« សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់

គោរពជូន គណៈប្រធានអង្គការបឋមសិក្សា និង អ្នកដឹកនាំតន្រី្ត

ចម្រៀងកុមារគឺជាឧបករណ៍ដ៏មានឥទ្ធិពល ដើម្បីជួយកុមារឲ្យរៀនអំពីផែនការនៃសុភមង្គលរបស់ព្រះវរបិតាសួគ៌ និងសេចក្ដីពិតជាមូលដ្ឋាននៃដំណឹងល្អរបស់ព្រះយេស៊ូវគ្រីស្ទ ។ នៅពេលកុមារច្រៀងអំពីគោលការណ៍នៃដំណឹងល្អ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្ដីពិតដ៏ពេញលេញនៃគោលការណ៍ទាំងនោះ ។ ទំនុកច្រៀង និងទំនុកភ្លេងនឹងដក់ជាប់ក្នុងគំនិត និងដួងចិត្តរបស់កុមារពេញមួយជីវិតរបស់ពួកគេ ។

សូមស្វែងរកជំនួយពីព្រះវិញ្ញាណ នៅពេលបងប្អូនរៀបចំបង្រៀនដំណឹងល្អតាមរយៈតន្ត្រី ។ សូមចែកចាយទីបន្ទាល់របស់បងប្អូនអំពីសេចក្ដីពិតដែលបងប្អូនកំពុងច្រៀង ។ សូមជួយកុមារឲ្យមើលឃើញពីរបៀបដែលតន្ត្រីទាក់ទងនឹងអ្វីដែលពួកគេកំពុងរៀន និងកំពុងដកពិសោធន៍នៅឯគេហដ្ឋាន និងក្នុងថ្នាក់អង្គការបឋមសិក្សា ។ កុមារ និងក្រុមគ្រួសាររបស់ពួកគេនឹងមានពរតាមរយៈការខិតខំប្រឹងប្រែងរបស់បងប្អូន ។

យើងស្រឡាញ់បងប្អូន ហើយសូមសម្ដែងការដឹងគុណរបស់យើងចំពោះការបម្រើដ៏មានការលះបង់ខ្ពស់ដែលបងប្អូនកំពុងបម្រើ ដើម្បីពង្រឹង ហើយការពារកុមារដ៏មានតម្លៃរបស់យើង ។

គណៈប្រធានអង្គការបឋមសិក្សាទូទៅ

សេចក្តីណែនាំសម្រាប់ម៉ោងច្រៀងចម្រៀង

៥ នាទី ( គណៈប្រធានអង្គការបឋមសិក្សា ) ៖ ការអធិស្ឋានបើក បទគម្ពីរ ឬមាត្រានៃសេចក្ដីជំនឿ និងការឡើងនិយាយរបស់កុមារម្នាក់

២០ នាទី ( អ្នកដឹកនាំតន្ត្រី ) ៖ ម៉ោងច្រៀងចម្រៀង

គណៈប្រធានអង្គការបឋមសិក្សា និងអ្នកដឹកនាំតន្ត្រីជ្រើសរើសចម្រៀងសម្រាប់ខែនីមួយៗដើម្បីពង្រឹងគោលការណ៍ដែលកុមារកំពុងរៀននៅក្នុងថ្នាក់ និងនៅឯគេហដ្ឋានរបស់ពួកគេ ។ បញ្ជីចម្រៀងមួយដែលពង្រឹងដល់គោលការណ៍ទាំងនេះមានដាក់បញ្ចូលនៅក្នុងសេចក្ដីណែនាំនេះ ។ ចម្រៀងទាំងនេះក៏មានណែនាំនៅក្នុងសៀវភៅចូរមកតាមខ្ញុំ—សម្រាប់អង្គការបឋមសិក្សានិង ចូរមកតាមខ្ញុំ—សម្រាប់បុគ្គល និងក្រុមគ្រួសារ ផងដែរ ។

