« យ៉ូសែប និងអំណត់អត់ » ដំណើររឿងព្រះគម្ពីរសញ្ញាចាស់ ( ឆ្នាំ២០២២ )
« យ៉ូសែប និងអំណត់អត់ » ដំណើររឿងព្រះគម្ពីរសញ្ញាចាស់
យ៉ូសែប និងអំណត់អត់
ឱកាសរបស់ប្អូនប្រុសម្នាក់ដើម្បីបង្រួបបង្រួមគ្រួសាររបស់លោក
គ្រួសាររបស់យ៉ាកុបរងការអត់ឃ្លាន ដោយសារតែអំណត់អត់ ។ ដូច្នេះ យ៉ាកុបបានឲ្យកូនប្រុសៗរបស់លោកទៅស្រុកអេស៊ីព្ទដើម្បីទិញស្បៀងអាហារ ។ លោកបានទុកកូនប្រុសពៅរបស់លោក បេនយ៉ាមីន ឲ្យនៅផ្ទះ ។ លោកខ្លាចថានឹងបាត់បង់បេនយ៉ាមីន ដូចជាលោកបានបាត់បង់កូនប្រុសរបស់លោក យ៉ូសែប ជាច្រើនឆ្នាំកន្លងទៅដែរ ។ លោកពុំបានដឹងថា កូនប្រុសបងៗរបស់លោកបានលក់ យ៉ូសែបឲ្យធ្វើជាទាសករនោះទេ ។
នៅគ្រានោះ យ៉ូសែបគឺជាអ្នកដឹកនាំដ៏អស្ចារ្យនៅស្រុកអេស៊ីព្ទ ។ លោកទទួលខុសត្រូវលើការលក់ស្បៀងអាហារអំឡុងពេលអំណត់អត់នេះ ។ ពួកបងប្រុសបានជួបនឹងយ៉ូសែប ហើយបានសូមទិញស្បៀងអាហារពីលោក ។ ពួកគេមិនបានស្គាល់លោកទេ ។
យ៉ូសែបស្គាល់ពួកគេភ្លាម ប៉ុន្ដែលោកធ្វើជាមិនស្គាល់ពួកគេ ។ លោកបានសួរអំពីគ្រួសាររបស់ពួកគេ ដើម្បីដឹងថា តើឪពុក និងប្អូនប្រុសរបស់លោក បេនយ៉ាមីននៅរស់ឬអត់ ។
បន្ទាប់មក យ៉ូសែបបានផ្ដល់ស្បៀងអាហារដល់បងប្រុសរបស់លោក ។ លោកបានប្រាប់ពួកគេថា កុំត្រឡប់មកវិញទិញស្បៀងអាហារថែមទៀតឡើយ លើកលែងតែពួកគេនាំប្អូនប្រុសពៅរបស់ពួកគេ បេនយ៉ាមីនមកជាមួយពួកគេ ។
នៅពេលគ្រួសារនេះអស់ស្បៀងអាហារម្ដងទៀត នោះយ៉ាកុបបានដឹងថា លោកត្រូវតែបញ្ជូនបេនយ៉ាមីន ឲ្យទៅជាមួយនឹងកូនប្រុសដទៃទៀតរបស់លោកទៅស្រុកអេស៊ីព្ទ ។ យ៉ាកុបនៅតែខ្លាចមិនចង់ឲ្យបេនយ៉ាមីនទៅនោះទេ ។ ប៉ុន្ដែ យូដា ដែលជាបងប្រុសម្នាក់ បានសន្យាថា គាត់នឹងថែរក្សាបេនយ៉ាមីនឲ្យមានសុវត្ថិភាព ។
នៅពេលពួកបងប្រុសត្រឡប់ទៅស្រុកអេស៊ីព្ទវិញ នោះយ៉ូសែបធ្វើឲ្យវាមើលទៅដូចជា បេនយ៉ាមីនបានលួចពែងប្រាក់មួយអញ្ចឹង ។ លោកចង់ដឹងថា តើពួកបងប្រុសរបស់លោកបានផ្លាស់ប្ដូរឬអត់ ។ យូដាបានសូមយ៉ូសែបកុំឲ្យដាក់ទោសបេនយ៉ាមីនឡើយ ប៉ុន្ដែសូមដាក់ទោសយូដាជំនួសវិញ ។
យ៉ូសែបបានរីករាយពេលឃើញថា ពួកបងប្រុសរបស់លោកបានផ្លាស់ប្ដូរ ។ ពួកគេស្រឡាញ់បេនយ៉ាមីនខ្លាំងល្មម ដើម្បីការពារគាត់បាន ។ ដូច្នេះ នៅទីបញ្ចប់ យ៉ូសែបបានប្រាប់ពួកគេថា លោកជានរណា ។
យ៉ូសែបបានអភ័យទោសឲ្យបងប្រុសៗរបស់លោក ដែលបានលក់លោកឲ្យធ្វើជាទាសករ ។ យ៉ូសែបបានថ្លែងថា វាគឺជារបៀបរបស់ព្រះអម្ចាស់ ដើម្បីជួយគ្រួសាររបស់ពួកគេឲ្យរស់រានក្នុងពេលមានអំណត់អត់នេះ ។
ពួកបងប្រុសរបស់យ៉ូសែបបានត្រឡប់ទៅឯឪពុករបស់ពួកគេ យ៉ាកុបវិញ ហើយបានប្រាប់លោកអំពីរឿងទាំងអស់ដែលបានកើតឡើង ។ យ៉ាកុបបាននាំគ្រួសាររបស់លោកទាំងមូលទៅស្រុកអេស៊ីព្ទ ។
ផារ៉ោនបានស្វាគមន៍គ្រួសាររបស់យ៉ាកុប ។ ទ្រង់បានប្រទានដី និងសត្វដល់ពួកគេ ដើម្បីពួកគេអាចមានអាហារជាច្រើន ។ គ្រួសាររបស់យ៉ាកុបបានរស់នៅដោយសុខសាន្ដអស់រយៈពេលជាយូរ ។