« ថ្ងៃទី ២១–២៧ ខែ វិច្ឆិកា ។ យ៉ូណាស; មីកា ៖ ‹ ទ្រង់សព្វព្រះហឫទ័យនឹងសេចក្តីសប្បុរស › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ២១–២៧ ខែ វិច្ឆិកា ។ យ៉ូណាស; មីកា » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២
យ៉ូណាសនៅលើឆ្នេរខ្សាច់នៃក្រុងនីនីវេ ដោយ ដានីយ៉ែល អេ លូវីស
ថ្ងៃទី ២១–២៧ ខែ វិច្ឆិកា
យ៉ូណាស; មីកា
« ទ្រង់សព្វព្រះហឫទ័យនឹងសេចក្តីសប្បុរស »
សូមស្រាវជ្រាវរកគោលការណ៍សំខាន់ៗនៅក្នុងគម្ពីរយ៉ូណាស និង មីកា ដែលនឹងផ្ដល់ពរជ័យដល់កុមារដែលបងប្អូនបង្រៀន ។ សូមពិចារណាពីរបៀបដែលបងប្អូនអាចជួយកុមារឲ្យរៀនអំពីគោលការណ៍ទាំងនេះ ។ គំនិតយោបល់នៅក្នុងគម្រោងមេរៀននេះអាចជួយបាន ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
ដើម្បីជួយកុមារឲ្យចងចាំពីដំណើររឿងរបស់យ៉ូណាស ឬសេចក្ដីពិតផ្សេងៗទៀត ដែលពួកគេអាចបានរៀននៅផ្ទះ សូមច្រៀងចម្រៀងមួយបទរួមគ្នា ដូចជាឃ្លា ៧ នៃបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨–៥៩ ) ។
បង្រៀនគោលលទ្ធិ ៖ កុមារតូចៗ
ព្រះអម្ចាស់ប្រទានពរខ្ញុំ នៅពេលខ្ញុំគោរពប្រតិបត្តិតាមទ្រង់ ។
នៅពេលព្រះអម្ចាស់បានសូមឲ្យយ៉ូណាស ទៅប្រកាសដល់ប្រជាជននៅក្រុងនីនីវេ នោះយ៉ូណាសមិនបានគោរពតាមទេ ។ សូមជួយកុមារឲ្យយល់ថា យើងទទួលបានពរជ័យ នៅពេលយើងគោរពប្រតិបត្តិតាមព្រះអម្ចាស់ ។
សកម្មភាពដែលអាចធ្វើបាន
-
សូមបង្ហាញរូបភាពនៃដំណើររឿងរបស់យ៉ូណាស ហើយអញ្ជើញកុមារឲ្យប្រាប់ពីអ្វីដែលពួកគេបានដឹងអំពីដំណើររឿងនោះ ( សូមមើល យ៉ូណាសជាព្យាការី » នៅក្នុង ដំណើររឿងព្រះគម្ពីរសញ្ញាចាស់ ទំព័រសកម្មភាពសប្ដាហ៍នេះ ឬ គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ សូមសួរសំណួរទាំងនេះ ៖ តើមានអ្វីបានកើតឡើង នៅពេលដែលយ៉ូណាសពុំបានគោរពតាមព្រះអម្ចាស់ ? ( សូមមើល យ៉ូណាស ១:៤–១៧ ) ។ តើមានអ្វីខ្លះបានកើតឡើង នៅពេលគាត់បានគោរពតាម ? ( សូមមើល យ៉ូណាស ៣:៣–៥ ) ។ សូមចែកចាយទីបន្ទាល់របស់បងប្អូនថា ព្រះអម្ចាស់នឹងប្រទានពរដល់យើង នៅពេលយើងគោរពប្រតិបត្តិតាមទ្រង់ ។
