« ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា ។ ដានីយ៉ែល ១–៦ ៖ ‹ គ្មានព្រះឯណាទៀត ដែលអាចនឹងជួយឲ្យរួចយ៉ាងដូច្នេះបានឡើយ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា ។ ដានីយ៉ែល ១–៦ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២
ដានីយ៉ែលបកស្រាយសុបិនរបស់នេប៊ូក្នេសា ដោយ ហ្រ្គេន រ៉មនី ខ្លសិន
ថ្ងៃទី ៣១ ខែ តុលា–ថ្ងៃទី ៦ ខែ វិច្ឆិកា
ដានីយ៉ែល ១–៦
« គ្មានព្រះឯណាទៀត ដែលអាចនឹងជួយឲ្យរួចយ៉ាងដូច្នេះបានឡើយ »
នៅពេលបងប្អូនអាន ដានីយ៉ែល ១–៦ សូមកត់ចំណាំសេចក្ដីពិតទាំងឡាយ ដែលបងប្អូនចាប់អារម្មណ៍ដើម្បីជួយឲ្យកុមាររកឃើញ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមបង្ហាញរូបភាពនៃព្រឹត្តិការណ៍នៅក្នុង ដានីយ៉ែល ១–៦ ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឬ សៀវភៅរូបភាពដំណឹងល្អ ល.រ. ២៣, ២៤, ២៥, ២៦ ) ។ សូមឲ្យកុមារចែកចាយនូវអ្វី ដែលពួកគេដឹងអំពីព្រឹត្តិការណ៍នៅក្នុងរូបភាពទាំងនោះ ។ សូមអញ្ជើញពួកគេឲ្យចែកចាយគ្រាមួយដែលពួកគេបានជ្រើសរើសដើម្បីធ្វើតាមព្រះអង្គសង្គ្រោះ ដូចជាដានីយ៉ែល និងមិត្តភក្ដិរបស់លោកបានធ្វើដែរ ។
បង្រៀនគោលលទ្ធិ ៖ កុមារតូចៗ
ព្រះវរបិតាសួគ៌មានព្រះទ័យចង់ឲ្យខ្ញុំមើលថែដល់រាងកាយរបស់ខ្ញុំ ។
ដានីយ៉ែល និងមិត្តភក្ដិរបស់លោកបានបដិសេធសាច់ និងស្រា ដែលស្ដេចបានប្រទានឲ្យពួកគេ ដោយសារពួកគេចង់ធ្វើតាមព្រះបញ្ញត្តិរបស់ព្រះ និងចង់ចៀសវាងពីការធ្វើឲ្យមានគ្រោះថ្នាក់ដល់រាងកាយរបស់ពួកគេ ។ សព្វថ្ងៃនេះ ពាក្យសម្ដីនៃប្រាជ្ញាវាងវៃ ជួយយើងឲ្យចៀសវាងពីសារធាតុទាំងឡាយដែលមិនល្អចំពោះរាងកាយរបស់យើង ។
សកម្មភាពដែលអាចធ្វើបាន
-
សូមចែកចាយជាមួយកុមារនូវរឿង « ដានីយ៉ែល និងមិត្តរបស់លោក » ( នៅក្នុង ដំណើររឿងព្រះគម្ពីរសញ្ញាចាស់ ) ឬសង្ខេបពី ដានីយ៉ែល ១:១–១៧ ។ សូមអញ្ជើញកុមារឲ្យសម្តែងជារឿង ។ សូមជួយពួកគេឲ្យយល់ថា តើព្រះអម្ចាស់បានប្រទានពរជ័យដល់ដានីយ៉ែល និងមិត្តភក្តិរបស់លោកយ៉ាងណាដែរ ចំពោះការជ្រើសរើសដើម្បីគោរពប្រតិបត្តិដល់ទ្រង់ ( សូមមើល ខទី ១៧ ) ។ តើយើងទទួលបានពរជ័យអ្វីខ្លះ នៅពេលយើងជ្រើសរើសអ្វីដែលត្រឹមត្រូវ ?
