“Oktoba 10–16. Jeremaia 1–3; 7; 16–18; 20: ‘M̧okta jen Aō kar Kōm̧anm̧an Eok ilo Lo̧jien Jinōm̧ Iar Jeļā Eok,’” Itok, Ļoor Eō—N̄an Būraimere: Kallim̧ur M̧okta 2022 (2021)
“Oktoba 10–16. Jeremaia 1–3; 7; 16–18; 20,” Itok, Ļoor Eō—N̄an Būraimere: 2022
Jeremiah [Jeremaia], jān Walter Rane
Oktoba 10–16
Jeremaia 1–3; 7; 16–18; 20
“M̧okta jen Aō kar Kōm̧anm̧an Eok ilo Lo̧jien Jinōm̧ Iar Jeļā Eok”
“Kōttōpar eo n̄an aolep gospel rūkaki … ej n̄an kwaļo̧k katak eo em̧ool an gospel in, kōn Jetōb, n̄an jipan̄ ro nejin Anij kōļapļo̧k aer tōmak ilo Rilo̧mo̧o̧r im erom̧ eļapļo̧k āinwōt E” (Teaching in the Savior’s Way, front cover).
Je En̄jake ko Rej Im̧we Eok
Kajjitōk bwe ren Kwaļo̧k
Je ioon peba eo jet naan raorōk jān ekkatak eo an wiik in kōn Jeremaia, āinwōt rikanaan, dānnin mour, aiintok, im kle. Likut peba ko ilo juon kantenar, im kajjitōk ippān ajri ro n̄an bōk juon im kwaļo̧k jabdewōt ļōmņak ko ewōr ippāer kake. Jipan̄ er lale elmen an naan ko ekkar n̄an men eo Jeremaia ekar kwaļo̧ke.
Katakin Katak eo: Ajri ro Reddikļo̧k
Jemedwōj Ilan̄ ejeļā eō m̧okta jen aō kar ļotak.
Kōnke jaar mour ippān Anij m̧okta jen ad kar itok n̄an laļin, E ejeļā kajjied, men̄e jeban keememej E. Ewi wāween am maron̄ jipan̄ ajri ro kwoj katakin er meļeļe m̧ool in aurōk?
M̧akūtkūt ko Maron̄ Kōm̧m̧ani
-
Riit n̄an ajri ro Jeremaia 1:5, im kōmeļeļeik bwe Anij ekar jeļā kajjien rikanaan Jeremaia m̧okta jen an kar ļotak. Kwaļo̧k n̄an kajjojo ajri, juon ilak juon, bwe Jemedwōj Ilan̄ ebar jeļā kajjien m̧okta jen an kar lo̧tak im bwe E ekar jilkintok kōj kajjojo n̄an ijin kōn juon un.
-
Kwaļo̧k n̄an ajri ro juon pijain juon nin̄nin̄, im kajjitōk ippāer n̄e rejeļā ia eo ajri in ekar mour ie m̧okta jen an kar lo̧tak. Al juon al ippān doon me ej kwaļo̧k kōn mour eo ad m̧okta ippān Anij, āinwōt “N̄a Nejin Anij” ak “I Lived in Heaven” (Children’s Songbook, 2–3,4). Kōnono kōn en̄jake in jetōb ko me al in ej kwaļo̧ki. Kwaļo̧k am̧ naan in kam̧ool bwe jaar aolep mour ippān Jemedwōj Ilan̄ m̧okta im bwe E ekar jilkintok kōj n̄an laļin.
Em̧ōj kūr rikanaan ro n̄an kōnono kōn naan ko an Irooj.
Kūr eo an Jeremaia ej kwaļo̧k ta eo Irooj ej kajjitōk ippān rikanaan ro n̄an kōm̧m̧ane. Elmen am̧ jipan̄ ajri ro kwoj katakin er kōkajoorļo̧k aer kōņaan n̄an ļoor rikanaan eo emour?
