The Cry of Jeremiah the Prophet[Jar eo an Jeremaia Rikanaan eo], jān juon jeje jān Nazarene School

Oktoba 17–23

Jeremaia 30–33; 36; Liaajļo̧ļ1; 3

“Inaaj Ukōt Liaajlo̧ļ n̄an Lan̄lōn̄”

Ilo am̧ rekoote en̄jake ko am̧, ļōmņak kōn wāween an pedped in katak ko ilo Jeremaia im Liaajļo̧ļ ko me rej iookļo̧k men ko kwaar ekkatak kaki ilo Kallim̧ur M̧okta.

Je En̄jake ko Rej Im̧we Eok

Ke Irooj ekar kūr Jeremaia n̄an erom̧ rikanaan, E kar ba n̄an e bwe mijen in enaaj “n̄an tūm̧wi, im rupwe” (Jeremaia1:10)—im ilo Jerusalem, ekar lukkun lōn̄ jerawiwi ko n̄an wūjwūj im n̄an eoļo̧k. Ak en̄in ekar m̧ōttan eo wōt ilo mijen eo an Jeremaia—eo kar bar likūt bwe en “n̄an kalōk im ekkat” (Jeremaia 1:10). Ta eo emaron̄ kar bar kalōk ak ekkat ālkin kakkure ko an itok jān jab pokake ko an Riisrael? Āinļo̧k wōt, n̄e jerawiwi ak apan̄ em̧ōj an kakkure mour ko ad, ewi wāween ad bar kalōk im bar ekkat? Uwaak ko rej pād ilo “Ra e wānok” (Jeremaia 33:15), eo ej Messaia eo kar kallim̧ur kake. Messaia ej bōktok “juon bujen ekāāl” (Jeremaia 31:31)—juon eo me ej aikuj eļapļo̧k jān juon wūjlepļo̧k ejabwe ak niknik ilo paaktok wōt. Kien eo an ej aikuj pād “ilo [kōj],” im jeje “ioon [buruōd].” En̄in ej lukkuun meļeļe ippān Irooj n̄an “[erom̧] Anij [eo ad]” im n̄an kōj bwe jen erom̧ “armej ro [Doōn]”(Jeremaia 31:33). Ej juon jerbal m̧ōttan wōt mour ko ad, im jenaaj baj wōt kōm̧m̧an bōd im en̄jake burom̧ōj jān iien n̄an iien. Ak n̄e jej kōm̧m̧ani, ewōr ippād kallim̧ur in jān Irooj “Inaaj ukōt aer liajļo̧ļ n̄an lan̄lōn̄” (Jeremaia 31:13).

N̄an tukaduin kōmeļeļe ko an Liajļo̧ļ, lale “Lamentations, Bookof” ilo Unin Tōl eo n̄an Jeje Ko Rekwojarjar (scriptures.ChurchofJesusChrist.org).

Ļōmņak ko n̄an Ekkatak Jeje Ko Rekwojarjar Ippam̧ Make

Jeremaia 30–31; 33

Irooj enaaj bar lo̧mo̧o̧ren er jān kōm̧akoko im aiintok er.

Ilo Jeremaia 30–31; 33 Irooj ej kile “jan̄ im liaajļo̧ļ” (Jeremaia 31:15) bwe Riisrael ro renaaj en̄jake ilo aer kar pād ilo kōm̧akoko. Ijoke, E ej barāinwōt letok naan in kaenōm̧m̧an im kōjatdikdik. Ta naan ko ilo jebta kein me kwoj ļōmņak ekar leļo̧k n̄an ri Israel ro kaenōm̧m̧an im kōjatdikdik? Ta kallim̧ur ko kwoj loi jān Irooj n̄an armej ro An? Ewi wāween an kallim̧ur kein iookwaj eok ilo raan kein?

Jeremaia 31:31–34; 32:37–42

“Im Inaaj Anij eo aer, im renaaj armej ro doō.”

Men̄e Riisrael ro rekar rub bujen ko aer ippān Irooj, Jeremaia ekar kanaan bwe Irooj enaaj bar ejaake juon “[bujen ekāāl” ippān armej ro An (Jeremaia 31:31; 32:40). Bujen in ekāāl im ejjeļo̧k jem̧ļo̧kin ej “tarlep in gospel eo an Jisōs Kraist [lale Katak im Bujen Ko 66:2]. Ekāāl aolep iien ej waļo̧k ilo an bar oktak ālkin juon tōre in bun̄ tōmak. Ejjeļo̧k jem̧ļo̧kin ilo meļeļein bwe ej bujen an Anij im armej rej m̧ōņōņō kake ilo aolep iien bōk eddo an gospel in ijo armej ro rekar kōņaan bōke” (Guide to the Scriptures, “New and Everlasting Covenant,” scriptures.ChurchofJesusChrist.org; italics added).

Ilo am̧ riiti Jeremaia 31:31–34; 32:37–42, kejōkļo̧kjeņ kōn ta meļeļein n̄an kwe n̄an erom̧ m̧ōttan armej in bujen ro an Anij. Ewi wāween an eoon kein jelet wāween am̧ kalimjōk bujen jem̧jerā eo am̧ ippān Anij? Ta meļeļein n̄an je kien ko An ilo būruōd? (lale Jeremaia 31:33).

Bar lale Jeremaia 24:7; Hibru 8:6–12.

Eoon ko remaron̄ im̧we kōj n̄an ukweļo̧k im oktakļo̧k n̄an Irooj.

Jeremaia36

Eoon ko ewōr aer kajoor n̄an ukōt eō jān nana ko.

