“5–11 Sepitema. ʻĪsaia 1–12: ‘Ko e ʻOtuá [ʻa] Hoku Fakamoʻuí,’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“5–11 Sepitema. ʻĪsaia 1–12,” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022
ʻOku kikiteʻi ʻe he Palōfita ko ʻĪsaiá Hono ʻAloʻi ʻo Kalaisí, tā fakatātaaʻi ʻe Harry Anderson
5–11 Sepitema
ʻĪsaia 1–12
“Ko e ʻOtuá [ʻa] Hoku Fakamoʻuí”
ʻE ala faingataʻa ke mahino e ngaahi lea ʻa ʻĪsaiá. ʻI hoʻo fakakaukau ki he founga ke akoʻi ai e fānaú fekauʻaki mo e tohi ʻa ʻĪsaiá, tokanga taha ki he fanga kiʻi moʻoni iiki te ne lava ʻo fakamālohia ʻenau fakamoʻoni kia Sīsū Kalaisí.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Fakaafeʻi e fānaú ke vahevahe ha meʻa kuo nau fakahoko kimuí ni mai ke moʻui ʻaki ai e ongoongoleleí, hangē ko hano fakahoko ha lotu, fakahaaʻi ha angaʻofa ki ha tokotaha pe talangofua ki he ngaahi fekau kehé.
Akoʻi e Tokāteliné: Fānau Iiki Angé
ʻOku tau ako ʻi he temipalé fekauʻaki mo Sīsū Kalaisi.
Naʻe tomuʻa mamata ʻa ʻĪsaia ki ha taimi ʻe hanga ai ʻe he temipalé, “ko e moʻunga ʻo e fale ʻo [e ʻEikí],” ʻo tataki mai ha kakai mei he “ngaahi puleʻanga kotoa pē.” Te ke lava ʻo fakaʻaongaʻi e kikite ko ʻení ke tokoni ki he fānaú ke nau ʻamanaki atu ki ha taimi te nau lava ai ʻo ʻalu ki he temipalé.
Ngaahi ʻEkitivitī ʻe Ala Fakahokó
-
Kole ki he fānaú ke tā ha fakatātā ʻo honau ʻapí. Hili iá pea lau fakataha ʻa e ʻĪsaia 2:2, mo fakaafeʻi kinautolu ke tā ha fakatātā ʻo e “fale ʻo e ʻEikí,” ʻa ia ko ha temipale. Lau fakataha ʻa e veesi 3 pea fakaafeʻi kinautolu ke tānaki ki heʻenau ngaahi fakatātaá ha kakai tokolahi ʻoku omi ki he temipalé, kau ai honau ngaahi fāmilí. Ko e hā ʻoku fie maʻu ai ke tau ʻalu ki he fale ʻo e ʻEikí? Vahevahe hoʻo fakamoʻoni ki he ngaahi tāpuaki ʻoku maʻu ʻi heʻetau ako fekauʻaki mo e ʻEikí ʻi Hono falé.
-
Tuku ke pukepuke ʻe ha kiʻi leka ha fakatātā ʻo ha temipale, pea kole ange ki he fānaú ke nau talanoa fekauʻaki mo e meʻa ʻoku nau vakai ki ai ʻi he fakatātaá. ʻEke ange pe ko e hā ʻoku nau saiʻia ai ʻi he temipalé. Lau fakataha ʻa e ʻĪsaia 2:2–3 pea tuku ke nau fanongo ki ha ngaahi ʻuhinga lahi ange ʻe lava ke tau saiʻia ai ʻi he temipalé. Talaange ki he fānaú ʻa e ʻuhinga ʻokú ke saiʻia ai ʻi he temipalé.
-
Hivaʻi mo e fānaú ha foʻi hiva fekauʻaki mo e temipalé, hangē ko e “Fie Siofia ha Temipale” (Tohi Hiva ʻa e Fānaú,99). Tokoniʻi kinautolu ke nau kumi ha ngaahi foʻi lea mo e ngaahi kupuʻi lea ʻi he foʻi hivá ʻoku ne akoʻi mai ko e hā ʻa e temipale mo e meʻa ʻoku tau fakahoko ʻi aí.
-
Tā ha foʻi hala ʻi he palakipoé, pea fokotuʻu ha fakatātā ʻo e temipalé pe ko e Fakamoʻuí ʻi ha tuliki ʻe taha (vakai, Fakalakalaka Fakatāutahá: Tohi Fakahinohino ʻa e Fānaú 2–3). Tuku ke taufetongi ʻa e fānaú hono tā fakatātaaʻi kinautolu pē ʻoku nau ʻaʻeva ʻi he halá. ʻI heʻenau fai iá, fakaafeʻi kinautolu ke toe lea ʻaki e kupuʻi lea mei he ʻĪsaia 2:3: “Te tau ʻaʻeva ʻi hono ngaahi halá.” Ko e hā te tau lava ʻo fai ke ʻaʻeva ʻi he ngaahi hala ʻo e ʻEikí?
