoaki
-
Tuanga temanna te ataei bwa e na wareka Itaia 40:3 ngkai ataei ake tabeman a wareka teuana man mwakoro n taeka aikai ao ni kakaai taeka ao mwakoro n taeka aika ti tebo: Mareko 1:3–4 (Ioane te Tia Bwabetito); Aramwa 7:9 (Aramwa); Reirei ao Berita aika Tabu 33:10–11 (mitinare ni boong-aika kaitira). Buokiia ni kinaia bwa antai ae katauraoa “kawain te Uea” inanon mwakoro n taeka n tatabeua nako. A kanga aomata aikai ni katauraoa kawain te Uea? Tera ae ti kona ni karaoia bwa ti na ibuobuoki iai?
-
Korea te kawai iaon te burakibooti, ao warekia ma ataei Itaia 40:3–5. Tuangiia ataei bwa ana koroi kangaanga aika a na totokoia aomata man irakin te Tia Kamaiu, ao kaoia bwa ana koroi kangaanga iaon te kawai. Kariaia bwa ana kamaunai kangaanga ngke ko taekin kawai aika ti kona ni buokia iai aomata n tokanikai iaoia.
Te Uea e raonai inanon katakiu.
Ngke ti karaoi berita ma te Uea, E karaoi berita bwa ana mena iroura—riki n ara tai ni kataaki. Buokiia ataei bwa ana taraia bwa ngaia bon mwakoron ana aomata ni berita te Uea ao bwa taan karekei Ana berita.
Waaki ni Kakukurei aika a Kona ni Karaoaki
-
Koroia iaon te burakibooti Bon ngai… ao N na… Tuangiia ataei bwa ana wareka Itaia 41:10 ao Itaia 43:1–5 ni kakaea bwa antai ae taekinna te Uea bwa boni Ngaia ao tera ae E taekinna E na karaoia. Tera mwakoro n taeka riki tabeua aika a kaokiokaki inanon kiibu aikai? Ana kanga rongorongo aikai n anganiira te raunnano ao te kantaninga n taai ni kangaanga?
-
Bootaki ni wareka Itaia 48:10, ao maroroakinna bwa tera te nenikanaiai ao aron kabongakina aika kakaokoro. Kabwarabwara bwa a kabuekaki biiti inanon te nenikanaiai. Tera bukina ngkai te nenikanaiai bon te kawai ae tamaroa ibukin kabwarabwarakin te karawawataaki? A kanga karawawatakira ni kaitiakiira? (taraa Aramwa 62:41).
Te Uea e na bon aki kona ni mwaninga taekau.
Ngkana ti namakina te kararoaki mairoun te Uea ibukin ara bure, ke bukina riki teuana, te rongorongo n Itaia 49:14–16 e kona ni uota te mwengaraoi.
Waaki ni Kakukurei aika a Kona ni Karaoaki
-
Kaoiia ataei bwa a na wareka Itaia 49:14. Tera ae na karikiia aomata bwa ana namakina te mwanuokinaki ke te akikubaraki? Ti na kanga ni buokiia tabeman bwa ana ataia ae e aki mwaninga taekaia te Uea? Ti na kanga n ataia ae E aki mwaninga taekara?
-
Kaoia ataei bwa ana taekina taekan temanna ae ataia ae ana aki kona ni mwaninga taekana, n aron kain te utu ke raoraom. Maroroakinna bwa e kanga ana namakin te tina ae tangira ibukiia natina ao e kanga ana namakin te Uea ibukira. Ngkanne tuangiia ataei bwa ana wareka Itaia 49:15–16. Ni kaineti ma kiibu aikai, bukin tera te Uea e na aki kona ni mwaninga taekara? Kaoia ataei bwa a na tibwauai aia namakin ibukin Iesu Krisstoi.
Kaungaa te Kamatebwai n te Mweenga
Kaoia ataei bwa ana iangoa taekan te bwai ae a reiakinna n te bong aei ae a tangiria n reirei riki taekana. Buokiia ni korea te titiraki ibukina ae a na kona n titirakiniia iai aia karo ke aia utu ake tabeman.
Kanakoraoan Ara Anga Reirei
Karaoia nakon kainnanoia ataei. Ngkana ko reireiniia ataei aika uarereke riki ma ko namakina te ungannano ni kan reireiniia teuana te reirei mai ibuakon taian reirei n te kamataata aei iaan “Ataei aika Ikawai Riki” ke kaitaraana, karaoa teuana mai ibuakon waaki ni kakukurei ake a katautauaki ibukin te reirei ni kaitaraa kainnanoia ao aia konabwai ataei aika ko reireiniia.