“3–9 ʻOkatopa. ʻĪsaia 58–66: ‘ʻE Haʻu ʻa e Huhuʻí ki Saione,’” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022 (2021)
“3–9 ʻOkatopa. ʻĪsaia 58–66,” Haʻu, ʻo Muimui ʻIate Au—Maʻá e Palaimelí: 2022
Ko Sīsū ʻi he Falelotu ʻi Nāsaletí, tā fakatātaaʻi ʻe GregK. Olsen
3–9 ʻOkatopa
ʻĪsaia 59–66
“ʻE Haʻu ʻa e Huhuʻí ki Saione”
ʻOku fakataumuʻa e ngaahi fakakaukau fakaʻekitivitī ʻi he lēsoni ko ʻení ke ne ueʻi fakalaumālie ho tuʻunga mohu foungá. ʻOua naʻá ke ongoʻi haʻisia ke muimui pau ki ai; muimui he ngaahi ueʻi ʻa e Laumālié kimuʻa pea ʻi he lolotonga ʻo e lēsoní.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
ʻOku fakamoʻoni ha konga lahi ʻo e ngaahi lea mo e akonaki ʻa ʻĪsaiá ki he Fakamoʻuí. Fakaʻaliʻali ha fakatātā ʻo Sīsū Kalaisi, pea fakaafeʻi e fānaú ke vahevahe ha meʻa ne nau ako fekauʻaki mo Ia ʻi he uiké ni.
Akoʻi e Tokāteliné: Fānau Iiki Angé
ʻE lava ke fakafiefia ʻa e Sāpaté.
Ko e ʻaho Sāpaté ko ha taimi ia ke tau manatu ai ki he ʻEikí mo mālōlō mei heʻetau ngaahi ngāue fakauiké. Te ke tokoni fēfē ki he fānau ʻokú ke akoʻí ke ngaohi e ʻaho Sāpaté ke fakafiefiá?
Ngaahi ʻEkitivitī ʻe Ala Fakahokó
-
Kole ki he fānaú ke toutou lea ʻaki e kupuʻi lea “Ui ʻa e ʻaho tapú ko e fakafiefia, ko e ʻaho māʻoniʻoni ʻo [e ʻEikí]” (ʻĪsaia 58:13). Fakamatalaʻi ange ʻoku ʻuhinga ʻa e “fakafiefiá” ki ha meʻa ʻokú ne ʻai kitautolu ke tau fiefia. Kole ki he fānaú ke vahevahe ha ngaahi meʻa ʻokú ne fakafiefiaʻi kinautolu. Fakamoʻoni ne ʻomi ʻe he ʻEikí ʻa e ʻaho Sāpaté koeʻuhí ʻokú Ne finangalo ke tau maʻu ʻa e fiefiá. Fakamatala ki he fānaú e ʻuhinga ʻoku hoko ai ʻa e ʻaho Sāpaté ko ha fiefiaʻanga kiate koé.
-
Lau ki he fānaú ʻa e ʻĪsaia 58:14: “Te ke toki fiefia koe [ʻi he ʻEikí].” Fakamatalaʻi ange ki he fānaú ko e Sāpaté ko ha ʻaho makehe ia—ko ha taimi ia ʻoku tau lava ai ʻo fakakaukau ki he ngaahi meʻa ne fakahoko ʻe he Tamai Hēvaní mo Sīsū ke tokoni kiate kitautolu ke tau fiefia. Tokoni ki he fānaú ke fakakaukau ki he ngaahi meʻa te nau lava ʻo fakahoko ʻi he Sāpaté ke nau manatu ai ki he Tamai Hēvaní mo Sīsū Kalaisi. Fakaafeʻi kinautolu ke tā fakatātaaʻi e ngaahi fakakaukau ʻoku nau maʻú pea vahevahe ʻenau ngaahi fakatātaá mo e niʻihi kehé pea mo honau fāmilí.
“ʻE hoko ʻa [e ʻEikí] ko e maama taʻengata kiate koe” (ʻĪsaia 60:19). Ko ha Meʻafoaki ʻo e Māmá, tā fakatātaaʻi ʻe Eva Timothy
Te u lava ʻo fakaulo atu e maama ʻa e Fakamoʻuí ki he niʻihi kehé.
