« ថ្ងៃទី ១៤–២០ ខែ វិច្ឆិកា ។ អេម៉ុស; អូបាឌា ៖ ‹ ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ ›» ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ១៤–២០ ខែ វិច្ឆិកា ។ អេម៉ុស; អូបាឌា » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២

នំប៉័ងជីវិត ដោយ គ្រីស យ៉ង់

ថ្ងៃទី ១៤–២០ ខែ វិច្ឆិកា

អេម៉ុស; អូបាឌា

« ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ »

កាលដែលបងប្អូនផ្ដោតលើការបង្រៀនគោលលទ្ធិពិតតាមរបៀបដ៏សាមញ្ញ នោះបងប្អូនផ្ដល់ឱកាសដល់ព្រះវិញ្ញាណដើម្បីថ្លែងទីបន្ទាល់ចំពោះកុមារ ។ សូមប្រើសកម្មភាពនៅក្នុងគម្រោងមេរៀននេះ—ឬបង្កើតសកម្មភាពរបស់បងប្អូនផ្ទាល់—ដើម្បីជួយបងប្អូនឲ្យបង្រៀនគោលការណ៍ដំណឹងល្អតាមរបៀបដ៏សាមញ្ញនានា ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមឲ្យកុមារចែកចាយពីអ្វីមួយ ដែលពួកគេបានរៀនថ្មីៗនេះនៅផ្ទះ ឬនៅព្រះវិហារ ។ ឧទាហរណ៍ សូមសួរថាបើពួកគេបានរកឃើញបទគម្ពីរដែលចូលចិត្តថ្មី ឬបានឮសារលិខិតមួយដែលពួកគេអាចចែកចាយជាមួយនឹងកុមារក្នុងថ្នាក់ ។

បង្រៀនគោលលទ្ធិ ៖ កុមារតូចៗ

អេម៉ុស ៣:៧; ៧:១៤–១៥

ពួកព្យាការីគឺសារទូតរបស់ព្រះយេស៊ូវគ្រីស្ទ ។

អ្វីដែលសំខាន់បំផុតដែលកុមារអាចដឹងបានអំពីពួកព្យាការី គឺថា ពួកលោកជាសារទូតរបស់ព្រះយេស៊ូវគ្រីស្ទ ។ គំនិតយោបល់ខាងក្រោមនេះ អាចជួយបងប្អូនឲ្យបង្រៀនអំពីសេចក្ដីពិតដ៏សំខាន់នេះបាន ។

សកម្មភាពដែលអាចធ្វើបាន

សូមខ្សឹបសារមួយប្រាប់កុមារម្នាក់សម្រាប់កុមារទាំងអស់នៅក្នុងថ្នាក់ ( ដូចជា សូមកុមារឲ្យឈរជើងមួយ ឬបង្វិលខ្លួន ) ហើយសូមកុមារនោះឲ្យចែកចាយសារនោះជាមួយនឹងកុមារផ្សេងទៀត ។ ចូរធ្វើសកម្មភាពនេះដដែលៗ ដោយអនុញ្ញាតឲ្យកុមារផ្សេងទៀតពីរបីនាក់ធ្វើជាសារទូត ។ សូមជួយពួកគេឲ្យយល់ពីរបៀបដែលសារទូតនៅក្នុងសកម្មភាពនេះគឺដូចជាព្យាការីម្នាក់ ដែលចែកចាយសាររបស់ព្រះជាមួយនឹងយើង ។ សូមចែកចាយឧទាហរណ៍មួយចំនួននៃសារលិខិតថ្មីៗមកពីព្យាការីដែលនៅរស់ ដែលបានជួយបងប្អូនឲ្យខិតទៅកាន់តែជិតព្រះយេស៊ូវគ្រីស្ទ ។
សូមអញ្ជើញកុមារម្នាក់ឲ្យមកឈរនៅខាងមុខបន្ទប់ ហើយធ្វើជាព្យាការីអេម៉ុស ។ កាលដែលបងប្អូនចែកចាយពីរឿងមួយចំនួនអំពីអេម៉ុស ចេញពី អេម៉ុស ៧:១៤–១៥ សូមឲ្យរូបភាព ឬវត្ថុជំនួយទៅកុមារកាន់ ដែលត្រូវទៅនឹងដំណើររឿងទាំងនោះ ដូចជា រូបចៀម ផ្លែឈើ និងព្រះអម្ចាស់ ។ សូមពន្យល់ថា អេម៉ុសគឺជាអ្នកគង្វាលម្នាក់ ដែលព្រះអម្ចាស់បានហៅឲ្យធ្វើជាសារទូតរបស់ទ្រង់ ។ បន្ទាប់មក សូមបង្ហាញរូបភាពព្រះអម្ចាស់ និងព្យាការីដែលនៅរស់ ហើយពន្យល់ថា ព្រះអម្ចាស់នៅតែបន្តហៅសារទូតនៅសព្វថ្ងៃនេះ ។ សូមអាន អេម៉ុស ៣:៧ ឮៗ ហើយសូមឲ្យកុមារចង្អុលទៅរូបភាពត្រឹមត្រូវ នៅពេលពួកគេស្ដាប់ឮពាក្យ « ព្រះយេហូវ៉ា » និង « ពួកហោរា » ។ សូមថ្លែងទីបន្ទាល់របស់បងប្អូនថា គឺដូចជានៅក្នុងជំនាន់អេម៉ុសដែរ ព្រះយេស៊ូវគ្រីស្ទមានព្រះបន្ទូលមកកាន់យើង តាមរយៈពួកព្យាការីរបស់ទ្រង់ ។
សូមចែកចាយរឿងមួយចេញពីទស្សនាវដ្ដីសាសនាចក្រថ្មីៗ អំពីព្យាការីដែលនៅរស់ ឬអំពីបទពិសោធន៍របស់សមាជិកសាសនាចក្រ ពេលដែលពួកគេបានធ្វើតាមការប្រឹក្សារបស់ព្យាការី ។ ( សូមមើលផងដែរ « Meet Today’s Prophets and Apostles » នៅគេហទំព័រ ChurchofJesusChrist.org ) ។
សូមច្រៀង ឬចាក់ចម្រៀងមួយបទអំពីព្យាការី ដូចជាបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨ ) កាលដែលកុមារកំពុងធ្វើកិច្ចការលើទំព័រសកម្មភាពសប្ដាហ៍នេះ ។ សូមចង្អុលបង្ហាញដល់កុមារនូវឃ្លាទាំងឡាយនៅក្នុងចម្រៀងនោះ ដែលបង្រៀនអំពីរបៀបដែលព្យាការីដឹកនាំផ្លូវទៅកាន់ព្រះយេស៊ូវគ្រីស្ទ ។

