“Tebetembwa 26–Okitobwa2. Itaia 50–57: ‘E Anai Rawawatara, ao E Uouoti Nanokawakira,’” Nakomai, Iriirai—Ibukin te Moanrinan: Te O Tetemanti 2022 (2021)
“Tebetembwa 26–Okitobwa2. Itaia 50–57,” Nakomai, Iriirai—Ibukin te Moanrinan: 2022
Kaenaenakin Kristo, iroun Carl Heinrich Bloch
Tebetembwa 26–Okitobwa2
Itaia 50–57
“E Anai Rawawatara, ao E Uouoti Nanokawakira”
Itaia 50–57 iai inanona tabeua taetae aika tikiraoi are a na aki kona n ota iai ataei aika ko reireiniia. Ngkana ko katauraoi n reirei, iangoi koaua aika bebete aika a na reirei iaona taeka aikai ao ko na kanga ni buokiia ataei n reiakin.
Korei Am Namakin
Kaunga te Tibwatibwa
Kaungaia ataei n tatabemaniia nako bwa ana tibwauaia bwa a kanga n ataa ana tangira Iesu Kristo nakoia. Tuangiia bwa ana tibwaua te bwai ae a karaoia ni kaotia bwa a tangira Iesu.
Reirei te Reirei: Ataei aika a Uarereke
Iesu Kristo e karawawataaki ibukiu bukina bwa E tangirai.
Rinanon Ana angakarea ni kamaiu, Iesu Kristo e karawawataaaki ibukin ara bure ao e katoka Iaona“rawawatara” ao “nanokawakira.” Ko na kanga ni kakoaua nakoia ataei Ana Mwakuri ni Kamaiu te Tia Kamaiu?
Waaki ni Kakukurei aika a Kona ni Karaoaki
-
Katekei tamnein te Tia Kamaiu ni karawawataaki iaon te kaibangaki n te Onaroka are i Ketetemwane (taraa Gospel Art Book, nambwa. 56, 57, ke mwakoro 51-53 inanon Karaki man te Nu Tetemanti). Tuangiia ataei bwa a na kabwarabwarai bwaai aika a noori inanon taian tamnei ao tera are a ataia man te bwai ae riki. Bukin tera e karawawataaki Iesu ibukira?
-
Wareware nakoa ataei man Itaia 53:4: “E anai rawawatara, ao E uouoti nanokawakira.” Kaotia nakoia ataei te bwai ae rawawata (ke temanein teuana), ao kaoia bwa ana karaoa ae ao ngkoa a tabeka te bwai ae rawawata. Kabwarabwara bwa te “rawawata” ao te “nanokawaki” (ke te nanorawawata) a kona n rangi n tinebu ao ni kangaanga ni uouotaki. Kakoaua bwa e na buokiira Iesu Kristo ni uoti bwaai aikai bukina bwa E tangiriira.
I kona n ukoukora te Uea ao ni Weteia.
Iangoia bwa kona kanga ni buokiia ataei n ataia bwa tera ae nanonaki n “ukoukora” Iesu rinanon maiuia.
Waaki ni Kakukurei aika a Kona ni Karaoaki
-
Karaba tamnein Iesu n te tabo teuana inanon te ruu, ao kaoa temanna te ataei bwa e na kakaea. Wareki taeka “Kam na ukoukora Iehova ngkae E na reke” man Itaia 55:6. Tuangiia ataei bwa ana aran tabeua kawai aika a kona iai n ukoukora te Uea—are nanona bwa a kabanea korakoraia ni kataia n reiakina Taekana ao n nako ni Kaniia riki. N tainako ngkana e anga ana kaeka te ataei, karaba riki te tamnei, ao kaoa te ataei bwa e na “ukeuke” ibukina.
-
Buokiia ataei bwa a na reirei taekan te anene “Seek the Lord Early” (Aia Boki n Anene Ataei108) ke te anene riki teuana iaon kaniakim riki nakon te Tia Kamaiu. Kabongana te iteraniba n te waki ni kakukurei n te wiiki aei ni buokiia ataei n rinea te bwai ae a na karaoia n te wiiki aei “ukoukora … te Uea.”
-
Wareka te mwakoro n taeka “Kam na weteia ngkae e a kaan” man Itaia 55:6. E kanga arora n wewete nakon Tamara are i Karawa? Tuangiia ataei bwa ana taekina te bwai are a taekinna n aia tataro. Kakoaua nakoia bwa Tamara are i Karawa e tangiriia ao E ongo aia tataro.
Reirei te Reirei: Ataei aika a Ikawai Riki
E kaoai te Uea bwa n na “karina [au] korakorau.”
Inanon Itaia51 ao52, te Uea e kabonganai mwakoro n taeka n aron “uti,” “teirake,” ao “karina korakoram” ni kaungaia Ana aomata ni kakoroa bukin mwakaia mai iroun te Atua. Iangoia bwa a kanga reirei aikai ni kona ni kakabwaiaia ataei aika ko reireiniia.
Waaki ni Kakukurei aika a Kona ni Karaoaki
-
Imwain te kiraati, koroia iaon te burakibooti tabeua mwakoro n taeka man Itaia 51–52 aika a kabwarabwara te bwai ae tangiria te Uea bwa a na karaoia Ana aomata, n aron “Kam na kaeka matami nako karawa,” “Uti,” “Tei rake,” “Ko na ioa tanom,” ao “Kam na karebwe nako ni kakatonga” (Itaia 51:6,17; 52:2,9). Kariaia ataei bwa ana ikaruoruo ni karaoa te mwakoro n taeka anne n te kaotioti ao nikiran te kiraati a na kataia ni iangoia bwa tera te mwakuri anne. Imwiin aia kekeiaki ni karaoa kain te mwakoro n taeka, kaotia nakoia ataei te mwakoro n taeka inanon koroboki aika tabu, ao maroroakinna ma ngaia nanon te mwakoro n taeka n tamnei anne. Tera ae e tuangiira te Uea bwa ti na karaoia? Ti na kanga ni karaoi bwaai aikai n tatabeua nako?
