“Okitobwa 24–30. Etekiera 1–3; 33–34; 36–37; 47: ‘N na Karina te Tamnei Naba ngkai I Nanomi,’” Nakomai, Iriirai–Ibukiia Aomata n Tatabemaniia ao Utu: Te O Tetemanti 2022 (2021)
“Okitobwa 24–30. Etekiera 1–3; 33–34; 36–37; 47,” Nakomai, Iriirai–Ibukiia Aomata n Tatabemaniia ao Utu: 2022
Nakomai, Iriirai, iroun Scott Sumner
Okitobwa 24–30
Etekiera 1–3; 33–34; 36–37; 47
“N na Karina te Tamnei Naba ngkai I Nanomi”
Etekiera e kaoaki bwa e na katamneia ni “kana” ana taeka te Atua—ni kaona birotona iai (taraa Etekiera 2:9–3:3,10). Kona kanga ni kaona birotom n ana taeka te Atua n te wiiki aei?
Korei Am Namakin
Etekiera bon te burabeti are e kakionakoaki man abana. N airi ma kain Iteraera ake tabeman, e a tia n tauaki ao e kanakoaki nako Baburon tabeua te ririki imwain are e a bon kamaunaaki Ierutarem. I Ierutarem, Etekiera e na kaman riki bwa te ibonga are e beku n te tembora. I Baburon, e mena ibuakoia “naake a taenikai,” ao e “tekateka n te tabo are a tekateka iai” (Etekiera 3:15), tebubua te maire man te tembora ma te kantaninga ae uarereke bwa e na manga okira ana auti te Atua ae tangiraki. Ngkanne n te bong teuana Etekiera e mii. E noora“mimitongin Iehova” (Etekiera 1:28)—tiaki n te tembora i Ierutarem ma ikekei i Baburon ibuakoia taan kakionakoaki man abaia. Te buakaka i Ierutarem, e reiakinna, e a tia n rang korakora n te aro are e aki kona ni mena ikekei Iehova (taraa Etekiera 8–11; 33:21).
Teuana tibwangan Etekiera bwa e na kauringiia kain Iteraera taekan mwiin aia kakaitara—te kauring are e angiina aomata aki ongo nako iai. Ma e mwaiti riki n ana rongorongo Etekiera: e taetae ni burabeti bwa, e ngae ngke a rang nakobuaka bwaai, iai te kawai n oki. Ngkana ana aomata te Atua a kona ni butimwaea te kakao n “ongo n ana taeka Iehova” (Etekiera 37:4), te bwai are e a tia ni mate ngkoa e na kona ni manga maiu. Te “nano ae atibu” e kona n oneaki mwiina n te “nano ae boou” (Etekiera 36:26). “[N] na karina Tamneiu I nanomi,” e tuangiia te Uea, “ao kam na maiu” (Etekiera 37:14). Ao ni boong aika kaitira, te Uea e na katea te tembora ae boou ao Ierutarem ae boou, “ao aran te kaawa man te bong arei, E memena iai Iehova” (Etekiera 48:35).
Iango ibukin te Kamatebwai i bon Iroum ni Koroboki aika Tabu
“Kona taekin au taeka.”
Warekan te wewete nakon Etekiera nakon te mwakuri n Etekiera 1–3 e na kona ni karekea inanom bwa kona iangoa te tai are e a tia n anganinko te Atua bwa kona “taekina [Ana] taeka” nakoia tabeman (Etekiera 3:4). N Etekiera 2–3, ata Ana taeka ni kaunganano ao ana kaetieti nakon Etekiera. E ngae ngke aomata ake ko beku ibukiia tao aki rang buakaka n aroia ana aomata Etekiera, iangoia bwa e kanga ana taeka te Atua nakon Etekiera n roota tarakim n am beku n te Ekaretia, ni mweengam, ao n tabo nako.
Taraa naba Etekiera 33:1–9; D.Todd Christofferson, “The Voice of Warning,” Ensign ke Liahona, Meei 2017, 108–11.
E tangiria te Uea ni kabwarai buure.
“Ao ngkana … a boni mena ara bure i aora, ” a titiraki kain Iteraera ake a taenikai, “tina iranna ni maiu iai?” (Etekiera 33:10). Ni kaekaana, te Uea e reireiniia kakaawakin koaua ibukin te rairannano ao te kabwarabure. Titiraki aikai e kona ni buokiko n iangoi koaua akanne:
-
Tera n am iango ae nanonaki n “onimakina oin [am] raoiroi”? (taraa Etekiera 33:12–13).
-
Tera ae kona taekinna nakon temanna ae e namakinna bwa te aomata ae raoiroi ao te aomata ae buakaka are e kabwarabwaraaki inanon Etekiera 33:12–19 a uaia n aki karaoaki ae raoiroi nakoia? (taraa naba Mataio 21:28–31; Ruka 18:9–14).
-
Tera kibuntaeka aika ko kunei inanon kiibu aikai are e buokiko bwa kona matata n te bwai are e nanonaki n te rairannano? Tera iango aika a raka ake ko kunei n Etekiera 36:26–27 ao Aramwa 7:14–16?
