Nakomai, Iriirai, iroun Scott Sumner

Okitobwa 24–30

Etekiera 1–3; 33–34; 36–37; 47

“N na Karina te Tamnei Nabangkai I nanomi”

E na aki reke am tai n anga reirei iaon reirei ni kabane inanon Etekiera. Ukori kairi n tamnei bwa tera ae ko na kabotoa am iaongo iaona, ao kaungaia ataei bwa a na reitamako aia kamatebwai ni mweengaia.

Korei Am Namakin

Kaunga te Tibwatibwa

Anganiia ataei tabeman bwa a na ikaruoruo ni koroi tamnein bwaai aika a reiakin n te tai ae nako man koroboki aika tabu. Ataei ake tabeman a kona ni keetina te tamanei ake a korei te ataei temanna ma temanna.

Reirei te Reirei: Ataei aika a Uarereke

Etekiera 3:17

Burabeti kanga ai aroia uatiman ake a anganiira te katauraoi ibukin te kangaanga.

Etekiera kanga ai aron te uatiman, e anganiia kain Iteraera te katauraoi nakon kangaanga aika ak kona n noori. Buokiia ataei n nooria bwa a kanga ara burabeti n taai aikai n riki bwa kanga uatiman.

Waaki ni Kakukurei aika a Kona ni Karaoaki

• Warekia nakoia ataei tera are e tuangaki Etekiera iroun te Uea Etekiera 3:17. Kaoiia bwa a na karaoi mwakuri aika nako ma te taeka, n aron kotean mataia, taningaia, ao wiia ngkana ko wareki taeka “uatiman”, “ongo”, ao “wii.”

• Kairria ataei n nakonakoia ni katobibia te ruu. Kauringiia taekan ae aongkoa kangaanga ni kawain te turein, n ai aron karanga ni kiba iaoia, mwaanga n rinnako iaaia, ke maan ni katuaia. Anganiia ataei aia tai n ikaruoruo n riki bwa te tia kariiri. Maroroakinna bwa a kanga burabeti ni kauringiira taekan kangaanga aika ti aki konai n noori.

• Kaota tamnein te burabeti ae ngkai n am tai n anene ma ngaiia te kuna ibukiia burabeti, n aron are kabanean kibun “Follow the Prophet” (Aia Boki n Anene Ataei, 110–11). Tuanggia ataei bwa a kanga burabeti n riki bwa kanga uatiman nakoim.

Etekiera 37:15–19

Koroboki aika a tabu a reireinai taekan Iesu Kristo.

Etekiera e kabootaua te bata are Iteraera ma kaai aika uaai aika a riki n tii teuana. Kaai aikai a kanikinaea te Bwaibwara ao ana Boki Momon, aika a reitaki ni kakoaua Kristo.

Waaki ni Kakukurei aika a Kona ni Karaoaki

• Anganiia ataei katotoon ana Boki Moomon: anga tabeua katotoon te Bwaibwara. Kakimototoa Etekiera 37:15–19 ni kamataata bwa te Uea e tuanga Etekiera bwa e na koroboki iaon kaai aika uoua are e tei ibukin te Bwaibwara ao ana Boki Moomon. Wareka te kibu17, ao kaoiia ataei n tatabemaniia bwa a na kakaea temanna ae iai ana boki ae tabu ae kaokoro ma are irouia ao n “raoniia” ni ikotia ni kabane bwa aonga n “riki ba ti teaina i nanon [baia].” Maroroakinna a kanga ni kauoua te Bwaibwara ao ana Boki Moomon ni buokiira ni kakorakorai ara onimaki iroun te Tama are i Karawa ao Iesu Kristo.

• Kabonganaan tamnei man Bokin Tamnein te Euangkerio ke man ririki aika a nako Nakomai, Iriirai taian boki, e buokiia ataei n tibwa karakinan Iesu man te Bwaibwara ao ana Boki Moomon. Titirakiniia bwa a na tibwaia bukin tera a rangi ni kakaitau n reken koroboki aika tabu akana uoua akanne.

Etekiera e nooria n te mii ni burabeti te karanga ae e ranganako man te tembora ao ni kamaiua Taari ae Mate.

Etekiera 47:1–12

Kakabwaia aika moan te korakora a reke man te tembora.

Miin ni burabeti Etekiera n te karanga ni kamaiu are e raanganako man te tembora e kona ni buokiia ataei n ataia bwa tembora a karokoi kakabwaia nakon maiura.

Waaki ni Kakukurei aika a Kona ni Karaoaki

• Kaota nakoia ataei te kiraati ae kanoana te ran. E kanga te ran ni kakabwaiaira? Tuangiia ataei miin ni burabeti Etekiera n te ran are e baro nako man te tembora (tara Etekiera 47:1–12). Kaota te tamnei inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu (tara naba te witeo “And the River Will Grow,” ChurchofJesusChrist.org). Tuangiia ataei taeka ni kakabwaia ake a reke iroum, n aron te karanga ni miin ni burabeti Etekiera, e raanganako man te tembora.

• Kaoia ataei bwa a na korea tamneia ngke a nako n te tembora. Bootaki anenea te kuna are e kabwarabwarai kakabwaia man te tembora, n aron “Families Can Be Together Forever” (Aia Boki n Anene Ataei,188). Tera ae e reireiniira te anene aio bwa e kanga te tembora ni kakabwaiaira?

Reirei te Reirei: Ataei aika a Ikawai Riki

Etekiera 2:3–4; 3:7; 36:26–27

Iesu Kristo e kona ni buokai ni bita nanou.

