12–18 Sepitema. ʻĪsaia 13–14; 24–30; 35: ‘Ko ha Ngāue Lahi mo Fakaofo,’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
12–18 Sepitema. ʻĪsaia 13–14; 24–30; 35,” Haʻu, ʻo Muimui ʻIate Au—Maʻá e Palaimelí: 2022
Vao ʻAkau Tapú, tā fakatātaaʻi ʻe Brent Borup
12–18 Sepitema
ʻĪsaia 13–14; 24–30;35
“Ko ha Ngāue Lahi mo Fakaofo”
Hili hono ako ʻi he faʻa lotu ʻa e ʻĪsaia 13–14; 24–30;35, palani ha ngaahi ʻekitivitī ke tokoni ke ako e fānaú. ʻE lava ke liliu e ngaahi fakakaukau fakaʻekitivitī ʻi laló ki ha faʻahinga kulupu taʻu motuʻa pē.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Fakaafeʻi e fānaú ke nau tuʻu ki ʻolunga kapau ʻoku nau loto ke vahevahe ha meʻa ne nau toki ako fekauʻaki mo e ongoongoleleí ʻi ʻapi pe ʻi he lotú. ʻOange ki he leka takitaha ha faingamālie ke vahevahe.
Akoʻi e Tokāteliné: Fānau Iiki Angé
Naʻe fakahoko ha tau ʻi he langí.
Kimuʻa pea faʻu ʻa e māmaní, naʻe fili ʻe he Tamai Hēvaní ʻa Sīsū Kalaisi ke hoko ko hotau Fakamoʻuí. ʻOku fakamatalaʻi ʻi he ʻĪsaia 14:12–14 ʻa e loto-hikisia ne fakahaaʻi ʻe Sētane ʻi he Fakataha Alēlea he maama fakalaumālié ʻi Hēvaní.
Ngaahi ʻEkitivitī ʻe Ala Fakahokó
-
Fakaʻaongaʻi ʻa e “Talateu: Ko e Palani ʻa ʻEtau Tamai Hēvaní” (ʻi he Ngaahi Talanoa ʻo e Fuakava Foʻoú, 1–3) pe ko e foʻi hiva “I Lived in Heaven” (Tohi Hiva ʻa e Fanaú,4) ke fakahā ki he fānaú fekauʻaki mo e Tau ʻi Hēvaní kimuʻa pea toki fanauʻi kitautolú. (ʻI hoʻo fakahoko iá, fakakau ha ngaahi kupuʻi lea mei he ʻĪsaia 14:12–14 ʻoku nau fakamatalaʻi ʻa Sētane.) Fakaafeʻi leva e fānaú ke nau taufetongi hono toe talanoaʻi atu ia kiate koé. Fakamahinoʻi ange naʻe muimui ʻa Sīsū Kalaisi ʻi he palani ʻa e Tamai Hēvaní pea hoko ko hotau Fakamoʻuí.
-
Tā ʻi he palakipoé ha foʻi haati mo e foʻi lea Sētane mo ha fofonga loto mamahi ʻi loto ai. Fakamatalaʻi ange ne pehē ʻe Sētane ʻi hono lotó, “Te u fokotuʻu ke māʻolunga hake ʻa hoku nofoʻangá ʻi he ngaahi fetuʻu ʻo e ʻOtuá” (ʻĪsaia 14:13), ʻa ia ko hono ʻuhingá naʻá ne loto ke lelei ange ia ʻi he Tamai Hēvaní. Fakaafeʻi ha kiʻi leka ke tā ha foʻi haati ʻe taha, kae tā e foʻi haati ko ʻení mo e foʻi lea Sīsū pea mo ha fofonga malimali ʻi loto ai. Tokoni ke mahino ki he fānaú naʻe finangalo ʻa Sīsū ke fakahoko e meʻa naʻe finangalo e Tamai Hēvaní ke Ne fakahokó (vakai, Mōsese 4:1–2). Te tau lava fēfē ʻo muimui he sīpinga ʻa Sīsuú?
“Te ne fakaʻauha ʻaupito ʻa e maté ʻi he mālohi” (ʻĪsaia 25:8).