អេម៉ុស ៥:១៤

ប្រសិនបើខ្ញុំស្វែងរកសេចក្ដីល្អ នោះព្រះអម្ចាស់នឹងគង់នៅជាមួយខ្ញុំ ។

អេម៉ុសបានអញ្ជើញពួកសាសន៍អ៊ីស្រាអែលឲ្យ « ស្វែងរកសេចក្តីល្អ កុំរកសេចក្តីអាក្រក់ឡើយ » ហើយបានសន្យាថា ប្រសិនបើពួកគេធ្វើដូច្នោះ នោះ « ព្រះយេហូវ៉ា … ទ្រង់នឹងគង់នៅជាមួយនឹងឯង » ។ តើបងប្អូននឹងជួយកុមារឲ្យឆ្លើយតបចំពោះការអញ្ជើញនេះ ហើយទទួលបានការសន្យានេះដោយរបៀបណា ?

សកម្មភាពដែលអាចធ្វើបាន

សូមដាក់បង្ហាញរូបភាពមួយចំនួននៃកុមារ ដែលកំពុងធ្វើកិច្ចការល្អៗ ដូចជា កំពុងជួយមនុស្សផ្សេងទៀត ឬកំពុងទទួលទានសាក្រាម៉ង់ ។ សូមទុកឲ្យកុមារម្នាក់ៗប្ដូរវេនគ្នាពិពណ៌នាអំពីរូបភាពទាំងឡាយ ខណៈដែលកុមារផ្សេងទៀតទស្សន៍ទាយពីអ្វីដែលគេកំពុងពិពណ៌នា ។ សូមអាន អេម៉ុស ៥:១៤ ហើយជួយកុមារឲ្យគិតពីវិធីនានា ដែលពួកគេនឹង « ស្វែងរកសេចក្ដីល្អ » ជារៀងរាល់ថ្ងៃ ។
សូមអញ្ជើញកុមារឲ្យគូររូបខ្លួនពួកគេកំពុងធ្វើអ្វីដែលល្អ ។ សូមអាន អេម៉ុស ៥:១៤ ហើយសង្កត់ធ្ងន់លើការសន្យារបស់ព្រះអម្ចាស់ដែលថា ទ្រង់នឹងគង់នៅជាមួយយើង ពេលយើងស្វែងរកសេចក្ដីល្អ ។ សូមអញ្ជើញកុមារឲ្យបន្ថែមទៅលើគំនូររបស់ពួកគេនូវរូបព្រះយេស៊ូវកំពុងឈរជាមួយពួកគេ ។

បង្រៀនគោលលទ្ធិ ៖ កុមារធំៗ

ពួកសាវកសម័យទំនើបកំពុងចាប់ដៃគ្នានៅឯសន្និសីទទូទៅ — ព្រះអម្ចាស់បើកបង្ហាញសេចក្តីពិតទាំងឡាយដល់ពួកព្យាការីរបស់ទ្រង់ ។

