Iesu n te Tinakaoke i Natareta, iroun GregK. Olsen

Okitobwa 3–9

Itaia 58–66

“E na Nakomai te Tia Kaboi Maiura nako Tion”

Iango ibukin waaki ni kakukurei n te kaotaniango aei a nanonaki ibukin kaungaakin am karioiango. Tai namakina are aongkoa ko kabaeaki n touimwia raoi, ira te kanamakin mairoun te Tamnei imwain ao n tain am anga reire.

Korei Am Namakin

Kaunga te Tibwatibwa

Mwaitin ana taeka Itaia a kakoaua ao n reirei taekan te Tia Kamaiu. Kaota tamnein Iesu, ao kaoiia ataei bwa a na tibwaua aron aia namakin Ibukina n te wiiki aei.

Reirei te Reirei: Ataei aika a Uarereke

Itaia 58:13–14

Te Tabati e kona n riki bwa te bwa ae kakukurei nakoiu.

Te bong ae te Tabati bon te tai n uringnga te Uea ao ni motirawa man mwakurin te wiiki. Ko na kanga ni buokiia ataei ake ko reireiniia bwa a na karaoa te Tabati bwa e kakukurei?

Waaki ni Kakukurei aika a Kona ni Karaoaki

• Tuangiia ataei bwa a na kaokioka te mwakoro n taeka”Taekina te Tabati ae kakukurei, ana tabu te Uea” (Isaiah 58:13) n te tai ae e mwaiti. Kabwarabwara bwa “kukurei”nanona bwa te bwai teuana ae anganiira te kimwareirei. Kaoiia ataei bwa a na tibwauai tabeua bwaai ake a uota nakoia te kimwareirei. Kakoaua bwa te Uea e anganiira te bong ae te Tabati ibukina bwa E tangiria bwa ti na karekea te kimwareirei. Tuangiia ataei bukin tera ngkai te Tabati bon te bwai ae kakukurei nakoim.

• Wareka nakoia ataei Itaia 58:14: “Ko na kakukureiko iai iroun te Uea.” Kabwarabwara nakoia ataei bwa te Tabati bon te bong ae onoti—te tai are ngkana ti kona n iangoi bwaai ake a karaoi te Tama are i Karawa ao Iesu Kristo ni buokiira bwa ti na kukurei. Buokiia ataei bwa a na iangoi bwaai ake a kona ni karaoi n te Tabati n uringa te Tamara are i Karawa ao Iesu Kristo. Kaoiia bwa a na korei tamnein aia iango ao n tibwauai aia tamnei i bon irouia ma aia utu.

“Bon otam ae akea tokina te Uea” (Itaia 60:19). Te Bwaintangira ae te Ota, iraoun Eva Timothy

Itaia 60:1–3

I kona ni kaotaa otan te Tia Kamaiu ibukiia tabeman.

E taetae ni burabetiia Itaia bwa ni kabanean bong, ana aomata te Uea a na riki bwa kanaga te ota ibukiia ake a mena n te roo. Iangoia ko na kanga ni buokiia ataei “teirake” ao n “ota.”

Waaki ni Kakukurei aika a Kona ni Karaoaki

• Kaoiia ataei bwa a na kamakii mataia ngkai ko wareka Itaia 60:1–3. Tuangiia bwa a na kaurei mataia ngkana a ongo te taeka ae “ota” ao ni kamakii mataia ngkana a ongo te taeka ae te“rotongitong.” Kamataata bwa Iesu Kristo ao Ana euangkerio kanga aia aron te ota ae e buokira n tara kawaira n okira Tamara are I Karawa.

• Angan te ataei temanan ma temanna tamnein te ota (n aron taai, te tauranenea, tetaura te bunimoa). Buokiia ataei n iangoi kawai ake a kona iai n tibwaua otan te Tia Kamaiu ma tabeman. Inanon tibwauan iango, kaoiabwa a na “teirake” ao ni “kaotaa” aia ota man tabekan aia tamnei. Tuangiia ataei taekan kawai ake ko a tia n nooria iai n tibwaua otan te Tia Kamaiu.

• Bootaki anenea te kuna iaon ibwauan te ota, n aron “Shine On” (Aia Boki n Anene Ataei,144). Buokiia ataei n ataa taekan te anene are e kamatoa baike a reiakin man Itaia 60:1–3.

Itaia 61:1–3

Iesu Kristo bon au Tia Kamaiu ao Te Tia Kabooi Maiura.

Itaia 61:1–3 e anga te kamatata ae e mwaakaroiroi n ana mwakuri te Tia Kamaiu n reirei ao ni kamarurung. Kakaei kawai ni buokiia ataei n taraia bwa e kanga Iesu Kristo n reirei ao ni kamarurungiia.

Waaki ni Kakukurei aika a Kona ni Karaoaki

• Anganiia ataei bwa a na taui tamnei aika a na reirei Iesu, ni kamarurung, ao ni buokiia tabem ngkai ko wareka Itaia 61:1 (tara Bokin Tamnein te Euangkerio). Kabwarabwara bwa te Atua e kanakoa Iesu Kristo bwa e na karaoi bwaai aikai ibukira ni kabane. Tuangiia ataei bwa a na tibwauai aia namakin ibukin Iesu Kristo. Kakoaua ana tangira te Tia Kamaiu ibukin ataei n tatabemaniia nako.

• Itaia 61:3 e kabwaarabwara bwa naake a ongora ao n ongotaeka iroun te Uea bwa “kaai aika raoiroi.” Korea tamnein te aroka iaon te burakibooti, ao kaoiia ataei bwa a na iangoi bwaai aika a raoiroi ake a kona ni karaoi. N taian iango ake a mwaneweaki, tuangiia ataei bwa a na korea te banikai iaon te aroka.

