« ថ្ងៃទី ២៨ ខែ វិច្ឆិកា–ថ្ងៃទី ៤ ខែ ធ្នូ ។ ណាហ៊ុម; ហាបាគុក; សេផានា ៖ ‹ ដំណើររបស់ទ្រង់មានតាំងពីបុរាណមក › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ២៨ ខែ វិច្ឆិកា–ថ្ងៃទី ៤ ខែ ធ្នូ ។ ណាហ៊ុម; ហាបាគុក; សេផានា » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

« ដំណើររបស់ទ្រង់មានតាំងពីបុរាណមក » ( ហាបាគុក ៣:៦ ) ។ កាលដើមដំបូងមានព្រះបន្ទូល ដោយ អ៊ីវ៉ា ធីម៉ូធី

ថ្ងៃទី ២៨ ខែ វិច្ឆិកា–ថ្ងៃទី ៤ ខែ ធ្នូ

ណាហ៊ុម; ហាបាគុក; សេផានា

« ដំណើររបស់ទ្រង់មានតាំងពីបុរាណមក »

សេចក្ដីស្រឡាញ់របស់បងប្អូនចំពោះព្រះគម្ពីរ អាចមានឥទ្ធិពលយ៉ាងខ្លាំងទៅលើកុមារដែលបងប្អូនបង្រៀន ។ សូមឲ្យពួកគេឃើញថា បងប្អូនមានអំណរគុណយ៉ាងខ្លាំងចំពោះព្រះបន្ទូលរបស់ព្រះ ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមអញ្ជើញកុមារឲ្យប្ដូរវេនគ្នាឈរ ហើយសម្ដែងជាព្យាការីនៃព្រះគម្ពីរសញ្ញាចាស់ម្នាក់ដែលកំពុងឈរ « លើប៉ម » ដូចជាហាបាគុក ( ហាបាគុក ២:១ ) ។ សុំពួកគេឲ្យប្រាប់កុមារផ្សេងទៀតនូវអ្វី ដែលពួកគេកំពុងរៀនអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។

បង្រៀនគោលលទ្ធិ ៖ កុមារតូចៗ

ហាបាគុក ២:៣

ព្រះនឹងបំពេញការសន្យារបស់ទ្រង់ជានិច្ច ។

ព្យាការីហាបាគុកបានមានកង្វល់ដោយភាពទុច្ចរិតដែលលោកបានឃើញនៅក្នុងចំណោមប្រជាជានយូដា ( សូមមើល ហាបាគុក ១:២–៤ ) ។ ព្រះអម្ចាស់បានអះអាងចំពោះលោកថា ការសន្យារបស់ទ្រង់នឹងត្រូវបានបំពេញតាមពេលវេលារបស់ទ្រង់ ( សូមមើល ហាបាគុក ២:៣ ) ។

សកម្មភាពដែលអាចធ្វើបាន

សូមចែកចាយឧទាហរណ៍នៃការណ៍ទាំងឡាយដែលល្អ ប៉ុន្តែទាល់តែយើងរង់ចាំសិន—ដូចជាផ្លែឈើដែលត្រូវទុំ ឬម្សៅនំដែលត្រូវដុត ។ តើនឹងមានអ្វីកើតឡើង ប្រសិនបើយើងបានព្យាយាមទទួលទានផ្លែឈើ ឬ ម្សៅនំមុនពេលវាឆ្អិន ឬ ទុំនោះ ? សូមប្រាប់អំពីព្យាការីហាបាគុក ដែលចង់ដឹងថា នៅពេលណាដែលព្រះអម្ចាស់នឹងបញ្ឈប់អំពើទុច្ចរិត ដែលលោកបានឃើញនៅជុំវិញលោក ។ សូមអានទៅកាន់កុមារនូវចម្លើយរបស់ព្រះអម្ចាស់ដែលមាននៅក្នុង ហាបាគុក ២:៣ ។ សូមសង្កត់ធ្ងន់ថា ហាបាគុក ត្រូវរង់ចាំឲ្យការសន្យារបស់ព្រះអម្ចាស់ត្រូវបំពេញសិន ដូចពេលខ្លះយើងត្រូវរង់ចាំដែរ ។ សូមចែកចាយអំពីគ្រាមួយដែលបងប្អូនត្រូវតែរង់ចាំដើម្បីទទួលពរជ័យអ្វីមួយ ។
សូមជួយកុមារឲ្យគិតអំពីការណ៍ទាំងឡាយ ដែលព្រះបានសន្យា—ឧទាហរណ៍ ថាព្រះយេស៊ូវគ្រីស្ទនឹងត្រឡប់មកផែនដីវិញ ឬថាយើងអាចរស់នៅជាមួយព្រះម្ដងទៀត ។ ជាមួយនឹងឧទាហរណ៍នីមួយៗ សូមអញ្ជើញកុមារឲ្យថាតាមឃ្លានេះ « ចូររង់ចាំចុះ ដ្បិតនឹងមកជាពិត ឥតរារង់ឡើយ » ។