M̧akūtkūt ko Maron̄ Kōm̧m̧ani
-
Kwaļo̧k n̄an ajri ro juon pija in rikanaan eo emour, im kajjitōk ippāer n̄an kwaļo̧k ta eo rejeļā kōn e. Ta ko rikanaan ro rej kōm̧m̧ane? Riit n̄an ajri ro ta eo Irooj ekar ba n̄an bar juon rikanaan, Jeremaia, ilo Jeremia 1:7. Kajjitōk ippān ajri ro n̄an etetal n̄an jikin eo n̄e kwoj riiti “aolep ijo Ij jilkinļo̧k eok n̄an e kwōnaaj etal ie” im kōtanke kwoj kōnono n̄e kwoj riiti “kwonaaj ba aolep men ij jiron̄ eok.” Kwaļo̧k am̧ naan in kam̧ool bwe rikanaan ro rej kōm̧m̧an im ba ta eo Irooj ej jiron̄.
-
Kwaļo̧k pijain rikanaan ro jān jeje ko rekwojarjar (lale Gospel Art Book, Māākjiin ko an Kabun̄, im Itok, Ļoor Eō—N̄an Kajjojo Armej im Baam̧le ko). Kōtļo̧k an ajri ro kwaļo̧k n̄an eok ta eo rejeļā kōn rikanaan ro. Kwaļo̧k jidik n̄an ajri ro kōn men ko kajjojo rekar kōm̧m̧ane n̄an jipan̄ jerbal in an Anij. Kwaļo̧k am̧ naan in kam̧ool bwe rikanaan ro rej kūr jān Anij n̄an kōnono kōn naan ko An im jerbal n̄an armej ro An.
Imaron̄ jipan̄ ro nejin Jemedwōj Ilan̄ jepļaak n̄an E.
Lale Jeremaia 16:16, Būreejtōn RussellM. Nelson eaar ba, “Mijenede ro ad rekar kappukot ro bwijjin Israel me rejepelōklōk; rekar kapukot er ‘ilo ro̧n̄ in dekā ko’; im rekar eo̧n̄ōde er āinwōt ilo raan ko etto” (“Aiintok Doon eo an Bwijin Israel eo Ekar Ejjeplōklōk,” Liaona, Nob. 2006,81).
M̧akūtkūt ko Maron̄ Kōm̧m̧ani
-
Ilo am̧ riiti Jeremaia 16:16, kajjitōk ippān ajri ro bwe ren kōtan n̄e rej eo̧n̄ōd im kappok mennin mour. Kōmeļeļeik bwe rieo̧n̄ōd ro im rikappok mennin mour ro ilo eoon in emaron̄ bōk jikin mijenede ro. Kajjitōk ippān ajri ro bwe ren kōtan n̄e rej mijenede ro. Ta eo mijenede ro rej kōm̧m̧ane? Elmen ad maron̄ jipan̄ er?
-
Kōm̧m̧ane juon ikkure in karōki pija ko kōjerbal peij in m̧akūtkūt eo an wiik in. N̄e juon ajri ej lo pija eo n̄e ejejjet, ekōnono kake ta eo pija in ej kwaļo̧ke jemaron̄ kōm̧m̧ane n̄an jipan̄ ajri ro nejin Jemedwōj Ilan̄ bar jepļaak n̄an E.
Katakin Katak eo: Ajri ro Rerūttoļo̧k
Kar kūr rikanaan ro n̄an kōnono kōn naan ko an Irooj.
Elmen am̧ maron̄ jipan̄ ajri ro kōkajoorļo̧k aer tōmak im meļeļe kōn jerbal eo an rikanaan ro ilo aelōn̄ in kiin̄ in an Anij?
M̧akūtkūt ko Maron̄ Kōm̧m̧ani
-
Kālet jet naan ko raorōk jān Jeremaia1 me ej kwalo̧k kōn m̧ool ko raorōk kōn rikanaan ro, āinwōt eoon 5, 7, 10, im19. Kajjitōk ippān ajri n̄an bōk juon eoon, riiti, im kwaļo̧k men ko ekar ekkatak kōn rikanaan ro jān eoon in. Kajjitōk ippān jejjo ajri n̄an kwaļo̧k naan in kam̧ool ko aer kōn rikanaan eo.
-
Kwaļo̧k juon pija in rikanaan eo emour, im al juon al ippān doon, āinwōt “We Listen to a Prophet’s Voice” (Hymns, no.22). Jipan̄ ajri ro kōm̧m̧ane juon laajrak in men ko rikanaan eo emour eaar kajjitōk ippād n̄an kōm̧m̧ane. Kālet juon ennaan jān kweilo̧k eo eļap ej kab jem̧ļo̧kļo̧k jān rikanaan eo, im jipan̄ ajri ro lale naan in kapilōk eo an. Elmen ad ļoor rikanaan eo? Ekōnono elmen an naan in kapilōk jen rikanaan ro jipan̄ kōj em̧m̧anļo̧k ad ļoor Jemedwōj Ilan̄ im Jisōs Kraist.