Te Uea e kaoai bwa N na kamwarakeia Ana tiibu.
N Etekiera34, te Uea e kananonaia taan kairiia Ana aomata bwa “taan kawakin tiibu.” Ngkai ko wareware, iangoia bwa tera ae nanonaki iroum n te bwai are e nanoaki n riki bwa te tia kairiiri. Antai “tiibu” ae e tangiria te Uea bwa kona kamwarakeia? Kona kanga n ira ana banna ni katooto te Tia Kamaiu are e katei ngke e riki bwa ara Tia Kawakin Tiibu? (taraa kibu 11–31).
Taraa naba Ioane 21:15–17.
Etekiera e nooria n te mii te karaanga ae raanga man te tembora nakon Tari ae Mate.
Te Uea e ikotiia Ana aomata ao e anganiia te maiu ae boou.
Ikotakiia kain Iteraera e kaotaki n Etekiera37 rinanon kanikina aika uoua. Ngkai ko wareka taekan te moan—riia aika a mate bwa a manga maiu (tarai kiibu 1–14)—iangoa te bwai are ko reiakinna n ikotakiia Iteraera n iteran te rabuna aika uoua (taraa naba Etekiera 36:24–30).
Te kauoua ni kanikina (tarai kiibu 15–28) a reke ni kaai aika uoua, are a taku taan rabakau aika a mwaiti bwa kaai aika a na korobokiaki ake a nim man te intiti. Ana kai Iuta e kona n tei ibukin te Baibara (ngkai angiin te Baibara a koreaki irouia kanoan Iuta), ao ana kai Iotebwa e kona n tei ibukin ana Boki Moomon (ngkai ana utu Riaai bon ana kariki Iotebwa are mai Aikubita). N anne n am iango, tera ae e reireiniko taekan taben te Baibara n ikotakiia kain Ieteraera? Tera 2Nibwaai 3:11–13 (te taetae ni burabeti ibukin Iotebwa Timiti ao ana Boki Moomon) ae anga riki nakon mataatam?
Taraa naba 2Nibwaai 29:14; “The Book of Mormon Gathers Scattered Israel” (witeo, ChurchofJesusChrist.org).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Etekiera 33:1–5.Ni kamatataan kiibu aikai, temanna kain te utu e kona ni bakaea n riki bwa “te waatiman” n tarataranako man te winto ao n tuangiia nikiraia te utu n te bwai are e riki i tinaniku. E kanga n riki ara burabeti ae maiu bwa ai aron te tia tantani ibukira?
-
Etekiera 33:15–16.Tera ae a reireiniira taekan kiibu aikai iaon te kabwarabure are ti kona ni karekea rinanon Iesu Kristo?
-
Etekiera 36:26–27.Kaotia nakoia am utu atibu tabeua ngkai ko maroroakina te bwai are e nanonaki n te “nano ae atibu.” Anganiia bwa a na rinea te taeka are e kabwarabwara te “nano ae boou” ao “te tamnei ae boou” are e anganiira te Tia Kamaiu (taraa Motiaea 3:19; 5:2).
-
Etekiera 37:15–28.Kain te utu a kona ni karekei uoua te kai ao a koreia iaon teuana Ibukin Iuta (Baibara) ao iaon are teuana Ibukin Iotebwa (Ana Boki Moomon) (tarai kiibu 16–19). A kona ngkanne n tibwai karaki ke koroboki aika tabu man te Baibara ao Ana Boki Moomon are e buokiia n namakinna bwa a kaan riki nakon te Tia Kamaiu ao n riki bwa “[Ana] aomata” (kibu23).
-
Etekiera 47:1–12.Kibu aikai a kabwarabwara miin Etekiera n te ran are e raanga man te tembora ao ni kamaiua Tari ae Mate—taari are e rang taoro n te aro are ika ao aroka aki kona ni maiu inanona. Ataei a na rang kukurei ni korea tamnein te mii ni burabeti aei. Tera ae e kona te kanikina n te ran are e raanga man te tembora n tei ibukina? (taraa te witeo “And the River Will Grow,” ChurchofJesusChrist.org). E kanga te tembora ni buokiira ni kamarurungiira? (taraa Etekiera 47:8–9,11).
Ibukin iango aika a mwaiti riki ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene are e rineaki: “Dear to the Heart of the Shepherd,” Boki n Anene, no.221.
Kanakoraoan Ara Anga reirei
Tai kataia n rinanon bwaai ni kabane. Kona bae n aki kona n rinanon koaua ni kabane inanon Etekiera ma am utu. Ukoukora ana kairiiri te tamnei n te bwai are kona boboto iaona. (Taraa Reirei n ana Kawai te Tia Kamaiu, 7.)
“Nooria, ao a otinako ran mai aan bwian nanon mataroan te mwaneaba.… Ao bwaai ni kabane a na bane ni maiu aika e roko te ran iai” (Etekiera 47:1,9). Tamnei e kabonganaaki iaan te raitienti man shutterstock.com.