Jisōs ej kwaļo̧k ilo im̧ōn kweilo̧k eo

Jesus in the Synagogue at Nazareth [Jisōs ilo Im̧ōn Kweilo̧k eo ilo Nazaret], jān GregK. Olsen

Oktoba 3–9

Aiseia 58–66

“Ripinmuur Enaaj Itok n̄an Zaion”

Ļōmņak in m̧akūtkūt ko ilo laajrak in ewōr tokjāer n̄an im̧we jerbal eo am̧. Jaab ļōmņak bwe kwoj aikuj in ļoori; ļoor im̧we ko an Jetōb m̧okta im ilo iien katak eo am̧.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Elōn̄ iaan naan ko an Aiseia rej kam̧ool im kwaļo̧k kōn Rilo̧mo̧o̧r. Kwaļo̧k juon pija in Jisōs, im kajjitōk ippān ajri ro n̄an kwaļo̧k jet men raar ekkatak kōn E ilo wiik in.

pija ej bōk jikin katakin

Katakin Katak eo: Ajri ro Reddikļo̧k

Aiseia 58:13–14

Raan in Jabōt emaron̄ menin lan̄lōn̄ n̄an eō.

Raan in Jabōt ej juon iien n̄an ad keememej Irooj im kakkije jān m̧akūtkūt ko ad kajjojo wiik. Elmen am̧ maron̄ jipan̄ ajri ro kwoj katakin kōm̧m̧an bwe Raan in Jabōt en menin lan̄lōn̄?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an ālijji naan kein “Ņa etan Jabōt men in lan̄lōn̄, men e kwōjarjar an Jeova” (Aiseia 58:13) elōn̄ alen. Kōmeļeļeiki bwe “men in lan̄lōn̄” meļeļein jet men ko rej bōktok n̄an kōj lan̄lōn̄. Kajjitōk ippān ajri ro n̄an kwaļo̧k jet men ko me ebōktok lan̄lōn̄ n̄an er. Kam̧ool bwe Irooj eaar letok Raan in Jabōt kōnke E ekōņaan bwe jen lan̄lōn̄. Kwaļo̧k n̄an ajri ro etke Raan in Jabōt ej juon menin lan̄lōn̄ n̄an eok.

• Riit n̄an ajri ro jān Aiseia 58:14: “Kwōnaaj kalan̄lōn̄ eok ilo Jeova.” Kōmeļeļeiki n̄an ajri ro bwe Raan in Jabōt ej juon raan ejeno̧lo̧k im aurōk—juon iien me jemaron̄ ļōmņak kōn men ko Jemedwōj Ilan̄ im Jisōs rekar kōm̧m̧ane n̄an jipan̄ kōj n̄an m̧ōņōņō. Jipan̄ ajri ro ļōmņake men ko remaron̄ kōm̧m̧ane ilo Raan in Jabōt n̄an keememej Jemedwōj Ilan̄ im Jisōs. Kajjitōk ippāer n̄an jin̄aiki ļōmņak ko aer im kwaļo̧k pija ko n̄an doon im baam̧le ko aer.

kōrā eo ej tile ļaam̧ oiļ eo ilo an em̧m̧aan eo jibwe ļaam eo

“A Irooj enaaj n̄an kwe juon meram indeeo” (Aiseia 60:19). A Gift of Light [Meram Juon Menin Letok], jān Eva Timothy

Aiseia 60:1–3

Imaron̄ kōromaak meram eo an Rilo̧mo̧o̧r n̄an ro jet.

Kanaan eo an Aiseia ilo raan ko āliktata, armej ro an Irooj renaaj āinwōt juon meram n̄an ro ilo marok. Ļōmņake elmen am̧ maron̄ jipan̄ ajri ro “jerkak” im “romaak.”

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kiil mejeer ilo am̧ riiti Aiseia 60:1–3. Kajjitōk ippāer n̄an kōppeļļo̧k mejāer n̄e rej ron̄ naan eo “meram” im kiil mejāer n̄e rej ron̄ naan eo “marok.” Kōmeļeļeiki bwe Jisōs Kraist im gospel eo An rej āinwōt juon meram me ejipan̄ kōj lo iaļ eo ad ļo̧k n̄an ippān Jemedwōj Ilan̄.