-
សូមច្រៀងចម្រៀងមួយបទជាមួយគ្នាអំពីការគោរពប្រតិបត្តិតាមព្រះអម្ចាស់ ដូចជាបទ « ខ្ញុំនឹងឆាប់ធ្វើតាម » ( សៀវភៅចម្រៀងកុមារ ទំព័រ ៧១ ) ។ សូមនិយាយថាវានឹងល្អខ្លាំងប៉ុណ្ណាទៅ បើយ៉ូណាសគោរពប្រតិបត្តិតាមតាំងពីដំបូងនោះ ។ សូមជួយកុមារឲ្យគិតអំពីការណ៍ទាំងឡាយ ដែលព្រះមានព្រះទ័យចង់ឲ្យពួកគេធ្វើ ហើយបន្ទាប់មកសម្ដែងពីរបៀបដែលពួកគេអាចឆាប់គោរពតាម ។
ព្រះវរបិតាសព្វព្រះទ័យចង់ឲ្យមនុស្សគ្រប់គ្នាស្ដាប់ឮដំណឹងល្អ ។
ដំណឹងល្អគឺសម្រាប់មនុស្សគ្រប់គ្នា ។
មនុស្សនៅក្រុងនីនីវេបានប្រែចិត្ត ពេលដែលយ៉ូណាសបានចែកចាយសារលិខិតរបស់ព្រះអម្ចាស់ជាមួយពួកគេ ។ តើកុមារមានឱកាសអ្វីខ្លះ ដើម្បីចែកចាយដំណឹងល្អ ?
សកម្មភាពដែលអាចធ្វើបាន
-
សូមសម្ដែងផ្នែកខ្លះនៃ យ៉ូណាស ៣:៣–៨ ជាមួយនឹងកុមារ ដូចជា ការដើរទៅក្រុងនីនីវេ ការចែកចាយសារលិខិតរបស់ព្រះអម្ចាស់ និងការសរសេរបង្គាប់របស់ស្តេចទៅប្រជារាស្ត្ររបស់ទ្រង់ ។ សូមបង្ហាញរូបភាពនៃអ្នកផ្សព្វផ្សាយសាសនា ( សូមមើល សៀវភៅរូបភាពដំណឹងល្អ ល.រ. ១០៩, ១១០ ) ។ តើពួកអ្នកផ្សព្វផ្សាយសាសនាធ្វើអ្វីខ្លះ ? តើយ៉ូណាសជាអ្នកផ្សព្វផ្សាយសាសនាម្នាក់តាមរបៀបណា ? សូមជួយកុមារឲ្យគិតអំពីរបៀបដែលពួកគេអាចចែកចាយដំណឹងល្អជាមួយអ្នកដទៃ ដូចជា ការចែកចាយមាត្រានៃសេចក្ដីជំនឿមួយ ឬការថ្លែងសក្ខីភាពរបស់ពួកគេអំពីព្រះយេស៊ូវគ្រីស្ទ ។
-
សូមប្រាប់បទពិសោធន៍មួយ នៅពេលដែលបងប្អូនបានចែកចាយដំណឹងល្អនៃព្រះយេស៊ូវគ្រីស្ទ ។ ឬ ពីរបីថ្ងៃពីមុនថ្នាក់រៀន សូមអញ្ជើញនរណាម្នាក់ឲ្យមកថ្នាក់របស់បងប្អូន ហើយប្រាប់កុមារអំពីពេលមួយ ដែលគាត់បានចែកចាយដំណឹងល្អ ឬពេលដែលនរណាម្នាក់បានចែកចាយដំណឹងល្អជាមួយនឹងគាត់ ។ សូមលើកទឹកចិត្តដល់បុគ្គលនោះឲ្យបង្ហាញរូបភាព បើអាចធ្វើទៅបាន ។ សូមជួយកុមារឲ្យគិតអំពីរបៀបនានាដែលពួកគេអាចក្លាយជាអ្នកផ្សព្វផ្សាយសាសនានាពេលឥឡូវនេះ ។
