« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ ៖ ‹ យើងបានរង់ចាំទ្រង់ ហើយទ្រង់នឹងជួយសង្គ្រោះយើង ›» ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

ដ្បិតមានបុត្រ ១ កើតដល់យើង ដោយ ស៊ីម៉ូន ឌូវី

ថ្ងៃទី ១៩–២៥ ខែ ធ្នូ

បុណ្យគ្រីស្ទម៉ាស់

« យើងបានរង់ចាំទ្រង់ ហើយទ្រង់នឹងជួយសង្គ្រោះយើង »

ពួកព្យាការីនៃព្រះគម្ពីរសញ្ញាចាស់បានទន្ទឹងរង់ចាំដោយក្ដីអំណរយ៉ាងក្រៃលែងដល់ការប្រសូតរបស់ព្រះមែស៊ី ( សូមមើល អេសាយ ២៥:៩ ) ។ នៅពេលបងប្អូនបង្រៀនអំឡុងរដូវបុណ្យគ្រីស្ទម៉ាស់ សូមពិចារណាអំពីរបៀបដែលបងប្អូនអាចជួយកុមារឲ្យរកឃើញអំណរនៅក្នុងការប្រសូតរបស់ព្រះអង្គសង្គ្រោះ ព្រះយេស៊ូវគ្រីស្ទ ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមអញ្ជើញកុមារឲ្យចែកចាយអ្វីដែលពួកគេដឹងអំពីការប្រសូតរបស់ព្រះយេស៊ូវគ្រីស្ទ ។ កាលដែលពួកគេលើកឡើងអំពីបុគ្គលម្នាក់ ឬ វត្ថុមួយចេញពីដំណើររឿងនេះ សូមអញ្ជើញពួកគេឲ្យគូរវានៅលើក្ដារខៀន ។ សូមសួរកុមារថា តើពួកគេចូលចិត្តអ្វីខ្លះអំពីដំណើររឿងនេះ ។

បង្រៀនគោលលទ្ធិ ៖ កុមារតូចៗ

ព្រះគម្ពីរសញ្ញាចាស់បង្រៀនខ្ញុំអំពីព្រះយេស៊ូវ ។

សូមជួយកុមារឲ្យផ្ដោតលើព្រះអង្គសង្គ្រោះ ព្រះយេស៊ូវគ្រីស្ទ ជាមូលហេតុដែលយើងប្រារព្ធពិធីបុណ្យគ្រីស្ទម៉ាស់ ។ បងប្អូនអាចធ្វើដូចនេះ ដោយការប្រើបទគម្ពីរទាំងឡាយចេញមកពីព្រះគម្ពីរសញ្ញាចាស់ ដែលថ្លែងទីបន្ទាល់ពីទ្រង់ ។

សកម្មភាពដែលអាចធ្វើបាន

សូមបង្ហាញរូបភាពការប្រសូត ( ដូចជា សៀវភៅរូបភាពដំណឹងល្អ ល.រ. ៣០ ឬរូបភាពមួយនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និង ក្រុមគ្រួសារ ) ។ សូមអាន អេសាយ ៩:៦ ដោយផ្ដល់វេនឲ្យកុមារម្នាក់ៗចង្អុលទៅព្រះឱរសយេស៊ូវ នៅពេលពួកគេស្ដាប់ឮឃ្លា « មានបុត្រ១កើត » ។ សូមចែកចាយទីបន្ទាល់របស់បងប្អូនថា ពួកព្យាការីនៅក្នុងព្រះគម្ពីរសញ្ញាចាស់បានដឹងថា ព្រះយេស៊ូវនឹងប្រសូតមក ។
សូមអញ្ជើញកុមារម្នាក់ឲ្យនិយាយឈ្មោះរបស់គេ ហើយប្រាប់ថា បន្ថែមលើឈ្មោះរបស់យើង យើងអាចត្រូវបានហៅដោយងារផ្សេងៗទៀត ដូចជា បងប្អូនប្រុសស្រី ឬមិត្តភក្ដិ ។ សូមអញ្ជើញកុមារឲ្យគិតពីឧទាហរណ៍ផ្សេងៗទៀត ។ សូមអាន អេសាយ ៩:៦ ទៅកុមារ ដោយសង្កត់ធ្ងន់ពីព្រះនាមដែលសំដៅលើព្រះយេស៊ូវគ្រីស្ទ ៖ « ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវរបិតាដ៏គង់នៅអស់កល្ប និងជាម្ចាស់នៃមេត្រីភាព » ។ សូមជួយកុមារឲ្យយល់ថា តើព្រះនាមទាំងនេះប្រាប់យើងអ្វីខ្លះអំពីព្រះយេស៊ូវ ។
សូមឲ្យផ្កាយក្រដាសទៅកុមារម្នាក់ៗ ហើយអញ្ជើញកុមារឲ្យលើកផ្កាយរបស់ពួកគេឡើង នៅពេលបងប្អូនអានឃ្លាដូចតទៅនេះចេញមកពី ជនគណនា ២៤:១៧ ៖ « នឹងមានផ្កាយ១ចេញពីពួកយ៉ាកុបមក » ។ សូមអញ្ជើញកុមារឲ្យចែកចាយពីរបៀបដែលព្រះយេស៊ូវដូចជាផ្កាយដ៏ភ្លឺដែលបញ្ចេញពន្លឺទៅកាន់ពិភពលោកទាំងមូល ។ សូមច្រៀងចម្រៀងមួយបទរួមគ្នាអំពីផ្កាយដែលរះឡើង នៅពេលព្រះយេស៊ូវបានប្រសូតមក ដូចជាបទ « ផ្កាយចាំងពន្លឺ » ( សៀវភៅចម្រៀងកុមារ ទំព័រ ២៤ ) ឬ « ណូអែលដំបូង » ( ទំនុកតម្កើង ល.រ. ១៣០ ) ។