Reirei te Reirei: Ataei aika a Ikawai Riki

Itaia 58:6–11

Te aki mamatam e kakabwaiai ao ake a rootaki n te kainnano.

Tabeman ataei ake ko reireiniia a bon ikawai ibukin te aki mamatam. Ma naake aki a kona n reke aroia man ataan taekan ana tua te Uea iaon te aki mamatam ao ni katauraoi nakon te aki mamatam ngkana a tauraoi.

Waaki ni Kakukurei aika a Kona ni Karaoaki

• Korea iaon te burakibooti Bukin tera ngkai ti aki mamatam? ao Ti na kanga n aki mamatam? Kaoiia ataei bwa a na korei kaeka ake a kona n reke iaon te burakibooti. Kaungaia bwa a na rinanoa te “Fast, Fasting” inanon Kairi nakon Koroboki aika Tabu (scriptures.ChurchofJesusChrist.org) ao Itaia 58:6–11 ni kakaei rakan riki taian kaeka. E na kanga Itaia 58:6–11 ni buokiira ngkana e kangaanga te aki mamatam?

• Tibwauaia ma ataei ana taneiai te aomata ma te aki mamatam, ke tibwaua te karaki man ana maekatiin te Aro n taekan te aki mamatam. Katuruturui kakabwaia ake a roko man te aki mamatam n iai bukina ma te nano n tamnei. Ngkana iai mai ibuakoia ataei aika a tia n aki mamatam, kaoiia bwa a na tibwauai aia taneiai. Kaungaia ataei bwa a na taetae nakoia aia karo n te aki mamatam n te Tabati are imwiina bwa tera nanon te aki mamatam. Buokiia bwa a na ota bwa tera nanon te aki mamatam ma te nano ae iai bukina ao te nano n tataro.

• Warekia ni bootaki Itaia 58:6–7, ao kamatata bwa te kawai teuana ti “karaoi [ara] kariki nakoia ake a baki” ngkana ti aki mamatam ti anganako te mwane are ti a tia ni kona ni kabanea iaon te amwarake bwa ara angabwai n aki mamatam. Kaota nakoia ataei te tinaniku ibukin te angamwane ibukin te aki mamatam ao te angabwai n aki mamatam, ao kabwarabwara aron kanoaakina. Kaoiia ataei bwa a na wareka Itaia 58:8–10, kakaei kakabwaia aaree beritanaki ngkana ti aki mamatam. E kanga te aki mamatam ni kakabwaiaira ao naake a rootaki n te kainnano?

Itaia 61:1–3

Iesu Kristo bon au Tia Kamaiu ao Te Tia Kabooi Maiura.

Iangoia bwa ko na kanga n rangi ni kabongana ana taeka Itaia ni kamatoai aia kakoaua ataei iroun Iesu Kristo ae aia Tia Kamaiu ao te Tia Kabooi Maiura.

Waaki ni Kakukurei aika a Kona ni Karaoaki

• Anganiia atei tabeua te miniti bwa a na wareka Itaia 61:1–3 i bon irouia. Ngkanne kaoiia bwa a na koroi iaon mwakoro ni beeba ke te tienoro ni mkamatebwai bwa baikara aika a reiakinaki man kiibu aikai taekan Iesu Kristo. Kaoiia tabeman ataei bwa a na tibwaua aia iango.

• Kaoiia ataei bwa a na tibwaua te kibu n taeka man kiibu aikai ae e iai nanona nakoia ao man kabwarabwara bukina. A na kanga kiibu aikai ni buokira bwa ti na ota bwa tera ae kanakoaki iai Iesu nakon aon te aba bwa e na karaoia?

Itaia 65:17–25

Te mereniam bon te tai n rau ao ni kimwareirei.

Itaia e noora te tai ike ana aomata te Atua e a reke irouia te rau ao te kimawareirei. E na kakoroaki nanon te taetae ni burabeti n okin Iesu Kristo nako aon te aba ao n tautaeka ibukin te ngaa n ririki—te tai ae e aranaki bwa te Mereniam.

Waaki ni Kakukurei aika a Kona ni Karaoaki

• Itaia 65:17–25 kabwarabwara bwa e na kanga aon te aba ngkan e a manga roko te Tia Kamaiu. Tibwaia ataei ni kurubu aika a uarereke, anganiia te kurubu teuana ma teuana tabeua kiibu aikai bwa a na wareki. Imwiin tabeua te miniti, koroi iaon te burakibooti rinanin taeka bwa e na kanga te maiu ni kaokoro n te “aonaaba nabangkai” ni kabwarabwaraaki ni kiibu aikai (te kibu17). Bukin tera ngkai e n a iki te tai aei bwa te tai “ni kakatonga ao ni kimareirei n aki toki”? (te kibu18).

• Imwain te reirei, katauraoi mwakoro ni beeba ma taeka ao kibun taeka man te katebwina n taekan te onimaki. Kaoa temanna te ataei bwa e na atongnga taekan te onimaki, ao tuangiia ataei bwa a na karinani mwakoro ni beeba ma taeka n etia raoi. Buokiia ataei bwa a na ota bwa tera taekan te onimaki aio ae e reireiniira taekan te mereniam.

Kaungaa te Kamatebwai n te Mweenga

Kaoiia ataei n tibwaua te bwai teuana are a reiakinna n te bong aei taekan te Tia Kamaiu ma aia utu. Kaungaia bwa a na wareware ni koroboki aika tabu ma aia utu n te wiiki aei.

Kanakoraoan Ara Anga reirei

Anga titiraki aika a kaunga te nano. Tabeki titiraki are e na kaoiia ataei n nako iaon are atongan koaua. N aron te katooto, iangoi titiraki are e kaungaia bwa a na tibwaua aia koaua ao aia taneiai.