“Oktoba 24–30. Ezekiel 1–3; 33–34; 36–37; 47: ‘Inaaj Lewōj n̄an Kom̧ juon Bōro Ekāāl,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Oktoba 24–30. Ezekiel 1–3; 33–34; 36–37; 47,” Itok, Ļoor Eō—N̄an Būraimere: 2022
Come, Follow Me [Itok, Ļoor Eō], jān Scott Sumner
Oktoba 24–30
Ezekiel 1–3; 33–34; 36–37; 47
“Inaaj Lewōj n̄an Kom̧ juon Bōro Ekāāl”
Eban ļap am̧ iien n̄an kwaļo̧k aolep pedped in katak ko ilo Ezekiel. Pukot im̧we an jetōb kōn ta eo n̄an mije wōt, im rōjan̄ ajri ro n̄an wōnm̧aanļo̧k wōt im ekkatak ilo m̧weeo.
Je En̄jake ko Rej Im̧we Eok
Kajjitōk bwe ren Kwaļo̧k
Kōtļo̧k an ajri ro jet bōk koņaer pijaik jet men ko raar ekkatak jān jeje ko rekwojarjar m̧oktaļo̧k. Ajri ro jet remaron̄ kajidedeik kwaļo̧k ta eo kajjojo ajri rej jin̄aiki.
Katakin Katak eo: Ajri ro Reddikļo̧k
Rikanaan ro rej āinwōt riwaj ro rej kakkōl kōj kōn kauwōtata.
Ezekiel ekar āinwōt juon riwaj, kakkōl RiIsrael ro kōn kauwōtata ko rejjab maron̄ loi. Jipan̄ ajri ro lo elmen an rikanaan ro rainin āinwōt riwaj ro.
M̧akūtkūt ko Maron̄ Kōm̧m̧ani
-
Riit n̄an ajri ro ta eo Irooj eaar jiron̄ļo̧k Ezekiel ilo Ezekiel 3:17. Kajjitōk ippāer n̄an kōm̧m̧ani m̧akūtkūt me rej ekkeijelļo̧k ippān naan ko, āinwōt ba kajjien mejeer, lojin̄ier, im lon̄ier ilo am riiti naan ko “riwaj,” “ron̄jake,” im “lon̄i.”
-
Tōlļo̧k ajri ro bwe ren etetal ipeļaakin ruum̧ eo. Kakkōļ er kōn kōtan n̄e kauwōtata ko ilo iaļ eo, āinwōt reba ko n̄an kijooni, ra ko n̄an jillo̧ki, ak mennin mour ko n̄an kōjekdooni. Kōtļo̧k an ajri ro jet bōk kūņaer āinwōt juon ritōl. Kōnono kake elmen an rikanaan ro ad kakkōl kōj kōn kauwōtata ko jejjab maron̄ loi.
-
Kwaļo̧k juon pija in rikanaan eo kiiō ilo ami al ippān doon juon al kōn rikanaan ro, āinwōt ilo eoon eo āliktata in “Follow the Prophet” (Children’s Songbook, 110–11). Jiron̄ ajri ro elmen an rikanaan eo āinwōt juon riwaj n̄an kwe.
Jeje ko rekwojarjar rej katakin eō kōn Jisōs Kraist.
Ezekiel eaar keidi m̧weeo im̧ōn Israel n̄an ruo aļaļ ko me renaaj juon wōt. Aļaļ kein rej kōkkaļļein Baibōl eo im Bok in Mormon, eo rej juon wōt n̄an kam̧ool kōn Kraist.
M̧akūtkūt ko Maron̄ Kōm̧m̧ani
-
Leļo̧k n̄an jet ajri kape in Bok in Momron, leļo̧k n̄anro jet kape in Baibōļ eo. Kōmeļeļeiki Ezekiel 37:15–19 ilo tukaduin bwe Irooj eaar jiron̄ Ezekiel n̄an je ioon ruo aļaļ ko rej bōk jikin Baibōļ eo im Bok in Mormon. Riiti eoon17, im kajjitōk ippān kajjojo ajri n̄an pukot juon eo ewōr bok in jeje eo rekwojarjar eoktak jān ko ippāer im “kobaik erro” ippān doon bwe ren “juon wōt [ilo peier].” Kōnono elmen an jim̧or Baibōļ im Bok in Mormon eo jipan̄ kōj kōkajoorļo̧k ad tōmak ilo Jemedwōj Ilan̄ im Jisōs Kraist.
