« 19–25 nō Tetepa. Isaia 40–49: ‘E ha’amāhanahana i tō’u ra mau ta’ata’ », Mai, pe’e mai—nō te Paraimere : Faufa’a Tahito 2022 (2021)
« 19–25 nō Tetepa. Isaia 40–49 », Mai, pe’e mai—nō te Paraimere : 2022
Healing the Blind Man [Te fa’aorara’a i te hō’ē mata pō], nā Carl Heinrich Bloch
19-25 nō Tetepa
Isaia 40-49
« E ha’amāhanahana i tō’u ra mau ta’ata »
E rave rahi mau tuha’a i roto i te Isaia 40 – 49 e nehenehe e tauturu i te mau tamari’i ’ia fa’arahi i tō rātou here i te Fatu ’e i to rātou fa’aro’o iāna. ’A ’imi i te arata’ira’a a te Vārua nō te ’imi i terā mau ’īrava ’a tuatāpapa ai ’outou.
Pāpa’i i te mau mana’o e tae mai
Tītau i te mana’o
’A tai’o Isaia 40:9 ’e te mau tamari’i, ’e e ani ia rātou ’ia fa’ahua tē pa’uma ra i « te mou’a teitei » ’e i muri iho, e fa’ateitei i tō rātou reo nō te fa’a’ite i te mea tā rātou i ’apo mai nō roto mai i te mau pāpa’ira’a mo’a ’aita i māoro a’e nei—i te fare ’aore rā, i te fare purera’a.
Ha’api’i i te ha’api’ira’a tumu : Te mau tamari’i ’āpī
E nehenehe au e riro ’ei ’ite nō te Fatu.
’Ua fa’aha’amana’o te Fatu i te ’ati ’Īserā’ela ē, ’ua ’ite rātou e rave rahi mau mea rārahi tāna i rave nō rātou. ’Ua hina’aro ’oia ia rātou (’e ia tātou pā’āto’a) ’ia riro ’ei mau ’ite nōna, te tauturura’a ia vetahi ’ē ’ia ’ite i tōna mana ’e tōna maita’i.
Mau ’ohipa ri’i e nehenehe e rave
-
’A parau i te mau tamari’i i te hō’ē mea ’ua riro ’outou ’ei ’ite. E tauturu ia rātou ’ia feruri i te mau mea tei tupu ia rātou ’o tā rātou e nehenehe e fa’ati’a i te tahi ’e te tahi ’aore rā, ’ua riro ’ei « ’ite » nō—’ei hi’ora’a, te hō’ē mā’a monamona tā rātou i tāmata, te hō’ē vāhi tā rātou i rātere a’enei, ’aore rā, te hō’ē ta’ata tā rātou i mātau. ’A tai’o i te mau tamari’i i te Isaia 43:10 : « ’O ’outou tō’u ’ite, ’e tā’u tāvini, i mā’itihia e au ra ». ’A parau i te mau tamari’i ē, ’ia bāpetizohia tātou, e fafau tātou ’ia riro ’ei ’ite nō Iesu Mesia (hi’o Mosia 18:9). E aha te aura’a ’ia riro ’ei ’ite nō te Fatu ?
-
E ani i te mau tamari’i ’ia fa’a’ite mai i te mea tā rātou i ’ite nō ni’a ia Iesu Mesia ’e tāna ’evanelia. ’A fa’a’ite ia rātou i te mau hōho’a nō te hōro’a ia rātou i te mau mana’o (’ei hi’ora’a, te mau hōho’a nō te Ti’afa’ahoura’a o te Fa’aora, te Buka a Moromona, te hiero, ’e te peropheta ora). E ani ia rātou ’ia parau mai e aha tā rātou e nehenehe e fa’a’ite atu ia vetahi ’ē ’ei ’ite nō te Fatu.
« ’Aore roa ho’i e ora maori rā ’o vau ».
’O Iesu Mesia ana’e te ta’ata e nehenehe e fa’aora ia tātou i te hara ’e i te pohe. ’A feruri nāhea ’outou i te fa’auru i te mau tamari’i ’ia tu’u i tō rātou ti’aturira’a i roto iāna.
Mau ’ohipa ri’i e nehenehe e rave
-
E ani i te mau tamari’i ’ia feruri i te hō’ē taime i reira rātou e hina’aro ai i te tauturu (mai te ta’ata ma’i ’aore rā i roto i te vero). ’A fa’a’ite e rave rahi tauiha’a (’aore rā, mau hōho’a nō te mau tauiha’a), te tahi ’o te tauturu ia rātou i roto i te fifi ’e te tahi ’aita roa ia. ’Ei hi’ora’a, e tauturu te hō’ē fare ’āmarara i roto i te hō’ē vero, terā rā, te hō’ē hāpaina pape ’e te hō’ē pēnitara, e’ita ia e tauturu. ’A ani i te mau tamari’i ’ia mā’iti i te tauiha’a ’o te tauturu i roto i taua taime ra. Fa’a’ite i te mau hōho’a o te Fa’aora nō te tauturu i te mau tamari’i ’ia parau mai nāhea ’oia i te tauturu ia tātou.
