« ថ្ងៃទី ៥–១១ ខែ ធ្នូ ។ ហាកាយ; សាការី ១–៣; ៧–១៤ ៖ ‹ បរិសុទ្ធដល់ព្រះយេហូវ៉ា › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៥–១១ ខែ ធ្នូ ។ ហាកាយ; សាការី ១–៣; ៧–១៤ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

ថ្ងៃទី ៥–១១ ខែ ធ្នូ

ហាកាយ; សាការី ១–៣; ៧–១៤

« បរិសុទ្ធដល់ព្រះយេហូវ៉ា »

សូមអានគម្ពីរហាកាយ និង សាការី ប្រកបដោយការអធិស្ឋាន ដោយគិតពិចារណារអំពីការបំផុសគំនិតដែលបងប្អូនទទួលបាន ។ តើសេចក្តីពិតនៅក្នុងគម្ពីរទាំងនេះអាចជួយបំពេញតម្រូវការរបស់កុមារដោយរបៀបណា ?

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមគូររូបមុខមនុស្សរីករាយនៅលើក្រដាសមួយសន្លឹក ហើយឲ្យកុមារប្ដូរវេនគ្នាកាន់ក្រដាសនោះ ។ អំឡុងវេនរបស់ពួកគេ សូមអញ្ជើញពួកគេឲ្យចែកចាយអ្វីមួយដែលពួកគេកំពុងរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ដែលធ្វើឲ្យពួកគេសប្បាយរីករាយ ។

បង្រៀនគោលលទ្ធិ ៖ កុមារតូចៗ

ហាកាយ ១:៦–៨

ខ្ញុំអាចដាក់ព្រះអម្ចាស់ជាទីមួយនៅក្នុងជីវិតខ្ញុំ ។

ការរៀនអំពីការប្រឹក្សារបស់ព្រះអម្ចាស់ដែលឲ្យ « ពិចារណាផ្លូវប្រព្រឹត្តរបស់ខ្លួនចុះ » គឺជាឱកាសមួយសម្រាប់កុមារដើម្បីប្រាកដថា ពួកគេកំពុងធ្វើការណ៍ដែលសំខាន់ ដែលព្រះបានបង្គាប់ឲ្យយើងធ្វើ ។

សកម្មភាពដែលអាចធ្វើបាន

សូមពន្យល់ដល់កុមារថា ព្រះអម្ចាស់មានព្រះទ័យចង់ឲ្យសាសន៍អ៊ីស្រាអែលសង់ព្រះវិហារបរិសុទ្ធ ប៉ុន្តែពួកគេបែរជាធ្វើអ្វីផ្សេងទៀតទៅវិញ ។ សូមអាន ហាកាយ ១:៧ ឮៗ ហើយពន្យល់ថា « ពិចារណាផ្លូវប្រព្រឹត្តរបស់ខ្លួនចុះ » មានន័យថា ព្រះអម្ចាស់មានព្រះទ័យចង់ឲ្យពួកសាសន៍អ៊ីស្រាអែលគិតថា តើពួកគេកំពុងធ្វើការណ៍ដែលសំខាន់បំផុតដែរឬទេ ។ សូមអាន ខទី ៨ ដល់កុមារ ហើយអញ្ជើញពួកគេឲ្យធ្វើជា « ឡើងទៅឯភ្នំ » « យកឈើមក » និង « សង់ព្រះវិហារ [ នៃព្រះអម្ចាស់ ] » ។ តើកិច្ចការសំខាន់អ្វីខ្លះ ដែលព្រះបានប្រទានឲ្យយើងធ្វើ ?
សូមដាក់រូបភាពដែលតំណាងឲ្យកិច្ចការមួយចំនួនដែលសំខាន់ចំពោះព្រះ ដូចជាព្រះគម្ពីរ ការអធិស្ឋាន និងព្រះវិហារបរិសុទ្ធ ផ្កាប់ចុះនៅលើតុ ។ សូមអនុញ្ញាតឲ្យកុមារប្ដូរវេនគ្នាជ្រើសរើសរូបភាពមួយ ហើយបង្ហាញរូបភាពនោះទៅកុមារក្នុងថ្នាក់ ។ សូមជួយពួកគេឲ្យយល់ពីមូលហេតុដែលវាសំខាន់ ដើម្បីប្រាកដថា យើងបង្កើតពេលវេលាសម្រាប់កិច្ចការនីមួយៗនៅក្នុងរូបភាពទាំងនេះ ។