Naʻe kikiteʻi ʻe ʻĪsaia, ʻe hoko ʻa e kakai ʻo e ʻEikí ʻo tatau mo ha maama kiate kinautolu ʻoku ʻi he fakapoʻulí ʻi he ngaahi ʻaho fakaʻosí. Fakakaukau ki he founga te ke lava ai ʻo tokoni ki he fānaú ke nau “tuʻu hake” pea “ulo atu.”
Ngaahi ʻEkitivitī ʻe Ala Fakahokó
-
Fakaafeʻi e fānaú ke kuikui honau matá ʻi hoʻo lau ʻa e ʻĪsaia 60:1–3. Kole ange ke nau ʻāʻā ʻi he taimi ʻoku nau fanongo ai ki he foʻi lea “māmá” pea kuikui ʻi heʻenau fanongo ki he foʻi lea “poʻulí.” Fakamatalaʻi ange ʻoku hangē ʻa Sīsū Kalaisi mo ʻEne ongoongoleleí ko ha maama ʻoku tokoni mai ke tau ʻilo hotau hala ke foki ai ki he Tamai Hēvaní.
-
ʻOange ki he fānaú takitaha ha fakatātā ʻo ha maama (hangē ko ha laʻā, teʻelango pe foʻi maama). Tokoni ke nau fakakaukau ki ha ngaahi founga te nau lava ai ʻo vahevahe e maama ʻo e Fakamoʻuí mo e niʻihi kehé. ʻI hono vahevahe ʻo e fakakaukau takitaha, fakaafeʻi kinautolu ke nau “tuʻu hake” pea “fakaulo” atu ʻenau māmá ʻaki hono puke hake ʻenau fakatātaá ki ʻolunga. Fakamatala ki he fānaú ha ngaahi founga kuó ke vakai ai ki haʻanau vahevahe e maama ʻo e Fakamoʻuí.
-
Hivaʻi fakataha ha foʻi hiva fekauʻaki mo hono vahevahe ʻo e māmá, hangē ko e “Ulo Atu” (Tohi Hiva ʻa e Fānaú,96). Tokoni ki he fānaú ke nau ʻilo e ngaahi lea ʻi he hivá ʻoku nau fakamamafaʻi e meʻa ʻoku nau ako mei he ʻĪsaia 60:1–3.
Ko Sīsū Kalaisi hoku Fakamoʻuí mo e Huhuʻí.
ʻOku ʻomi ʻe he ʻĪsaia 61:1–3 ha fakamatala mālohi ʻo e misiona akoʻi mo faifakamoʻui ʻo e Fakamoʻuí. Kumi ha ngaahi founga ke tokoni ai ki he fānaú ke nau vakai ki he founga ʻe lava ke akoʻi mo fakamoʻui fakatāutaha ai kinautolu ʻe Sīsū Kalaisí.
Ngaahi ʻEkitivitī ʻe Ala Fakahokó
-
Tuku ke puke hake ʻe he fānaú ha ngaahi fakatātā ʻo Sīsū ʻoku akonaki, faifakamoʻui mo tokoni ki he niʻihi kehé ʻi hoʻo lau ʻa e ʻĪsaia 61:1 (vakai ki he Tohi Fakatātā ʻo e Ongoongoleleí). Fakamatalaʻi ange naʻe tuku mai ʻe he ʻOtuá ʻa Sīsū Kalaisi ke Ne fakahoko e ngaahi meʻá ni maʻatautolu kotoa. Fakaafeʻi e fānaú ke vahevahe ʻenau ngaahi ongo kau kia Sīsū Kalaisí. Fakamoʻoni ki he ʻofa ʻoku maʻu ʻe he Fakamoʻuí maʻa ʻEne fānaú takitaha.
-
ʻOku fakamatalaʻi ʻi he ʻĪsaia 61:3 ʻa kinautolu ʻoku fanongo mo talangofua ki he ʻEikí ko ha “ngaahi [fuʻu] ʻakau ʻo e māʻoniʻoní.” Tā ha fuʻu ʻakau ʻi he palakipoé, pea fakaafeʻi e fānaú ke fakakaukau ki he ngaahi meʻa māʻoniʻoni te nau lava ʻo fakahokó. ʻI he foʻi fakakaukau takitaha, tuku ke tā ʻe he fānaú ha laʻiʻakau ʻi he fuʻu ʻakaú.
