The Cry of Jeremiah the Prophet [Te ’oto a Ieremia, te peropheta], hō’ē hōho’a nana’ohia nā te fare ha’api’ira’a Nazarene

17–23 nō ’Ātopa

Ieremia 30–33 ; 36 ; Te ’Oto o Ieremia ra 1 ; 3

« E fa’ariro ho’i au i tō rātou ’oto ’ei ’oa’oa »

E mea fifi paha te mau buka a Ieremia ’e Te ’Oto o Ieremia ra nō te mau tamari’i ’ia māramarama, terā rā, e nehenehe tā ’outou piha ha’api’ira’a e ha’api’i tāmau mai i te mau ha’api’ira’a nā roto mai i te mau parau tumu i ha’api’ihia i roto i teie mau buka. E aha tei fa’auruhia ia ’oe ’ia fa’a’ite ?

Pāpa’i i te mau mana’o e tae mai

Tītau i te mana’o

’A fa’ahaere i te hō’ē Bibilia nā roto i te tamari’i. ’Ia tāpe’a te tamari’i i te buka, e ani ia rātou ’ia fa’a’ite mai i te hō’ē mea tā rātou i here nō ni’a i te Faufa’a Tahito—penei a’e te hō’ē parau tumu ’aore rā te hō’ē ’ā’amu au-roa-hia tā rātou i ha’api’i mai i te fare ’aore rā i te fare purera’a.

Ha’api’i i te ha’api’ira’a tumu : Te mau tamari’i ’āpī

Ieremia 31:3

’Ua here te Metua i te ao ra ’e ’o Iesu iā’u.

E tauturu te ’itera’a i te « here mure ’ore » ’o te Metua i te ao ra ’e ’o Iesu Mesia i te mau tamari’i tā ’outou e ha’api’i rā, ’ia ha’afātata atu ia rāua.

Mau ’ohipa ri’i e nehenehe e rave

• ’A fa’a’ite i te mau tamari’i i te tahi mau tao’a (’aore rā te mau hōho’a nō te mau tao’a) e vai maoro ’e te tahi ’aita, mai te hō’ē moni ’auri ’e hō’ē tuha’a mā’a hotu. E ani i te mau tamari’i, e aha te tao’a e vai maoro a’e ’e ’a parauparau nō te aha te tahi mau tao’a e vai maoro ai i te tahi atu. ’A tai’o Ieremia 31:3, ’e e tauturu i te mau tamari’i ’ia māramarama ē, te here o te Metua i te ao ra ’e o Iesu Mesia nō rātou ’ei mea « mure ’ore » ïa.

• E ani i te mau tamari’i ’ia fa’a’ite mai e mea nāhea tā te Metua i te ao ra ’e tā Iesu Mesia ’ia fa’a’ite mai i tō rāua « aroha hāmani maita’i » nō rātou (Ieremia 31:3). Nō te hōro’a i te mau tamari’i i te mau mana’o, ’a hīmene i te hō’ē hīmene nō ni’a i tō rāua here nō tātou, mai te « Je ressens son amour » ’aore rā, « Mon Père Céleste m’aime » (Chants pour les enfants, 42–43, 16–17). Mai te mea e nehenehe, ’a fa’a’ite i te mau hōho’a nō te mau mea tei fa’ahitihia i roto i te hīmene. E aha tā tātou fāri’i, ’ia feruri ana’e tātou i te here o te Metua i te ao ra ’e ’o Iesu Mesia ?

E nehenehe te mau pāpa’ira’a mo’a e fa’auru ia tātou ’ia tātarahapa ’e ’ia fāriu atu i te Fatu.

Ieremia 36:1–4

Te mau pāpa’ira’a mo’a ’o te parau ïa a te Atua.