“He kuo fanauʻi kiate kitautolu ʻa e tamasiʻi, kuo foaki kiate kitautolu ʻa e foha” (ʻĪsaia 9:6).
Naʻe kikite ʻa ʻĪsaia kau kia Sīsū Kalaisi.
ʻOku fakamoʻoni e kau palōfita kotoa pē kia Sīsū Kalaisi, ʻo kau ai ʻa kinautolu ne moʻui he kuohilí kimuʻa pea ʻaloʻi mai Iá, hangē ko ʻĪsaiá. Fakakaukau ki he meʻa ʻe lava ke ako ʻe he fānaú fekauʻaki mo Sīsū mei he kikite ʻa ʻĪsaia ʻi he ʻĪsaia 9:6.
Ngaahi ʻEkitivitī ʻe Ala Fakahokó
-
“Isaiah the Prophet” (in Old Testament Stories). Lau ki he fānaú ʻa e ʻĪsaia 9:6, pea fakaafeʻi kinautolu ke toutou lea ʻaki e “hingoa” takitaha ne pehē ʻe ʻĪsaia ʻe “ui ʻaki [e] huafa” ʻo Sīsū Kalaisí.
-
Hiki ʻi he ʻū laʻipepá ha ngaahi huafa ʻe niʻihi ʻo Sīsū Kalaisi ʻoku maʻu ʻi he ʻĪsaia 9:6 (vakai ki he peesi ʻekitivitī ʻo e uike ní). Fakaafeʻi e fānaú takitaha ke nau fili ha laʻipepa ʻe taha, pea tokoni ke puʻaki e hingoá ki he kalasí. Talanoa ki he fānaú fekauʻaki mo e ʻuhinga ʻo e hingoa takitaha kiate koé. ʻOange ha fakatātā ʻo Kalaisi ki ha taha ʻo e fānaú, pea kole ange kiate ia ke vahevahe ha meʻa fekauʻaki mo Sīsū pea paasi leva e fakatātaá ki ha tokotaha kehe. Toutou fakahoko e ʻekitivitī ko ʻení kae ʻoua kuo maʻu ʻe he fānaú kotoa ha faingamālie ke vahevahe ai.
Akoʻi e Tokāteliné: Fānau Lalahi Angé
Koeʻuhí ko Sīsū Kalaisi, te u lava ʻo fakatomala pea hoko ʻo maʻa.
Naʻe moʻui ʻa ʻĪsaia ʻi ha taimi ne tafoki ai ha tokolahi ʻo hono kakaí mei he ʻEikí. Ka naʻe talaʻofa ange ʻe he ʻEikí ʻe lava ke fakamolemoleʻi ʻenau ngaahi angahalá kapau te nau fakatomala. ʻOkú Ne fakahoko mai foki ʻa e talaʻofá ni kiate kitautolu.
Ngaahi ʻEkitivitī ʻe Ala Fakahokó
-
Kole ki he fānaú ke lau ʻa e ʻĪsaia 1:2–4 pea talanoa fekauʻaki mo ha niʻihi ʻo e ngaahi ʻuhinga ne ʻikai fiefia ai ʻa e ʻEikí he kakai ʻo Siutá. Hili iá pea lau fakataha ʻa e ʻĪsaia 1:16–19 ke ʻilo e meʻa ne fakaafeʻi ʻe he ʻEikí e kakaí ke nau fakahokó. ʻO ka fie maʻu, tokoni ki he fānaú ke mahino kiate kinautolu e ngaahi lea mo e kupuʻi lea faingataʻá. Ke tokoni ke nau fakakaukauloto ki he veesi18, fakaʻaliʻali ha meʻa lanu kulokula maama mo ha meʻa hinehina lelei. Ko e hā ʻoku tau ako fekauʻaki mo e ʻaloʻofa ʻa Sīsū Kalaisí mei he ngaahi veesi ko ʻení? Fakaafeʻi e fānaú ke vahevahe e anga ʻenau ongo fekauʻaki mo e meʻaʻofa ʻa Sīsū Kalaisi ʻo e fakamolemolé, pea vahevahe foki mo e ngaahi ongo ʻokú ke maʻú.
-
Tokoni ki he fānaú ke nau ako maʻuloto ʻa e ʻĪsaia 1:18. Hiki e vēsí ʻi he palakipoé, pea fakaafeʻi e fānaú ke nau toutou lau maʻuloto ia, ʻo tamateʻi ha foʻi lea ʻe taha he taimi kae ʻoua kuo nau lava ʻo lau maʻuloto ia. Te ke lava foki ʻo fakaʻaongaʻi ha ʻū laʻipepa ʻoku hiki ai e ngaahi lea mei he vēsí. Ko e hā ʻoku mahuʻinga ai ke tau manatuʻi maʻu pē e meʻa ʻoku akoʻi mai ʻe he veesi ko ʻení? Aleaʻi e founga ʻoku hanga ai ʻe he papitaisó mo hono maʻu ʻo e sākalamēnití ʻo fakafaingamālieʻi e talaʻofa ko ʻení kiate kitautolú.
