Itok, Ļoor Eō, jān Scott Sumner

Oktoba 24–30

Ezekiel 1–3; 33–34; 36–37; 47

“Juon Jetōb Ekāāl I Buļōmi”

Rekar karuwaineneik n̄an “m̧ōn̄ā” naan ko an Anij—n̄an kobrak e kōn naan an Anij (lale Ezekiel 2:9–3:3,10). Ewi wāween am̧ kobrak eok make kōn naan ko an Anij ilo wiik in?

Je En̄jake ko Rej Im̧we Eok

Ezekiel ekar juon rikanaan ilo iien kōm̧akoko ko. Mōttanļo̧k Riisrael ro jet, em̧ōj lukwarkware im jilkinļo̧k e im bōke ļo̧k n̄an Babilon jejjo iiō ko m̧okta jān aer kar kakkure Jerusalem. Ilo Jerusalem, Ezekiel enaaj kar juon pris eo ej jerbal ilo tampeļ. Ilo Babilon, ekar “deļo̧n̄ n̄an ippān ri jipo̧kwe ro,” im ekar “jijet ijo rekar jijet ie” (Ezekiel 3:15), bukwi m̧ael ko jān tampeļ eo im kōn jidik kōjatdikdik n̄an jepļaak n̄an m̧weo im̧ōn Anij eaorōk. Innem juon raan Ezekiel ekar lo juon visōn. Ekar lo “aibojooj an Irooj” (Ezekiel 1:28)—ejjab ilo kar tampeļ eo ilo Jerusalem ak ijeņ ilo Babilon ilubwiljin rikōm̧akoko ro. Jerawiwi ko ilo Jerusalem, ekar jeļā kake, ekar lukkuun ļap jon̄an aao̧ eo an Anij ekar jako ijeņ (lale Ezekiel 8–11; 33:21).

Juon iaan jerbal ko an Ezekiel kar n̄an kakkōļ ri Israel ro kōn ta ko renej waļo̧k itok jān aer penawiia—juon kakkōļ me aolep rekar ron̄ ak rekar jab errā. Ak ekar lōn̄ men ko jān ennaan eo an Ezekiel: ekar kanaan bwe, jekdo̧o̧n ewi jon̄an nana ko rej waļo̧k, ekar bar wōr juon iaļ n̄an anjo̧. Elan̄n̄e armej ro an Anij renaaj bōk kūr eo n̄an “ron̄jake naan an Irooj” (Ezekiel 37:4), ta eo ekar mej emaron̄ bar mour. Juon “bōro dekā” emaron̄ bōk jikin kōn “juon bōro ekāāl” (Ezekiel 36:26). “[Inaaj] likūt Jetōb eo Aō ilo kom̧,” Irooj ekar ba n̄an er, “im kom̧naaj mour” (Ezekiel 37:14). Im ilo raan ko āliktata, Irooj enaaj kalōk juon tampeļ kāāl im juon Jerusalem kāāl, “im etan jikin kweilo̧k eo jān raan eo im etal enaaj, Irooj ej pād ie” (Ezekiel 48:35).

Ļōmņak ko n̄an Ekkatak Jeje Ko Rekwojarjar Ippam̧ Make

Ezekiel 1–3

“Im kwōnaaj kwaļo̧k naan ko Aō.”

Riiti kūr eo an Ezekiel n̄an jerbal in An ilo Ezekiel 1–3 emaron̄ im̧we eok n̄an ļōmņak kōn iien ko Anij ekar letok n̄an eok n̄an “kōnono naan ko [An]” n̄an ro jet (Ezekiel 3:4). Ilo Ezekiel 2–3, kwonej lo naan in kōketak im katakin ko An n̄an Ezekiel. Men̄e armej ro kwoj jerbal n̄an er bolen rejjab penawiia āinwōt armej ro an Ezekiel, ļōmņak kōn wāween an naan ko an Anij jelet wāween am̧ kalimjōk jerbal in jipan̄ ko ilo Kabun̄ in, ilo m̧ōko, im ijoko jabdewōt.

Barāinwōt lale Ezekiel 33:1–9; D.Todd Christofferson, “The Voice of Warning,” Ensign ak Liaona, Māe 2017, 108–11.

Ezekiel 33:10–19

Irooj ekōņaan bwe in jeorļo̧k bōd.

“Eļan̄n̄e … jerawiwi ko ad rej ioed,” Riisrael rikōm̧akoko ro rej bwilōn̄, “ewi wāween ad nej mour?” (Ezekiel 33:10). Uwaak eo, Irooj ekar katakin er aorōk in m̧ool ko kōn ukweļo̧k im jeorļo̧k bōd. Kajjitōk kein remaron̄ jipan̄ eok kejōkļo̧kjeņ kōn m̧ool ko:

• Ta ko kwoj ļōmņak ej meļeļein n̄an “lōke [am̧] wānōk”? (lale Ezekiel 33:12–13).

• Ta eo kwonaaj ba n̄an juon eo ej en̄jake bwe armej jim̧we im armej bōd me kar kōmeļeļeiki ilo Ezekiel 33:12–19 rejjab jon̄an wōt aer kōm̧m̧an n̄an er? (bar lale Matu 21:28–31; Luk 18:9–14).

• Ta naan ko kwoj lo ilo eoon kein me rej jipan̄ eok meļeļe ta meļeļein n̄an ukweļo̧k? En̄jake ko jet kwoj loe ilo Ezekiel 36:26–27 im Alma 7:14–16?

Ezekiel34

Irooj ej karuwaineneik eō n̄an naajdik sip ko An.

