« 26 nō Tetepa–2 nō ’Ātopa. Isaia 50–57 : ‘’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto’ », Mai, pe’e mai—nō te Paraimere : Faufa’a Tahito 2022 (2021)
« 26 nō Tetepa–2 nō ’Ātopa. Isaia 50–57 », Mai, pe’e mai—nō te Paraimere : 2022
The Mocking of Christ [Te tāhitohitora’a i te Mesia], nā Carl Heinrich Bloch
26 nō Tetepa–2 nō ’Ātopa
Isaia 50–57
« ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto »
Tē vai ra i roto i te Isaia 50–57 te tahi mau reo nehenehe ’o tā te mau tamari’i tā ’outou e ha’api’i nei e ’ore e māramarama. ’A fa’aineine ai ’outou i te ha’api’i, ’a feruri hōhonu i te mau parau mau ’ōhie tā teie mau parau e ha’api’i ra ’e e nāhea ’outou e nehenehe ai e tauturu i te mau tamari’i ’ia ha’api’i mai.
Pāpa’i i te mau mana’o e tae mai
Tītau i te mana’o
’A fa’aitoito i te tamari’i tāta’itahi ’ia fa’a’ite mai, e mea nāhea rātou i te ’itera’a ē, ’ua here Iesu Mesia ia rātou. ’A ani ia rātou ’ia fa’a’ite mai e aha tā rātou e rave ra nō te fa’a’ite ē, ’ua here rātou ia Iesu.
Ha’api’i i te ha’api’ira’a tumu : Te mau tamari’i ’āpī
’Ua mamae Iesu nō’u nō te mea ’ua here ’oia iā’u.
Nā roto i tāna tusia tāra’ehara, ’ua mamae Iesu Mesia nō tā tātou mau hara ’e ’ua rave i ni’a iāna iho « i tō tātou mau paruparu » ’e « tō tātou ’oto ». Nāhea ’outou e fa’a’ite pāpū ai i te mau tamari’i i te Tāra’ehara a te Fa’aora ?
Mau ’ohipa ri’i e nehenehe e rave
-
’A pia i te mau hōho’a o te Fa’aora e mamae ra i ni’a i te sātauro ’e i roto i te ’ō i Getesemane (hi’o Buka hōho’a nō te ’evanelia, N°56, 57, ’aore rā, te mau pene 51–53 i roto Te mau ’ā’amu o te Faufa’a ’Āpī). E ani i te mau tamari’i ’ia fa’a’ite mai e aha tā rātou e ’ite nei i roto i te mau hōho’a ’e e fa’a’ite mai e aha tā rātou i ’ite nō ni’a i te mau ’ohipa e tupu ra. Nō te aha Iesu i mamae ai nō tātou ?
-
Tai’o i te mau tamari’i i te Isaia 53:4 : « ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto ». ’A fa’a’ite i te mau tamari’i i te hō’ē tao’a taiaha (’aore rā te hō’ē hōho’a o te reira), ’e ’a fa’aue ia rātou ’ia fa’ahua amo i te tahi mea teimaha. ’A fa’ata’a ē, e nehenehe te « paruparu » ’e te « ’oto » (’aore rā te ’oto rahi), e riro e mea teiaha ’e te fifi ’ia amo. ’A fa’a’ite pāpū ē, e tauturu Iesu Mesia ia tātou ’ia amo i teie mau mea nō te mea ’ua here ’oia ia tātou.
E nehenehe au e ’imi i te Fatu ’e e ti’aoro atu iāna.
’A feruri e nāhea e nehenehe ai ia ’outou ’ia tauturu i te mau tamari’i ’ia māramarama e aha te aura’a e « ’imi » ia Iesu i roto i tō rātou orara’a.
Mau ’ohipa ri’i e nehenehe e rave
-
’A huna i te hō’ē hōho’a nō Iesu i te hō’ē vāhi i roto i te piha, ’e e ani i te mau tamari’i ’ia ’imi i te reira. ’A tai’o i te mau parau « e ’imi ’outou ia Iehova oi ’itea e ’oia » i roto i te Isaia 55:6. E ani i te mau tamari’i ’ia fa’a’ite mai i te tahi mau rāve’a e ti’a ai ia rātou ’ia ’imi i te Fatu—te aura’a, e ti’a ia rātou ’ia tāmata ma te pūai i te ha’api’i mai nō ni’a iāna ’e ’ia ha’afātata atu iāna. I te mau taime ato’a e hōro’a mai te hō’ē tamari’i i te hō’ē pāhonora’a, ’a huna fa’ahou i te hōho’a, ’e e ani i te tamari’i ’ia « ’imi » i te reira.