នៅពេលបងប្អូនបង្រៀនបទចម្រៀងនីមួយៗទៅកុមារ សូមអញ្ជើញពួកគេឲ្យចែកចាយអ្វីដែលពួកគេបានរៀនរួចហើយអំពីដំណើររឿង និងគោលការណ៍ខាងគោលលទ្ធិនោះនៅក្នុងបទចម្រៀងនីមួយៗ ។ បងប្អូនអាចរំឭកក្នុងគម្រោងមេរៀននៃសៀវភៅ ចូរមកតាមខ្ញុំ—សម្រាប់អង្គការបឋមសិក្សា ដែលកុមារកំពុងរៀននៅក្នុងថ្នាក់របស់ពួកគេ ។ ការធ្វើបែបនេះនឹងជួយឲ្យបងប្អូនបានដឹងអំពីរឿង និងគោលការណ៍ទាំងឡាយដែលពួកគេកំពុងរៀន ដើម្បីបងប្អូនអាចពិចារណាពីរបៀបជួយដល់ការរៀនសូត្ររបស់ពួកគេដោយប្រើប្រាស់តន្រ្តី ។

នៅអំឡុងម៉ោងច្រៀងចម្រៀង បងប្អូនក៏អាចរំឭកបទចម្រៀងដែលកុមារបានរៀនពីមុនៗមក និងបទចម្រៀងដែលកុមារចូលចិត្តច្រៀង ។ នៅពេលបងប្អូនរំឭកបទចម្រៀងទាំងនោះ សូមឲ្យកុមារចែកចាយគំនិត និងអារម្មណ៍របស់ពួកគេអំពីសេចក្តីពិតដែលមាននៅក្នុងបទចម្រៀងទាំងនោះ ។

សៀវភៅចម្រៀងកុមារ គឺជាធនធានមូលដ្ឋានសម្រាប់តន្រ្តីនៅក្នុងអង្គការបឋមសិក្សា ។ ទំនុកតម្កើងនៅក្នុង សៀវភៅទំនុកតម្កើង និងចម្រៀងនៅក្នុងទស្សនាវដ្តី ប្រិយមិត្ត ឬទស្សនាវដ្តី លីអាហូណា ក៏អាចប្រើប្រាស់បានផងដែរ ។ ជួនកាល កុមារអាចច្រៀងចម្រៀងជាតិ ឬ ចម្រៀងថ្ងៃបុណ្យ ដែលសមរម្យសម្រាប់ថ្ងៃអាទិត្យ និងសម្រាប់អាយុរបស់កុមារ ។ ការប្រើចម្រៀងផ្សេងទៀតនៅក្នុងអង្គការបឋមសិក្សាត្រូវតែមានអនុមតិពីគណៈប៊ីស្សព ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១២.៣.៤ គេហទំព័រ ChurchofJesusChrist.org ) ។

ទិដ្ឋភាពទូទៅនៃអង្គការបឋមសិក្សា

រាល់សប្តាហ៍ កុមាររៀន ៖

ម៉ោងច្រៀងចម្រៀង ៖២៥ នាទី

ការប្ដូរទីកន្លែង ៖៥ នាទី

ម៉ោងបង្រៀន ៖២០ នាទី

ថ្នាក់ដឹកនាំរបស់អង្គការបឋមសិក្សាដែលមានចំនួនកុមារច្រើន អាចបំបែកកុមារជាពីរក្រុម ហើយឲ្យក្រុមមួយនៅក្នុងថ្នាក់រៀនអង្គការបឋមសិក្សា ខណៈដែលក្រុមមួយទៀតនៅក្នុងម៉ោងច្រៀង ។ បន្ទាប់មកក្រុមទាំងពីរប្តូរទីកន្លែងគ្នា ។ នៅក្នុងករណីបែបនេះ ថ្នាក់ដឹកនាំអង្គការបឋមសិក្សាអាចត្រូវកែសម្រួលម៉ោងដែលបានបង្ហាញខាងលើ ដើម្បីឲ្យត្រូវតាមកាលៈទេសៈរបស់ពួកគាត់ ។

តន្ត្រីសម្រាប់ម៉ោងច្រៀងចម្រៀង

ខែ មករា

« ខ្ញុំជាកូនរបស់ព្រះ » សៀវភៅចម្រៀងកុមារ ទំព័រ ២–៣
« ខ្ញុំដឹងព្រះបិតារស់ » សៀវភៅចម្រៀងកុមារ ទំព័រ ៨
« ពេលទ្រង់យាងមកម្តងទៀត » សៀវភៅចម្រៀងកុមារ ទំព័រ ៤៦