-
សូមបង្ហាញកុមាររូបភាពនានានៃអ្វីៗដែលពាក្យសម្ដីនៃប្រាជ្ញាវាងវៃ បង្រៀនយើងឲ្យទទួលទាន ឬប្រើប្រាស់ និងអ្វីដែលវាប្រាប់យើងមិនឲ្យទទួលទាន ឬប្រើប្រាស់ ( សូមមើល គោលលទ្ធិ និង សេចក្ដីសញ្ញា ៨៩ ) ។ សូមអញ្ជើញឲ្យកុមារធ្វើជាទទួលទានអ្វីដែលល្អ ហើយនិយាយថា ទេ ចំពោះអ្វីដែលអាក្រក់ ។ សូមថ្លែងទីបន្ទាល់ថា ព្រះអម្ចាស់ប្រទានពរជ័យដល់យើង នៅពេលយើងថែទាំរាងកាយរបស់យើង ។ សូមច្រៀងចម្រៀងមួយបទរួមគ្នាអំពីការថែទាំរាងកាយរបស់យើង ដូចជាបទ « ព្រះបានប្រទានវិហារឲ្យខ្ញុំ » ( សៀវភៅចម្រៀងកុមារ ទំព័រ ៧៣ ) ។ តើបទចម្រៀងនេះបង្រៀនយើងអ្វីខ្លះ ?
រចនារូបភាពអំពី ដានីយ៉ែល និងមិត្តភក្តិរបស់លោកកំពុងបដិសេធមិនបរិភោគព្រះស្ងោយរបស់ស្តេច ដោយ ប្រាយអិន ខល
ដានីយ៉ែល ១; ៣; ៦
ព្រះនឹងប្រទានពរដល់ខ្ញុំ នៅពេលខ្ញុំជ្រើសរើសដើម្បីធ្វើតាមព្រះយេស៊ូវគ្រីស្ទ ។
គម្ពីរដានីយ៉ែល មាននូវដំណើររឿងរបស់មនុស្សដែលជ្រើសរើសធ្វើតាមព្រះបញ្ញត្តិរបស់ព្រះ សូម្បីនៅពេលដែលការធ្វើដូច្នោះគឺជាការពិបាកក្ដី ។ តើបងប្អូននឹងជួយកុមារឲ្យរៀនសូត្រចេញពីគំរូទាំងនេះដោយរបៀបណា ?
សកម្មភាពដែលអាចធ្វើបាន
-
សូមបង្ហាញរូបភាពនៃដំណើររឿងនៅក្នុង ដានីយ៉ែល ១, ៣, និង៦ ( សូមមើលទំព័រសកម្មភាពសប្ដាហ៍នេះ គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ឬ សៀវភៅរូបភាពដំណឹងល្អ ល.រ. ២៣, ២៥, ២៦ ) ។ សូមផ្កាប់មុខរូបភាពនោះនៅលើក្ដារខៀន ឬឥដ្ឋ ។ សូមឲ្យកុមារម្នាក់បើករូបភាពមួយ ហើយជួយកុមារនោះឲ្យអានរឿងដែលរូបភាពនោះតំណាងឲ្យ ។ ( ដើម្បីទទួលបានជំនួយ សូមមើល « ដានីយ៉ែល និងមិត្តរបស់លោក » « សាដ្រាក់ មែសាក់ និងអ័បេឌ-នេកោ » និង « ដានីយ៉ែល និងរូងសិង្ហ » នៅក្នុង ដំណើររឿងព្រះគម្ពីរសញ្ញាចាស់ ) ។ បន្ទាប់ពីដំណើររឿងនីមួយៗ សូមពិភាក្សាសំណួរដូចតទៅនេះ ៖ តើមនុស្សទាំងនេះបានធ្វើអ្វីខ្លះ ដើម្បីធ្វើតាមព្រះអម្ចាស់ ? តើព្រះអម្ចាស់ប្រទានពរដល់ពួកគេយ៉ាងដូចម្ដេច ? សូមចែកចាយពីរបៀបដែលបងប្អូនធ្លាប់បានទទួលពរ សម្រាប់ការជ្រើសរើសធ្វើតាមព្រះយេស៊ូវគ្រីស្ទ ។ សូមកុមារឲ្យចែកចាយបទពិសោធន៍របស់ពួកគេ ។
-
សូមអញ្ជើញកុមារឲ្យសម្ដែងតាមស្ថានការណ៍ ដែលពួកគេអាចបង្ហាញសេចក្ដីជំនឿរបស់ពួកគេលើព្រះ ដោយការកាន់តាមព្រះបញ្ញត្តិរបស់ទ្រង់ ។ ស្ថានភាពទាំងនេះអាចរួមមាន ការមានចិត្តល្អដល់បងប្អូនបង្កើតខ្លួន ការប្រាប់នរណាម្នាក់អំពីព្រះអង្គសង្គ្រោះ ឬការអធិស្ឋានជារៀងរាល់យប់ ។ សូមបង្ហាញរូបភាពសាដ្រាក់ មែសាក់ និងអ័បេឌ-នេកោ នៅក្នុងឡភ្លើងដ៏សន្ធោសន្ធៅ ( សូមមើល សៀវភៅរូបភាពដំណឹងល្អ ល.រ. ២៥ ) ហើយសូមឲ្យកុមាររាប់មនុស្សនៅក្នុងឡ ។ សូមមើល ដានីយ៉ែល ៣:២៤–២៥ ដើម្បីរកមើលថា តើមាននរណាទៀតនៅក្នុងឡនោះ ។ សូមចែកចាយទីបន្ទាល់របស់បងប្អូនថា ព្រះអម្ចាស់គង់នៅជាមួយយើង កាលដែលយើងធ្វើតាមទ្រង់ ។
ព្រះវរបិតាសួគ៌សព្វព្រះទ័យឲ្យខ្ញុំអធិស្ឋានជាញឹកញាប់ ។
ដានីយ៉ែលបានសុខចិត្តប្រថុយជីវិតលោក ដើម្បីលោកអាចអធិស្ឋានទៅព្រះវរបិតាសួគ៌ជារៀងរាល់ថ្ងៃ ។ តើបងប្អូនអាចជួយកុមារឲ្យបង្កើតបំណងប្រាថ្នាស្រដៀងគ្នានេះដោយរបៀបណា ?
សកម្មភាពដែលអាចធ្វើបាន
-
សូមនិទានរឿងមកពី ដានីយ៉ែល ៦ ( សូមមើល ដានីយ៉ែល និងរូងសិង្ហ នៅក្នុង ដំណើររឿងព្រះគម្ពីរសញ្ញាចាស់ ) ហើយអញ្ជើញកុមារឲ្យគូររូបភាពមួយអំពីដំណើររឿងនេះ ។ សូមឲ្យកុមារប្រើរូបភាពរបស់ពួកគេដើម្បីនិទានរឿងនោះឲ្យគ្នាស្ដាប់ទៅវិញទៅមក ។ ហេតុអ្វីព្រះវរបិតាសួគ៌សព្វព្រះទ័យឲ្យយើងអធិស្ឋានទៅទ្រង់ ? សូមចែកចាយពីមូលហតុដែលការអធិស្ឋានសំខាន់ចំពោះបងប្អូន ។