’Ua parau te Fatu ia Ieremia ’ia pāpa’i i tāna mau parau, ’e ’ua fa’ahereherehia te mau pāpa’ira’a a Ieremia nō tātou i roto i te Buka a Ieremia. E tauturu i te mau tamari’i ’ia fa’ahōhonu i tō rātou here i te mau pāpa’ira’a mo’a, i te vāhi tātou e ’ite mai ai i te parau a te Atua.

Mau ’ohipa ri’i e nehenehe e rave

• E ani i te hō’ē tamari’i ’ia fa’ahua ha’uti mai ia Ieremia, ’e e ani i te tahi atu mau tamari’i ’ia ha’uti mai ia Baruka. ’A tauturu i te tamari’i e ha’uti ra ia Ieremia ’ia parau mai i te tahi mau parau i roto i te Ieremia 36:3 ’a fa’ahua pāpa’i ai te tahi atu mau tamari’i i te mau mea e parauhia ra, mai tā Baruka i rave. ’A fa’a’ite pāpū ē, te mau pāpa’ira’a mo’a i teie mahana, ’o te « mau parau ato’a a Iehova » (Ieremia 36:4) tāna i ani i te mau peropheta ’ia pāpa’i.

• ’A fa’a’ite i te hō’ē buka nā te mau tamari’i ’e te hō’ē buka pāpa’ira’a mo’a, ’e e ani i te mau tamari’i ’ia parau mai i te mau ta’a-’ē-ra’a tā rātou e ’ite nei i rotopū i teie nā buka. E aha tē fa’ata’a ’ē nei te mau pāpa’ira’a mo’a ? E tauturu i te mau tamari’i ’ia māramarama ē, te mau pāpa’ira’a mo’a ’o te parau ïa a te Atua tei pāpa’ihia e te mau peropheta, mai te Buka a Ieremia ’o tā te Atua i parau ia Ieremia e pāpa’i.

Ieremia 36:4–10

E nehenehe au e fa’a’ite i te mea tā’u i ha’api’i mai i roto i te mau pāpa’ira’a mo’a.

E nehenehe te mau tamari’i e fāri’i i te hō’ē fa’aurura’a rahi nō ni’a i te feiā e ha’ati ra ia rātou. Mai ia Baruka, e nehenehe rātou e fa’a’ite i te mea tā rātou i ha’api’i mai i roto i te mau pāpa’ira’a mo’a ia vetahi ’ē.

Mau ’ohipa ri’i e nehenehe e rave

• E ani i te mau tamari’i ’ia rave i te mau ’ohipa e au i te mau parau tā ’outou e tai’o (’aore rā e ha’apoto) te Ieremia 36:4–10, mai te fa’ahuara’a e pāpa’i i roto i te hō’ē buka (hi’o ’īrava 4), te tāpe’ara’a i te ’auri o te hō’ē fare tāpe’ara’a (hi’o ’īrava 5), ’e te tai’ora’a i te mau pāpa’ira’a mo’a i te mau ta’ata (hi’o ’īrava 8, 10). E ha’apāpū e, mea itoito Baruka i te tai’ora’a i te mau parau a Ieremia i te mau ta’ata noa atu ē, ’aita te feiā fa’atere nō Ierusalema i hina’aro ’ia nā reira ’oia. ’A tauturu i te mau tamari’i ’ia ha’amana’o i te hō’ē mea tā rātou i ’apo mai i roto i te Faufa’a Tahito ’e ’ia feruri i te mau rāve’a e nehenehe ai rātou e fa’a’ite atu i te reira ia vetahi ’ē.

• E hīmene i te hō’ē hīmene nō ni’a i te mau pāpa’ira’a mo’a, mai te « Quand je lis l’Ecriture sainte » (Chants pour les enfants, 66). ’A fa’a’ite atu i tō ’outou ’itera’a pāpū nō te mau pāpa’ira’a mo’a, ’e e ani i te mau tamari’i ’ia fa’a’ite ato’a mai i tō rātou ’itera’a pāpū.