ខែ កុម្ភៈ

« ធ្វើតាមព្យាការី » សៀវភៅចម្រៀងកុមារទំព័រ ៥៨–៥៩
« ទ្រង់បញ្ជូនបុត្រាទ្រង់មក » សៀវភៅចម្រៀងកុមារទំព័រ ២០–២១
« ជ្រើសផ្លូវត្រូវ » ទំនុកតម្កើង ល.រ. ១៤៨

ខែ មីនា

« ចូរអ្នកស្រឡាញ់គ្នា » សៀវភៅចម្រៀងកុមារ ទំព័រ ៧៤
« បិតាសូមជួយកូន » សៀវភៅចម្រៀងកុមារ ទំព័រ ៥២
« អូរតូចនិយាយថា ‹ ឲ្យ › » សៀវភៅចម្រៀងកុមារ ទំព័រ ១១៦

ខែ មេសា

« ព្រះនៃអ៊ីស្រាអែល » ទំនុកតម្កើង ល.រ. ៦
« តើព្រះយេស៊ូវរស់ឡើងវិញឬ ? » សៀវភៅចម្រៀងកុមារ ទំព័រ ៤៥
« រក្សាបទបញ្ញត្តិ » សៀវភៅចម្រៀងកុមារ ទំព័រ ៦៨–៦៩

ខែ ឧសភា

« ខ្ញុំដើរតាមព្រះយេស៊ូវ » ( music.ChurchofJesusChrist.org )
« ស្វែងរក គិត និងអធិស្ឋាន » សៀវភៅចម្រៀងកុមារ ទំព័រ ៦៦
« ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩

ខែ មិថុនា

« ខ្ញុំនឹងធ្វើជាអ្នកក្លាហាន » សៀវភៅចម្រៀងកុមារ ទំព័រ ៨៥
« ការអធិស្ឋានរបស់កុមារ » សៀវភៅចម្រៀងកុមារ ទំព័រ ៦–៧
« ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០–៤១

ខែ កក្កដា

« ព្រះវិញ្ញាណបរិសុទ្ធ » សៀវភៅចម្រៀងកុមារ ទំព័រ ៥៦
« ខ្ញុំដឹងព្រះបិតារស់ » សៀវភៅចម្រៀងកុមារ ទំព័រ ៨
« ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩

ខែ សីហា

« ព្រះប្រោសលោះខ្ញុំនៅរស់ » ទំនុកតម្កើង ល.រ. ៧៧
« ខ្ញុំស្គាល់ក្តីស្នេហ៍ព្រះសង្រ្គោះ » សៀវភៅចម្រៀងកុមារ ទំព័រ ៤២–៤៣
« ប្រាប់ខ្ញុំឲ្យដើរក្នុងពន្លឺ » សៀវភៅចម្រៀងកុមារ ទំព័រ ៧០

ខែ កញ្ញា

« ចិត្តល្អចាប់ផ្តើមនឹងខ្ញុំ » សៀវភៅចម្រៀងកុមារ ទំព័រ ៨៣
« រក្សាបទបញ្ញត្តិ » សៀវភៅចម្រៀងកុមារ ទំព័រ ៦៨–៦៩
« ខ្ញុំដើរតាមព្រះយេស៊ូវ » ( music.ChurchofJesusChrist.org )

ខែ តុលា

« ខ្ញុំស្គាល់ក្តីស្នេហ៍ព្រះសង្រ្គោះ » សៀវភៅចម្រៀងកុមារ ទំព័រ ៤២–៤៣
« ខ្ញុំសង្ឃឹមគេហៅខ្ញុំទៅបម្រើ » សៀវភៅចម្រៀងកុមារ ទំព័រ ៩១
« ក្រុមគ្រួសារអាចនៅជាមួយគ្នាជានិរន្តរ » សៀវភៅចម្រៀងកុមារ ទំព័រ ៩៨

ខែ វិច្ឆិកា

« ធ្វើតាមព្យាការី » សៀវភៅចម្រៀងកុមារ ទំព័រ ៥៨–៥៩ ( វគ្គទី ៧ )
« យើងអរគុណទ្រង់ចំពោះព្យាការី » ទំនុកតម្កើង ល.រ. ១០
« ខ្ញុំចង់រស់នៅតាមដំណឹងល្អ » សៀវភៅចម្រៀងកុមារ ទំព័រ ៧២

