« នេហេមា » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« នេហេមា » ដំណើររឿងព្រះគម្ពីរសញ្ញាចាស់
នេហេមា ១–២; ៤; ៦
នេហេមា
ការសង់កំផែងក្រុងយេរូសាឡិមឡើងវិញ
នេហេមាគឺជាសាសន៍យូដាម្នាក់ ដែលបានរស់នៅក្នុងស្រុកពើស៊ី ។ លោកគឺជាអ្នកបម្រើជំនិតរបស់ស្ដេច ។ ថ្ងៃមួយ នេហេមាបានឮថា ពួកសាសន៍យូដានៅក្នុងក្រុងយេរូសាឡិមកំពុងរងទុក្ខ ។ កំផែងការពារក្រុងយេរូសាឡិមត្រូវបានបំផ្លាញ ហើយមិនដែលបានសង់ឡើងវិញនោះទេ ។ ក្រុងយេរូសាឡិមស្ថិតក្នុងគ្រោះថ្នាក់ ។ នេហេមាបានតមអាហារ និងអធិស្ឋានសូមជំនួយពីព្រះអម្ចាស់ ។
ស្ដេចបានសួរនេហេមាថា ហេតុអ្វីបានជាលោកក្រៀមក្រំម្ល៉េះ ។ លោកបានទូលទៅស្តេចអំពីគ្រោះថ្នាក់នៅក្រុងយេរូសាឡិម ។ ស្ដេចបានមានបន្ទូលថា ទ្រង់អាចជួយបាន ។ នេហេមាបានទូលសូមទ្រង់ ដើម្បីទៅក្រុងយេរូសាឡិម និងសង់កំផែងឡើងវិញ ។ ស្តេចបានឲ្យនេហេមាធ្វើជាអ្នកដឹកនាំ ហើយបានប្រទានគ្រឿងផ្គត់ផ្គង់ដល់លោកដែលលោកត្រូវការ ។
នេហេមា និងពួកសាសន៍យូដាបានចាប់ផ្ដើមសង់កំផែងក្រុងយេរូសាឡិមឡើងវិញ ។ ប៉ុន្ដែ ពួកសត្រូវរបស់ពួកគេបានសើចចំអកដាក់ពួកគេ ហើយបានព្យាយាមបញ្ឈប់ពួកគេ ។
ពួកសត្រូវបានព្យាយាមបំភាន់នេហេមាឲ្យចាកចេញពីទីក្រុង ។ ប៉ុន្តែ នេហេមាមិនចាកចេញឡើយ ។ លោកបានទុកចិត្តលើព្រះអម្ចាស់ ។ លោកបានធ្វើកិច្ចការដ៏អស្ចារ្យមួយ ។
នេហេមាបានប្រាប់ប្រជាជនរបស់លោកថា កុំឲ្យភ័យខ្លាចឡើយ ។ ពួកគេបានដាក់អ្នកយាមនៅលើកំផែង ដើម្បីរក្សាក្រុងឲ្យមានសុវត្ថិភាព ។ ពួកសាសន៍យូដាបានបន្ដសង់កំផែង ។ ព្រះអម្ចាស់បានប្រទានកម្លាំងដល់ពួកសាសន៍យូដា ហើយពួកគេបានសង់កំផែងរួចរាល់ក្នុងរយៈពេល ៥២ ថ្ងៃ ។ ក្រុងយេរូសាឡិមមានសុវត្ថិភាពសាជាថ្មី ។