Naʻe toetuʻu ʻa Sīsū Kalaisi.
ʻE lava ke fakafiemālieʻi ʻe Sīsū Kalaisi ʻa e mamahi ʻoku tau ongoʻi fekauʻaki mo e maté. Koeʻuhí naʻá Ne ikunaʻi ʻa e maté, te tau toetuʻu kotoa pē foki mo kitautolu.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo e Toetuʻu ʻa Sīsū Kalaisí, pea kole ki he fānaú ke vahevahe ʻa e meʻa ʻoku nau ʻilo fekauʻaki mo e fakatātaá. ʻO ka fie maʻu, vahevahe mo kinautolu ha talanoa ʻo e toetuʻu ʻa Sīsuú (vakai, “Kuo Toetuʻu ʻa Sīsū,” ʻi he Ngaahi Talanoa ʻo e Fuakava Foʻoú, 139–44). Tā pe hivaʻi ha foʻi hiva fekauʻaki mo eToetuʻú, hangē ko e “Kuo Toe Tuʻu ʻa Sīsū” (Tohi Hiva ʻa e Fānaú,44), pea fakaafeʻi e fānaú ke vahevahe e ongo ʻoku nau maʻú ʻi heʻenau ʻilo naʻe toe tuʻu ʻa Sīsū mei he maté.
-
Talanoa ki he fānaú ʻo kau ki ha taha ʻokú ke ʻilo kuo mate. ʻOku tau ongoʻi fēfē nai ʻi he taimi ʻoku mate ai hatau ʻofaʻanga? Fakaafeʻi e fānaú ke tā ha fofonga ʻo ha tokotaha ʻoku tangi. Hili iá pea lau ʻa e ʻĪsaia 25:8 kiate kinautolu. Ko e hā ʻe fakahoko ʻe Sīsū ki hotau ngaahi loʻimatá ʻi he taimi ʻoku tau ʻofa ai ki ha tokotaha kuo mate? Fakaafeʻi e fānaú ke tā ha fofonga fiefia. Fakahoko hoʻo fakamoʻoní koeʻuhí naʻe toetuʻu ʻa Sīsū Kalaisi, te tau lava ʻo ongoʻi nonga ʻi he taimi ʻoku mate ai ha tokotaha mo ʻiloʻi te tau toetuʻu kotoa pē ʻi ha ʻaho.
Naʻe fakafoki mai ʻe he ʻEikí Hono Siasí ʻo fakafou ʻia Siosefa Sāmita.
Ko hono Fakafoki Mai ʻo e ongoongoleleí ko ha “ngāue fakaofo mo lahi” ia (ʻĪsaia 29:14). Vahevahe mo e fānaú ha ngaahi meʻa fakaofo ʻe niʻihi naʻe fakahoko ʻe he ʻEikí—mo kei fakahoko pē—ke fakafoki mai ʻEne ongoongoleleí ʻi hotau kuongá ni.
Ngaahi ʻEkitivitī ʻe Ala Fakahokó
-
Fakaafeʻi e fānaú ke talaatu ʻa e meʻa ʻoku nau ʻilo fekauʻaki mo Siosefa Sāmitá. ʻO ka fie maʻu, vahevahe mo kinautolu ʻa e “ʻUluaki Mata Meʻa-Hā-Mai ʻa Siosefa Sāmitá” (ʻi he Tokāteline mo e Ngaahi Fuakava, 9–12). Lau ʻa e ʻĪsaia 29:12, pea fakamatalaʻi ange neongo ne pehē ʻe ha kakai tokolahi ne ʻikai “poto” ʻa Siosefa Sāmita, ka naʻe fakafoki mai ʻe Sīsū Kalaisi e Siasí ʻo fakafou ʻiate ia.