ខែ ធ្នូ

« ពេលទ្រង់យាងមកម្តងទៀត » សៀវភៅចម្រៀងកុមារ ទំព័រ ៤៦
« ស្វែងរកព្រះអម្ចាស់ពីក្មេង » សៀវភៅចម្រៀងកុមារ ទំព័រ ៦៧
« ផ្ទុំនៅក្នុងស្នូកទីឆ្ងាយ » សៀវភៅចម្រៀងកុមារ ទំព័រ ២៦–២៧

ការប្រើប្រាស់តន្រ្តីដើម្បីបង្រៀនកុមារ

ម៉ោងច្រៀងចម្រៀងមានគោលបំណងដើម្បីជួយកុមារឲ្យទទួលអារម្មណ៍នូវព្រះចេស្ដានៃព្រះវិញ្ញាណបរិសុទ្ធ នៅពេលពួកគេរៀនអំពីសេចក្ដីពិតនៃដំណឹងល្អ ។ គំនិតខាងក្រោមអាចបំផុសគំនិតបងប្អូន នៅពេលបងប្អូនដាក់ផែនការពីរបៀបបង្រៀនគោលការណ៍ដំណឹងល្អដែលមាននៅក្នុងទំនុកតម្កើង និងចម្រៀងថ្នាក់អង្គការបឋមសិក្សា ។

អានខគម្ពីរដែលទាក់ទងគ្នា ។ ចម្រៀង និងទំនុកតម្កើងជាច្រើននៅក្នុង សៀវភៅចម្រៀងកុមារ និង ទំនុកតម្កើង មានសេចក្តីយោងដែលមានទាក់ទងនឹងបទគម្ពីរ ។ សូមជួយកុមារអានវគ្គបទគម្ពីរមួយចំនួននេះ ហើយពិភាក្សាពីរបៀបដែលបទគម្ពីរទាំងនេះទាក់ទងនឹងបទចម្រៀងនេះ ។ បងប្អូនក៏អាចសរសេរសេចក្តីយោងបទគម្ពីរពីរបីនៅលើក្តារខៀន ហើយអញ្ជើញកុមារឲ្យផ្គូផ្គងសេចក្តីយោងនីមួយៗទៅនឹងបទចម្រៀង ឬវគ្គណាមួយនៅក្នុងបទចម្រៀងផងដែរ ។

បំពេញចន្លោះ ។ សូមសរសេរវគ្គមួយនៃបទចម្រៀងនៅលើក្តារខៀនដោយលុបពាក្យគន្លឹះមួយចំនួនចេញ ។ បន្ទាប់មក សូមឲ្យកុមារច្រៀងចម្រៀងនេះ ដោយផ្ទៀងស្តាប់រកពាក្យដើម្បីបំពេញនៅក្នុងចន្លោះ ។ នៅពេលពួកគេបំពេញចន្លោះនីមួយៗ សូមពិភាក្សាពីគោលការណ៍ដំណឹងល្អដែលពួកគេរៀននៅក្នុងពាក្យដែលបាត់នេះ ។

ប្រើពាក្យដកស្រង់មកពីថ្នាក់ដឹកនាំសាសនាចក្រ ។ សូមអញ្ជើញកុមារឲ្យស្តាប់ពាក្យដកស្រង់មកពីថ្នាក់ដឹកនាំរបស់សាសនាចក្រដែលបង្រៀនពីគោលការណ៍ដំណឹងល្អដូចគ្នានៅក្នុងបទចម្រៀងអង្គការបឋមសិក្សា ។ សូមឲ្យពួកគេលើកដៃឡើង នៅពេលពួកគេបានឮអ្វីមួយដែលជួយពួកគេឲ្យយល់ពីសេចក្តីពិតដែលពួកគេកំពុងច្រៀង ។ សូមពួកគេឲ្យចែកចាយអ្វីដែលពួកគេបានឮ ។

ថ្លែងទីបន្ទាល់ ។ សូមថ្លែងទីបន្ទាល់ខ្លីៗដល់កុមារពីសេចក្តីពិតនៃដំណឹងល្អ ដែលមាននៅក្នុងចម្រៀងអង្គការបឋមសិក្សា ។ សូមជួយកុមារឲ្យយល់ថា ការច្រៀងចម្រៀងគឺជាវិធីមួយដែលពួកគេអាចថ្លែងទីបន្ទាល់ និងទទួលនូវអារម្មណ៍នៃព្រះវិញ្ញាណ ។