Ha’api’i i te ha’api’ira’a tumu : Te mau tamari’i pa’ari

Ieremia 31:31–34 ; 32:38–41

E ti’a iā’u ’ia ha’apa’o i tā’u mau fafaura’a ’e te Atua.

E nehenehe te mau ha’api’ira’a a Ieremia nō ni’a i te fafaura’a ’āpī ’e te mure ’ore a te Fatu e tauturu i te mau tamari’i tā ’outou e ha’api’i ra ’ia ha’apūai i tō rātou hina’aro ’ia ha’apa’o i tā rātou mau fafaura’a.

Mau ’ohipa ri’i e nehenehe e rave

• ’A pāpa’i hōho’a i te hō’ē māfatu i ni’a i te tāpura ’ere’ere, ’e e ani i te ’āfara’a o te mau tamari’i ’ia tai’o Ieremia 31:31–34 ’e te tahi ’āfara’a ’ia tai’o i te Ieremia 32:38–41. E ani i te nā pupu ’ia pāpa’i i roto i te māfatu i te mau mea tā rātou i ha’api’i mai nā roto mai i tā rātou mau ’īrava nō ni’a i tā tātou mau fafaura’a ’e te Atua. E mea nāhea te mau ture a te Atua tei pāpa’ihia i roto i tō tātou māfatu (hi’o Ieremia 31:33) e ta’a ’ē ai i te tai’o-noa-ra’a te reira i roto i te mau pāpa’ira’a mo’a ? Nō te aha tātou e hina’aro ai e rave i te mau fafaura’a ’e te Fatu ? Nō te aha ’oia e hina’aro ai e rave i te mau fafaura’a ’e tātou ?

• Nō te hi’o fa’ahou i te mau fafaura’a tā tātou i rave ’a bāpetizohia ai tātou, e ani i te mau tamari’i ’ia hāmani e piti tāpura i ni’a i te hō’ē ’āpī parau ma te upo’o parau Tā’u mau fafaura’a ’e Tā te Atua mau fafaura’a. E ani ia rātou ’ia fa’a’ī i te tāpura ma te fa’a’ohipa i te tuha’a tei pi’ihia « Fafaura’a nō te bāpetizora’a » i roto i Te mau tumu parau o te ’evanelia tuha’a « Bāpetizora’a » (topics.ChurchofJesusChrist.org) ’aore rā Mosia 18:10, 13 ; Te Parau Ha’api’ira’a ’e te mau Parau Fafau 20:37. E ani i te mau tamari’i ’ia pia i te ’api parau i te fare nō te tauturu ia rātou ’ia ha’amana’o i te ha’apa’o i tā rātou mau fafaura’a.

Ieremia 36

Te mau pāpa’ira’a mo’a ’o te parau ïa a te Atua.

E nehenehe te ’ā’amu i roto i te Ieremia 36 e tauturu i te mau tamari’i ’ia ha’api’i mai roto mai i te mau hi’ora’a o te mau ta’ata tei fāri’i i te parau a te Fatu i roto i te mau pāpa’ira’a mo’a.

Mau ’ohipa ri’i e nehenehe e rave

• ’A pāpa’i i teie mau uira’a i ni’a i te tāpura ’ere’ere : Nō te aha ? ’O vai te ha’afaufa’a nei i te mau pāpa’ira’a mo’a ? ’O vai,’aita ? ’A tai’o ’āmui i te Ieremia 36:1–3, ’e e ani i te mau tamari’i nō te aha te Fatu i hina’aro ai ia Ieremia ’ia pāpa’i i tāna mau parau. I muri iho e ani i te mau tamari’i ’ia ’ohipa ’āmui ’ei ’āpiti nō te tai’o Ieremia 36:5–8, 20–25 ’e ’ia ’imi mai ’o vai tei fa’a’itehia ē, ’ua ha’afaufa’a rātou i te mau pāpa’ira’a mo’a ’e ’o vai ’aita. E parau nō te aha ’outou e ha’afaufa’a ai i te mau pāpa’ira’a mo’a. ’A fa’a’ite i te hō’ē tuha’a o te pāpa’ira’a mo’a ’aore rā, te hō’ē ’ā’amu tei riro e aura’a ta’a ’ē mau nō ’outou. E ani i te mau tamari’i ’ia fa’a’ite ato’a mai i tā rātou.