ព្រះយេស៊ូវគ្រីស្ទបានប្រសូតនៅភូមិបេថ្លេហិម ។
មីកាបានព្យាករថា អនាគត « អ្នកគ្រប់គ្រងលើអ៊ីស្រាអែល » នឹងប្រសូតនៅភូមិបេថ្លេហិម ។ បងប្អូនអាចជួយកុមារឲ្យដឹងថា ការប្រសូតរបស់ព្រះយេស៊ូវគ្រីស្ទបានបំពេញការព្យាករនេះ ។
សកម្មភាពដែលអាចធ្វើបាន
-
សូមបង្ហាញរូបភាពទាំងឡាយអំពីព្រឹត្តិការណ៍ជុំវិញការប្រសូតរបស់ព្រះយេស៊ូវគ្រីស្ទ ( សូមមើល សៀវភៅរូបភាពដំណឹងល្អ ល.រ. ២៨, ២៩, ៣០, ៣១ ) ។ សូមអញ្ជើញកុមារឲ្យនិយាយអំពីអ្វីដែលកំពុងកើតឡើងនៅក្នុងរូបភាពនីមួយៗ ។ សូមអាន មីកា ៥:២ ហើយអញ្ជើញកុមារឲ្យក្រោកឈរឡើង ពេលពួកគេឮពាក្យ « បេថ្លេហិម » ។ សូមថ្លែងទីបន្ទាល់ថា ការប្រសូតរបស់ព្រះយេស៊ូវគឺសំខាន់ខ្លាំងណាស់ រហូតដល់ពួកព្យាការីបានដឹងអំពីព្រឹត្តិការណ៍នេះ ពីមុនទ្រង់បានប្រសូតមកទៅទៀត ។
-
សូមអញ្ជើញកុមារឲ្យគូររូបភាពនៃការប្រសូតរបស់ព្រះយេស៊ូវ ។ កាលដែលពួកគេបង្ហាញរូបភាពរបស់ពួកគេ សូមពួកគេឲ្យចែកចាយពីមូលហេតុដែលពួកគេមានអំណរគុណចំពោះព្រះយេស៊ូវគ្រីស្ទ ។
បង្រៀនគោលលទ្ធិ ៖ កុមារធំៗ
យ៉ូណាស ១:១០–១២; ២:១–៤, ៩; ៣:១–៥
ការប្រែចិត្តរួមមានទាំងការទទួលស្គាល់អំពើបាបរបស់ខ្ញុំ និងការសូមការអភ័យទោស ។
គំរូរបស់យ៉ូណាសអាចបំផុសគំនិតដល់កុមារឲ្យងាកទៅរកព្រះអម្ចាស់ នៅពេលពួកគេបានធ្វើអំពើបាប ។
សកម្មភាពដែលអាចធ្វើបាន
-
សូមជួយកុមារឲ្យធ្វើបញ្ជីមួយនៅលើក្ដារខៀនអំពីធាតុសំខាន់ៗមួយចំនួននៃការប្រែចិត្ត ( សូមមើល សេចក្ដីណែនាំដល់បទគម្ពីរទាំងឡាយ « ប្រែចិត្ត, ការប្រែចិត្ត » នៅលើគេហទំព័រ scriptures.ChurchofJesusChrist.org ) ។ សូមរំឭកដំណើររឿងរបស់យ៉ូណាសជាមួយគ្នា ហើយអញ្ជើញកុមារឲ្យរកមើលភស្ដុតាង ដែលយ៉ូណាសបានប្រែចិត្ត ( សម្រាប់ឧទាហរណ៍ សូមមើល យ៉ូណាស ១:១០–១២; ២:១–៤, ៩; ៣:១–៥ ) ។ តើយើងអាចបង្ហាញព្រះអម្ចាស់ថា ការប្រែចិត្តរបស់យើងគឺស្មោះសរដោយរបៀបណា ?