-
Kōjerbal pija ko jān Gospel Art Book ak jān iiō ko ļo̧k’ Itok, Ļoor Eō bok ko, jipan̄ ajri ro kwaļo̧k bwebwenato ko kōn Jisōs jān Baibōļ im Bok in Mormon eo. Kajjitōk ippāer n̄an kwaļo̧k etke rej kam̧m̧oolol bwe ewōr ruo bok in jeje ko rekwojarjar.
Ezekiel eaar lo ilo visōn juon reba eaar to̧o̧rļo̧k jān tampeļ eo im kōmour Lo̧m̧alo̧ in Mej.
Kōjeraam̧m̧an ko reļļap rej itok jān tampeļ eo.
Visōn eo an Ezekiel kōn reba in kōmour eo ej to̧o̧rļo̧k jān tampeļ eo emaron̄ jipan̄ ajri ro jeļā bwe tampeļ ko rej bōktok kōjeraam̧m̧an ko n̄an mour ko ad.
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro juon kūlaaj in dān. Ekōjkan an dān kōjeraam̧m̧an kōj? Kwaļo̧k n̄an ajri ro kōn visōn eo an Ezekiel kōn an to̧o̧rļo̧k dān eo jen tampeļ eo Ezekiel 47:1–12). Kwaļo̧k pija eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko (bar lale pija in alooj eo “And the River Will Grow,” ChurchofJesusChrist.org). Kwaļo̧k n̄an ajri kōn kōjeraam̧m̧an ko kwoj būki me, āinwōt visōn in reba eo an Ezekiel, an to̧o̧rļo̧k jān tampeļ eo.
-
Kajjitōk ippān ajri ro n̄an pijaik juon pija in er make rej etal n̄an tampeļ. Al juon al ippān doon me ej kōmeļeļeiki kōjeraam̧m̧an ko an tampeļ, āinwōt “Families Can Be Together” (Children’s Songbook,188). Ta eo al in ej katakin kōn wāween an tampeļ ko kōjeraam̧an kōj?
Katakin Katak eo: Ajri ro Rerūttoļo̧k
Jisōs Kraist emaron̄ jipan̄ n̄a bwe in ukōt būruwō.
Ezekiel ekar kōjerbal naan kein āinwōt “bōro ekāāl” im “jetōb ekāāl” n̄an katakin kōn kain oktak eo Rilo̧mo̧o̧r ej bōktok n̄an mour ko ad.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an pukote Ezekiel 2:3–4; 3:7 kōn naan ko me rej kōmeļeļeik RiIsrael ro. Innām kajjitōk ippāer n̄an riiti Ezekiel 36:26–27 n̄an jeļā elmen an Rilo̧mo̧o̧r kar leļo̧k n̄an jipan̄ er oktak. Ta naan ko remaron̄ kōmeļeļeiki “bōro ekāāl” im “jetōb ekāāl” E ej letok n̄an kōj? (lale, n̄an waanjon̄ak, Mosaia 3:19; 5:2).
-
Kajjitōk ippān ajri ro n̄an ļōmņaki men ko armej rej “bōt” ak “pen būrueier” kaki (Ezekiel 2:4; 3:7) remaron̄ kōm̧m̧ani. N̄an waanjon̄ak, elmen aer maron̄ kōm̧m̧an n̄an kapilōk jān m̧am̧a ak baba ak juon rikanaan? Ta eo remaron̄ kōm̧m̧ani n̄e rej lo juon eo epād ilo aikuj? Elmen ad kōm̧m̧an oktakļo̧k n̄e Rilo̧mo̧o̧r emōj an kōpidodoik būruwōd?
Baibōļ im Bok in Mormon eo ejipan̄ “aiintok” kōj n̄an Jisōs Kraist.
Ezekiel “aļaļ eo an Juda” (Baibōļ eo) im “aļaļ eo an Josep” (Bok in Mormon eo) rej jerbal ippān doon n̄an aiintok Israel n̄an Rilo̧mo̧o̧r eo (lale Ezekiel 37:19).