អេម៉ុស ៣:៧

ពួកព្យាការីគឺសារទូតរបស់ព្រះយេស៊ូវគ្រីស្ទ ។

អេម៉ុស ៣:៧ គឺជាវគ្គបទគម្ពីរដ៏អស្ចារ្យមួយ ដើម្បីជួយកុមារឲ្យដឹងថា នៅពេលយើងស្ដាប់តាមព្យាការី នោះយើងកំពុងស្ដាប់តាមសារទូតរបស់ព្រះយេស៊ូវគ្រីស្ទ ។

សកម្មភាពដែលអាចធ្វើបាន

សូមជួយកុមារឲ្យទន្ទេញ អេម៉ុស ៣:៧ ។ ឧទាហរណ៍ សូមផ្ដល់ពេលឲ្យពួកគេពីរបីនាទី ដើម្បីអានខគម្ពីរនោះបួនប្រាំដង ខណៈដែលបងប្អូនសរសេរមួយពាក្យរំលងមួយពាក្យៗនៃខគម្ពីរនោះនៅលើក្ដារខៀន ។ សូមអញ្ជើញកុមារឲ្យបិទព្រះគម្ពីររបស់ពួកគេ ហើយថាខគម្ពីរនោះឮៗជាមួយគ្នា ដោយប្រើប្រាស់តម្រុយនៅលើក្ដារខៀន ។ បន្ទាប់មក សូមលុបម្ដងពីរបីពាក្យចេញ រហូតទាល់តែកុមារអាចថាឡើងវិញនូវខគម្ពីរទាំងមូលដោយគ្មានតម្រុយសោះ ។ តើខគម្ពីរនេះបង្រៀនយើងអ្វីខ្លះ អំពីពួកព្យាការី ? តើព្យាការីនៅរស់របស់យើង បានជួយយើងឲ្យដឹងពីអ្វីដែលព្រះអង្គសង្រ្គោះមានព្រះទ័យចង់ឲ្យយើងធ្វើយ៉ាងដូចម្ដេច ?
សូមសរសេរសំណួរមួយចំនួនអំពីព្យាការីនៅលើចម្រៀកក្រដាស ដូចជាសំណួរដូចតទៅនេះ ៖ តើហេតុអ្វីយើងមានពួកព្យាការី ? តើពួកព្យាការីធ្វើអ្វី ? តើហេតុអ្វីប្អូនៗធ្វើតាមព្យាការី ? តើពួកព្យាការីបង្រៀនអំពីអ្វី ? សូមឲ្យកុមារចាប់ដៃគូ ហើយឲ្យកុមារម្នាក់មកពីដៃគូនីមួយៗ ជ្រើសរើសសំណួរមួយ ហើយសួរដៃគូរបស់គេឲ្យឆ្លើយវា ។ ប្រសិនបើកុមារត្រូវការជំនួយដើម្បីឆ្លើយសំណួរមួយ ពួកគេអាចមើលនៅក្នុង « ព្យាការី » នៅក្នុង សេចក្តីណែនាំដល់គម្ពីទាំងឡាយ បាន ( scriptures.ChurchofJesusChrist.org ) ។ បន្ទាប់ពីដៃគូឆ្លើយសំណួរនោះហើយ កុមារអាចប្ដូរតួនាទីគ្នា ហើយជ្រើសរើសសំណួរមួយទៀត ។
សូមចែកចាយជាមួយកុមារនូវការពិតមួយចំនួនអំពីព្យាការីក្នុងព្រះគម្ពីរសញ្ញាចាស់ ដែលពួកគេបានរៀននៅក្នុងឆ្នាំនេះ ( ដូចជា ណូអេ ម៉ូសេ ឬ អេសាយ ) ។ សូមឲ្យពួកគេទាយថាព្យាការីណាដែលបងប្អូនកំពុងពិពណ៌នា ។ សូមធ្វើដដែលៗសម្រាប់ព្យាការីផ្សេងទៀត ។

អេម៉ុស ៥:៤–១៥

ប្រសិនបើខ្ញុំស្វែងរកសេចក្ដីល្អ នោះព្រះអម្ចាស់នឹងគង់នៅជាមួយខ្ញុំ ។

កុមារមានឱកាសជាច្រើន ដើម្បីជ្រើសរើសរវាងត្រូវ និងខុស ។ សូមពិចារណាអំពីរបៀបដែលបងប្អូននឹងបំផុសគំនិតពួកគេឲ្យ « ស្វែងរកសេចក្តីល្អ កុំរកសេចក្តីអាក្រក់ឡើយ » ( ខទី ១៤ ) ។