ហាបាគុក ២:១៤

ខ្ញុំអាចជួយបំពេញផែនដីជាមួយនឹងការចេះដឹងអំពីព្រះយេស៊ូវគ្រីស្ទ ។

ហាបាគុកបានព្យាករអំពីថ្ងៃដែលពិភពលោកទាំងមូល នឹងស្គាល់ព្រះយេស៊ូវគ្រីស្ទ ។ ការព្យាករនោះគឺកំពុងចាប់ផ្ដើមបំពេញនៅក្នុងជំនាន់របស់យើង ។ សូមពិចារណាពីរបៀបដែលបងប្អូនអាចជួយកុមារឲ្យចូលរួមចំណែកនៅក្នុងការបំពេញការព្យករនោះ ។

សកម្មភាពដែលអាចធ្វើបាន

សូមបង្ហាញក្រឡទទេមួយ ហើយចែកវត្ថុតូចមួយឲ្យទៅកុមារម្នាក់ៗ ។ សូមឲ្យកុមារម្នាក់ៗចែកចាយពីអ្វីដែលព្រះយេស៊ូវបានធ្វើ ឬបានបង្រៀន ហើយបន្ទាប់មក សូមដាក់វត្ថុរបស់ពួកគេទៅក្នុងក្រឡនោះ ។ សូមអាន ហាបាគុក ២:១៤ ឮៗ ហើយពន្យល់ថា គឺដូចជាកុមារបានបំពេញក្រឡដោយចំណេះដឹងរបស់ពួកគេអំពីព្រះអម្ចាស់ យើងក៏អាចបំពេញពិភពលោកនេះដោយចំណេះដឹងអំពីទ្រង់ផងដែរ ។
សូមបង្ហាញផែនទីពិភពលោកទៅកុមារ ( សូមមើល ផែនទីប្រវត្តិសាសនាចក្រ ល.រ. ៧ « ផែនទីនៃពិភពលោក » ) ។ សូមជួយពួកគេឲ្យស្វែងរកកន្លែងដែលពួកគេរស់នៅ និងកន្លែងទាំងឡាយដែលពួកអ្នកផ្សព្វផ្សាយសាសនាដែលពួកគេស្គាល់បានបម្រើ ។ សូមថ្លែងទីបន្ទាល់របស់បងប្អូនថា ព្រះវរបិតាសួគ៌មានព្រះទ័យចង់ឲ្យមនុស្សនៅទូទាំងផែនដីស្គាល់ព្រះយេស៊ូវគ្រីស្ទ ។ តើយើងអាចជួយបង្រៀនមនុស្សដទៃទៀតអំពីព្រះយេស៊ូវដោយរបៀបណា ? សូមប្រាប់កុមារអំពីការណ៍ទាំងឡាយដែលបងប្អូនបានឃើញពួកគេធ្វើ ដែលបង្រៀនបងប្អូនអំពីព្រះយេស៊ូវគ្រីស្ទ ។ សូមជួយពួកគេឲ្យគិតអំពីការណ៍ផ្សេងៗទៀតដែលពួកគេអាចធ្វើបាន ។
សូមច្រៀងចម្រៀងមួយបទជាមួយគ្នាអំពីការចែកចាយដំណឹងល្អ ដូចជាបទ « ខ្ញុំចង់ក្លាយជាអ្នកផ្សាយសាសនាពេលនេះ » ( សៀវភៅចម្រៀងកុមារ ទំព័រ ៩០ ) ។ តើយើងអាចប្រាប់អ្នកដទៃអ្វីខ្លះ អំពីព្រះយេស៊ូវគ្រីស្ទ ? សម្រាប់គំនិតមួយចំនួន សូមមើលមាត្រានៃសេចក្ដីជំនឿ ។