ʻOku tau ako ʻi he temipalé fekauʻaki mo Sīsū Kalaisi.
ʻOku fakahaaʻi mai ʻe he kikite ʻa ʻĪsaia fekauʻaki mo e “moʻunga ʻo e fale ʻo [e ʻEikí]” ha niʻihi ʻo e ngaahi tāpuaki ʻoku tau maʻu mei he moihū ʻi he temipalé, fakataha mo ha ngaahi tāpuaki kehe ʻe hoko mai ʻi he ngaahi ʻaho fakaʻosí. Fakalaulauloto ki he founga te ke ueʻi fakalaumālie ai e fānaú ke nau fekumi ki he ngaahi tāpuaki ko ʻení.
Ngaahi ʻEkitivitī ʻe Ala Fakahokó
-
Kole ki he fānaú ke nau laukonga fekauʻaki mo e meʻa ne mamata ki ai ʻa ʻĪsaia ʻi he ʻĪsaia 2:2–3 pea tā ha fakatātā ʻo e meʻa ʻoku nau pehē ne mei hangē ko iá. Fakamatalaʻi ange naʻe ui ʻe ʻĪsaia e temipalé ko e “moʻunga ʻo e fale ʻo [e ʻEikí].” Ko e hā e ʻuhinga ʻoku hoko ai e moʻungá ko ha fakataipe lelei ki he temipalé?
-
Fakaafeʻi e fānaú ke lau ʻa e ʻĪsaia 2:2–3,5 pea kumi ʻi he ngaahi veesi takitaha ko ʻení ha meʻa ʻokú ne ueʻi fakalaumālie kinautolu ke nau ʻalu ki he temipalé ʻi ha ʻaho. Lau fakataha leva e veesi 4 pea aleaʻi e founga ʻoku tokoni ai e temipalé ke ʻomi ʻa e melino ʻoku fakamatalaʻi ʻi he veesi ko ʻení. Tokoniʻi kinautolu ke fakakaukau ki he ngaahi founga te nau lava ai ʻo teuteu ke ʻalu ki he temipalé ʻi ha ʻaho.
Naʻe kikite ʻa ʻĪsaia kau kia Sīsū Kalaisi.
Naʻe kikite ʻa ʻĪsaia ki he ʻaloʻi ʻo ha tama te Ne ʻafio ʻi he taloni ʻo Tēvitá mo fokotuʻu ha puleʻanga ʻoku ikai hano ngataʻanga. Te ke tokoni fēfē ki he fānau ʻokú ke akoʻí ke mahino e ngaahi kikite ko ʻeni fekauʻaki mo Sīsū Kalaisí?
Ngaahi ʻEkitivitī ʻe Ala Fakahokó
-
Kole ki he fānaú ke nau ʻoatu ha ngaahi sīpinga ʻo ha ngaahi tuʻunga ʻe ala maʻu ʻe ha tokotaha, hangē ko ha hingoa fakanofo ʻoku fekauʻaki mo ha ngāue, ko ha uiuiʻi, timi pe ko ha fāmili. Ko e hā ʻoku talamai ʻe he ngaahi hingoa fakanofo ko ʻení fekauʻaki mo e tokotaha ʻokú ne maʻu kinautolú? Tokoni ki he fānaú ke kumi e ngaahi huafa ʻo Sīsū Kalaisí ʻi he ʻĪsaia 7:14 mo e 9:6–7. Ko e hā ʻoku akoʻi mai ʻe he ngaahi huafa takitaha ko ʻení fekauʻaki mo Iá? Ko e hā mo ha toe meʻa ʻoku tau ako fekauʻaki mo Sīsū Kalaisi mei he ngaahi veesi ko ʻení?
-
Lau fakataha ʻa e Mātiu 1:21–23 mo e Luke 1:31–33, pea aleaʻi e founga ne fakakakato ai e ngaahi kikite ʻa ʻĪsaia ʻi he ʻĪsaia 7:14; 9:6–7 ʻi he taimi ne ʻaloʻi ai ʻa Sīsū Kalaisí.
Poupouʻi e Ako ʻi ʻApí
Kole ki he fānaú ke fakakaukau ki ha meʻa ne nau ako fekauʻaki mo e Fakamoʻuí te nau lava ʻo vahevahe ʻi ʻapi mo honau fāmilí, hangē ko ha taha ʻo Hono ngaahi huafá.
Fakatupulaki ʻo ʻEtau Founga Akoʻí
Tokoniʻi ʻa e fānaú ke nau langaki ha loto falala. ʻE ʻi ai ha fānau ʻe niʻihi mahalo he ʻikai te nau ongoʻi te nau lava ʻo ako ʻa e ongoongoleleí ʻiate kinautolu pē. Ko e founga ʻe taha ʻe tokoni ke langaki ʻaki ʻenau loto falalá ko hono fakahikihikiʻi kinautolu ʻi he taimi ʻoku nau kau mai ai ki he kalasí. Palōmesi ange ki he fānaú ʻe tokoniʻi kinautolu ʻe he Laumālie Māʻoniʻoní ʻi heʻenau akó.