-
សូមនិយាយជាមួយកុមារអំពីគ្រាទាំងឡាយ ដែលពួកគេអាចអធិស្ឋាន ដូចជាពេលពួកគេភ័យខ្លាច ពេលពួកគេធ្វើខុស ឬពេលពួកគេត្រូវការជំនួយនៅសាលារៀន ។ ហេតុអ្វីវាល្អ ដើម្បីអធិស្ឋាននៅក្នុងស្ថានភាពទាំងនេះ ? សូមបង្រៀនកុមារថា មិនថាពួកគេនៅទីណាទេ ពួកគេអាចអធិស្ឋាននៅក្នុងដួងចិត្តពួកគេបានជានិច្ច ។
-
សូមច្រៀងចម្រៀងមួយបទរួមគ្នាអំពីការអធិស្ឋាន ដូចជាបទ « យើងបន្ទន់កេសា » ( សៀវភៅចម្រៀងកុមារ ទំព័រ ១៨B ) ។ សូមនិយាយជាមួយកុមារអំពីអ្វីដែលយើងអាចអធិស្ឋានសូម ។
បង្រៀនគោលលទ្ធិ ៖ កុមារធំៗ
ដានីយ៉ែល ១; ៣; ៦
ខ្ញុំអាចធ្វើអ្វីដែលត្រឹមត្រូវ សូម្បីតែនៅពេលវាពិបាកក្ដី ។
ដំណើររឿងនៅក្នុង ដានីយ៉ែល ១, ៣ និង ៦ អាចផ្ដល់ដល់កុមារដែលបងប្អូនបង្រៀននូវភាពក្លាហាន និងសេចក្ដីជំនឿ ដើម្បីធ្វើការជ្រើសរើសល្អៗ សូម្បីតែនៅពេលពួកគេមានអារម្មណ៍ឯកោក្ដី ។
សកម្មភាពដែលអាចធ្វើបាន
-
សូមគូររូបសញ្ញាព្រួញបួនប្រាំនៅលើក្ដារខៀន ដោយឲ្យសញ្ញាព្រួញទាំងអស់ចង្អុលទៅទិសដៅដូចគ្នា និងសញ្ញាព្រួញមួយចង្អុលទៅទិសដៅផ្ទុយពីគេ ។ តើដានីយ៉ែល និងមិត្តភក្ដិរបស់លោកដូចជាសញ្ញាព្រួញមួយនេះយ៉ាងដូចម្ដេច ? សូមអញ្ជើញកុមារឲ្យផ្ដល់ឧទាហរណ៍ទាំងឡាយចេញពីដំណើររឿងនៅក្នុង ដានីយ៉ែល ១, ៣ និង ៦ ( សូមមើល « ដានីយ៉ែល និងមិត្តរបស់លោក » « សាដ្រាក់ មែសាក់ និងអ័បេឌ-នេកោ » និង « ដានីយ៉ែល និងរូងសិង្ហ » នៅក្នុង ដំណើររឿងព្រះគម្ពីរសញ្ញាចាស់ ) ។ ឲ្យកុមារគិតអំពីមូលហេតុដែលពួកគេគិតថា វាអាចជាការលំបាកចំពោះដានីយ៉ែល និងមិត្តភក្ដិរបស់លោកដើម្បីធ្វើការជ្រើសរើសត្រឹមត្រូវនោះ ។ តើព្រះអម្ចាស់បានប្រទានពរដល់ពួកគេយ៉ាងណា សម្រាប់ការជ្រើសរើសត្រឹមត្រូវនេះ ?