ឈរជាសាក្សី ។ សូមឲ្យកុមារផ្លាស់ប្តូរវេនគ្នាក្រោកឈរ ហើយចែកចាយអ្វីដែលពួកគេរៀនចេញពីចម្រៀងដែលពួកគេកំពុងច្រៀង ឬអារម្មណ៍របស់ពួកគេអំពីសេចក្តីពិតដែលបានបង្រៀននៅក្នុងបទចម្រៀងនេះ ។ សូមសួរពួកគេថាតើពួកគេមានអារម្មណ៍យ៉ាងណា នៅពេលពួកគេច្រៀងចម្រៀងនេះ ហើយជួយពួកគេឲ្យស្គាល់ឥទ្ធិពលនៃព្រះវិញ្ញាណបរិសុទ្ធ ។

ប្រើប្រាស់រូបភាព ។ សូមឲ្យកុមារជួយបងប្អូនស្វែងរក ឬបង្កើតរូបភាពដែលត្រូវនឹងពាក្យ ឬឃ្លាសំខាន់ៗនៅក្នុងបទចម្រៀងនេះ ។ សូមអញ្ជើញពួកគេឲ្យចែកចាយនូវរបៀបដែលរូបភាពនេះទាក់ទងនឹងបទចម្រៀងនេះ ហើយថាតើបទចម្រៀងនេះបង្រៀនអ្វីខ្លះ ។ ឧទាហរណ៍ ប្រសិនបើបងប្អូនកំពុងបង្រៀនបទ « ពេលទ្រង់យាងមកម្តងទៀត » ( សៀវភៅចម្រៀងកុមារ ទំព័រ ៤៦ ) បងប្អូនអាចបង្ហាញរូបភាពដែលពិពណ៌នាអំពីពាក្យសំខាន់ៗចេញពីបទចម្រៀងនោះឲ្យក្នុងបន្ទប់ ( ដូចជា ទេវតា ហិមៈ និង ផ្កាយ ) ។ សូមឲ្យកុមារប្រមូលរូបភាពទាំងនេះ ហើយកាន់រូបភាពតាមលំដាប់លំដោយ នៅពេលបងប្អូនច្រៀងចម្រៀងនេះជាមួយគ្នា ។

ចែកចាយមេរៀនដោយប្រើវត្ថុ ។ បងប្អូនអាចប្រើវត្ថុដើម្បីបំផុសឲ្យមានការពិភាក្សាអំពីបទចម្រៀងនេះ ។ ឧទារហណ៍ចម្រៀងបទ « ស្វែងរកព្រះអម្ចាស់ពីក្មេង » ( សៀវភៅចម្រៀងកុមារ ទំព័រ ៦៧ ) ដែលនិយាយអំពីការស្វែងរកព្រះអម្ចាស់ ។ បងប្អូនអាចលាក់រូបភាពរបស់ព្រះអង្គសង្រ្គោះនៅក្នុងបន្ទប់ ហើយសូមឲ្យកុមារទៅរករូបភាពនោះ ។ បន្ទាប់ពីកុមាររកឃើញរូបភាពនោះហើយ សូមពិភាក្សាអំពីអ្វីៗដែលពួកគេធ្វើដែលធ្វើឲ្យរកឃើញរូបភាពនោះ ។ ការធ្វើបែបនេះអាចនាំឲ្យមានការពិភាក្សាអំពីអ្វីៗដែលបានលើកឡើងនៅក្នុងបទចម្រៀងនេះ ដែលយើងអាចធ្វើដើម្បីស្វែងរកព្រះអម្ចាស់ ។

អញ្ជើញឲ្យចែកចាយបទពិសោធន៍ផ្ទាល់ខ្លួន ។ សូមជួយកុមារឲ្យភ្ជាប់ទំនាក់ទំនងគោលការណ៍ដែលបានបង្រៀននៅក្នុងបទចម្រៀងនេះជាមួយនឹងបទពិសោធន៍ដែលពួកគេធ្លាប់មានជាមួយនឹងគោលការណ៍ទាំងនោះ ។ ឧទាហរណ៍ មុនពេលច្រៀងបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) បងប្អូនអាចសូមឲ្យកុមារលើកដៃរបស់ពួកគេឡើង ប្រសិនបើពួកគេធ្លាប់បានឃើញព្រះវិហារបរិសុទ្ធ ។ នៅពេលពួកគេច្រៀង សូមអញ្ជើញពួកគេឲ្យគិតអំពីអារម្មណ៍ដែលពួកគេមាន នៅពេលពួកគេឃើញព្រះវិហារបរិសុទ្ធ ។