-
E tai’o i te mau tamari’i i te Isaia 43:11, ’e e ani ia rātou ’ia fa’atoro i te hō’ē hōho’a nō Iesu ’ia fa’aro’o ana’e rātou i te ta’o « Fa’aora ». ’A fa’a’ite pāpū ē, nō te mea ’ua mamae Iesu Mesia ’e ’ua pohe nō tātou ’e ’ua ti’afa’ahou ’oia, ’o ’oia ana’e te ta’ata e nehenehe e fa’aora ia tātou i tā tātou mau hara ’e i te pohe ato’a ho’i.
E nehenehe tā tātou e fāri’i i te « maita’i mai te ’are moana ra » (Isaia 48:18).
E hōpoi mai te ha’apa’ora’a i te mau fa’auera’a a te Atua i te hau.
Tē fafau mai nei te Fatu i te hau mai te « pape pu’e » ’e te parauti’a mai « te mau ’are o te moana » i te feiā e ha’apa’o i tāna mau fa’auera’a.
Mau ’ohipa ri’i e nehenehe e rave
-
Tai’o i te mau tamari’i i te Isaia 48:18. E ani ia rātou ’ia hā’uti’uti mai i tō rātou rima mai te hō’ē ’ānāvai ’e te mau ’are. ’A parau e mea nāhea te ha’apa’ora’a i te mau fa’auera’a a te Atua i te tauturura’a ia ’outou ’ia fāri’i i te hau mai te hō’ē ’ānāvai ’aore rā, te pūai mai te ’are.
-
Nīno’a i te hō’ē ’ānāvai i ni’a i te tāpura ’ere’ere. E tauturu i te mau tamari’i ’ia feruri i te mau fa’auera’a tā te Atua i hōro’a mai ia tātou. ’A pāpa’i i te reira mau fa’auera’a i ni’a i te tahi ’api parau (’aore rā ’a pāpa’i i te mau hōho’a ’ōhie nō te reira), ’e e vaiiho i te mau tamari’i ’ia tā’amu atu i te mau fa’auera’a i ni’a i te ’ānāvai i ni’a i te tāpura ’ere’ere te tahi i muri mai i te tahi. E tauturu i te mau tamari’i ’ia ha’api’i mai nāhea te ha’apa’ora’a i te mau fa’auera’a e hōpoi mai ai i te hau.
-
Hīmene ʼāmui i te hōʼē hīmene nō niʼa i te mau fa’auera’a, mai te « Pour trouver la paix » (Chants pour les enfants, 68). E aha tā teie hīmene e ha’api’i nei nō ni’a i te tumu e ti’a ai ia tātou ’ia ha’apa’o i te mau fa’auera’a a te Atua ?
Ha’api’i i te ha’api’ira’a tumu : Te mau tamari’i pa’ari
E nehenehe vau ’ia tauturu i te fa’aineine « i te ’ē’a o Iehova. »
Tē tauturu nei tātou i te fa’atupu i te parau tohu i roto ia Isaia 40:3–5 nā roto i te tauturura’a ia vetahi ’ē ’ia fāri’i i te Fatu i roto i tō rātou orara’a.
Mau ’ohipa ri’i e nehenehe e rave
-
E ani i te hō’ē tamari’i ’ia tai’o te Isaia 40:3 ’a tai’o ai te tahi atu mau tamari’i, tāta’itahi hō’ē ’īrava o te mau tuha’a i muri nei, ’e ’ia ’imi i te tahi atu mau ta’o ’e te mau pereota e tūea ra : Mareko 1:3–4 (Ioane Bāpetizo) ; Alama 7:9 (Alama) ; Te Parau Ha’api’ira’a ’e te mau Parau Fafau 33:10–11 (mau misiōnare nō te mau mahana hope’a nei). ’A tauturu ia rātou ’ia ’ite o vai tē fa’aineine nei « i te ’ē’a o Iehova » i roto i te mau tuha’a tāta’itahi. Nāhea teie mau ta’ata i te fa’aineine i te ’ē’a o te Fatu ? E aha tā tātou e nehenehe e rave nō te tauturu ?
-
’A pāpa’i i te hō’ē ’ē’a i ni’a i te tāpura ’ere’ere, ’e ’a tai’o ’e te mau tamari’i i te Isaia 40:3–5. E ani i te mau tamari’i ’ia tāpura mai i te mau fa’atāfifira’a o te nehenehe e ārai te mau ta’ata ’ia pe’e i te Fa’aora, ’e e ani ia rātou ’ia pāpa’i hōho’a i te mau fifi i ni’a i te ’ē’a. E vaiiho ia rātou ’ia tūmā i te mau fa’atāfifira’a ’a parau ai ’outou i te mau rāve’a e ti’a ia tātou ’ia tauturu i te mau ta’ata ’ia upo’oti’a i ni’a i te reira.
