The Prophet Isaiah Foretells Christ’s Birth [’Ua fa’a’ite ātea te peropheta Isaia i te fānaura’a o te Mesia], nā Harry Anderson

5–11 nō Tetepa

Isaia 1–12

« ’Ua riro mai te Atua ’ei ora nō’u »

E nehenehe te mau parau a Isaia e riro ’ei mea pa’ari nō te hāro’aro’a. ’A feruri ai ’outou ē nāhea i te ha’api’i i te mau tamari’i nō ni’a ia Isaia, ’a fa’atumu i ni’a i te mau parau mau ’ōhie ’o tē nehenehe e ha’apūai i tō rātou fa’aro’o ia Iesu Mesia.

Pāpa’i i te mau mana’o e tae mai

Tītau i te mana’o

E ani i te mau tamari’i ’ia fa’a’ite mai i te hō’ē mea tā rātou i rave iho nei nō te ora i te ’evanelia, mai te paraura’a i te hō’ē pure, te fa’a’itera’a i te maita’i i te hō’ē ta’ata, ’aore rā, te ha’apa’ora’a i te tahi atu mau fa’auera’a.

Ha’api’i i te ha’api’ira’a tumu : Te mau tamari’i ’āpī

Isaia 2:2–3

I roto i te hiero, tē ha’api’i nei tātou nō ni’a ia Iesu Mesia.

A’ena tō Isaia mitora’a i te hō’ē taime i reira te hiero, « te mou’a o te fare o te Fatu », e ume mai ai i te ta’ata nō ’ō mai i « te mau nuna’a ato’a ». E nehenehe ’outou e fa’a’ohipa i teie tohura’a nō te tauturu i te mau tamari’i ’ia hi’o ātea i te taime e nehenehe ai rātou e haere i te hiero.

Mau ’ohipa ri’i e nehenehe e rave

• E ani i te mau tamariʼi ’ia pāpa’i i te hōʼē hōhoʼa nō tō rātou fare. I muri iho, e tai’o ’āmui i te Isaia 2:2, ’e e ani ia rātou ’ia pāpa’i i te hō’ē hōho’a nō « te fare o te Fatu », ’o te hiero ia. E ta’io ’āmui i te ’īrava 3, ’e e ani ia rātou ’ia tu’u mai i tā rātou mau hōho’a e rave rahi ta’ata e haere mai nei i te hiero, e tae noa atu i tō rātou mau ’utuāfare. Nō te aha tātou e hina’aro ai e haere i te fare o te Fatu ? ’A fa’a’ite i tō ’outou ’itera’a pāpū nō ni’a i te mau ha’amaita’ira’a ’o tē tae mai ’a ’apo mai ai tātou nō ni’a i te Fatu i roto i tōna fare.

• E vaiiho i te hō’ē tamari’i ’ia tāpe’a i te hōho’a o te hō’ē hiero, ’e e ani i te mau tamari’i ’ia ’āparau mai e aha tā rātou e ’ite ra i roto i te hōho’a. E ani i te mau tamari’i e aha tā rātou i au nō ni’a i te hiero. ’A tai’o ’āmui i te Isaia 2:2–3 ’e e ani ia rātou ’ia fa’aro’o i te tahi atu mau tumu nō te aha e ti’a ai ia tātou ’ia here i te hiero. E parau i te mau tamari’i nō te aha ’outou i here ai i te hiero.

• Hīmene ’e te mau tamari’i i te hō’ē hīmene nō ni’a i te hiero, mai te « Oh, J’aime voir le temple » (Chants pour les enfants, 99). E tauturu ia rātou ’ia ’imi i te mau ta’o ’e te mau pereota i roto i te hīmene ’o tē ha’api’i ra e aha te hiero ’e e aha tā tātou e rave i reira.

• ’A pāpa’i i te hō’ē ’ē’a i ni’a i te tāpura ’ere’ere, ’e ’a tu’u i te hō’ē hōho’a nō te hiero ’aore rā te Fa’aora i te hō’ē hōpe’a (hi’o Te fa’ahotura’a iāna iho : Buka arata’i nā te mau tamari’i, 2–3). E vaiiho i te mau tamari’i ’ia pāpa’i hōho’a ia rātou iho te tahi i muri mai i te tahi e haere ra nā ni’a i te ’ē’a. ’A nā reira ai rātou, e ani ia rātou ’ia fa’ahiti fa’ahou i teie pereota nō roto mai i te Isaia 2:3 : « E haere tātou nā te ’ē’a tāna e fa’a’ite mai ra ». E aha tē rave e haere ai tātou nā te mau ’ē’a o te Fatu ?

« ’Ua fānau mai ho’i te hō’ē tama nā tātou, ’e ’ua hōroahia mai te hō’ē tamaiti nā tātou » (Isaia 9:6).