-
Lau ki he fānaú ʻa e ʻĪsaia 29:14 pea vahevahe mo kinautolu ha ngaahi lea kehe ʻoku ʻuhinga tatau mo e “fakaofó” pea mo e “lahí.” Fakaʻaliʻali ha ngaahi meʻa ʻokú ne fakafofongaʻi ha konga ʻo e ngaahi ngāue fakaofo ʻa e ʻEikí ʻi he ngaahi ʻaho kimui ní, hangē ko ha fakatātā ʻo e ʻUluaki Mata Meʻa-Hā-Maí pe ko hono maʻu ʻe Siosefa Sāmita ʻa e lakanga fakataulaʻeikí (vakai, Tohi Fakatātā ʻo e Ongoongoleleí, fika 90, 93,94) pe ko ha tatau ʻo e Tohi ʻa Molomoná. Fakaafeʻi e fānaú ke fili ha meʻa pea vahevahe ʻa e ʻuhinga ʻoku fakaofo ai ia kiate kinautolú.
Akoʻi e Tokāteliné: Fānau Lalahi Angé
ʻĪsaia 24:3–5; 29:7–10; 30:8–14
ʻOku ʻuhinga ʻa e hē mei he moʻoní ki he tafoki mei he ʻEikí mo ʻEne kau palōfitá.
ʻE lava ke tokoni ki he fānaú hono lau e ngaahi fakatokanga ʻa ʻĪsaia fekauʻaki mo e fakatuʻutāmaki ʻo e hē mei he moʻoní ke nau tukupā ai ke tuʻu maʻu ʻi he ʻEikí mo muimui ki Heʻene kau palōfitá.
Ngaahi ʻEkitivitī ʻe Ala Fakahokó
-
Tohiʻi e [kupuʻi] lea ko e hē mei he moʻoní ʻi he palakipoé. Fakaafeʻi e fānaú ke kumi ha ʻuhinga ʻi he “Hē Mei he Moʻoní” mei he Fakahinohino ki he Ngaahi Folofolá (scriptures.ChurchofJesusChrist.org). Fakaafeʻi kinautolu ke lau ʻa e ʻĪsaia 24:5; 30:9–11 pea hiki ha lisi ʻo e ngaahi meʻa ne fakahoko ʻe he kakaí ʻi he taimi ʻo ʻĪsaiá naʻá ne tataki kinautolu ke hē mei he moʻoní. Fakaafeʻi leva e fānaú ke liliu e ngaahi meʻa ʻi he lisí ki he ngaahi meʻa te tau lava ʻo fai ke tuʻu maʻu ai ʻi he ʻEikí.
-
Vahevahe e kalasí ke nau tauhoa, pea vahe ki he hoa takitaha ke lau ha taha ʻo e ngaahi potufolofola ko ʻení: ʻĪsaia 24:3–5; ʻĪsaia 29:7–10; pe ʻĪsaia 30:8–14. Fakaafeʻi kinautolu ke tā ha ngaahi fakatātā ʻoku ne fakafofongaʻi ʻa e meʻa ne nau laú. ʻI heʻenau vahevahe ʻenau ngaahi fakatātaá, tokoniʻi kinautolu ke aleaʻi ʻa e meʻa ne akoʻi ʻe he ngaahi lea ʻa ʻĪsaiá fekauʻaki mo e ʻuhinga ʻoku totonu ke tau kei tuʻu maʻu ai ʻi he ʻEikí.
Ko hono Fakafoki Mai ʻo e ongoongoleleí ko ha “ngāue fakaofo” ia.
Te ke tokoni fēfē ke mahino ki he fānaú ʻoku nau kau ʻi he “ngāue fakaofo” (ʻĪsaia 29:14) ʻa e ʻEikí ʻi he ngaahi ʻaho kimui ní?
Ngaahi ʻEkitivitī ʻe Ala Fakahokó
-
Fakaʻaliʻali ha ngaahi fakatātā ʻo ha konga ʻo e ngaahi meʻa fakaofo ne hoko ʻi he taimi ne fakafoki mai ai e ongoongoleleí (vakai, Tohi Fakatātā ʻo e Ongoongoleleí, fika 90–95, pe ko e peesi ʻekitivitī ʻo e uike ní). Lau fakataha ʻa e ʻĪsaia 29:14, 18,24, pea fakaafeʻi e fānaú ke kumi ha ngaahi foʻi lea mo ha ngaahi kupuʻi lea ʻoku felāveʻi mo e ngaahi meʻa ʻoku hoko ʻi he fakatātaá. ʻEke ange ki he fānaú pe te nau lava fēfē ʻo tokoni ki he “ngāue fakaofo” (veesi 14) ʻa e ʻEikí.