-
Kwaļo̧k pijaan alooj eo “Why Do We Have Prophets?” (ChurchofJesusChrist.org), im kajjitōk ippān ajri ro elmen aer maron̄ kōmeļeļeiki n̄an eo m̧ōttaer etke ej juon jeraam̧m̧an bwe en wōr juon rikanaan emour (lale Laajrak in Tōmak Ko 1:6,9). Kajjitōk ippān ajri ro n̄an kwaļo̧k en̄jake ko aer kōn rikanaan eo emour.
Imaron̄ in m̧ōttan aiintok doon eo an Israel.
Ennaan in kōn aiintok doon eo an Israel maron̄ loe ilo Jeremaia 16:14–15 emaron̄ letok juon iien eļap an em̧m̧an n̄an kōnono kake n̄an ajri ro kōn jerbal in mijenede im menmenbwij an baam̧le. En̄in ej juon wāween jemaron̄ “jutak āinwōt rikam̧ool ro an Anij” (Mosaia 18:9).
M̧akūtkūt ko Maron̄ Kōm̧m̧ani
-
Riit ippān doon Jeremaia 16:14, im kajjitōk ippān ajri ro n̄an kwaļo̧k men ko rej keememeji elmen an “Jeova … kar kadiwōjļo̧k ro nejin Israel jān āne in Ijipt” (lale Exodus14). Kajjitōk bwe ren riiti Jeremaia 16:15 im lale iien ta eoJeremaia ekar ba enaaj kabwilōn̄lōn̄. Kōmeļeļeik bwe Israel ro rekar ejjeplōklōk ilo aolepen laļ in, ak Anij ekar kallim̧ur n̄an bar aiintok er n̄an Ippān im Kabun̄ in An. Menin ņaetan aiintok doon eo an Israel. Elmen an menin āinwōt juon n̄an kōtļo̧k armej ro jān kōm̧akoko?
-
Kwaļo̧k ennaan in jān Būreejtōn RussellM. Nelson: “Jabdewōt iien kwoj kōm̧m̧ane jabdewōt men me ej jipan̄ jabdewōt armej—ilo jim̧or jait ko an ran̄ōl eo—bōk juon bun̄tōn m̧aanļo̧k n̄an kōm̧m̧ani bujen ko ippān Anij im bōk kain̄i ko remenin aikuj n̄an aer peptaij im kain̄i ko an tampeļ, kwoj jipan̄ aiintok Israel” (RussellM. Nelson im WendyW. Nelson, “Hope of Israel” [worldwide youth devotional, June3, 2018], supplement to the New Era im Ensign, Aug. 2018,15, ChurchofJesusChrist.org). Elmen ad jipan̄ aiintok Israel?
-
Al juon al ippān doon kōn jerbal in mijende, āinwōt “I Hope They Call Me on a Mission” ak “Called to Serve” (Children’s Songbook, 169,174), ak kwaļo̧k pijaan alooj eo “Your Day for a Mission” (ChurchofJesusChrist.org). Kajjitōk ippān ajri ro ta eo raar ekkatak jān al eo ak pija inn alooj eo etke ro jet remaron̄ kālet n̄an jerbale juon mijen.
Kōketak Ekkatak ilo M̧weo
Kajjitōk ippān ajri ro n̄an bōk n̄an m̧weeo juon kape in peij in m̧akūtkūt eo an wiik in im ikkure ikkure in kamejeej ippān baam̧le eo aer. Rōjan̄ er n̄an kōnono ippān baam̧le ko aer kōn wāween an jerbal in mijinede kar kōjeraam̧m̧an er.
Kōkōm̧anm̧anļo̧k Ad Katakin
Jipan̄ ajri ro kile Jetōb eo. Al ko rekwojarjar ekkā aer bōktok im̧we eo an Jetōb Kwojarjar. N̄e kwoj al ippān ajri ro, bōk iien em̧m̧an n̄an jipan̄ er kile en̄jake ko an jetōb me ej kapen m̧ool kōn ta eo rej ekkatak.