M̧akūtkūt ko Maron̄ Kōm̧m̧ani
-
Kotak juon kape in Baibōļ eo im Bok in Mormon, im kajitōk ippān ajri ro etke rej en̄jake em̧m̧an n̄an wōr jim̧or bok kein. Riit n̄an er Ezekiel 37:19, im kōmeļeļeik bwe “aļaļ eo an Josep” ej Bok in Mormon eo, eo kar jeje jen ro bwijjin Josep eo ilo Ijipt, im “aļaļ eo an Juda” ej Baibōļ eo, eo kar jeje jen enan̄in Riju wōt. Innām riit ippān doon eoon 21–23 im 2Nipai 3:12, im kōlaajraki kōjeraam̧m̧an ko me rej itok jān an wōr jim̧or bok kein.
-
Likūt juon pijain Jisōs ilo io̧lepen ruum̧ eo, im kajjitōk ippān ajri ro n̄an kōm̧akūt jea ko aer n̄an bar jet jikin ilo dipin ruum̧ eo. Innām kajjitōk ippāer n̄an kōjerbal Topical Guide n̄an pukot jeje ko rekwojarjar ilo Baibōļ im Bok in Mormon me ej kwaļo̧k kōn Jisōs Kraist (n̄e ekkar, kwaļo̧k n̄an er kilen kōm̧m̧ane). Ālkin an kajjojo ajri kwaļo̧k juon eoon, kajjitōk ippān aolep ajri ro n̄an kōm̧akūt jea ko aer kepaaktok pijain Jisōs. Wōnm̧aanļo̧k wōt m̧ae iien em̧ōj an aolep “aiintok” n̄an Ippān.
Kōjeraam̧m̧an ko an tampeļ remaron̄ kōmour būruwōd im baam̧le ko ad.
Dān eo ej to̧o̧rļo̧k jān tampeļ eo ilo visōn eo an Ezekiel ekar leļo̧k mour n̄an aolep men ko rej itaak ippān. Ejjeļo̧k oktak, kōjeraam̧m̧an ko me rej to̧o̧rļo̧k jān tampeļ eo remaron̄ kōmour kōj ilo jetōb im bōktok n̄an kōj mour indeeo.
M̧akūtkūt ko Maron̄ Kōm̧m̧ani
-
Kōlaajraki ioon boot eo jet naan ko raorōk im naan ko reiokļo̧k Ezekiel47:1–12, āinwōt tampeļ, reba, āne jem̧aden, Lo̧m̧alo̧ in Mej, oraņ ek, im leen wōjke. Kajjitōk ippān kajjojo ajri n̄an kālet juon iaan men kein im jin̄aiki. Innām riiti eoon ko ippān doon, im kajjitōk ippān ajri ro n̄an kwaļo̧k jin̄n̄a ko aer n̄e rej ron̄ etan men ko rekar jin̄aiki. Ta kōjeraam̧m̧an ko raar itok jān reba eo ilo visōn in? (lale eoon 8–9,12). Jipan̄ ajri ro loe elmen an kōjeraam̧m̧an kein āinwōt kōjeraam̧m̧an ko an Jemedwōj Ilan̄ im Rilo̧mo̧o̧r letok n̄an ro rej kōjparok bujen tampeļ ko aer.
-
Kwaļo̧k juon pijaan alooj “And the River Will Grow” (ChurchofJesusChrist.org). Ak riit ippān doon ta eo Elder DaleG. Renlund ekar kwaļo̧k kōn visōn eo an Ezekiel ilo “Family History and Temple Work: Sealing and Healing” (Ensign ak Liaona, May 2018, 47–48). Ba n̄an ajri ro kōn wāween an kar jerbal in menmenbwij an baam̧le im tam̧ple eo boktok eok kōmour eo an Rilo̧mo̧o̧r. Kajjitōk ippān ajri ro n̄an kwaļo̧k en̄jake ko aer kōn tampeļ.
Kōketak Ekkatak ilo M̧weo
Kajjitōk ippān ajri ro n̄an kwaļo̧k n̄an baam̧le ko aer juon men me rekar ekkatak rainin im juon men em̧m̧an ippāer n̄an ekkatak eļapļo̧k kake.
Kōkōm̧anm̧anļo̧k Ad Katakin
Kōketak Ekkatak ilo M̧weo “Juon iaan kōttōbar ko am̧ āinwōt juon rikaki eaikuj in rōjan̄ ro kwoj katakin n̄an bōk en̄jake ko aer make ilo jeje ko rekwojarjar—jim̧or ippāer make im ippān baam̧le ko aer” (Teaching in the Savior’s Way, 36).