« ដាវីឌ និង កូលីយ៉ាត » ដំណើររឿងព្រះគម្ពីរសញ្ញាចាស់ ( ឆ្នាំ២០២២ )
« ដាវីឌ និង កូលីយ៉ាត » ដំណើររឿងព្រះគម្ពីរសញ្ញាចាស់
សាំយូអែល ទី១ ១៧
ដាវីឌ និងកូលីយ៉ាត
ការប្រឈមនឹងឧបសគ្គដ៏ធំមួយ
សាសន៍ភីលីស្ទីនកំពុងវាយប្រហារសាសន៍អ៊ីស្រាអែល ។ រៀងរាល់ព្រឹក បុរសមាឌធំសាសន៍ភីលីស្ទីនម្នាក់ឈ្មោះកូលីយ៉ាតបានហៅសាសន៍អ៊ីស្រាអែលណាម្នាក់មកប្រកួតនឹងគាត់ ។ កូលីយ៉ាតមានមាឌធំ ហើយខ្ពស់ជាងមនុស្សគ្រប់គ្នា ហើយគាត់ជាមនុស្សកាចសាហាវ ។ គាត់មានពាក់គ្រឿងសឹកធ្ងន់ៗ ហើយដៃកាន់ ដាវ លំពែង និង ខែលដ៏ធំ ។ គ្មាននរណាម្នាក់ចង់ប្រកួតនឹងគាត់ឡើយ ។
ដាវីឌ គឺជាក្មេងប្រុសឃ្វាលចៀមម្នាក់ដែលមានសេចក្តីជំនឿលើព្រះអម្ចាស់ ។ ពួកបងប្រុសរបស់លោកគឺជាទាហាននៅក្នុងទ័ពអ៊ីស្រាអែល ។ មានថ្ងៃមួយ ដាវីឌបានយកអាហារខ្លះៗទៅឲ្យពួកបងប្រុសរបស់លោក ។ នៅពេលលោកទៅដល់ជំរំកងទ័ព លោកបានឮការហៅប្រកួតរបស់កូលីយ៉ាត ។
ដាវីឌបានសួរពួកទាហានថាហេតុអ្វីគ្មាននរណាម្នាក់ការពារអ៊ីស្រាអែល ។ ពួកបងប្រុសរបស់លោកបានខឹង ហើយបានប្រាប់លោកឲ្យទៅមើលចៀមវិញ ។ ប៉ុន្តែដាវីឌបានដឹងថា ព្រះអម្ចាស់នឹងការពារអ៊ីស្រាអែល ។
ស្ដេចសុលបានដឹងពីសេចក្ដីជំនឿរបស់ដាវីឌ ដូច្នេះទ្រង់បានសុំជួបនឹងដាវីឌ ។ ដាវីឌបានទូលទៅស្តេចសុលថា លោកមិនខ្លាចប្រកួតនឹងកូលីយ៉ាតឡើយ ។ ដាវីឌបានពន្យល់ថា មានម្ដងនោះពេលលោកកំពុងមើលចៀមរបស់លោក លោកបានសម្លាប់សត្វតោ និងសត្វខ្លាឃ្មុំ ។ ព្រះអម្ចាស់បានការពារលោកនៅពេលនោះ ហើយដាវីឌបានដឹងថា ព្រះអម្ចាស់នឹងការពារលោកនៅពេលនេះ ។
ស្តេចសុលបានឲ្យគ្រឿងសឹករបស់ទ្រង់ដល់ដាវីឌ ។ ប៉ុន្តែវាមិនល្មមដាវីឌទេ ដូច្នេះដាវីឌបានដោះវាចេញ ។ លោកបានសម្រេចចិត្តប្រកួតដោយគ្មានគ្រឿងសឹក ។
ដាវីឌបានរើសថ្មរលោងប្រាំដុំ ហើយដាក់វានៅក្នុងយាម ។ លោកបានយកខ្សែដង្ហក់របស់លោក និងដំបងសម្រាប់ឃ្វាលចៀម ហើយចេញទៅជួបនឹងកូលីយ៉ាត ។
នៅពេលកូលីយ៉ាតបានឃើញដាវីឌ គាត់បានស្រែកចំអកឲ្យដាវីឌ ។ គាត់បាននិយាយថា ក្មេងប្រុសឃ្វាលចៀមមិនអាចឈ្នះគាត់បានទេ ។ ដាវីឌបានស្រែកតបវិញថា លោកបានទុកចិត្តលើព្រះអម្ចាស់ដើម្បីការពារលោក ! ដាវីឌបាននិយាយថា លោកនឹងយកឈ្នះកូលីយ៉ាតដើម្បីបង្ហាញសេចក្ដីអស្ចារ្យរបស់ព្រះអម្ចាស់ ។
ដាវីឌបានរត់ទៅកាន់កូលីយ៉ាត ។ លោកបានគប់ថ្មនឹងខ្សែដង្ហក់របស់លោកភ្លាម ។ ថ្មនោះបានត្រូវចំថ្ងាសរបស់កូលីយ៉ាត ហើយបុរសមាឌធំនោះបានដួលទៅលើដី ។ ព្រះអម្ចាស់បានជួយដាវីឌឲ្យយកឈ្នះកូលីយ៉ាតដោយគ្មានដាវ ឬគ្រឿងសឹកឡើយ ។
នៅពេលសាសន៍ភីលីស្ទីនបានឃើញថា កូលីយ៉ាតបានស្លាប់ នោះពួកគេបានរត់ចេញដោយភ័យខ្លាច ។ សាសន៍អ៊ីស្រាអែលបានឈ្នះចម្បាំងនោះ ។ ដាវីឌបានទុកចិត្តលើព្រះអម្ចាស់ ហើយព្រះអម្ចាស់បានការពារអ៊ីស្រាអែល ។