Akoʻi e Tokāteliné: Fānau Lalahi Angé
ʻOku faitāpuekina au ʻe he ʻaukaí mo e niʻihi kehe ʻoku faingataʻaʻiá.
Mahalo kuo matuʻotuʻa feʻunga ha niʻihi ʻo e fānau ʻokú ke akoʻí ke nau ʻaukai. Ka, naʻa mo kinautolu ʻoku teʻeki lavá, te nau lava ʻo lavemonū mei he ako fekauʻaki mo e fono ʻa e ʻEikí ki he ʻaukaí mo e teuteu ke ʻaukai ʻi he taimi kuo nau mateuteu aí.
Ngaahi ʻEkitivitī ʻe Ala Fakahokó
-
Hiki ʻi he palakipoé ʻa e ʻUhinga ʻoku tau ʻaukai aí mo e Founga ʻoku tau ʻaukai aí? Fakaafeʻi e fānaú ke hiki e ngaahi talí ʻi he palakipoé. Poupouʻi kinautolu ke toe vakaiʻi ʻa e “ʻAukaí” ʻi he Fakahinohino ki he Ngaahi Folofolá (scriptures.ChurchofJesusChrist.org) mo e ʻĪsaia 58:6–11 ke maʻu ha ngaahi tali lahi ange. ʻE tokoni fēfē mai ʻa e ʻĪsaia 58:6–11 kiate kitautolu ʻi he taimi ʻoku tau ʻaukai aí?
-
Vahevahe ki he fānaú haʻo aʻusia fakatāutaha fekauʻaki mo e ʻaukaí, pe vahevahe ha talanoa mei he makasini ʻa e Siasí fekauʻaki mo e ʻaukaí. Fakamamafaʻi ange e ngaahi tāpuaki ʻoku tau maʻu mei he ʻaukai ʻi ha taumuʻa fakalaumālié. Kapau ʻoku ʻi ai ha fānau kuo nau lava ʻo ʻaukai, fakaafeʻi kinautolu ke vahevahe ʻenau ngaahi aʻusiá. Poupouʻi e fānaú ke talanoa ki heʻenau mātuʻá he Sāpate ʻaukai hokó fekauʻaki mo e ʻuhinga ʻo e ʻaukaí. Tokoniʻi kinautolu ke mahino e ʻuhinga ʻo e ʻaukai ʻi ha taumuʻa fakamātoató mo ha loto faʻa lotú.
-
Lau fakataha ʻa e ʻĪsaia 58:6–7, pea fakamatalaʻi ange ko e founga ʻe taha ʻoku tau “tufaki [ai ʻetau] maá ki he fiekaiá” ʻi he taimi ʻoku tau ʻaukai aí, ko hono foaki e paʻanga ne tau mei fakaʻaongaʻi ʻi he meʻakaí ko ha foaki ʻaukai. Fakaʻaliʻali ki he fānaú ha laʻipepa foaki ki he vahehongofulú mo e ʻaukaí, pea fakamatalaʻi ange e founga ke fakafonu ai iá. Fakaafeʻi e fānaú ke lau ʻa e ʻĪsaia 58:8–10, ʻo kumi e ngaahi tāpuaki ʻoku talaʻofa mai maʻatautolu ʻi he taimi ʻoku tau ʻaukai aí. ʻE tāpuekina fēfē kitautolu ʻe he ʻaukaí mo e niʻihi kehe ʻoku faingataʻaʻiá?
Ko Sīsū Kalaisi hoku Fakamoʻuí mo e Huhuʻí.
Fakalaulauloto ki he founga te ke lava ai ʻo fakaʻaongaʻi e ngaahi lea ʻa ʻĪsaiá ke fakamālohia e fakamoʻoni ʻa e fānaú kau kia Sīsū Kalaisi ko honau Fakamoʻuí mo e Huhuʻí.