-
E tauturu i te mau tamari’i ’ia ha’api’i mai i te mau parau o te hīmene « Sans tarder, je recherche mon Sauveur » (Chants pour les enfants, 67) ’aore rā, te tahi atu hīmene nō ni’a i te ha’afātatara’a atu i te Fa’aora. ’A fa’aohipa i te ’api ’ohipara’a nō teie hepetoma nō te tauturu i te mau tamari’i ’ia mā’iti i te tahi mea tā rātou e rave nō te « ’imi i te Fatu ».
-
E tai’o i te pereota « e ti’aoro ’outou iāna, oi fātata mai ’oia » i roto i te Isaia 55:6. Nāhea tātou ’ia « ti’aoro » i te Metua i te ao ra ? E ani i te mau tamari’i ’ia paraparau nō ni’a i te ’ōhipa tā rātou e parau nei i roto i tā rātou mau pure. ’A fa’a’ite pāpū ē, ’ua here te Metua i te ao ra ia rātou ’e tē fa’aro’o nei ia rātou ’ia pure.
Ha’api’i i te ha’api’ira’a tumu : Te mau tamari’i pa’ari
Tē ani mai nei te Fatu iā’u ’ia « ’ahu na i tō [tō’u] pūai ».
I roto te Isaia 51 ’e te 52, ’ua fa’a’ohipa te Fatu i te mau pereota mai te « ’a ara », « ’a ti’a i ni’a », ’e « ’a ’ahu na i tō pūai » nō te fa’auru i tōna mau ta’ata ’ia ora i tō rātou fāito pūai hanahana. E feruri nāhea teie mau parau e nehenehe ai e fa’auru i te mau tamari’i tā ’outou e ha’api’i ra.
Mau ’ohipa ri’i e nehenehe e rave
-
Nā mua a’e i te piha ha’api’ira’a, ’a pāpa’i i ni’a i te tāpura ’ere’ere e rave rahi pereota i roto i te Isaia 51–52 ’o tē fa’a’ite nei i te mau ’ohipa tā te Fatu i hina’aro i tōna mau ta’ata ’ia rave, mai te « ’a nānā na i tō ’outou mata i ni’a », « ’a ara », « ’a ti’a i ni’a », « ’a ueue na i te repo ia ’oe ra », ’e « ’ia puroro noa atu te ’oa’oa » (Isaia 51:6, 17 ; 52:2, 9). E ani ia rātou, te tahi i muri mai i te tahi, ’ia ha’uti ta’ata ora i te mau pereota ’a tāmata ai te toe’a o te piha ha’api’ira’a i te ’imi e aha te reira. ’Ia hope te reira, e fa’a’ite i te mau tamari’i i te pereota i roto i te mau pāpa’ira’a mo’a, ’e ’a ’āparau ’e o rātou i te aura’a pae vārua o te pereota. E aha tā te Fatu e ani mai nei ia tātou ’ia rave ? Nāhea e ti’a ai ia tātou ’ia rave i teie mau mea tāta’itahi ?
-
E ani i te mau tamari’i ’ia tai’o i te Isaia 51:1, 4, 7 ’e ’ia hi’o ’o vai tā te Fatu e parau nei ’e te mea tāna e hina’aro ia rātou ’ia rave. E aha te aura’a, ’ia « fa’aro’o mai » i te Fatu ? Nō te fa’ahōho’ara’a, e ani i te hō’ē o te mau tamari’i ’ia hōro’a mai i te mau arata’ira’a ’ōhie, ’o tā vetahi ’ē atu e pe’e. Nō te aha e mea fifi i te tahi taime ’ia fa’aro’o ’e ’ia ha’apa’o i te parau a te Fatu ? Nāhea e ti’a ai ia tātou ’ia fa’a’ite i te Fatu ē, tē « fa’aro’o nei » tātou iāna ?
Because of Love [Nō te here], nā te ta’ata nana’o ’o Angela Johnson
’Ua rave Iesu Mesia i ni’a iāna iho i tā’u mau hara ’e tō’u mau ’oto.
Nāhea e ti’a ai ia ’outou ’ia fa’a’ohipa i te mau parau a Isaia nō te tauturu i te mau tamari’i ’ia hāro’aro’a hōhonu atu ā i te mea tā te Fa’aora i rave nō rātou ?