Isaia 9:6

ʼUa tohu Isaia nō Iesu Mesia.

Tē fa’a’ite pāpū nei te mau peropheta ato’a nō Iesu Mesia, tae noa atu te feiā tei ora na hou ’oia ’a fānauhia mai ai, mai ia Isaia. ’A feruri e aha tā te mau tamari’i e nehenehe e ha’api’i mai nō ni’a ia Iesu nā roto mai i te tohu a Isaia i roto i te Isaia 9:6.

Mau ’ohipa ri’i e nehenehe e rave

• ’A fa’a’ite i te mau tamari’i « Isaia te peropheta » (i roto Te mau ’ā’amu o te Faufa’a Tahito). ’A fa’aea ma’a taime ’ia nehenehe te mau tamari’i ’ia parau mai nō ni’a i te mea tā Isaia i ’ite nō ni’a ia Iesu Mesia e rave rahi matahiti hou ’oia [Iesu Mesia] ’a fānauhia mai ai. E tai’o i te mau tamari’i te Isaia 9:6, ’e e ani ia rātou ’ia fa’ahiti mai nā muri ia ’outou i te « i’oa » tāta’itahi tā Isaia i parau nō Iesu Mesia « e ma’irihia tōna i’oa ».

• ’A pāpa’i i ni’a i te ’api parau i te tahi o te mau ti’ara’a o Iesu Mesia e ’itehia i roto i te Isaia 9:6 (hi’o i te ’api ’ohipara’a o teie hepetoma). E ani i te tamari’i tāta’itahi ’ia mā’iti hō’ē, ’e e tauturu i te tamari’i ’ia tai’o i te ti’ara’a i roto i te piha ha’api’ira’a. E paraparau i te mau tamari’i e aha te aura’a o te ti’ara’a tāta’itahi nō ’outou. ’A hōro’a i te hō’ē hōho’a nō te Mesia i te hō’ē o te mau tamari’i, ’e e ani iāna ’ia fa’a’ite mai i te tahi mea nō ni’a ia Iesu, ’e i muri iho e hōro’a atu i te hōho’a i te tahi atu tamari’i. Tāmau fa’ahou ā i teie ’ohipa ri’i e tae noa atu ’ua ’ati te mau tamari’i i te paraparau mai.

Ha’api’i i te ha’api’ira’a tumu : Te mau tamari’i pa’ari

Isaia 1:2–4, 16–19

Maoti Iesu Mesia, e nehenehe au e tātarahapa ’e ’ia mā.

’Ua ora o Isaia i te hō’ē tau ’a fāriu ’ē atu ai te tahi o tōna mau ta’ata i te Fatu. Terā rā, ’ua fafau mai te Fatu ia rātou ē e fa’a’orehia tā rātou mau hara mai te mea e tātarahapa rātou. ’Ua fafau ato’a ’oia ia tātou i teie fafaura’a.

Mau ’ohipa ri’i e nehenehe e rave

• ’A ani i te mau tamari’i ’ia tai’o te Isaia 1:2–4 ’e e ’āparau nō ni’a i te tahi o te mau tumu ’aita te Fatu i ’oa’oa i te nūna’a o Iuda. I muri iho, ’a tai’o ’āmui i te Isaia 1:16–19 nō te ha’api’i mai i te mea tā te Fatu i ani i te mau ta’ata ’ia rave. Mai te mea e hina’arohia, ’a tauturu i te mau tamari’i ’ia ta’a maita’i i te mau ta’o ’e te mau pereota fifi. Nō te tauturu ia rātou ’a hi’o te ’īrava 18, ’a pia i te hō’ē mea ’ute’ute ’e te hō’ē mea teatea. E aha tā tātou e ha’api’i mai nō ni’a i te aroha o Iesu Mesia nā roto mai i teie mau ʼīrava ? ’A ani i te mau tamari’i ’ia fa’a’ite mai e aha tō rātou mana’o nō ni’a i te ō a Iesu Mesia nō te fa’a’orera’a hara, ’e ’a fa’a’ite ato’a i tō ’outou mau mana’o.

• ’A tauturu i te mau tamari’i ’ia tāmau ’ā’au te Isaia 1:18. ’A pāpa’i i te ’īrava i ni’a i te tāpura ’ere’ere, ’e ’a ani i te mau tamari’i ’ia fa’ahiti i te reira e rave rahi taime, ma te tūmā hō’ē ta’o i te taime hō’ē, e tae roa i te taime e nehenehe ai tā rātou e fa’ahiti i te reira ma te ha’amana’ora’a. E nehenehe ato’a ’outou e fa’a’ohipa i te mau ’api parau tei pāpa’ihia te mau parau i ni’a iho. Nō te aha e mea faufa’a ’ia ha’amana’o tāmau noa i te mau mea tā teie ’īrava e ha’api’i nei ? ’A ’āparau nāhea te bāpetizora’a ’e te ’amura’a i te ’ōro’a mo’a e fa’atupu ai i teie fafaura’a nō tātou.