សួរសំណួរ ។ មានសំណួរជាច្រើនដែលបងប្អូនអាចសួរនៅពេលបងប្អូនច្រៀងចម្រៀង ។ ឧទាហរណ៍ បងប្អូនអាចសួរកុមារថា តើពួកគេរៀនបានអ្វីខ្លះពីវគ្គនីមួយៗនៅក្នុងចម្រៀងនេះ ។ បងប្អូនក៏អាចសូមឲ្យពួកគេគិតអំពីសំណួរដែលចម្រៀងនោះឆ្លើយប្រាប់ផងដែរ ។ ការណ៍នេះអាចដឹកនាំទៅរកការពិភាក្សាមួយអំពីសេចក្ដីពិតដែលបានបង្រៀននៅក្នុងចម្រៀងនោះ ។

ស្ដាប់រកចម្លើយ ។ សូមឲ្យកុមាររកមើលចម្លើយចំពោះសំណួរនេះ ។ ឧទារហណ៍ បទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០ ) មាននូវសំណួរ និងចម្លើយទាំងឡាយ ។ បងប្អូនអាចសួរកុមារនូវសំណួរទាំងនេះ ហើយឲ្យពួកគេស្តាប់រកចម្លើយនៅពេលដែលពួកគេច្រៀង ។

ការជួយកុមារឲ្យរៀន និងចងចាំបទចម្រៀងកុមារ និងទំនុកតម្កើង

កុមាររៀនច្រៀងចម្រៀងមួយបានតាមរយៈការស្តាប់ និងការច្រៀងម្តងហើយម្តងទៀត ។ សូមច្រៀងពាក្យនៃចម្រៀងថ្មីមួយឲ្យកុមារស្ដាប់ជានិច្ច—សូមកុំគ្រាន់តែអាន ឬ សូត្រពាក្យទាំងនោះ ។ ការធ្វើបែបនេះជួយកុមារឲ្យភ្ជាប់ទំនុកភ្លេងទៅនឹងពាក្យទាំងនោះ ។ បន្ទាប់ពីបានបង្រៀនបទចម្រៀងមួយរួចហើយ សូមរំឭកបទចម្រៀងនេះឡើងវិញតាមរបៀបសប្បាយៗ ពេញមួយឆ្នាំ ។ ខាងក្រោមនេះគឺជាគំនិតមួយចំនួនដើម្បីជួយកុមារឲ្យរៀន ហើយរំឭកចម្រៀងនានា ។

ធ្វើប័ណ្ណប្រកាស ។ សូមបង្ហាញប័ណ្ណប្រកាសដែលមានពាក្យចេញមកពីវគ្គនីមួយៗ ឬ រូបភាពដែលតំណាងឲ្យពាក្យទាំងនោះ ។ នៅពេលកុមារច្រៀង សូមបាំងពាក្យមួយចំនួន ឬ រូបភាពរហូតដល់ពួកគេអាចច្រៀងវគ្គទាំងមូលដោយគ្មានប័ណ្ណប្រកាសនោះ ។ បងប្អូនក៏អាចអញ្ជើញឲ្យកុមារជួយបងប្អូនធ្វើប័ណ្ណប្រកាសនោះផងដែរ ។

បង្ហាញចង្វាក់ភ្លេង ។ ដើម្បីជួយកុមារឲ្យរៀនទំនុកភ្លេងនៃបទចម្រៀងមួយ សូមលើកដៃរបស់បងប្អូនឡើងជាទម្រង់ផ្តេក ហើយខណៈដែលបងប្អូនច្រៀងពាក្យទាំងនោះ សូមធ្វើចលនាដៃរបស់បងប្អូនឡើងដើម្បីបង្ហាញពីចង្វាក់ខ្ពស់ ហើយចុះក្រោមដើម្បីបង្ហាញពីចង្វាក់ទាប ។