Irooj ekar kakien Jeremaia n̄an rekoote kanaan ko an ilo “juon bok,” ak juon peba lemlem, kōmeļeļeiki bwe eļan̄n̄e armej ren kar ron̄ kanaan kein, “innām renaaj oktak … jabdewōt armej jān iaļ ko an ro re nana; innem Inaaj joļo̧k nana ko aer im jero̧wiwi ko aer” (Jeremaia 36:2–3). Ilo am̧ riiti Jeremaia36, ļōmņak in je wāween an armej rein rej elaajrak en̄jake kōn kanaan ko:

Irooj:

Jeremaia:

Baruch:

Jehudi im Kiin̄ Jehoiakim:

Elnathan, Delaiah, im Gemariah:

Kejōkļo̧kjeņ kōn wāween am̧ en̄jake kōn eoon ko im eddo ko aer ilo mour eo am̧. Ewi wāween aer kar jipan̄ eok bwe kwon kattoļo̧k eok make jān nana ko?

Bar lale JulieB. Beck, “My Soul Delighteth in the Scriptures,” Ensign or Liahona, May 2004, 107–9.

Liajļōļ1; 3

Irooj emaron̄ kōmeraiki būrom̧ōj ko jej en̄jake me rej waļo̧k kōn wōt jerawiwi.

Bok in Liajļōļ ej kobain poem ko me kar je ālkin kakkure eo an Jerusalem im tampeļ eo ie. Ilo am̧ ļōmņak etke eaorōk bwe ren kar kōjparoki liajļōļ kein im kobaiki ilo Kallim̧ur M̧okta? Ļōmņak kōn ta waanjon̄ak ko ilo Liajļōļ1 im3 jipan̄ eok meļeļe kōn būrom̧ōj eļap me Riisrael ro rekar en̄jake. Ta ennaan in kōjatdikdik ko ilo Kraist me kwoj loi? (lale eļaptata Liajļōļ 3:20–33; bar lale Matu 5:4; Jemes 4:8–10; Alma 36:17–20).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jeremaia 31:3.Ewi wāween an Jemedwōj Ilan̄ im Jisōs Kraist kwaļo̧k Aer “iakwe ejjeļo̧k jem̧ļo̧kin” n̄an kōj? Kwaļo̧k pija in men ko Kraist ekar kōm̧anm̧ani n̄an kōj ak ekar kōm̧m̧an ilo iien an kar kwaļo̧k naan emaron̄ jipan̄ baam̧le eo am̧ en̄jake “iakweejouj.”

Jeremaia 31:31–34; 32:38–41.Ļōmņak in kōm̧m̧ane juon laajrak in men ko ilo eoon kein me Irooj ej kallim̧ur kōj n̄e jej kōm̧m̧ane bujen ko Ippān. Ta eo eoon kein rej katakin kōj kōn aorōkin bujen ko ad?

Ro uwaan baam̧le eo remaron̄ bar je (ak jin̄n̄aiki) ioon juon peba kōjekjekin heart[love] juon men me ej kwaļo̧k wāween aer en̄jake kōn Rilo̧mo̧o̧r. Ta meļeļe n̄an je kien ko an ilo būruōd? (lale Jeremaia 31:33). Ewi wāween ad kwaļo̧k n̄an Irooj ke jekōņaan erom̧ armej ro An?

Jeremaia36.Ewi wāween am̧ kōjerbal Jeremaia36 n̄an jipan̄ baam̧le eo am̧ ekkatak kōn aorōk in eoon ko? (lale, n̄an waanjon̄ak, eoon ko 1–6, 10, 23–24, 27–28,32). Kwomaron̄ kajjitōk ippān juon uwaan baam̧le eo n̄an riiti juon eoon jān jebta in ilo an bar juon uwaan baam̧le eo je, āinwōt an kar Baruch kōm̧m̧ane n̄an Jeremaia. Etke jej kam̧m̧olool kōn kijejeto an armej ro āinwōt Baruch, eo ekar kōjparoki naan ko an rikanaan ro? Ta eo jemaron̄ kōm̧m̧an n̄an kwaļo̧k n̄an Irooj ke jej kaorōk naan ko An ilo jeje ko rekwojarjar?

Ļiajļōļ 3:1–17, 21–25, 31–32.Āinwōt juon baam̧le, kwomaron̄ kōnono kōn wāween kwaļo̧k en̄jake ko ilo Liajļōļ 3:1–17 emaron̄ iookļo̧k en̄jake ko jej en̄jaki n̄e jej jerawiwi. Ewi wāween an ennaan ko ilo eoon ko 21–25, 31–32 im̧we mour ko ad?

N̄an ļōmņak ko reļļapļo̧k kōn katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote:“I Feel My Savior’s Love,” Children’s Songbook, 74–75.

Kōkm̧anm̧anļo̧k Am̧ Make Ekkatak

Pukōt revelesōn. Ilo am̧ kejōkļo̧kjeņ kake ilo raan eo, kwomaron̄ bōk ļōmņak ko im en̄jake ko jet kōn eoon ko kwoj ekkatak jāni. Jab ļōmņak kōn ekkatak gospel eo āinwōt juon men kwoj kōm̧m̧an iien n̄an ak juon men kwoj kōm̧m̧ane aolep iien. (Lale Teaching in the Savior’s Way, 12.)

Jeremiah Lamenting the Destruction of Jerusalem[Jeremaia Ej Liaajlo̧ļ Kōn Kakkure eo an Jerusalem, jān Rembrandt van Rijn