ព្រះយេស៊ូវគ្រីស្ទគឺជាព្រះអង្គសង្រ្គោះរបស់ខ្ញុំ ។

បុណ្យគ្រីស្ទម៉ាស់ជាពេលមួយដែលយើងមិនត្រឹមតែប្រារព្ធអបអរដល់ការប្រសូតរបស់ព្រះយេស៊ូវគ្រីស្ទប៉ុណ្ណោះទេ ប៉ុន្តែថែមទាំងអបអរដល់ព្រះជន្ម និងបេសកកម្មរបស់ទ្រង់ផងដែរ ក្នុងព្រះនាមជាព្រះអង្គសង្គ្រោះនៃពិភពលោក ។ តើបងប្អូនអាចជួយកុមារឲ្យមានអារម្មណ៍នៃអំណរ និងការដឹងគុណចំពោះដង្វាយធួនរបស់ព្រះយេស៊ូវគ្រីស្ទដោយរបៀបណា ?

សកម្មភាពដែលអាចធ្វើបាន

សូមឲ្យកុមារគិតអំពីអ្វីមួយដែលពួកគេកំពុងទន្ទឹងរង់ចាំ ។ សូមពន្យល់ថា មនុស្សដ៏ស្មោះត្រង់នៅក្នុងជំនាន់ព្រះគម្ពីរសញ្ញាចាស់ បានទន្ទឹងរង់ចាំការប្រសូតរបស់ព្រះយេស៊ូវគ្រីស្ទ ។ សូមអាន អេសាយ ២៥:៩ ទៅកុមារ ហើយឲ្យពួកគេថាតាមឃ្លា « យើងបានរង់ចាំទ្រង់ យើងនឹងមានចិត្តរីករាយ ហើយត្រេកអរ ដោយសេចក្តីសង្គ្រោះរបស់ទ្រង់ » ។ សូមចែកចាយជាមួយពួកគេពីមូលហេតុដែលបងប្អូនរីករាយ ហើយត្រេកអរដែលព្រះគ្រីស្ទបានប្រសូតមក ។ សូមអញ្ជើញកុមារឲ្យចែកចាយអារម្មណ៍របស់ពួកគេអំពីព្រះអង្គសង្គ្រោះ ។
សូមច្រៀងជាមួយគ្នានូវបទចម្រៀងមួយបទអំពីការប្រសូតរបស់ព្រះយេស៊ូវ ដូចជាបទ « ផ្ទុំនៅក្នុងស្នូកទីឆ្ងាយ » ( សៀវភៅចម្រៀងកុមារ ទំព័រ ២៦–២៧ ) ឬ « ហ៍្ន ! ឮពួកទេវតាច្រៀងបទ » ( ទំនុកតម្កើង ល.រ. ១៣១ ) ។ សូមជួយកុមារឲ្យរកឃើញឃ្លាទាំងឡាយនៅក្នុងបទចម្រៀងទាំងនេះ ដែលបង្រៀនយើងអំពីព្រះអង្គសង្គ្រោះរបស់យើង និងពរជ័យទាំងឡាយដែលយើងមានដោយសារទ្រង់ ។