សាការី ៣:១–៧

ព្រះយេស៊ូវគ្រីស្ទអាចធ្វើឲ្យវិញ្ញាណរបស់ខ្ញុំស្អាត ។

សម្លៀកបំពាក់កខ្វក់របស់សម្ដេចសង្ឃយេសួរ ដែលត្រូវបានពិពណ៌នានៅក្នុង សាការី ៣:១–៧ ជានិមិត្តសញ្ញាពីអ្វីដែលកើតឡើង នៅពេលយើងធ្វើអំពើបាប ។ តាមរយៈដង្វាយធួននៃព្រះយេស៊ូវគ្រីស្ទ យើងអាចត្រូវបានធ្វើឲ្យស្អាត ដូចជាយេសួរ ដែលត្រូវបានធ្វើឲ្យស្អាតដែរ នៅពេលដែលលោកបានទទួលសម្លៀកបំពាក់ថ្មី ។

សកម្មភាពដែលអាចធ្វើបាន

សូមឲ្យកុមារហុចអាវកខ្វក់តគ្នា ហើយអាន សាការី ៣:៣ ។ បន្ទាប់មក ឲ្យកុមារហុចអាវស្អាតមួយតគ្នា ហើយអាន ខទី ៤ ។ សូមនិយាយជាមួយកុមារអំពីរបៀបដែលការធ្វើជម្រើសខុស គឺដូចជាការក្លាយជាកខ្វក់ខាងវិញ្ញាណដែរ ប៉ុន្តែព្រះអង្គសង្គ្រោះអាចធ្វើឲ្យយើងបានស្អាតម្ដងទៀត ។ តើយើងមានអារម្មណ៍យ៉ាងណា នៅពេលយើងស្អាត ? សូមចែកចាយទីបន្ទាល់របស់បងប្អូនថា ដោយសារព្រះយេស៊ូវគ្រីស្ទបានរងទុក្ខ និងបានសុគតសម្រាប់យើង នោះយើងនឹងបានស្អាតពីអំពើបាបរបស់យើង ពេលយើងប្រែចិត្ត ។
បើអាចធ្វើបាន សូមបង្ហាញដល់កុមារនូវរូបភាពរបស់មនុស្សម្នាក់ដែលពួកគេស្គាល់ ស្លៀកពាក់ពណ៌សនៅបុណ្យជ្រមុជទឹករបស់គាត់ ( ឬសូមមើល សៀវភៅរូបភាពដំណឹងល្អ ល.រ. ១០៣, ១០៤ ) ។ ហេតុអ្វីយើងស្លៀកពាក់ពណ៌សនៅបុណ្យជ្រមុជទឹករបស់យើង ? សូមច្រៀងចម្រៀងមួយបទអំពីពិធីបុណ្យជ្រមុជទឹក ដូចជា « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ៥៣ ) ។ សូមអញ្ជើញកុមារឲ្យគូររូបខ្លួនពួកគេកំពុងទទួលបុណ្យជ្រមុជទឹក ហើយចែកចាយពីអារម្មណ៍របស់ពួកគេអំពីការទទួលបុណ្យជ្រមុជទឹកនៅថ្ងៃមួយ ។

សាការី ២:១០; ៩:៩; ១៤:៣–៩

ពួកព្យាការីបង្រៀនយើងអំពីព្រះយេស៊ូវគ្រីស្ទ ។

ដូចជាពួកព្យាការីផ្សេងទៀតនៅក្នុងព្រះគម្ពីរសញ្ញាចាស់ដែរ សាការីបានព្យាករអំពីព្រះយេស៊ូវគ្រីស្ទ ។ តើការព្យាករទាំងឡាយនៅក្នុង សាការី ២:១០; ៩:៩; ១៤:៣–៩ អាចបង្រៀនកុមារអ្វីខ្លះអំពីទ្រង់ ?