• E ani i te mau tamari’i ’ia fa’a’ohipa i te ’api ’ohipara’a nō teie hepetoma nō te ha’api’ipi’i i te fa’a’ite i te tahi ’e te tahi i te ’ā’amu i roto i te Ieremia 36. E ani manihini ia rātou ’ia faʼaʼite i tō rātou ’itera’a pāpū nō te mau pāpa’ira’a mo’a.

Te ’Oto o Ieremia ra 1:1–2, 16 ; 3:22–26

Maoti te Fa’aora e rāve’a tā’u ’ia fa’a’orehia tā’u mau hara.

Mai tā te buka Te ’Oto o Ieremia ra e pehepehe nei, pinepine tātou i te ’oto ’ia hara ana’e tātou. E nehenehe teie mau mana’o e fa’aitoito ia tātou ’ia taui ’e ’ia ani i te Metua i te ao ra ’ia fa’a’ore mai i te hapa.

Mau ’ohipa ri’i e nehenehe e rave

• ’A fa’ata’a i te mau tamari’i ē, nō te mea ’aita te ’āti ’Īserā’ela i tātarahapa, ’ua ha’amouhia Ierusalema ’e te hiero i reira. E ani i te mau tamari’i ’ia ’āparau mai e aha tā rātou e fāri’i, mai te mea tē ora ra rātou i Ierusalema i taua taime ra. Tai’o ’āmui i Te ’Oto o Ieremia ra 1:1–2, 16. E aha te mau ta’o ’e te mau pereota i roto i teie mau ’īrava e tauturu ia tātou ’ia māramarama e aha tā te ’āti ’Īserā’ela i fāri’i ? Nāhea te parau poro’i i roto i Te ’Oto o Ieremia ra 3:22–26 i te hōro’a mai ia rātou i te ti’aturira’a ?

• E ani i te mau tamari’i ’ia feruri i te hō’ē taime ’a ’oto ai rātou nō te hō’ē mā’itira’a ’ino tā rātou i rave. E aha tā rātou i ’ite mai i roto i Te ’Oto o Ieremia ra 3:22–26 ’o te tauturu ia rātou ’ia ’ite ē ’ua hina’aro te Fatu ’ia fa’a’ore i tā rātou hapa ?

Fa’aitoito i te ha’api’ira’a i te fare

E ani i te mau tamari’i ’ia ani i te mau melo o tō rātou ’utuāfare ’ia fa’a’ite mai i te mau ’itera’a e tū’ati i te mau parau tumu tā ’outou i tuatāpapa i roto i te piha ha’api’ira’a. ’Ei hi’ora’a, mai te mea, e ’āparau ’outou nō te mau pāpa’ira’a mo’a, e nehenehe te mau tamari’i e ani i te hō’ē melo o te ’utuāfare ’ia fa’a’ite mai, e mea nāhea ’oia i te ’itera’a ē e parau mau te mau pāpa’ira’a mo’a.

Ha’amaita’i i tā tātou ha’api’ira’a

E ha’apa’o i te vai ara o te mau tamari’i. E hinaʼaro paha ʼoutou e feruri i te mau rāveʼa ʼāpī nō te ’ume mai i te mau tamariʼi ʼāpī aʼe. ’Ei hi’ora’a, e fa’a’ohipa i te mau hōho’a, te mau hīmene, te mau ha’utira’a, ’e te tahi atu mau ’ohipa ri’i.