Ngaahi ʻEkitivitī ʻe Ala Fakahokó
-
ʻOange ki he fānaú ha ngaahi miniti siʻi ke lau ai ʻa e ʻĪsaia 61:1–3 ʻiate kinautolu pē. Hili iá pea fakaafeʻi kinautolu ke hiki ʻi ha laʻipepa pe ʻi ha tohinoa ako ʻa e meʻa ʻoku akoʻi ange ʻe he ngaahi veesi ko ʻení fekauʻaki mo Sīsū Kalaisí. Fakaafeʻi ha niʻihi ʻo e fānaú ke vahevahe ʻenau ngaahi fakakaukaú.
-
Fakaafeʻi e fānaú ke vahevahe ha kupuʻi lea mei he ngaahi veesi ko ʻení ʻoku ʻuhingamālie taha kiate kinautolú pea fakamatalaʻi hono ʻuhingá. ʻOku tokoni fēfē nai e ngaahi veesi ko ʻení ke mahino kiate kitautolu e meʻa ne tuku mai ai ʻa Sīsū Kalaisi ki he māmaní ke fakahokó?
ʻE hoko ʻa e Nofotuʻí ko ha taimi ʻo e melino mo e fiefia.
Naʻe mamata ʻa ʻĪsaia ki ha taimi ʻe melino mo fiefia ai e kakai ʻo e ʻOtuá. ʻE fakahoko e kikite ko ʻení ʻi he taimi ʻe liuaki mai ai ʻa Sīsū Kalaisi ki he māmaní ʻo pule ʻi ha taʻu ʻe tahaafé—ko ha vahaʻataimi ʻoku ui ko e Nofotuʻi Taʻu ʻe Tahaafé.
Ngaahi ʻEkitivitī ʻe Ala Fakahokó
-
ʻOku fakamatalaʻi ʻi he ʻĪsaia 65:17–25 e tuʻunga ʻe ʻi ai ʻa e māmaní ʻi he taimi ʻe toe hāʻele mai ai e Fakamoʻuí. Vahevahe e fānaú ki ha fanga kiʻi kulupu iiki, ʻoange ki he kulupu takitaha ha niʻihi ʻo e ngaahi veesi ko ʻení ke lau. Hili ha ngaahi miniti siʻi, hiki fakataha ha lisi ʻi he palakipoé ʻo e founga ʻe kehe ai ʻa e moʻui ʻi he “fonua foʻoú” ʻo hangē ko hono fakamatalaʻi ʻi he ngaahi veesi ko ʻení (veesi 17). Ko e hā ka hoko ai ʻeni ko ha taimi ke tau “fiefia pea nekeneka [ai] ʻo taʻengatá”? (veesi 18).
-
Kimuʻa pea kamata e kalasí, teuteu ha ʻū laʻipepa ʻo e ngaahi lea mo e kupuʻi lea mei he tefito ʻo e tui hono hongofulú. Fakaafeʻi ha taha ʻo e fānaú ke ne lau maʻuloto e tefito ʻo e tuí, pea kole ki he fānaú ke nau fokotuʻutuʻu e ʻū laʻipepá ki heʻene hokohoko totonú. Tokoni ki he fānaú ke mahino ʻa e meʻa ʻoku akoʻi mai ʻe he tefito ʻo e tui ko ʻení fekauʻaki mo e Nofotuʻí.
Poupouʻi e Ako ʻi ʻApí
Fakaafeʻi e fānaú ke vahevahe ha meʻa ne nau ako he ʻahó ni fekauʻaki mo e Fakamoʻuí mo honau ngaahi fāmilí. Poupouʻi kinautolu ke lau e folofolá mo honau ngaahi fāmilí he ʻahó ni.
Fakatupulaki ʻEtau Akoʻí
Fai ha ngaahi fehuʻi fakalaumālie ʻEke ha ngaahi fehuʻi ʻoku nau fakaafeʻi e fānaú ke nau fakahoko ha ngaahi meʻa lahi ange he meʻa ʻoku ʻoatú. Hangē ko ʻení, fakakaukau ki ha ngaahi fehuʻi ʻe poupouʻi ai kinautolu ke vahevahe ʻenau ngaahi fakamoʻoní mo e aʻusiá.