សូររំពង ។ សូមឲ្យកុមារធ្វើជាសូររំពងរបស់បងប្អូនដោយថាតាមអ្វីដែលបងប្អូនកំពុងច្រៀង ។ សូមច្រៀងឃ្លា ឬ វគ្គខ្លីមួយឲ្យកុមារស្ដាប់ រួចហើយសូមឲ្យពួកគេច្រៀងឲ្យបងប្អូនស្ដាប់វិញ ។

ប្រើវិធីផ្សេងៗគ្នា ។ សូមច្រៀងចម្រៀងតាមរបៀបខុសៗគ្នា ដូចជាការខ្សឹបប្រាប់ ការគ្រហឹម ការទះដៃតាមចង្វាក់ភ្លេង ការប្តូរល្បឿន ឬ ការច្រៀងចម្រៀងកាលកំពុងអង្គុយ ឬ ឈរ ។ បងប្អូនក៏អាចបត់ក្រដាសធ្វើជារាងគូប ហើយនៅលើជ្រុងនីមួយៗនៃគូបនោះ សូមសរសេរវិធីផ្សេងគ្នាដើម្បីច្រៀង ។ សូមឲ្យកុមារម្នាក់បង្វិលគូបនោះដើម្បីសម្រេចថាកុមារនឹងច្រៀងចម្រៀងនោះតាមរបៀបណា ។

ច្រៀងជាក្រុម ។ សូមឲ្យសិស្សក្នុងថ្នាក់ ឬ កុមារម្នាក់ៗមានឃ្លាមួយដើម្បីច្រៀងខណៈដែលកំពុងឈរ រួចហើយសូមឲ្យពួកគេប្ដូរឃ្លាគ្នារហូតដល់សិស្សក្នុងថ្នាក់ ឬ កុមារម្នាក់ៗបានច្រៀងឃ្លានីមួយៗ ។

ប្រើកាយវិការដៃ ។ សូមឲ្យកុមារគិតពីកាយវិការដៃងាយៗដើម្បីជួយពួកគេចងចាំពាក្យ និងសារលិខិតនៃបទចម្រៀង ។ ឧទាហរណ៍ នៅពេលបងប្អូនច្រៀង « ដោយគោរព ដោយស្ងៀមស្ងាត់ » ( សៀវភៅចម្រៀងកុមារ ទំព័រ ១១ ) បងប្អូនអាចអញ្ជើញកុមារឲ្យឱបដៃរបស់ពួកគេ ឱនក្បាលរបស់ពួកគេ ហើយប៉ះបេះដូងរបស់ពួកគេ នៅពេលពួកគេច្រៀងឃ្លាទាក់ទងនឹងបទចម្រៀងនេះ ។

កុមារីច្រៀង កុមារាច្រៀង ។ សូមគូររូបរបស់កុមារា និងកុមារី ហើយសូមបិទរូបនោះជាមួយកាវ ឬស្កត់លើឈើពីរផ្សេងគ្នា ។ ពេលដែលរំឭកបទចម្រៀងនេះ សូមលើករូបភាពនេះឡើង ដើម្បីបង្ហាញថាតើនរណាត្រូវច្រៀងផ្នែកណា ។

បោះកន្រ្តក ។ សូមដាក់កន្រ្តក ឬប្រអប់ផ្សេងៗនៅពីមុខថ្នាក់—សូមដាក់ប្រអប់ឲ្យច្រើនស្មើនឹងចំនួនវគ្គនៃបទចម្រៀងណាមួយ ។ សូមអញ្ជើញកុមារម្នាក់ឲ្យបោះថង់សណ្តែក ឬក្រដាសដែលបានឆ្មូលទៅជិតនឹងប្រអប់ដែលមានដាក់លេខរៀង ។ សូមឲ្យកុមារច្រៀងឃ្លានៃបទចម្រៀងដូចមាននៅលើប្រអប់នេះ ។

ផ្គូផ្គងរូបភាពទៅនឹងឃ្លាបទចម្រៀង ។ សូមសរសេរឃ្លានីមួយៗនៃបទចម្រៀងនៅលើក្រដាសផ្សេងៗគ្នា ហើយស្វែងរករូបភាពដែលតំណាងឲ្យឃ្លានៃបទចម្រៀងនីមួយៗ ។ សូមបិទរូបភាពនៅលើជញ្ជាំងម្ខាងនៃបន្ទប់ ហើយបិទក្រដាសនៅជញ្ជាំងម្ខាងទៀត ។ សូមច្រៀងចម្រៀងនោះ ហើយឲ្យកុមារផ្គូផ្គងរូបភាពជាមួយនឹងពាក្យ ។