សេផានា ២:៣

« ចូរស្វែងរកទ្រង់ » ។

សេផានាបានបង្រៀនថា យើងគួរតែស្វែងរកព្រះអម្ចាស់ អំឡុងគ្រានៃទុច្ចរិតភាពដ៏ធំធេង ដូចជានៅក្នុងថ្ងៃចុងក្រោយនេះជាដើម ។ សូមពិចារណាអំពីរបៀបដែលបងប្អូននឹងលើកទឹកចិត្តកុមារឲ្យស្វែងរកទ្រង់ ។

សកម្មភាពដែលអាចធ្វើបាន

សូមបង្ហាញរូបព្រះយេស៊ូវ ហើយអាន សេផានា ២:៣ ដល់កុមារ ។ សូមអញ្ជើញពួកគេឲ្យដាក់ដៃរបស់ពួកគេក្បង់ជារង្វង់ជុំវិញភ្នែករបស់ពួកគេ ដូចជាវ៉ែនតា ហើយមើលទៅរូបភាពរាល់ពេលដែលបងប្អូនអានពាក្យ « ស្វែងរក » ។ សូមពន្យល់ថា ព្យាការីសេផានាចង់ឲ្យមនុស្សស្វែងរកព្រះអម្ចាស់ ។ តើយើងស្វែងរកព្រះអម្ចាស់តាមរបៀបណា ? តើយើងអាចស្វែងរកទ្រង់នៅទីណា ?
សូមប្រើទំព័រសកម្មភាពសប្តាហ៍នេះ ឬគិតអំពីល្បែងមួយទៀត ដែលលើកទឹកចិត្តកុមារឲ្យស្វែងរកព្រះអម្ចាស់ ។ សូមចាក់ ឬច្រៀងចម្រៀងមួយបទដែលទាក់ទងនឹងប្រធានបទនេះ ដូចជា « ស្វែងរកព្រះអម្ចាស់ពីក្មេង » ( សៀវភៅចម្រៀងកុមារ ទំព័រ ៦៧ ) ។ សូមពិភាក្សាអំពីអ្វីដែលចម្រៀងនេះបង្រៀនអំពីរបៀបដែលយើងអាចស្វែងរកព្រះយេស៊ូវគ្រីស្ទនៅក្នុងជីវិតយើង ។

បង្រៀនគោលលទ្ធិ ៖ កុមារធំៗ

ណាហ៊ុម ១:៧

« ព្រះយេហូវ៉ាទ្រង់ល្អ ទ្រង់ជាទីពឹងមាំមួននៅគ្រាលំបាក » ។

យើងម្នាក់ៗប្រឈមនឹង « គ្រាលំបាក » របស់យើងផ្ទាល់ ។ តើបងប្អូនអាចជួយកុមារឲ្យងាកទៅរកព្រះអម្ចាស់ « យកទ្រង់ជាទីពឹងផ្អែក » ហើយស្វែងរកសុវត្ថិភាពខាងវិញ្ញាណនៅក្នុងគ្រាលំបាករបស់ពួកគេយ៉ាងដូចម្តេច ?