-
Vahevahe ha kiʻi aʻusia nounou ke tokoni ki he fānaú ke mahino e ʻuhinga ʻo e fakafoki mai ʻo e ongoongoleleí. Hangē ko ʻení, talanoa fekauʻaki mo ha meʻa naʻe mole pea mo e founga naʻá ke toe maʻu ai iá. Tokoni ki he fānaú ke nau fakafehoanaki ʻeni ki hono Fakafoki Mai ʻo e ongoongoleleí. Fakatatau ki he ʻĪsaia 29:13–15, ko e hā ʻoku tau fie maʻu ai hono Fakafoki Mai ʻo e Ongoongoleleí? Ko e hā ha ngaahi ngāue fakaofo naʻe fakahoko ʻe he ʻEikí ke fakafoki mai ʻEne ongoongoleleí?
ʻOku tākiekina au kia Sīsū Kalaisi ʻe he ngaahi akonaki ʻa ʻĪsaiá.
ʻE lava ke tākiekina ʻe he ngaahi akonaki ʻa ʻĪsaiá ʻa e fānau ʻokú ke akoʻí, ki he Fakamoʻuí, mo tokoni ke nau manatuʻi e ngaahi meʻa kuó Ne fakahoko maʻanautolú.
Ngaahi ʻEkitivitī ʻe Ala Fakahokó
-
Hiki e ngaahi potufolofola ko ʻení ʻi ha laʻipepa kehe: ʻĪsaia 14:3; ʻĪsaia 25:8; ʻĪsaia 28:16; Mātiu 11:28–30; 1 Kolinitō 15:53–57; Hilamani 5:12. ʻOange e ʻū laʻipepá ki he fānaú pea fakaafeʻi kinautolu ke hiki ʻi he ʻū laʻipepá e ngaahi moʻoni ʻoku nau ako mei he ngaahi vēsí pea fengāueʻaki fakataha ke fakatauhoa e ngaahi veesi ʻoku nau akoʻi ha ngaahi moʻoni tataú. Fakatatau ki he ngaahi veesi ko ʻení, ko e hā ha ngaahi meʻa maʻongoʻonga kuo fakahoko ʻe he ʻEikí maʻatautolu?
-
Kole ki he fānaú ke fili ha kupuʻi lea mei he ʻĪsaia 14:3; 25:8; pe 28:16 ʻoku nau fakamanatu ange kiate kinautolu ʻa Sīsū Kalaisi. Fakaafeʻi kinautolu ke hiki e kupuʻi leá ʻi ha laʻipepa pea tā ha fakatātā ʻo e Fakamoʻuí ʻa ia te nau lava ʻo fakaʻaliʻali ʻi honau ngaahi ʻapí.
Poupouʻi e Ako ʻi ʻApí
Fakaafeʻi e fānaú ke hiki ha kiʻi fakamatala pe tā ha fakatātā fekauʻaki mo e meʻa ne nau ako ʻi he kalasí he ʻaho ní. Poupouʻi kinautolu ke vahevahe ia mo honau ngaahi fāmilí pe ko ha mēmipa ʻo e kalasí ne ʻikai haʻu ki he Palaimelí he ʻahó ni.
Ko Hono Fakatupulaki ʻEtau Founga Akoʻí
Fulifulihi ʻa e ngaahi ʻekitivitií ke feʻunga mo e fānau ʻoku nau faingataʻaʻia fakaesinó. ʻE lava ʻe he fanga kiʻi liliu iiki ki he ngaahi ʻekitivitií ʻo fakapapauʻi ʻoku lava ke ako e fānaú kotoa. Hangē ko ʻení, kapau ʻoku fokotuʻu mai ʻe ha ʻekitivitī ke fakaʻaliʻali ha fakatātā, ʻe lava ke mou hivaʻi ha foʻi hiva kae lava ke kau mai mo kinautolu ʻoku kovi ʻenau vakaí.