សកម្មភាពដែលអាចធ្វើបាន

សូមអញ្ជើញកុមារឲ្យស្រាវជ្រាវ អេម៉ុស ៥:៤–១៥ ដោយរកមើលពាក្យ « ស្វែងរក » ។ តើព្រះអម្ចាស់មានព្រះទ័យចង់ឲ្យយើងស្វែងរកអ្វីខ្លះ ហើយការសន្យាអ្វីខ្លះដែលទ្រង់ធ្វើជាមួយពួកអ្នកដែលធ្វើដូច្នោះ ? តើយើងស្វែងរកព្រះអម្ចាស់តាមរបៀបណា ?
សូមជួយកុមារឲ្យទន្ទេញប្រយោគចុងក្រោយនៃមាត្រានៃសេចក្ដីជំនឿទីដប់បី ។ តើយើងស្វែងរក « របស់ផងទាំងនេះ » តាមរបៀបណា ?

អេម៉ុស ៨:១១–១២

ការស្ដារឡើងវិញនៃដំណឹងល្អបានបញ្ចប់អំណត់ដែលជាការក្បត់សាសនា ។

ការយល់នូវអ្វីដែលអេម៉ុសបានបង្រៀនអំពីការក្បត់សាសនា អាចជួយកុមារឲ្យមានអំណរគុណចំពោះការស្ដារឡើងវិញនៃដំណឹងល្អ ។

សកម្មភាពដែលអាចធ្វើបាន

សូមអញ្ជើញកុមារឲ្យអាន អេម៉ុស ៨:១១–១២ ហើយនិយាយអំពីអ្វីដែលកើតឡើង នៅពេលមនុស្សមិនមានព្រះបន្ទូលរបស់ព្រះ ។ សូមជួយកុមារឲ្យពន្យល់ពាក្យ សេចក្ដីក្បត់សាសនា និង អំណត់ ដោយប្រើប្រាស់ សេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) ឬវចនានុក្រម ។ តើការក្បត់សាសនាដូចគ្នាទៅនឹងអំណត់យ៉ាងដូចម្ដេចដែរ ?
ដើម្បីជួយកុមារឲ្យយល់អំពីការក្បត់សាសនាដ៏ធំ សូមរំឭកជាមួយពួកគេនូវ « After the New Testament » ( នៅក្នុង New Testament Stories ទំព័រ ១៦៧–៧០ ) ។ បន្ទាប់មក សូមពិភាក្សាពីសំណួរទាំងឡាយដូចនេះ ៖ ហេតុអ្វីមានការក្បត់សាសនា ? តើមានអ្វីដែលបានកើតឡើងជាលទ្ធផលមកពីការក្បត់សាសនា ? ហេតុអ្វីព្រះអម្ចាស់បានស្ដារដំណឹងល្អរបស់ទ្រង់ឡើងវិញ ? ( សូមមើលផងដែរ « ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » នៅលើគេហទំព័រ ChurchofJesusChrist.org ) ។ សូមលើកទឹកចិត្តកុមារឲ្យសរសេរសំណួរទាំងនេះ និងចម្លើយរបស់ពួកគេទុក ហើយចែកចាយវាជាមួយក្រុមគ្រួសាររបស់ពួកគេនៅផ្ទះ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមផ្ដល់ពេលឲ្យកុមារមួយសន្ទុះ ដើម្បីគិតអំពីអ្វីដែលពួកគេបានរៀននៅថ្ងៃនេះ ដែលពួកគេចង់ចែកចាយជាមួយនឹងសមាជិកគ្រួសារម្នាក់ ។ សូមលើកទឹកចិត្តពួកគេឲ្យសម្រេចចិត្តថា នរណាដែលពួកគេនឹងចែកចាយវាជាមួយ និងរបៀបដែលពួកគេនឹងចែកចាយវា ។

ការកែលម្អការបង្រៀនរបស់យើង

ផ្ដល់ការអញ្ជើញដែលគោរពដល់សិទ្ធិជ្រើសរើស ។ សូមសួរសំណួរទាំងឡាយ ដែលជួយកុមារឲ្យគិតពីវិធីផ្ទាល់ខ្លួននានា ដើម្បីអនុវត្តអ្វីដែលពួកគេបានរៀន ។ ឧទាហរណ៍ បងប្អូនអាចសួរថា « តើរឿងអ្វីមួយដែលប្អូនៗមានអារម្មណ៍ថា ប្អូនៗគួរតែធ្វើ ដោយផ្អែកលើអ្វីដែលយើងបាននិយាយគ្នានៅថ្ងៃនេះ ? »

ទំព័រសកម្មភាព ៖ ពួកព្យាការីគឺជាសារទូតរបស់ព្រះយេស៊ូវគ្រីស្ទ ។