-
Kaoia ataei bwa ana wareka Itaia 51:1, 4,7 ao kina bwa antai ae taetae te Uea nakoina ao tera ae E tangiria bwa ana karaoia. Tera ae nanonaki n “ongo nakon ana taeka te Uea? Ni kamatataana, tuanga temanna te ataei bwa e na anga kaetieti aika bebete aika a na iria ake tabeman. Bukin tera e matoatoa n tabetai te kakauongo nakon ao karinean te Uea? Ti na kanga ni kaotia nakon te Uea bwa ti “kan ongo” Irouna?
Ibukin te Tangira, iroun te tia taitai n te atibu ke n te kai Angela Ioaneson
Iesu Kristo e katokaa Iaona au bure ao rawawatau.
Ko na kanga ni kabonganai ana taeka Itaia ni buokiia ataei n ata raoi te bwai ae karaoia te Tia Kamaiu ibukiia?
Waaki ni Kakukurei aika a Kona ni Karaoaki
-
Kaoti tabeua tamnei aika a kaota karawawatakin ao maten Iesu Kristo (taraa, ibukin te katooto, Gospel Art Book, nambwa. 56, 57, 58). Botaki ni wareka Itaia 53:3–6,9, ao kaoia ataei bwa a na kakaei mwakoro n taeka aika a kabwarabwarai bwaai aika riki n taian n tamnei. Kakoaua bwa tebubua te ririki n nako imwain ae karawawataaki Iesu Kristo ibukira, burabeti n aron Itaia a reirei bwaai aika kakawaki aikai. Bukin tera e kakawaki ibukiia aomata bwa ana atai imwain taia bwaai aikai inanon rikiriki aika mwaiti n nako? (taraa Aramwa 39:15–19).
-
Kaoia ataei bwa ana wareka Itaia 53:4–7 ao ni kakaai taeka aika a kabwarabwara te bwai ae karawawataaki iai te Tia Kamaiu ibukira. Tuangiia bwa a na korei taeka aikai iaon te burakibooti. Bukin tera E karawawataaki n “rawawatara,” “n nanokawakira,” ao “ni buakakara”? (taraa naba Aramwa 7:11–12). Tibwauaia ma ataei bwa e kanga te Tia Kamaiu n tia ni buokiko n rawawtam ao n nanokawakim. Tuangiia bwa ana tibwaua aron aia namakin ibukin te Tia Kamaiu ao tera ae E a tia ni karaoia ibukiia.
A rietaata riki ana kawai te Uea nakon au kawai.
Ngkana ti ataia bwa a rietaata riki ana iango ao ana kawai te Uea nakoira, e na moanna ni bebete riki iai Onimakinana.
Waaki ni Kakukurei aika a Kona ni Karaoaki
-
Titirakiniia ataei bwa antai ae a na nakoina ngkana iai aia kangaanga, ao bukin tera. Warekia ma ataei Itaia 55:8–9, ao tuangiia bwa ana kakauongo bwa bukin tera ngkai ti na ukoukora ana kairiiri te Uea ngkana ti kainnanoa te ibuobuoki.
-
Koreia iaon te burakibooti karawa ao aontano, ao koroi iaoia Karawa ao Aonaaba. Ngkanne kaoia ataei bwa ana wareka Itaia 55:9 ni kakaea te bwai ae kabotaua iai karawa ma aon te aba te Uea, ao tuangiia bwa ana kanim kanikina riki aikai nakon te koro tamnei. Tera ae nanonaki n ae ana kawai ao ana iango te Uea a “rietaata” riki nakoira? Bukin tera e kakaawaki atakin aei?
-
Maroroakinna ma ataei tabeua ana kawai te Uea aika a rietaata riki nakon ara kawai. Te katooto, tera Ana kawai ni buokiia taan bure? (taraa Mareko 2:15–17). Tera Ana kawai ni kairiia tabeman? (taraa Mataio 20:25–28). A kanga Ana kawai ni kaokoro ma aia kawai tabeman? Tuangiia ataei bwa ko kanga n onimakin ana kawai ao ana iango te Uea aika rietaata riki.
Kaungaa te Kamatebwai n te Mweenga
Tuangiia ataei bwa ana katea aia kouru are e na buokiia ni kaan riki nakon Iesu Kristo, ae boboto iaon te bwai ae a reiakinna n te kiraati n te bong aei. Kaoia bwa a na tibwaua aia kouru ma kaain aia utu.
Kanakoraoan Ara Anga reirei
Buokiia ataei aika a uarereke bwa a na reirei man koroboki aika tabu. Ni buokiia ataei aika uareke n reirei man koroboki aika tabu, kabotoa am iango iaon te kibu ae ti teuana ke ti te mwakoro n taeka ae kakawaki. N tabetai ko na bae ni wareka te mwakoro n taeka ao tuangiia ataei bwa a na teirake ke n tabeki baia ngkana a ongo te taeka ae onoti ke te kibu n taeka are ko tangiria ni kabotoa am iango iaona.