• Leļo̧k n̄an kajjojo ajri juon pija in juon meram (āinwōt aļ, juon kāāntōļ, ak juon tōm̧a). Jipan̄ ajri ro ļōmņak kōn wāween ko remaron̄ kwaļo̧ke meram eo an Rilo̧mo̧o̧r n̄an ro jet. Ilo an waļo̧k kajjojo ļōmņak, kajjitōk ippāer n̄an “jerkak” im “romaak.” Kwaļo̧k n̄an ajri ro kōn wāween ko kwaar loi ilo aer kwaļo̧k meram eo an Rilo̧mo̧o̧r.

• Al ippān doon juon al kōn kwaļo̧k meram, eo āinwōt “Shine OnChildren’s Songbook,144). Jipan̄ ajri ro keememej naan ko ilo al eo me ej kapen ta eo rej ekkatak jān Aiseia 60:1–3.

Aiseia 61:1–3

Jisōs Kraist ej aō Rilo̧mo̧o̧r im Ripinmuur.

Aiseia 61:1–3 ej letok juon kōmeļeļe eo ekajoor kōn jerbal in katakin im kōmour eo an Rilo̧mo̧o̧r. Pukot wāween ko n̄an jipan̄ ajri ro lo elmen an Jisōs Kraist maron̄ katakin im kōmour er juon ilo̧k juon.

M̧akūtkūt ko Maron̄ Kōm̧m̧ani

• Kōtļo̧k bwe ajri ro ren kotak pija in an Jisōs katakin, kōmour, im jipan̄ ro jet ilo am̧ riiti Aiseai 61:1 (lale Gospel Art Book). Kōmeļeļeik bwe Anij ekar jilkintok Jisōs Kraist n̄an kōm̧m̧ani men kein aolep n̄an kōj. Kajjitōk ippān ajri ro n̄an kwaļo̧k en̄jake ko aer kōn Jisōs Kraist. Kam̧ool kōn iakwe eo an Rilo̧mo̧o̧r n̄an kajjojo ajri ro.

• Aiseia 61:3 ej kōmeļeļeik ro rej ron̄jake im pokake Irooj āinwōt “wōjke in wānōk.” Jin̄aik juon wōjke ioon boot eo, im kajjitōk ippān ajri ro n̄an ļōmņaki men ko an wānōk remaron̄ kōm̧m̧ani. N̄an kajjojo ļōmņak, kōtļo̧k an ajri ro jin̄aik juon bōlōk ioon boot eo.

pija ej bōk jikin katakin

Katakin Katak eo: Ajri ro Rerūttoļo̧k

Aiseia 58:6–11

Jitlo̧k ej kōjeraam̧m̧an eō im ro jet ilo aikuj.

Jet iaan ajri ro kwoj katakin remaron̄ in bwe aer rūtto n̄an jitlo̧k. Ak ro me rejjab rūtto remaron̄ jeraam̧m̧an jān katak eo an Irooj kōn kien jitlo̧k im pojak n̄an jitlo̧k n̄e repojak.

M̧akūtkūt ko Maron̄ Kōm̧m̧ani

• Je ioon boot eo Etke jej jitlo̧k? im Elmen ad jitlo̧k? Kajjitōk ippān ajri ro n̄an je uwaak ko rekkar ioon bo̧o̧t eo. Rōjan̄ er n̄an etale “Jitlo̧k” ilo Unin Tōl ko n̄an Jeje ko Rekwojarjar (scriptures.ChurchofJesusChrist.org) im Aiseia 58:6–11 n̄an lo kakobaba in uwaak ko. Elmen an Aiseia 58:6–11 jipan̄ kōj n̄e jitlo̧k epen?

• Kwaļo̧k n̄an ajri ro juon en̄jake an juon make kōn jitlo̧k, ak kwaļo̧k juon bwebwenato jān māākjiin ko an Kabun̄ kōn jitlo̧k. Kwaļo̧k kōjeraam̧m̧an ko me rej waļo̧k jān jitlo̧k kōn jibadbad ilo jetōb. Eļan̄n̄e jabdewōt ajri em̧ōj aer kar jitlo̧k kajjitōk ippāer n̄an kwaļo̧k kōn en̄jake ko aer. Rōjan̄ ajri ro n̄an kōnono n̄an ro jineer im jemāer Jabōt in jitlo̧k in tok juon kōn ta meļeļein jitlo̧k. Jipan̄ er meļeļe ta meļeļein jitlo̧k kōn juon jibadbad em̧ool im kōn juon bōro em̧ool.

