« ព្យាការីយ៉ូណាស » ដំណើររឿងព្រះគម្ពីរសញ្ញាចាស់ ( ឆ្នាំ ២០២១ )
« ព្យាការីយ៉ូណាស » ដំណើររឿងព្រះគម្ពីរសញ្ញាចាស់
យ៉ូណាស ១–៤
ព្យាការីយ៉ូណាស
ការរៀនទុកចិត្តលើសេចក្តីមេត្តាករុណារបស់ព្រះអម្ចាស់
យ៉ូណាសគឺជាព្យាការី ។ ព្រះអម្ចាស់បានបង្គាប់ឲ្យលោកព្រមានដល់ប្រជាជននៅក្រុងនីនីវេថា ទីក្រុងរបស់ពួកគេនឹងត្រូវបំផ្លាញ ប្រសិនបើពួកគេមិនប្រែចិត្តទេនោះ ។
ប៉ុន្តែ ប្រជាជននៅក្រុងនីនីវេគឺជាសត្រូវនឹងសាសន៍អ៊ីស្រាអែល ។ យ៉ូណាសមិនចង់ផ្សព្វផ្សាយទៅកាន់ពួកគេនោះទេ ។ ដូច្នេះ លោកក៏ឡើងទៅលើសំពៅជិះទៅឆ្ងាយពីក្រុងនីនីវេ ។
យ៉ូណាសបាននៅលើសំពៅ ខ្យល់ព្យុះដ៏កំណាចក៏បានមកដល់ ។ មនុស្សដែលនៅលើសំពៅបានភ័យខ្លាចបាត់បង់ជីវិតរបស់ពួកគេ ។ ពួកគេបានសុំឲ្យយ៉ូណាសអធិស្ឋានទៅព្រះអម្ចាស់ដើម្បីជួយសង្រ្គោះពួកគេ ។
យ៉ូណាសបានដឹងថា ព្រះអម្ចាស់បានបញ្ជូនព្យុះមក ពីព្រោះលោករត់គេចពីអ្វីដែលព្រះអម្ចាស់បង្គាប់ឲ្យលោកធ្វើ ។ យ៉ូណាសចង់ជួយសង្រ្គោះមនុស្សនៅលើសំពៅនោះ ។ លោកបាននិយាយថា ប្រសិនបើពួកគេបោះលោកចូលទៅក្នុងសមុទ្រ នោះខ្យល់ព្យុះនឹងស្ងប់ ។
ពួកបុរសទាំងនោះពុំចង់បោះយ៉ូណាសចេញពីសំពៅឡើយ ។ ពួកគេព្យាយាមកាច់សំពៅទៅឯច្រាំងវិញ ប៉ុន្តែខ្យល់ព្យុះនោះមានកម្លាំងខ្លាំងណាស់ ។ នៅទីបំផុត ពួកគេក៏បោះយ៉ូណាសចូលទៅក្នុងសមុទ្រ ។
ព្យុះក៏ស្ងប់ទៅ ។ ប៉ុន្តែបន្ទាប់មក យ៉ូណាសត្រូវបានត្រីដ៏ធំមួយលេប ។
យ៉ូណាសនៅក្នុងពោះត្រីអស់រយៈពេលបីថ្ងៃ បីយប់ ។ នៅអំឡុងពេលនោះ យ៉ូណាសបានអធិស្ឋាន ហើយបានប្រែចិត្ត ។ លោកចង់ធ្វើអ្វីដែលត្រឹមត្រូវ ហើយស្តាប់តាមព្រះអម្ចាស់ ។ ព្រះអម្ចាស់បានឮការអធិស្ឋានរបស់យ៉ូណាស ហើយបានធ្វើឲ្យត្រីខ្ជាក់យ៉ូណាសនៅលើដីគោកវិញ ។
ជាថ្មីម្តងទៀត ព្រះអម្ចាស់បានបង្គាប់ឲ្យយ៉ូណាស ទៅផ្សព្វផ្សាយដល់ប្រជាជននៅក្រុងនីនីវេ ។ លើកនេះ យ៉ូណាសបានប្រតិបត្តិតាម ។ លោកបានទៅក្រុងនីនីវេ ហើយប្រាប់ប្រជាជនឲ្យប្រែចិត្ត បើមិនដូច្នោះទេ ព្រះអម្ចាស់នឹងបំផ្លាញទីក្រុងរបស់ពួកគេហើយ ។ ស្ដេច និងប្រជារាស្រ្តរបស់ទ្រង់បានប្រែចិត្ត ។ ព្រះអម្ចាស់បានព្រះរាជទានទោសដល់ពួកគេ ហើយមិនបំផ្លាញទីក្រុងនីនីវេឡើយ ។
ប៉ុន្តែ យ៉ូណាសបានខកចិត្តដែលប្រជាជននេះមិនត្រូវបានបំផ្លាញ ។ លោកបានគិតថា ពួកគេពុំសមនឹងទទួលបានការអភ័យទោសនោះទេ ។
ដើម្បីបង្រៀនមេរៀនមួយដល់យ៉ូណាស នោះព្រះអម្ចាស់បានដាំដើមឈើមួយដើម ដើម្បីធ្វើជាម្លប់ឲ្យយ៉ូណាសជ្រកពីព្រះអាទិត្យ ។ បន្ទាប់មក ដើមឈើនោះបានងាប់ ហើយ យ៉ូណាសមានអារម្មណ៍សោកស្តាយដើមឈើនោះ ។
ព្រះអម្ចាស់បានបង្រៀនយ៉ូណាសនូវមេរៀនមួយអំពីបុត្រាបុត្រីរបស់ទ្រង់ ។ យ៉ូណាសបានរៀនថា លោកគួរតែពិបាកចិត្ត នៅពេលប្រជាជនមិនប្រែចិត្ត ហើយថា លោកគួរតែសប្បាយចិត្ត នៅពេលពួកគេប្រែចិត្ត ។