-
សូមច្រៀងចម្រៀងមួយបទអំពីការប្រែចិត្ត ដូចជាបទ « Repentance » ( Children’s Songbook ទំព័រ ៩៨ ) ។ សូមសួរកុមារថាតើពាក្យ ឬឃ្លាណាខ្លះមកពីបទចម្រៀងនេះ ដែលពួកគេនឹងចែកចាយជាមួយយ៉ូណាស ដើម្បីជួយគាត់ឲ្យប្រែចិត្ត ។
យ៉ូណាស ២:៧–១០; ៣:១០; ៤:២; មីកា ៧:១៨–១៩
ព្រះអម្ចាស់ពោរពេញដោយសេចក្ដីមេត្តាករុណាដល់អ្នកទាំងឡាយដែលងាកមករកទ្រង់ ។
នៅពេលកុមារយល់ថា ព្រះអម្ចាស់ពោរពេញដោយសេចក្ដីមេត្តាករុណា និងមានព្រះទ័យល្អ នោះពួកគេនឹងងាកមករកទ្រង់ នៅពេលពួកគេត្រូវការទ្រង់ ។
សកម្មភាពដែលអាចធ្វើបាន
-
សូមអញ្ជើញកុមារឲ្យស្វែងរកនិយមន័យមួយនៃពាក្យ មេត្តាករុណា នៅក្នុង សេចក្ដីណែនាំដល់បទគម្ពីរទាំងឡាយ ( scriptures.ChurchofJesusChrist.org ) ។ ហេតុអ្វីយ៉ូណាសត្រូវការសេចក្ដីមេត្តាករុណា ? តើហេតុអ្វីប្រជាជននៅក្រុងនីនីវេត្រូវការសេចក្ដីមេត្តាករុណា ? ( សូមមើល យ៉ូណាស ១:១–៣ ) ។ សូមឲ្យកុមារស្រមៃថា ពួកគេអាចសម្ភាសយ៉ូណាសបាន ។ តើភស្ដុតាងអ្វី ដែលយ៉ូណាសអាចផ្ដល់ឲ្យដើម្បីបង្ហាញថា ព្រះអម្ចាស់ពោរពេញដោយសេចក្ដីមេត្តាករុណា ? ( សម្រាប់ឧទាហរណ៍ សូមមើល យ៉ូណាស ២:៧–១០; ៣:១០; ៤:២ ) ។ តើព្រះអម្ចាស់បានបង្ហាញសេចក្ដីមេត្តាករុណាដល់យើងយ៉ាងដូចម្ដេច ?
-
សូមឲ្យកុមារធ្វើបញ្ជីមួយនៅលើក្ដារខៀន អំពីអ្វីៗដែលពួកគេ « ពេញចិត្ត » ដូចជា ចំណង់ចំណូលចិត្ត ពរជ័យទាំងឡាយមកពីព្រះអម្ចាស់ ជាដើម ។ សូមអញ្ជើញពួកគេឲ្យអាន មីកា ៧:១៨–១៩ ដើម្បីរកមើលការណ៍មួយដែលព្រះអម្ចាស់សព្វព្រះហឫទ័យ ។ តើសេចក្ដីពិតអ្វីខ្លះនៅក្នុងខគម្ពីរទាំងនេះ ដែលនឹងជួយដល់បុគ្គលម្នាក់ដែលភ័យខ្លាចក្នុងការប្រែចិត្ត ?