បង្រៀនគោលលទ្ធិ ៖ កុមារធំៗ

ព្រះគម្ពីរសញ្ញាចាស់បង្រៀនខ្ញុំអំពីព្រះយេស៊ូវគ្រីស្ទ ជាព្រះមែស៊ីដែលបានសន្យា ។

ព្រះគម្ពីរសញ្ញាចាស់មិនគ្រាន់តែជាបណ្ដុំនៃដំណើររឿង និងសំណេរដ៏គួរឲ្យចាប់អារម្មណ៍នោះទេ គោលបំណងរបស់ព្រះគម្ពីរនេះ ក៏ដូចជាព្រះគម្ពីរទាំងអស់ដែរ គឺដើម្បីថ្លែងទីបន្ទាល់អំពីព្រះយេស៊ូវគ្រីស្ទ ។ សូមជួយកុមារឲ្យរៀនពីរបៀបដើម្បីស្វែងរកទ្រង់នៅក្នុងព្រះគម្ពីរសញ្ញាចាស់ ។

សកម្មភាពដែលអាចធ្វើបាន

សូមអញ្ជើញកុមារឲ្យធ្វើបញ្ជីមួយអំពីព្រះនាម និងព្រះបរមងារទាំងអស់របស់ព្រះយេស៊ូវគ្រីស្ទ ដែលពួកគេអាចរកឃើញនៅក្នុង ម៉ូសេ ៧:៥៣; ទំនុកដំកើង ២៣:១; យ៉ូប ១៩:២៥; អេសាយ ៧:១៤; ៩:៦; ១២:២; អេម៉ុស ៤:១៣ និង សាការី ១៤:១៦ ។ សូមឲ្យពួកគេធ្វើការជាគូ ប្រសិនបើពួកគេចង់ធ្វើដូច្នោះ ។ សូមអញ្ជើញពួកគេឲ្យចែកចាយបញ្ជីរបស់ពួកគេជាមួយគ្នាទៅវិញទៅមក ។ តើយើងរៀនអ្វីខ្លះ អំពីព្រះអង្គសង្គ្រោះតាមរយៈព្រះនាម និងព្រះបរមងារទាំងនេះ ?
សូមបង្ហាញកុមារនូវគ្រឿងតុបតែងសម្រាប់បុណ្យគ្រីស្ទម៉ាស់ ( ឬរូបភាពមួយចំនួន ) ដូចជាផ្កាយ ពន្លឺ ឬអំណោយ ។ សូមសួរកុមារថា តើរបស់ទាំងនេះអាចរំឭកយើងពីព្រះអង្គសង្រ្គោះយ៉ាងដូចម្តេចដែរ ? សូមពន្យល់ថា ជាញឹកញាប់ ព្រះគម្ពីរប្រើប្រាស់និមិត្តរូបដើម្បីបង្រៀនយើងអំពីព្រះយេស៊ូវគ្រីស្ទ ។ សូមអញ្ជើញកុមារឲ្យមើលក្នុងខគម្ពីរមួយ ឬច្រើនក្នុងខគម្ពីរដូចតទៅនេះ សម្រាប់អ្វីដែលអាចជានិមិត្តរូបអំពីព្រះយេស៊ូវគ្រីស្ទ ៖ លោកុប្បត្តិ ២២:៨; និក្ខមនំ ១៧:៦; ទំនុកដំកើង ១៨:២; ២៧:១ ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ សម្រាប់ឧទាហរណ៍បន្ថែមទៀត ) ។ តើព្រះយេស៊ូវដូចជា កូនចៀម ទឹក ថ្មដា បន្ទាយ ឬពន្លឺមួយ ដោយរបៀបណា ?
នៅចុងបញ្ចប់នៃការសិក្សាព្រះគម្ពីរសញ្ញាចាស់ឆ្នាំនេះ សូមអញ្ជើញកុមារឲ្យចែកចាយពីដំណើររឿង ឬបទគម្ពីរដែលពួកគេចូលចិត្តចេញពីព្រះគម្ពីរសញ្ញាចាស់ ។ តើដំណើររឿង ឬបទគម្ពីរទាំងនេះបង្រៀនយើងអ្វីខ្លះអំពីព្រះយេស៊ូវគ្រីស្ទ ? ហេតុអ្វីយើងមានអំណរគុណក្នុងការមានព្រះគម្ពីរសញ្ញាចាស់ ?

ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់ខ្ញុំ ។

កាលដែលយើងប្រារព្ធអបអរការប្រសូតរបស់ព្រះយេស៊ូវគ្រីស្ទ យើងក៏អាចត្រេកអរនឹងព្រះជន្ម និងពលិកម្មដ៏ធួនរបស់ទ្រង់ផងដែរ ។ តើបងប្អូនអាចប្រើប្រាស់បទគម្ពីរទាំងឡាយមកពីព្រះគម្ពីរសញ្ញាចាស់ ដើម្បីជួយដល់កុមារឲ្យពង្រឹងសេចក្ដីជំនឿរបស់ពួកគេលើព្រះអង្គសង្គ្រោះ និងព្រះប្រោសលោះរបស់ពួកគេយ៉ាងដូចម្ដេច ?