សកម្មភាពដែលអាចធ្វើបាន

សូមដាក់តាំងរូបភាពរបស់ព្រះយេស៊ូវគ្រីស្ទយាងចូលក្រុងយេរូសាឡិមនៅលើសត្វលា ( សូមមើល សៀវភៅរូបភាពដំណឹងល្អ ល.រ. ៥០ ) ។ សូមប្រាប់កុមារថា ជាច្រើនឆ្នាំពីមុនព្រះយេស៊ូវបានយាងមកកាន់ផែនដី សាការីបានព្យាករថា ព្រះយេស៊ូវគ្រីស្ទនឹងគង់លើសត្វលាចូលក្នុងក្រុងយេរូសាឡិម មុននឹងទ្រង់សុគតដើម្បីយើង ។ កាលដែលបងប្អូនអាន សាការី ៩:៩ សូមឲ្យកុមារចង្អុលទៅមនុស្សនៅក្នុងរូបភាពនោះ ដែល « រីករាយជាខ្លាំង » ហើយក៏ចង្អុលទៅ « ស្ដេច » ផងដែរ ។ តើស្ដេចនោះជានរណា ? សូមកុមារឲ្យចែកចាយពីមូលហេតុដែលពួកគេមានអំណរគុណចំពោះព្រះយេស៊ូវ ។
សូមអានដល់កុមារនូវការព្យាករមួយចំនួន ដែលសាការីបានព្យាករអំពីការយាងមកជាលើកទីពីររបស់ព្រះអង្គសង្គ្រោះ ដូចជាការព្យាករទាំងឡាយដែលមាននៅក្នុង សាការី ២:១០; ១៤:៩ ។ សូមកុមារឲ្យគូររូបភាពអំពីអ្វីដែលពួកគេគិតថា នឹងជាសភាពនៃការយាងមកម្ដងទៀតរបស់ព្រះយេស៊ូវ ឬច្រៀងរួមគ្នានូវចម្រៀងមួយបទអំពីការយាងមកជាលើកទីពីរ ដូចជាបទ « ពេលទ្រង់យាងមកម្តងទៀត » ( សៀវភៅចម្រៀងកុមារ ទំព័រ ៤៦–៤៧ ) ។

បង្រៀនគោលលទ្ធិ ៖ កុមារធំៗ

ហាកាយ ១:២–៨

« ពិចារណាផ្លូវប្រព្រឹត្តរបស់ខ្លួនចុះ » ។

វាសំខាន់សម្រាប់យើងទាំងអស់គ្នា ដើម្បីដឹងពីអាទិភាពរបស់យើង ហើយចំណាយពេលដើម្បី « ពិចារណាផ្លូវប្រព្រឹត្ត [ របស់យើង ] ចុះ » ។ តើបងប្អូនអាចជួយកុមារឲ្យបង្កើតពេលវេលានៅក្នុងជីវិតរបស់ពួកគេសម្រាប់កិច្ចការរបស់ព្រះដោយរបៀបណា ?