សេចក្តីណែនាំអំពីបទបង្ហាញនៅក្នុងការប្រជុំសាក្រាម៉ង់

ក្រោមការដឹកនាំរបស់ប៊ីស្សព នោះបទបង្ហាញរបស់កុមារនៅម៉ោងប្រជុំសាក្រាម៉ង់ គឺជាធម្មតាធ្វើនៅត្រីមាសទីបួននៅក្នុងឆ្នាំនីមួយៗ ។ ក្នុងនាមជាគណៈប្រធានអង្គការបឋមសិក្សា និងអ្នកដឹកនាំតន្រ្តី សូមរៀបចំជួបគ្នាជាមួយទីប្រឹក្សានៅក្នុងគណៈប៊ីស្សព ដែលមើលការខុសត្រូវលើអង្គការបឋមសិក្សានៅដើមឆ្នាំ ដើម្បីចាប់ផ្តើមពិភាក្សាពីផែនការក្នុងការធ្វើបទបង្ហាញនេះ ។ នៅពេលបងប្អូនបានបញ្ចប់ផែនការនេះ សូមទទួលការអនុមតិពីពួកគាត់ ។

បទបង្ហាញនេះគួរអនុញ្ញាតឲ្យកុមារបង្ហាញអ្វីដែលពួកគេ និងក្រុមគ្រួសាររបស់ពួកគេបានរៀនចេញពីព្រះគម្ពីរសញ្ញាចាស់នៅឯផ្ទះ និងនៅក្នុងអង្គការបឋមសិក្សា រួមទាំងបទចម្រៀងអង្គការបឋមសិក្សា ដែលពួកគេបានច្រៀងនៅក្នុងឆ្នាំនេះផងដែរ ។ សូមពិចារណាប្រកបដោយការអធិស្ឋាននូវគោលការណ៍ និងបទចម្រៀងអ្វីដែលជួយឲ្យពួកគេរៀន ។ ចូរធ្វើការកត់ចំណាំសុន្ទរកថា និងបទពិសោធន៍ផ្ទាល់ខ្លួនរបស់កុមារពេញមួយឆ្នាំ ដើម្បីអាចយកមកប្រើនៅក្នុងបទបង្ហាញនេះ ។ សូមអញ្ជើញកុមារឲ្យចែកចាយបទគម្ពីរ ដំណើររឿង និងទីបន្ទាល់របស់ពួកគេនៅក្នុងបទបង្ហាញ ។ នៅពេលបងប្អូនរៀបផែនការធ្វើបទបង្ហាញនេះ សូមគិតពីវិធីជាច្រើនដែលវាអាចជួយក្រុមជំនុំឲ្យផ្តោតយកចិត្តទុកដាក់ទៅលើព្រះវរបិតាសួគ៌ ព្រមទាំងព្រះអង្គសង្រ្គោះ និងការបង្រៀនទាំងឡាយរបស់ទ្រង់ទាំងពីរអង្គ ។

អង្គភាពដែលមានកុមារតិច អាចពិចារណានូវវិធីនានា ដែលសមាជិកក្រុមគ្រួសារអាចចូលរួមជាមួយនឹងកូនៗរបស់ពួកគាត់ ។ សមាជិកម្នាក់នៅក្នុងគណៈប៊ីស្សពអាចបញ្ចប់ការប្រជុំនេះដោយការថ្លែងទីបន្ទាល់សង្ខេបៗ ។

នៅពេលបងប្អូនរៀបចំបទបង្ហាញ សូមចងចាំគោលការណ៍ណែនាំដូចខាងក្រោម ៖

ការហាត់សមមិនគួរយកពេលមិនចាំបាច់ពីថ្នាក់អង្គការបឋមសិក្សា ឬក្រុមគ្រួសារឡើយ ។
បទបង្ហាញជារូបភាព សំលៀកបំពាក់ និងប្រព័ន្ធផ្សព្វផ្សាយផ្សេងៗគឺមិនសមរម្យចំពោះការប្រជុំសាក្រាម៉ង់នោះទេ ។

សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១២.២.១.២, ChurchofJesusChrist.org ។