សកម្មភាពដែលអាចធ្វើបាន

សូមអាន អេសាយ ៧:១៤ បន្ទាប់មក សូមអញ្ជើញកុមារឲ្យចែកចាយពីអ្វីដែលពួកគេដឹងអំពីការប្រសូតរបស់ព្រះគ្រីស្ទ ។ ឬបង្ហាញវីដេអូ « The Nativity » ( នៅលើគេហទំព័រ ChurchofJesusChrist.org ) ហើយអញ្ជើញកុមារម្នាក់ៗឲ្យជ្រើសរើសបុគ្គលម្នាក់ពីវីដេអូ ហើយចែកចាយថាបុគ្គលនោះអាចមានអារម្មណ៍យ៉ាងណា ។ សូមចែកចាយទីបន្ទាល់របស់បងប្អូនអំពីព្រះអង្គសង្គ្រោះ ហើយអញ្ជើញកុមារឲ្យធ្វើដូច្នោះផងដែរ ។
ដើម្បីជួយកុមារឲ្យយល់កាន់តែច្បាស់អំពីតួនាទីរបស់ព្រះយេស៊ូវគ្រីស្ទ ក្នុងនាមជាព្រះអង្គសង្គ្រោះរបស់យើង សូមអញ្ជើញពួកគេឲ្យអាន អេសាយ ២៥:៨–៩; ៥៣:៣–៥ និង ហូសេ ១៣:១៤ ។ តើបទគម្ពីរទាំងនេះបង្រៀនយើងអ្វីខ្លះអំពីរបៀបដែលព្រះអម្ចាស់សង្គ្រោះយើង ? តើយើងអាច « ត្រេកអរដោយសេចក្តីសង្គ្រោះរបស់ទ្រង់ » យ៉ាងដូចម្ដេច ? ( អេសាយ ២៥:៩ ) ។
សូមច្រៀងជាមួយគ្នានូវចម្រៀងមួយបទអំពីសេចក្ដីស្រឡាញ់របស់ព្រះយេស៊ូវគ្រីស្ទសម្រាប់យើង ដូចជាបទ « ផ្ទុំនៅក្នុងស្នូកទីឆ្ងាយ » ( សៀវភៅចម្រៀងកុមារ ទំព័រ ២៦ ) ឬ « ខ្ញុំឆ្ងល់យ៉ាងអស្ចារ្យ » ( ទំនុកតម្កើង ល.រ. ១១៥ ) ។ សូមអញ្ជើញកុមារឲ្យចែកចាយឃ្លាទាំងឡាយ ដែលជួយពួកគេឲ្យទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេ ឬមិត្តភក្ដិ នូវអ្វីដែលពួកគេបានរៀនអំពីព្រះយេស៊ូវគ្រីស្ទចេញពីព្រះគម្ពីរសញ្ញាចាស់ ។ សូមលើកទឹកចិត្តពួកគេឲ្យចាប់ផ្ដើមសិក្សាព្រះគម្ពីរសញ្ញាថ្មីនៅសប្ដាហ៍នេះ ។

ការកែលម្អការបង្រៀនរបស់យើង

បង្កើតបរិយាកាសដែលអញ្ជើញព្រះវិញ្ញាណ ។ មានវិធីជាច្រើនដែលបងប្អូនអាចយាងអញ្ជើញព្រះវិញ្ញាណឲ្យចូលមកក្នុងថ្នាក់រៀនរបស់អ្នក ។ តន្ត្រីអាចធ្វើឲ្យមានគារវភាព ។ ការបង្ហាញសេចក្ដីស្រឡាញ់ និងការថ្លែងទីបន្ទាល់អាចបង្កើតឲ្យមានបរិយាកាសដ៏កក់ក្ដៅខាងវិញ្ញាណ ។ សូមពិចារណាប្រកបដោយការអធិស្ឋានពីអ្វីដែលបងប្អូនអាចធ្វើបាន ដើម្បីបង្កើតបរិយាកាសខាងវិញ្ញាណមួយនៅក្នុងថ្នាក់របស់បងប្អូន ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៥ ) ។

ទំព័រសកម្មភាព ៖ ព្រះគម្ពីរសញ្ញាចាស់បង្រៀនខ្ញុំអំពីព្រះយេស៊ូវ