សកម្មភាពដែលអាចធ្វើបាន

សូមអញ្ជើញកុមារឲ្យអាន ហាកាយ ១:២–៥ ដើម្បីរកមើលមូលហេតុ ដែលព្រះអម្ចាស់មិនសប្បាយព្រះទ័យជាមួយនឹងពួកសាសន៍អ៊ីស្រាអែល ។ សូមឲ្យកុមាររើសឃ្លាមួយចេញពី ខទី ៦ ហើយគូររូបភាពមួយអំពីវា ។ សូមឲ្យកុមារក្នុងថ្នាក់ទស្សន៍ទាយថាតើឃ្លាណាដែលគំនូរនីមួយៗតំណាងឲ្យ ។ សូមនិយាយអំពីរបៀបដែលការចំណាយពេលទៅលើការណ៍ទាំងឡាយ ក្រៅពីអ្វីដែលព្រះអម្ចាស់សព្វព្រះទ័យ គឺដូចជាការទទួលទាន ប៉ុន្តែមិនឆ្អែត ការស្លៀកពាក់ប៉ុន្តែមិនកក់ក្ដៅ ជាដើម ។ ហេតុអ្វីបានជាវាសំខាន់ដើម្បីបង្កើតពេលវេលាសម្រាប់កិច្ចការទាំងឡាយដែលសំខាន់ចំពោះព្រះអម្ចាស់ ?
សូមសរសេរ « ពិចារណាផ្លូវប្រព្រឹត្តរបស់ខ្លួនចុះ » នៅលើក្ដារខៀន ( ខទី ៧ ) ។ សូមអញ្ជើញកុមារម្នាក់ៗឲ្យធ្វើបញ្ជីមួយអំពីការណ៍ទាំងឡាយ ដែលគេអាចធ្វើបានក្នុងថ្ងៃធម្មតាមួយ រួមទាំងការណ៍ទាំងឡាយដែលព្រះអម្ចាស់បានសូមឲ្យយើងធ្វើផងដែរ ។ សូមកុមារឲ្យ « ពិចារណាផ្លូវប្រព្រឹត្ត [ របស់ខ្លួន ] ចុះ » ដោយការគូររង្វង់លើអ្វីដែលព្រះអម្ចាស់អាចនឹងមានព្រះបន្ទូលថាជាការណ៍ដែលសំខាន់បំផុតនៅក្នុងបញ្ជីរបស់ពួកគេ ។ តើយើងអាចប្រាកដថា យើងផ្ដល់ពេលវេលាជារៀងរាល់ថ្ងៃសម្រាប់ការណ៍ដែលព្រះអម្ចាស់សព្វព្រះទ័យចង់ឲ្យយើងធ្វើយ៉ាងដូចម្ដេច ?

កុមារីម្នាក់កំពុងទទួលបុណ្យជ្រមុជទឹក — យើងស្លៀកពាក់ពណ៌សនៅឯបុណ្យជ្រមុជទឹករបស់យើង ដើម្បីបង្ហាញថា ព្រះយេស៊ូវគ្រីស្ទអាចធ្វើឲ្យយើងបានស្អាត ពេលដែលយើងប្រែចិត្តពីអំពើបាបរបស់យើង ( សូមមើល សាការី ៣:៣–៤ ) ។

សាការី ៣:១–៧

ការធ្វើ និងការរក្សាសេចក្ដីសញ្ញាអាចជួយខ្ញុំឲ្យកាន់តែក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ ។

នៅក្នុងការនិមិត្តមួយ សាការីបានឃើញសម្ដេចសង្ឃឈ្មោះយេសួរដែល « ស្លៀកពាក់កខ្វក់ » ( សាការី ៣:៣ ) ។ ទេវតាមួយអង្គបានប្រគល់ដល់លោកនូវសម្លៀកបំពាក់ស្អាត ហើយបានពន្យល់ថា នេះជានិមិត្តរូបនៃការបានស្អាតពីអំពើបាបរបស់គាត់ ។ បងប្អូនអាចប្រើទម្រង់នេះ ដើម្បីជួយកុមារឲ្យយល់ពីសេចក្ដីសញ្ញា និងពរជ័យទាំងឡាយដែលទាក់ទងនឹងពិធីបុណ្យជ្រមុជទឹកបាន ។

សកម្មភាពដែលអាចធ្វើបាន

សូមអាន សាការី ៣:១–៧ ហើយពិភាក្សាសំណួរទាំងនេះ ៖ តើការ « ស្លៀកពាក់កខ្វក់ » របស់យេសួរ តំណាងឲ្យអ្វី ? តើយើងក្លាយជាស្អាតពីអំពើបាបរបស់យើងដោយរបៀបណា ? តើសេចក្ដីសញ្ញាបុណ្យជ្រមុជទឹករបស់យើងជួយយើងឲ្យ « ដើរតាមផ្លូវ [ របស់ព្រះអម្ចាស់ ] » ដោយរបៀបណា ?
ពីរបីថ្ងៃពីមុនចាប់ផ្ដើមថ្នាក់ សូមអញ្ជើញកុមារម្នាក់ឲ្យរៀបចំដើម្បីនិយាយអំពីបុណ្យជ្រមុជទឹករបស់គេ ។ សូមរំឭកជាមួយគ្នានូវសេចក្តីសញ្ញាដែលយើងធ្វើនៅបុណ្យជ្រមុជទឹក ( សូមមើល គោលលទ្ធិ និង សេចក្ដីសញ្ញា ២០:៣៧ ) ។ តើការរក្សាការសន្យារបស់យើង ជួយយើងឲ្យកាន់តែក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ? តើការទទួលទានសាក្រាម៉ង់ជារៀងរាល់សប្ដាហ៍ ជួយយើងឲ្យរក្សាសេចក្តីសញ្ញាបុណ្យជ្រមុជទឹករបស់យើងដោយរបៀបណា ?