Mau ’ohipa ri’i e nehenehe e rave
-
’A pia i te mau hōho’a e rave rahi o te māuiui ’e te pohe o Iesu Mesia (hi’o, ’ei hi’ora’a, Buka hōho’a nō te ’evanelia, N°56, 57, 58). ’A taio ’āmui i te Isaia 53:3–6, 9, ’e e ani i te mau tamari’i ’ia ’imi i te mau pereota e fa’ata’a nei i te mau ’ohipa i tupu i roto i te mau hōho’a. ’A fa’a’ite pāpū ē e rave rahi hānere matahiti hou Iesu Mesia ’a mamae ai nō tātou, ’ua ha’api’i te mau peropheta mai ia Isaia nō ni’a i teie mau ’ohipa faufa’a rahi i tupu. Nō te aha e mea faufa’a rahi te reira nō te mau ta’ata ’ia ’ite i teie mau mea e rave rahi mau matahiti nā mua roa ? (hi’o Alama 39:15–19).
-
E ani i te mau tamari’i ’ia tai’o i te Isaia 53:4–7 ’e ’ia ’imi mai i te mau parau o te fa’a’ite rā i te mea tā te Fa’aora i mamae nō tātou. E ani i te mau tamari’i ’ia pāpa’i i teie mau ta’o i ni’a i te ’iri pāpa’ira’a. Nō te aha ’oia i fa’a’oroma’i ai i tō tātou « paruparu », « ’oto », ’e « te mau ’ino » ? (hi’o ato’a Alama 7:11–12). ’A fa’a’ite i te mau tamari’i nāhea te Fa’aora i te tauturu ia ’outou ’ia amo i tō ’outou paruparu ’e tō ’outou mau ’oto. E vaiiho ia rātou ’ia fa’a’ite mai i tō rātou mana’o nō ni’a i te Fa’aora ’e i te mea tāna i rave nō rātou.
E mea teitei a’e te mau rāve’a a te Fatu i tā’u iho.
’Ia māramarama ana’e tātou ē, e mea teitei atu ā te mau mana’o ’e te mau rāve’a a te Fatu i tō tātou nei, e mea ’ōhie roa atu ’ia ti’aturi iāna.
Mau ’ohipa ri’i e nehenehe e rave
-
E ani i te mau tamari’i ’o vai tā rātou e haere atu mai te mea e fifi rātou, ’e nō te aha. Tai’o ’e te mau tamari’i te Isaia 55:8–9, ’e e ani ia rātou ’ia fa’aro’o nō te aha e ti’a ai ia tātou ’ia ’imi i te arata’ira’a a te Fatu i te taime e hina’aro tātou i te tauturu.
-
’A pāpa’i hōho’a i ni’a i te ’iri pāpa’ira’a i te ra’i ’e te fenua, ’e e tāpa’o i te reira te Ra’i ’e te Fenua. I muri iho, e ani i te mau tamari’i ’ia tai’o i te Isaia 55:9 nō te ’ite mai e aha tā te Fatu e fa’aau nei i te mau ra’i ’e i te fenua, ’e e ani ia rātou ’ia tu’u mai i teie mau tāpa’o ’ē atu i ni’a i te mau hōho’a. E aha te aura’a e « mea teitei a’e » te mau rāve’a ’e te mau mana’o o te Fatu, i tō tātou ? Nō te aha e mea faufa’a ’ia ’ite i te reira ?
-
’A ’āparau ’e te mau tamari’i i te tahi o te mau rāve’a a te Fatu e mea teitei a’e i tō tātou. ’Ei hi’ora’a, e aha te huru o tāna ravera’a i te mau ta’ata hara ? (hi’o Mareko 2:15–17). E aha te huru o tāna arata’ira’a ia vetahi ’ē ? (hi’o Mataio 20:25–28). Nāhea tāna rāve’a i ta’a ’ē ai i tō vetahi ’ē ? ’A parau i te mau tamari’i ē e mea nāhea tō ’outou ha’api’ira’a mai i te ti’aturi i te mau rāve’a teitei ’e te mau mana’o a te Fatu.
Fa’aitoito i te ha’api’ira’a i te fare
’A hōro’a i te mana’o i te mau tamari’i ’ia ha’amau i te hō’ē fā o te nehenehe e tauturu ia rātou ’ia ha’afātata atu ia Iesu Mesia, ma te fa’atumu i ni’a i te hō’ē mea tā rātou i ha’api’i mai i roto i te piha ha’api’ira’a i teie mahana. E ani ia rātou ’ia fa’a’ite atu i taua fā ra i te hō’ē melo o te ’utuāfare.
Ha’amaita’i i tā tātou ha’api’ira’a
Tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a. Nō te tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a, ’a fa’atumu i ni’a i te hō’ē ’īrava ’aore rā, hō’ē noa a’e pereota faufa’a. Te tahi mau taime e nehenehe ’outou e tai’o pūai i te hō’ē ’īrava ’e e ani i te mau tamari’i ’ia ti’a ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te hō’ē ta’o ’aore rā, te hō’ē pereota ta’a ’ē tā ’outou e hina’aro e rōtahi i ni’a iho.