• Riit ippān doon Aiseia 58:6–7, im kōmeļeļeik bwe juon wāween jemaron̄ “ilo [ad] jab m̧ōn̄ā” n̄e jej jitlo̧k ilo ad leļo̧k jāān me jekar joļo̧k n̄an m̧ōn̄ā āinwōt juon kein joortak. Kwaļo̧k n̄an ajri ro juon peba in juon m̧ōttan jon̄oul im jortak ko, im kōmeļeļeiki elmen kanne. Kajjitōk ippān ajri ro n̄an riiti Aiseia 58:8–10, pukot kōjeraam̧m̧an ko kar kallim̧ur kaki n̄e jej jitlo̧k. Elmen an jitlo̧k kōjeraam̧m̧an kōj im ro rej pād ilo aikuj?

Aiseia 61:1–3

Jisōs Kraist ej aō Rilo̧mo̧o̧r im Ripinmuur.

Kōļmenļo̧kjeņ elmen am̧ maron̄ kōjerbal naan ko an Aiseia n̄an kōkajoorļo̧k naan in kam̧ool ko an ajri ro kōn Jisōs Kraist āinwōt aer Rilo̧mo̧o̧r im Ripinmuur.

M̧akūtkūt ko Maron̄ Kōm̧m̧ani

• Leļo̧k jidik iien bwe ajri ro ren riiti Aiseia 61:1–3 ippāer make. Innām kajjitōk ippāer n̄an je ioon jidik peba ak ilo juon jōnōļ ta eo eoon kein rej katakin er kōn Jisōs Kraist. Kajjitōk ippān jet iaan ajri ro n̄an kwaļo̧k ļōmņak ko aer.

• Kajjitōk ippān ajri ro n̄an kwaļo̧k juon naan jān eoon ko me ewōr tokjāer ippāer im kōmeļeļeiki etke. Elmen an eoon kein jipan̄ kōj meļeļe ta eo kar jilkintok Jisōs Kraist n̄an laļ bwe en kōm̧m̧ane?

Aiseia 65:17–25

Meļļeniōm̧ eo enaaj juon iien aenōm̧m̧an im lan̄lōn̄.

Aiseia eaar lo juon iien armej ro an Anij renaaj bōk aenōm̧m̧an im lan̄lōn̄. Kanaan in enaaj kūrm̧ool n̄e Jisōs Kraist enaaj bar ro̧o̧ltok n̄an laļin im irooj ilo taujin iiō—jerbal ņaetan Meļļeniōm̧.

M̧akūtkūt ko Maron̄ Kōm̧m̧ani

• Aiseia 65:17–25 kōmeļeļeik ta eo laļin enaaj āinwōt n̄e Rilo̧mo̧o̧r ebar itok. Kōjenolo̧k ajri ro n̄an kurup ko reddik, leļo̧k n̄an kajjojo kurup jejjo̧ eoon n̄an riiti. Ālkin jejjo̧ minit ko, kōm̧m̧ane juon elaajrak ippān doon ioon bo̧o̧t eo kōn elmen an naaj mour in oktak n̄an juon “laļ ekāāl” kar kōmeļeļeiki ilo eoon kein (eoon17). Etke enaaj juon iien “m̧ōņōņō im lan̄lōn̄ indeeo”? (eoon18).

• M̧okta jen kūlaaj, kepooj naan ko peba im naan ko im eoon ko jān laajrak in tōmak ko jon̄oul. Kajjitōk ippān juon iaan ajri ro n̄an lale laajrak in tōmak ko, im kajjitōk ippāer n̄an karōki ilo laajrak eo aer. Jipan̄ ajri ro meļeļe ta eo laajrak in tōmak eo ej katakin kōj kake kōn Meļļeniōm̧.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kwaļo̧k jet men raar ekkatak rainin kōn Rilo̧mo̧o̧r n̄an baam̧le eo aer. Rōjan̄ er n̄an riiti eoon ko ippān baam̧le eo aer wiik in.

Kōkōm̧anm̧anļo̧k Ad Katakin

Kajjitōk kajjitōk ko reim̧we. Kajjitōk kajjitōk ko me ekōm̧m̧an bwe ajri ro ren kōm̧m̧an eļapļo̧k ot jān aer kwaļo̧k kam̧ool ko. N̄an waanjon̄ak, ļōmņaki kajjitōk ko me ekōketak er bwe ren kwaļo̧k naan in kam̧ool im en̄jake ko aer.

peij in m̧akūtkūt: Imaron̄ romaak kōn meram eo an Rilo̧mo̧o̧r n̄an ro jet