-
សូមជួយកុមារឲ្យគិតអំពីស្ថានភាពនានា នៅពេលដែលពួកគេអាចមានសម្ពាធឲ្យធ្វើការជ្រើសរើសខុស ។ សូមអញ្ជើញកុមារឲ្យចែកចាយនូវបទពិសោធន៍នានា នៅពេលពួកគេបានទទួលពរជ័យចំពោះការជ្រើសរើសត្រឹមត្រូវ ទោះបីជាវាពិបាកក៏ដោយ ។ សូមច្រៀងចម្រៀងមួយបទដែលទាក់ទងនឹងប្រធានបទនេះ ដូចជា « ជ្រើសរើសផ្លូវត្រូវ » ( សៀវភៅចម្រៀងកុមារ ទំព័រ ៨២ ) ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជានគរព្រះនៅលើផែនដី ។
នៅពេលដានីយ៉ែលបានថ្វាយការបកស្រាយដ៏បំផុសគំនិតរបស់លោកអំពីសុបិនរបស់ស្ដេចនេប៊ូក្នេសា លោកបានឃើញថ្មមួយ « ដាប់ផ្តាច់ចេញពីភ្នំឥតមានដៃអ្នកណាធ្វើឡើយ » ( ដានីយ៉ែល ២:៤៥ ) ។ ថ្មនេះតំណាងឲ្យសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលត្រូវទៅបំពេញផែនដីទាំងមូល ។
សកម្មភាពដែលអាចធ្វើបាន
-
សូមអាន ដានីយ៉ែល ២:៣១–៣៥, ៤៤–៤៥ ជាមួយកុមារ ហើយអញ្ជើញពួកគេឲ្យគូររូបភាពមួយអំពីអ្វីដែលនេប៊ូក្នេសាបានឃើញនៅក្នុងសុបិនរបស់ទ្រង់ ។ សូមសួរកុមារថា តើពួកគេរៀនអ្វីខ្លះចេញពីខគម្ពីរទាំងនេះ អំពីថ្មនៅក្នុងសុបិននោះ ។ សូមពន្យល់ថា ថ្មនេះតំណាងឲ្យសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សូមឲ្យកុមាររៀបរាប់ការណ៍មួយចំនួន ដែលព្រះវរបិតាសួគ៌បានធ្វើ ដើម្បីរៀបចំសាសនាចក្ររបស់ទ្រង់នៅក្នុងថ្ងៃចុងក្រោយនេះ ។ ដើម្បីផ្ដល់គំនិតដល់ពួកគេ សូមបង្ហាញរូបភាពនៃព្រឹត្តិការណ៍នានានៅក្នុងការស្ដារឡើងវិញរបស់សាសនាចក្រ ( សូមមើល សៀវភៅរូបភាពដំណឹងល្អ ល.រ. ៩០–៩៥ ) ។
-
សូមឲ្យក្រដាសខ្ញុកខ្ញូវមួយទៅកុមារ ដើម្បីតំណាងឲ្យថ្មនៅក្នុងសុបិនរបស់នេប៊ូក្នេសា ។ សូមឲ្យកុមារម្នាក់ៗចែកចាយពីរបៀបដែលគេដឹងថា សាសនាចក្រត្រូវបានស្ដារឡើងវិញដោយព្រះ ។ កាលដែលកុមារចែកចាយ សូមអញ្ជើញពួកគេឲ្យប្រគល់ « ថ្ម » របស់ពួកគេមកបងប្អូន ។ សូមរុំថ្មទាំងនោះចូលគ្នា ដោយប្រើស្កុត ឬខ្សែដើម្បីបង្កើតជាថ្មធំមួយផ្ទាំង ។ សូមថ្លែងទីបន្ទាល់ថា កាលដែលយើងពង្រឹងទីបន្ទាល់របស់យើង និងចែកចាយដំណឹងល្អជាមួយមនុស្សដទៃ នោះយើងបង្រួបបង្រួមសេចក្ដីជំនឿរបស់យើង ដើម្បីជួយដល់នគរព្រះឲ្យ « [ បំពេញ ] ផែនដីទាំងដុំមូល » ( ដានីយ៉ែល ២:៣៥ ) ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យធ្វើអ្វីមួយនៅសប្តាហ៍នេះ ដែលបង្ហាញសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ ។
ការកែលម្អការបង្រៀនរបស់យើង
ជួយសិស្សឲ្យស្គាល់ពីព្រះវិញ្ញាណ ។ កាលដែលបងប្អូនមានបទពិសោធន៍ខាងវិញ្ញាណជាមួយនឹងកុមារ សូមជួយពួកគេឲ្យស្គាល់ពីព្រះចេស្ដានៃព្រះវិញ្ញាណបរិសុទ្ធ ។