សកម្មភាពដែលអាចធ្វើបាន

សូមបង្ហាញកុមាររូបភាពតំបន់ការពារ ឬបន្ទាយមួយ ។ តើមូលហេតុមួយចំនួនអ្វីខ្លះ ដែលមនុស្សអាចត្រូវការបន្ទាយមួយ ? សូមអញ្ជើញកុមារឲ្យអាន ណាហ៊ុម ១:៧ ដើម្បីរកមើលអ្វីដែលព្យាការីណាហ៊ុមបាននិយាយ ដែលដូចគ្នាទៅនឹងតំបន់ការពារ ឬបន្ទាយមួយសម្រាប់យើង ។ តើព្រះអង្គសង្រ្គោះអាចការពារយើងឲ្យរួចពីអ្វីខ្លះ ?
សូមអញ្ជើញកុមារឲ្យគូររូបខ្លួនពួកគេ និងក្រុមគ្រួសារពួកគេនៅក្នុងតំបន់ការពារ ឬបន្ទាយមួយ ។ សូមលើកទឹកចិត្តពួកគេឲ្យសរសេរពាក្យទាំងឡាយនៅជុំវិញតំបន់ការពារនោះ ដែលពិពណ៌នាពីឥទ្ធិពលអាក្រក់មួយចំនួននៅក្នុងលោកិយនេះ ។ សូមអញ្ជើញពួកគេឲ្យសរសេរពាក្យទាំងឡាយនៅខាងក្នុងតំបន់ការពារនោះ ដែលពិពណ៌នាអំពីព្រះយេស៊ូវគ្រីស្ទ ។ តើទ្រង់បង្គាប់ឲ្យយើងធ្វើអ្វី ដើម្បីទទួលបានកម្លាំង និងការការពារពីទ្រង់ ? ( សូមមើល គោលលទ្ធិ និង សេចក្ដីសញ្ញា ៣៥:២៤ ) ។

« ព្រះយេហូវ៉ាទ្រង់ល្អ ទ្រង់ជាទីពឹងមាំមួននៅគ្រាលំបាក » ( ណាហ៊ុម ១:៧ ) ។

ហាបាគុក ៣:១៧–១៩

ខ្ញុំអាចមានអំណរនៅក្នុងព្រះយេស៊ូវគ្រីស្ទ ទោះបីជាអ្វីៗមិនដំណើរការល្អក្ដី ។

ហាបាគុកបានពិពណ៌នាពីការលំបាកមួយចំនួន ដែលអាចនឹងកើតឡើងចំពោះប្រជាជនរបស់លោក រួមទាំងដើមឈើ ឬរុក្ខជាតិវល្លិដែលមិនមានផ្លែផង ។ បន្ទាប់មក លោកបាននិយាយថា សូម្បីបើការណ៍ទាំងនេះបានកើតឡើង « គង់តែខ្ញុំនឹងរីករាយ ដោយសារព្រះយេហូវ៉ា » ។

សកម្មភាពដែលអាចធ្វើបាន

សូមអញ្ជើញកុមារឲ្យអាន ហាបាគុក ៣:១៧ ហើយរកមើលការលំបាកដែលបានពិពណ៌នានៅក្នុងខគម្ពីរនេះ ។ តើមនុស្សម្នាក់អាចនឹងមានអារម្មណ៍យ៉ាងដូចម្ដេច ប្រសិនបើការណ៍ទាំងនេះបានកើតឡើង ? សូមជួយកុមារឲ្យគិតអំពីការលំបាកទាំងឡាយដែលអាចកើតឡើងចំពោះពួកគេ ។ បន្ទាប់មក សូមអាន ខទី ១៨–១៩ ជាមួយគ្នា ដើម្បីដឹងពីអារម្មណ៍របស់ហាបាគុក ទោះបីបើការណ៍ទាំងនេះបានកើតឡើងដល់លោកក្ដី ។
សូមជួយកុមារឲ្យរកមើលឧទាហរណ៍ផ្សេងៗទៀត អំពីមនុស្សនៅក្នុងព្រះគម្ពីរដែលបានរីករាយក្នុងព្រះអម្ចាស់ សូម្បីនៅក្នុងគ្រាលំបាកៗក៏ដោយ ។ ពួកគេអាចរកឃើញឧទាហរណ៍ទាំងឡាយនៅក្នុង កិច្ចការ ១៦:១៩–២៥; ម៉ូសាយ ២៤:១០–១៥; និងសារលិខិតរបស់ប្រធាន ឌៀថើរ អេហ្វ អុជដុហ្វ « Grateful in Any Circumstances » ( Liahona ខែ ឧសភា ឆ្នាំ ២០១៤ ទំព័រ ៧០–៧៧ ) ជាពិសេសនៅផ្នែក « ការដឹងគុណក្នុងកាលៈទេសៈរបស់យើង » ។ ហេតុអ្វីមនុស្សទាំងនេះអាចរីករាយនៅក្នុងគ្រាលំបាកបាន ? តើយើងអាចធ្វើតាមគំរូរបស់ពួកគេដោយរបៀបណា ?