Ilo Ezekiel34, Irooj ej watōk ritōl ro an armej ro An rej āinwōt “rilale sip.” Ilo am̧ riiti, ļōmņak kōn ta eo taitōļ ej kwaļo̧k n̄an kwe kōn ta meļeļein erom̧ juon ritōl. Wōn ro rej “sip” me Irooj ekōņaan bwe kwon naajdik er? Ewi wāween am̧ maron̄ ļoor waanjon̄ak eo Rilo̧mo̧o̧r ekar kwaļo̧k āinwōt juon rilale sip? (lale eoon ko 11–31).

Bar lale Jon 21:15–17.

Ezekiel ekar lo ilo visōn juon reba ej toorļo̧k jān tampeļ im kōmour Lom̧aļo in Jo̧o̧ļ.

Ezekiel37

Irooj ej kakobaik armej ro An im leļo̧k n̄an er mour ekāāl.

Aiintok Israel ej kōmeļeļeik ilo Ezekiel37 kōn ruo kōkaļļe. Ilo am̧ riit kōn kōkaļļe eo kein kajuon—di ko rekar mej renej bar mour (lale eoon ko 1–14)—kejokļo̧kjeņ kōn ta eo kwoj ekkatak kake kōn aiintok doon eo an Israel ilo jait ko jim̧or ilo ran̄ōļ eo (bar lale Ezekiel 36:24–30).

Kōkaļļe eo kein karuo (lale eoon ko 15–28) ej kitbuuj alal ko ruo, eo me elōn̄ rimāletlet ro rej ukote āinwōt alal in jeje kar kobaiki kōn injej. Alal an Juda emaron̄ bōk jikin Baibōļ (kōn an ļap wōt an jeje ko ilo Baibōļ kar jeje jān ro bwijjin Juda), im alal an Josep emaron̄ bōk jikin Bok in Mormon (bwe kōnke baam̧le eo an Liai rekar bwijjin Josep eo ilo Ijipt). Kōn menin ilo kōlmenļo̧kjeņ, ta eo eoon kein rej katakin eok kōn jerbal eo an jeje ko rekwojarjar ilo aiintok doon in an Israel? Ta eo bok in 2Nipai 3:11–13 (juon kanaan kōn Josep im Bok in Mormon) ej kōļapļo̧k ilo jeļā eo am̧?

Bar lale 2Nipai 29:14; “The Book of Mormon Gathers Scattered Israel” (video, ChurchofJesusChrist.org).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Ezekiel 33:1–5.N̄an kōmeļeļeik eoon kein, juon uwaan baam̧le eo emaron̄ kōtōnn̄e e juon “riwaj” ilo an reinabōj ļo̧k ilo juon wintō im ba n̄an aolep baam̧le eo ta eo ej waļo̧k ilo nabōj in m̧weo. Ewi wāween an rikanaan eo ad emour āinwōt juon riwaj n̄an kōj?

Ezekiel 33:15–16.Ta eo eoon kein rej katakin kōn jeorļo̧k bōd me jemaron̄ bōke kōn Jisōs Kraist?

Ezekiel 36:26–27.Kwaļo̧k n̄an baam̧le eo am̧ jet dekā ilo am̧ ekkōnoo kōn ta meļeļein bwe en wōr juon “bōro dekā.” Kōtļo̧k bwe ren kwaļo̧k naan ko me rej kōmeļeļeik “bōrō ekāāl” im “jetōb ekāāl” Rilo̧mo̧o̧r ej letok n̄an kōj (lale Mosaia 3:19; 5:2).

Ezekiel 37:15–28Ro uwaan kabun̄ in remaron̄ kappukot ruo aļaļ im je ioon juon N̄an Juda (Bible) im je ioon eo juon N̄an Josep (Book of Mormon) (lale eoon ko 16–19). Remaron̄ jeere bwebwenato ko ak jeje ko rekwojarjar jān Bok in Mormon me ej jipan̄ er epaake ļo̧k Rilo̧mo̧o̧r im erom̧ “armej ro [An]” (eoon23).

Ezekiel 47:1–12.Eoon kein rej kōmeļeļeik visōn eo an Ezekiel kōn dān eo ej toorļo̧k jān tampeļ im kōmour Lom̧alo in Jo̧o̧ļ—dān jo̧o̧ļ jān lojet me ek ko im menin mour ko rejjab maron̄ mour jene. Ajri ro remaron̄ m̧ōņōņō ilo aer jin̄n̄a pija in visōn in. Ta eo dān eo ilo tampeļ eo ej jutak kake? (lale pija eo “And the River Will Grow,” ChurchofJesusChrist.org). Ewi wāween an tampeļ jipan̄ kōmour kōj? (lale Ezekiel 47:8–9,11).

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—For Primary.

Al eo kar elmakote: “Dear to the Heart of the Shepherd,” Hymns, no.221.

Kōkm̧anm̧anļo̧k Ad Katakin

Jab kajjieon̄ kabare aolep men. Kwomaron̄ jab kappukot aolep m̧ool ko ilo bok in Ezekiel ippān baam̧le eo am̧. Kappukot tōl an jetōb n̄an kālet ta eo n̄an mije. (Lale Teaching in the Savior’s Way, 7.)

“Lo, ear wōr dān ko raar to̧o̧rļo̧k jān ium̧win biten kōjām in m̧weo.… Im aolep menninmour ko rej m̧akūtkūt ilo aolep jikin ko river eo ej etal ie” (Ezekiel 47:1,9). Pija kar kōjerbale ium̧win mālim jān shutterstock.com.