Isaia 2:2–5

I roto i te hiero, e ha’api’i mai tātou nō ni’a ia Iesu Mesia.

’Ua heheu mai te tohura’a a Isaia nō ni’a i « te mou’a ra o te fare o Iehova » i te tahi o te mau ha’amaita’ira’a e tae mai nā roto i te ha’amorira’a i roto i te hiero, e tae noa atu i te tahi atu mau ha’amaita’ira’a e tae mai i te mau mahana hope’a nei. ’A feruri nāhea ’outou i te fa’auru i te mau tamari’i ’ia ’imi i teie mau ha’amaita’ira’a.

Mau ’ohipa ri’i e nehenehe e rave

• ’A ani i te mau tamari’i ’ia tai’o i te mea tā Isaia i ’ite i roto i te Isaia 2:2–3 ’e ’a pāpa’i hōho’a i te mea tā Isaia i ’ite i tō rātou mana’ora’a. E fa’ata’a ē, ’ua pi’i Isaia, te hiero « te mou’a ra o te fare o Iehova ». Nō te aha te mou’a e riro ai ’ei tāpa’o maita’i nō te hiero ?

• E ani i te mau tamari’i ’ia tai’o i te Isaia 2:2–3, 5 ’e ’ia ’ite mai i roto i teie mau ’īrava te hō’ē mea ’o te fa’auru ia rātou ’ia haere i te hiero i te hō’ē mahana. I muri iho, ’a tai’o ’āmui i te ’īrava 4 ’e e ’āparau nāhea te hiero i te tauturu ’ia ’āfa’i mai i te hau tei fa’a’itehia i roto i teie ’īrava. E tauturu ia rātou ’ia feruri i te mau rāve’a e nehenehe ai rātou e fa’aineine nō te haere i te hiero i te hō’ē mahana.

Isaia 7:14 ; 9:6–7

ʼUa tohu Isaia nō Iesu Mesia.

’Ua tohu Isaia i te fānaura’a o te hō’ē tama e pārahi i ni’a i te terōno o Davida ’e o te ha’amau i te hō’ē bāsileia ’aita tōna e hope’a. Nāhea ’outou ’ia tauturu i te mau tamari’i tā ’outou e ha’api’i nei ’ia māramarama i teie mau tohura’a nō ni’a ia Iesu Mesia ?

Mau ’ohipa ri’i e nehenehe e rave

• ’A ani i te mau tamari’i ’ia hōro’a mai i te mau hi’ora’a nō te mau ti’ara’a o te hō’ē ta’ata, mai te hō’ē ti’ara’a tā’atihia i te hō’ē ravera’a ’ohipa, te hō’ē pi’ira’a, te hō’ē pupu, ’aore rā, te hō’ē ’utuāfare. E aha tā teie mau ti’ara’a e parau nei nō ni’a i te ta’ata tei fāri’i i te reira ? ’A tauturu i te mau tamari’i ’ia ’imi i te mau ti’ara’a o Iesu Mesia i roto i te Isaia 7:14 ’e 9:6–7. E aha tā teie mau ti’ara’a tāta’itahi e ha’api’i nei ia tātou nō ni’a iāna ? E aha atu ā tā tātou e ha’api’i mai nō ni’a ia Iesu Mesia nā roto mai i teie mau ʼīrava ?

• E tai’o ’āmui i te Mataio 1:21–23 ’e Luka 1:31–33, ’e e ’āparau mea nāhea te mau tohu a Isaia i roto i te Isaia 7:14 ; 9:6–7 i te tupura’a i te taime ’a fānauhia ai Iesu Mesia.

Fa’aitoito i te ha’api’ira’a i te fare

’A ani i te mau tamari’i ’ia feruri i te hō’ē mea tā rātou i ha’api’i mai nō ni’a i te Fa’aora ’o tā rātou e nehenehe e fa’a’ite atu i te fare i tō rātou ’utuāfare, mai te hō’ē o tōna mau i’oa.

Ha’amaita’i i tā tātou ha’api’ira’a

Tauturu i te mau tamari’i ’ia fa’atupu i te ti’aturira’a. E riro te tahi mau tamari’i i te ’ore e nehenehe e ’apo mai i te ’evanelia nā roto ia rātou iho. Hō’ē rāve’a nō te tauturu ia rātou ’ia fa’atupu i te ti’aturira’a, ’o te ’āruera’a ia rātou ’ia ’āmui ana’e mai rātou i roto i te piha ha’api’ira’a. ’A parau fafau i te mau tamari’i ē, e tauturu te Vārua Maita’i ia rātou ’a ha’api’i mai ai rātou.