សេផានា ៣:១៤–២០

អ្នកទាំងឡាយដែលធ្វើតាមព្រះយេស៊ូវគ្រីស្ទ នឹងរកឃើញសេចក្ដីសុខសាន្ត និងអំណរ ។

សេផានា ៣:១៤–២០ ពិពណ៌នាអំពីថ្ងៃដ៏រីករាយ ពេលដែលព្រះយេស៊ូវគ្រីស្ទ « ស្តេចនៃសាសន៍អ៊ីស្រាអែល » នឹងសោយរាជ្យក្នុងចំណោមរាស្ត្រទ្រង់ ហើយ « អរសប្បាយនឹង [ យើង ] ដោយសំឡេងច្រៀង » ( ខទី ១៥, ១៧ ) ។

សកម្មភាពដែលអាចធ្វើបាន

សូមអាន សេផានា ៣:១៤ ជាមួយគ្នា ។ បន្ទាប់មក សូមអញ្ជើញកុមារម្នាក់ៗឲ្យជ្រើសរើសខគម្ពីរមួយនៅក្នុង សេផានា ៣:១៥–២០ ហើយសិក្សាវា ដោយរកមើលអ្វីមួយដែលអាចជួយយើងឲ្យ « អរសប្បាយ ហើយរីករាយ » ។ សូមឲ្យពួកគេចែកចាយអ្វីដែលពួកគេរកឃើញ ។
សូមជួយកុមារឲ្យរកមើលទំនុកតម្កើង ឬចម្រៀងកុមារ ដែលជួយពួកគេឲ្យ « អរសប្បាយ ហើយរីករាយឲ្យអស់អំពីចិត្ត » ( សេផានា ៣:១៤ ) ។ សូមច្រៀងចម្រៀងពីរបីបទជាមួយគ្នា ហើយលើកទឹកចិត្តកុមារឲ្យនិយាយអំពីអំណរ ដែលពួកគេរកឃើញនៅក្នុងដំណឹងល្អនៃព្រះយេស៊ូវគ្រីស្ទ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមឲ្យកុមារសរសេរនូវសេចក្ដីយោងទៅបទគម្ពីរមួយ ដែលពួកគេចង់ចែកចាយជាមួយនឹងក្រុមគ្រួសាររបស់ពួកគេ ( ឬសរសេរសេចក្តីយោងនោះទុកសម្រាប់ខ្លួនពួកគេ ) ។

ការកែលម្អការបង្រៀនរបស់យើង

ជួយកុមារឲ្យស្គាល់ពីព្រះវិញ្ញាណ ។ សូមព្យាយាមកត់សម្គាល់ពីគ្រាទាំងឡាយ ពេលដែលកុមារអាចមានអារម្មណ៍ពីឥទ្ធិពលនៃព្រះវិញ្ញាណ ។ នៅពេលការណ៍នេះកើតឡើង សូមជួយពួកគេឲ្យយល់ថា អារម្មណ៍ទាំងនេះកើតមកពីព្រះវិញ្ញាណបរិសុទ្ធ ។