Isaia 41:10 ; 43:1–5 ; 48:10
Tei pīha’i iho te Fatu iā’u i roto i tō’u mau tāmatara’a.
’Ia rave ana’e tātou i te mau fafaura’a ’e te Fatu, e fafau mai ’oia ’ia vai noa i pīha’i iho ia tātou—e tae noa atu i roto i tō tātou mau tāmatara’a. E tauturu i te mau tamari’i ’ia hi’o ia rātou iho ’ei tuha’a nō te nūna’a nō te fafaura’a a te Fatu ’e ’ei fa’ari’i nō tāna mau fafaura’a.
Mau ’ohipa ri’i e nehenehe e rave
-
’A pāpa’i i ni’a i te tāpura ’ere’ere ’O vau… ’e E riro vau… E ani i te mau tamari’i ’ia tai’o i te Isaia 41:10 ’e te Isaia 43:1–5 nō te ’ite mai ’o vai tā te Fatu e parau ra ē, ’O ’oia ’e E rave ’oia. E aha te tahi atu ā mau pereota i roto i teie mau ’īrava ? Nāhea teie mau parau poro’i e hōro’a mai ai ia tātou i te tāmāhanahana ’e i te ti’aturi i roto i te mau taime fifi ?
-
’A tai’o ’āmui i te Isaia 48:10, ’e ’ia parau e aha te hō’ē umu, ’e te mau fa’a’ohipara’a ta’a ’ē o te umu. ’A fa’ata’a ē, e tāmāhia te ’āuri i roto i te umu auahi pūai. Nō te aha e fa’aaura’a maita’i te umu nō te fa’a’ite i te ’ati ? Nāhea tō tātou mau ’ati i te tāmā ia tātou ? (hi’o Alama 62:41).
E’ita roa te Fatu e ha’amo’e iā’u.
’Ia ’ite ana’e tātou ē ’ua ātea tātou i te Fatu nō te hara, nō te mau tāmatara’a, ’aore rā te tahi atu mau tumu, e nehenehe te parau poro’i a Isaia 49:14–16 e hōro’a mai i te tāmāhanahanara’a.
Mau ’ohipa ri’i e nehenehe e rave
-
E ani i te mau tamariʼi ’ia taiʼo i te Isaia 49:14. E aha te mea e feruri ai te ta’ata ’ua ha’amo’e ’aore rā, ’ua fa’aru’ehia rātou ? Nāhea tātou i te tauturu ia vetahi ’ē ’ia ’ite ē, ’aita te Fatu i ha’amo’e ia rātou ? Nāhea tātou ’ia ’ite ē, ’aita ’oia i ha’amo’e ia tātou ?
-
E ani i te mau tamari’i ’ia parau mai nō ni’a i te hō’ē ta’ata tā rātou i mātau ’o te ’ore roa e ha’amo’e ia rātou, mai te hō’ē melo o te ’utuāfare ’aore rā te hō’ē hoa. ’A ’āparau e mea nāhea te hō’ē metua vahine here i te mana’ona’ora’a i tāna mau tamari’i ’e nāhea te Fatu i te mana’ona’o ia tātou. I muri iho, ’a ani i te mau tamari’i ’ia tai’o i te Isaia 49:15–16. Mai te au i teie mau ’īrava, nō te aha e ’ore roa te Fatu e ha’amo’e ia tātou ? E ani i te mau tamari’i ’ia fa’a’ite mai i tō rātou mau mana’o nō ni’a ia Iesu Mesia.
Fa’aitoito i te ha’api’ira’a i te fare
E ani i te mau tamari’i ’ia feruri i te tahi mea tā rātou i ha’api’i mai i teie mahana ’o tā rātou e hina’aro e ha’api’i rahi mai ā nō ni’a i te reira. ’A tauturu ia rātou ’ia pāpa’i i te hō’ē uira’a nō ni’a i te reira, ’o tā rātou e nehenehe e ui i te hō’ē metua ’aore rā, i te tahi atu melo o te ’utuāfare.
Ha’amaita’i i tā tātou ha’api’ira’a
’A fa’atano i ni’a i te mau hina’aro o te mau tamari’i. Mai te mea e ha’api’i ’outou i te mau tamari’i ’āpī, ’ua fa’auruhia rā ’outou ’ia ha’api’i ia rātou i te hō’ē o te mau parau tumu i roto i teie arata’ira’a i raro a’e i te « tamari’i pa’ari a’e » ’aore rā e tāuiui, ’a fa’atano i te mau ’ohipa ri’i tei fa’anahohia nō taua parau tumu rā nō te pāhono i te mau hina’aro ’e te mau ’aravihi o te mau tamari’i tā ’outou e ha’api’i nei.