សាការី ៩:៩–១១; ១១:១២; ១៣:៦–៧

ព្រះយេស៊ូវគ្រីស្ទគឺជាព្រះមែស៊ីដែលត្រូវបានសន្យា ។

តើកុមារអាចរៀនអ្វីខ្លះមកពីការព្យាកររបស់សាការីអំពីព្រះយេស៊ូវគ្រីស្ទ ?

សកម្មភាពដែលអាចធ្វើបាន

សូមបំបែកកុមារជាគូ ។ សូមឲ្យគូនីមួយៗនូវការព្យាករមួយមកពីសាការី ជាមួយនឹងខគម្ពីរក្នុងព្រះគម្ពីរសញ្ញាថ្មី ដែលពិពណ៌នាពីការបំពេញរបស់វា ៖ សាការី ៩:៩ និង ម៉ាថាយ ២១:៥–៩; សាការី ៩:១១ និង ពេត្រុស ទី១ ៣:១៨–១៩; សាការី ១១:១២ និង ម៉ាថាយ ២៦:១៤–១៦; សាការី ១៣:៧ និង ម៉ាថាយ ២៦:៣១ ។ សូមឲ្យក្រុមនីមួយៗចែកចាយដល់កុមារក្នុងថ្នាក់នូវអ្វីដែលពួកគេបានរៀនអំពីព្រះយេស៊ូវគ្រីស្ទ ចេញមកពីខគម្ពីរទាំងឡាយរបស់ពួកគេ និងមូលហេតុដែលពួកគេមានអំណរគុណចំពោះទ្រង់ ។
សូមបង្ហាញ រូបភាព ៥០, ៦០ និង ៦៤ មកពី សៀវភៅរូបភាពដំណឹងល្អ ។ សូមសរសេរបទគម្ពីរយោងដូចតទៅនេះនៅលើក្ដារខៀន ហើយអញ្ជើញកុមារឲ្យផ្គូផ្គងបទគម្ពីរយោងទាំងនេះទៅនឹងរូបភាព សាការី ៩:៩; ១៣:៦; ១៣:៧ ។ សូមអញ្ជើញកុមារឲ្យចែកចាយអារម្មណ៍របស់ពួកគេអំពីព្រះយេស៊ូវគ្រីស្ទ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យសរសេរសេចក្ដីពិតមួយ ដែលពួកគេបានរៀននៅក្នុងថ្នាក់ ។ សូមអញ្ជើញពួកគេឲ្យពិភាក្សាជាមួយក្រុមគ្រួសារពួកគេ អំពីរបៀបដែលពួកគេអាចទទួលទីបន្ទាល់អំពីសេចក្ដីពិតនោះកាន់តែរឹងមាំឡើង ។

ការកែលម្អការបង្រៀនរបស់យើង

ប្រើភាពច្នៃប្រឌិតរបស់បងប្អូន ។ ចូរឲ្យគំនិតនៅក្នុងគម្រោងមេរៀននេះបញ្ឆេះភាពច្នៃប្រឌិតរបស់បងប្អូនផ្ទាល់ ។ សូមគិតអំពីអ្វីដែលកុមារនៅក្នុងថ្នាក់របស់បងប្អូននឹងរីករាយជាមួយ និងអ្វីដែលនឹងជួយពួកគេឲ្យរកឃើញទំនាក់ទំនងរវាងព្រះគម្ពីរ និងជីវិតរបស់ពួកគេ ។

ទំព័រសកម្មភាព ៖ ព្រះយេស៊ូវគ្រីស្ទអាចធ្វើឲ្យវិញ្ញាណរបស់ខ្ញុំស្អាត