-
សូមជួយកុមារឲ្យគិតអំពីគំរូទាំងឡាយ នៅពេលដែលព្រះអង្គសង្គ្រោះបានបង្ហាញសេចក្ដីមេត្តាករុណាចំពោះមនុស្សដទៃទៀត ដូចជា ម៉ាកុស ២:៣–១២; លូកា ២៣:៣៣–៣៤; និង យ៉ូហាន ៨:១–១១ ។ សូមបង្ហាញរូបភាពនៃព្រឹត្តិការណ៍ទាំងនេះ ប្រសិនបើអាច ។ សូមជួយកុមារឲ្យគិតអំពីឱកាសនានា ដែលពួកគេមានដើម្បីមានសេចក្ដីមេត្តាករុណា និងចិត្តល្អចំពោះអ្នកដទៃ ។
ព្រះអម្ចាស់មានព្រះទ័យចង់ឲ្យខ្ញុំប្រព្រឹត្តដោយយុត្តិធម៌ ស្រឡាញ់សេចក្តីសប្បុរស ហើយដើរជាមួយនឹងទ្រង់ដោយរាបសា ។
មីកា ៦:៨ ផ្ដល់នូវលំនាំមួយសម្រាប់ការរស់នៅដោយសុចរិត ។ តើបងប្អូនអាចជួយកុមារឲ្យរកឃើញ ហើយរស់នៅតាមការបង្រៀននៅក្នុងខគម្ពីរនេះដោយរបៀបណា ?
សកម្មភាពដែលអាចធ្វើបាន
-
សូមអាន មីកា ៦:៨ ហើយជួយកុមារឲ្យយល់ពីអត្ថន័យនៃឃ្លាទាំងនេះ ៖ « ប្រព្រឹត្តដោយសុចរិត » « ស្រឡាញ់សេចក្តីសប្បុរស » និង « ដើរជាមួយនឹងព្រះនៃខ្លួន ដោយសុភាពរាបទាប » ។ សូមអញ្ជើញកុមារឲ្យគូររូបខ្លួនពួកគេកំពុងធ្វើអ្វីមួយដែលទាក់ទងនឹងចំណុចមួយនៃឃ្លាទាំងនេះ ។
-
សូមសរសេរនៅលើក្ដារខៀន « តើព្រះយេហូវ៉ាសព្វព្រះហឫទ័យឲ្យឯងប្រព្រឹត្តដូចម្តេច ? » អញ្ជើញពួកគេឲ្យស្វែងរកចម្លើយនៅក្នុង មីកា ៦:៨ ។ តើការគោរពប្រតិបត្តិតាមព្រះបញ្ញត្តិរបស់ព្រះអម្ចាស់ ជួយយើងឲ្យបំពេញតាមអ្វីដែលព្រះអម្ចាស់តម្រូវពីយើងនៅក្នុងខគម្ពីរនេះដោយរបៀបណា ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមសរសេរនៅលើក្រដាសមួយសន្លឹកសម្រាប់កុមារម្នាក់ៗ នូវឃ្លាគន្លឹះមួយចេញមកពីបទគម្ពីរដែលបងប្អូនបានពិភាក្សាក្នុងថ្នាក់ ។ សូមអញ្ជើញកុមារឲ្យព្យាយាមទន្ទេញឃ្លានោះ ហើយសុំដល់សមាជិកគ្រួសារម្នាក់ឲ្យចែកចាយពីគំនិតរបស់គាត់អំពីវា ។
ការកែលម្អការបង្រៀនរបស់យើង
យកចិត្តទុកដាក់ចំពោះកុមារ ។ តើកុមារនៅក្នុងថ្នាក់របស់បងប្អូនឆ្លើយតបនឹងសកម្មភាពរៀនសូត្រនានាយ៉ាងដូចម្ដេច ? បើពួកគេពុំនៅស្ងៀមទេ វាអាចនឹងដល់ពេលដើម្បីសាកល្បងសកម្មភាពមួយប្រភេទទៀត ។ ម្យ៉ាងវិញទៀត ប្រសិនបើបងប្អូនកត់សម្គាល់ឃើញថា កុមារចូលរួមនៅក្នុងសកម្មភាពមួយ សូមកុំមានសម្ពាធដើម្បីបន្ដទៅមុខទៀត ដោយសារតែបងប្អូនពុំទាន់បានបង្រៀនគ្រប់ចំណុចមេរៀនទាំងអស់នោះ ។