E kabongana Etekiera te mwakoro n taeka “te nano ae boou” n reireiniira taekan te bitaki are e uotia te Tia Kamaiu nakon maiura.

Waaki ni Kakukurei aika a Kona ni Karaoaki

• Tuangiia ataei bwa a na kakaea Etekiera 2:3–4; 3:7 ibukin taeka are a kabwarabwara aroia kaain Iteraera. Ngkanne kaoiia bwa a na wareka Etekiera 36:26–27 bwa a na ataia bwa e kanga te Tia kamaiu n anaganiia te buoka bwa a na bitaki. Baikara taeka aika a na kabwarabwa te “nano ae e boou” ao “te tamnei ae e boou” E anganiira? (tara, in aron te katooto, Motiaea 3:19; 5:2).

• Tuangiia ataei bwa a na iangoi bwaai ake a “matoatoa nanoia” ke “matoatoa nanoia” aomata (Ezekiel 2:4; 3:7) are a na karaoia. N aron te katooto, a na kanga ni kaeka nakon te reirei mairoun te karo ke te burabetri? Tera ae a riai ni karaoia ngkana a noora temanna ae e rootaki n te kainnano? Ti kanga ni mwakuri ni kakaokoro ngkana e a tia te Tia Kamaiu ni kamaraui nanora?

Etekiera 37:19–23

Te Bwaibwara ao ana Boki Moomon a buokiira “ni ikotaki” nakon Iesu Kristo.

Etekiera “ana kai Iuta” (te Bwaibwara) ao “ana kai Ioteba” (ana Boki Moomon) a uaia ni mwakuri n ikota Iteraera nakon te Tia Kamaiu (tara Etekiera 37:19).

Waaki ni Kakukurei aika a Kona ni Karaoaki

• Taua katotoon te Bwaibwara ao ana Boki Moomon, ao tuangiia ataei bwa n aia namakin bukin tera e na raoroi ae na iai uoua booki aikai. Wareka nakoia Etekiera 37:19, ao kamataata bwa “ana kai Ioteba” e kaineti nakon ana Boki Moomon, are e koreaki irouia kanoan Ioteba mai Aikubita, ao “ana kai Iuta” e kaineti nakon te Bwaibwara, are angiin kanoana e koreaki irouia Iutaia. Ngkanne bootaki wareki kiibu 21–23 and 2Nibwaai 3:12, ao korei karinani kakabwaia ake a roko man reken booki aika uoua aikai.

• Katuka tamnein Iesu inukan te ruu, ao kaoiia ataei bwa a na kamwaei aia kai n tekateka nakon taabo aika a kakaokoro irarikin oon te ruu. Ngkane tuangiia bwa a na kabongana te Topical Guide bwa a na kunei koroboki aika tabu n te Bwaibwara ao n ana Boki Moomon are e reiakina taekan Iesu Kristo (ngkana e kainnanoaki, reireiniia aron karaoan aei). Imwiin ae e tia te teei temanna ma temanna n tibwa te rongorongo, kaoiia ni kabane bwa a na kamwaei aia kai n tekateka ni kaania ma tamnein Iesu. Waaki nako ni karokoa are ni kabane a bane “ni ikotaki” n okiria.

Etekiera 47:1–12

Kakabwaia man te tembora a kona ni kamarurungi nanora ma ara utu.

Te ran are e raanga man te tembora ni miin ni burabeti Etekiera e uota te maiu nakon bwaai ake e riingi. N ae ti te arona, kakabwaia ake a raanga man te tembora a kona ni kamarurungiira n te tamnei ao n anagniira te maiu ae e akea tokina.

Waaki ni Kakukurei aika a Kona ni Karaoaki

• Korei karinani iaon te burakibooti tabeua taeka aika kakawaki n irekereke ma Etekiera 47:1–12, n aron tembora, karanga, rereua, Taari ae Mate, ika aika a uanao, ao te aroka ae kariki uaa. Weteia ataei n tatabemaniia bwa a na rinea teuana mai bwaai aikai ao ni koroi tamneiia. Ngkanne wareki kiibu ni botaki, ao weteia ataei bwa a na tibwa aia korotamnei ngkana atongaki aia bwai. Baikara kakabwaia aika a roko man te karanga n te mii ni burabeti aio? (tarai kiibu 8–9,12). Buokiia ataei bwa a na taraia a kanga kakabwaia aikai n aekan kakabwaia mairoun te Tama are i Karawa ao te Tia Kamaiu are a anga nakoia naake a kawakin aia berita ae tabu n te tembora.

• Kaota te witeo “And the River Will Grow” (ChurchofJesusChrist.org). Ke bootaki wareka are iroun Unimwaane DaleG. Renlund e reiakina taekan miin ni burabeti Etekiera inanon “Family History and Temple Work: Sealing and Healing” (Riaona, Meei 2018, 47–48). Tuangiia ataei bwa e na kanga te mwakuri n rongorongon te utu ao te temboro n tia ni karokoa iroum ana kamakiu te Tia Kamaiu. Kaoiia ataei bwa a na tibwaua aia namakin ibukin te tembora.

Kaungaa te Kamatebwai n te Mweenga

Kaoiia ataei bwa a na tibwaia ma aia utu teuana te bwai ae a reiakinna n te bong aei ao teuana te bwai ae a kan reiakina riki taekana.

Kanakoraoan Ara Anga reirei

Boutoka te Kamatebwai n te mweenga. “Teuana mai buakon am kouru ngkai te tia reirei ko riai ni kaungaia naake ko reireiniia bwa a na karekei oin aia taneiai ni koroboki aika tabu—ni kauoua temanna n onoti ao n te utu” (Reirei n ana Kawai te Tia Kamaiu, 36).