« កងទ័ពរបស់គេឌាន » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« កងទ័ពរបស់គេឌាន » ដំណើររឿងព្រះគម្ពីរសញ្ញាចាស់
កងទ័ពរបស់គេឌាន
ការទុកចិត្តលើព្រះអម្ចាស់នៅក្នុងចម្បាំង
ប្រជាជនអ៊ីស្រាអែលមានពរជ័យអស់រយៈពេលជាច្រើនឆ្នាំ ។ ប៉ុន្ដែ ក្រោយមកពួកគេបានជ្រើសរើសមិនគោរពតាមព្រះអម្ចាស់ ។ ដើម្បីជួយពួកគេឲ្យចងចាំដល់ទ្រង់ នោះព្រះអម្ចាស់បានអនុញ្ញាតឲ្យពួកសត្រូវសាសន៍ម៉ាឌានមកយកស្បៀងអាហារ និងសត្វរបស់ពួកគេ ។ ពួកសាសន៍អ៊ីស្រាអែលរងការអត់ឃ្លាន ដើម្បីឲ្យពួកគេចងចាំដល់ព្រះអម្ចាស់ និងអធិស្ឋានសូមជំនួយពីទ្រង់ ។
គេឌានគឺជាបុរសម្នាក់មកពីគ្រួសារក្រីក្រមួយ ។ ព្រះអម្ចាស់បានបញ្ជូនទេវតាមួយអង្គ ដើម្បីទៅហៅលោកឲ្យរំដោះអ៊ីស្រាអែល ។ គេឌានបានឆ្ងល់ថា ហេតុអ្វីបានជាព្រះអម្ចាស់បានជ្រើសរើសលោក ។
ព្រះអម្ចាស់បានមានបន្ទូលឲ្យគេឌានបំផ្លាញទីកន្លែងទាំងឡាយ ដែលពួកសាសន៍អ៊ីស្រាអែលបានថ្វាយបង្គំព្រះក្លែងក្លាយ ។ នៅពេលគេឌានបានគោរពតាម នោះប្រជាជនបានខឹងសម្បារ ។
ពួកសាសន៍អ៊ីស្រាអែលចង់សម្លាប់គេឌាន ។ ប៉ុន្ដែ ឪពុករបស់គេឌានបានបញ្ចុះបញ្ចូលពួកគេកុំឲ្យធ្វើបាបលោក ។ គេឌានបានមានសុវត្ថិភាព ។
គេឌានគិតថា លោកមិនអាចរំដោះអ៊ីស្រាអែលបានទេ ។ មានទាហានជាង ១៣៥,០០០ នាក់នៅក្នុងជួរកងទ័ពសាសន៍ម៉ាឌាន ។ ប៉ុន្ដែ ព្រះអម្ចាស់បានប្រទានប្រាជ្ញា និងកម្លាំងដល់គេឌាន ។
ព្រះអម្ចាស់សព្វព្រះទ័យឲ្យពួកសាសន៍អ៊ីស្រាអែលដឹងថា ពួកគេអាចយកឈ្នះបានដោយសារកម្លាំងរបស់ទ្រង់ មិនមែនដោយសារកម្លាំងរបស់ពួកគេផ្ទាល់នោះឡើយ ។ ទោះបីជាអ៊ីស្រាអែលមានទាហានតែ ៣២,០០០ នាក់ក្ដី ក៏ព្រះអម្ចាស់បានបញ្ជាឲ្យគេឌានបញ្ជូនទាហានណាដែលខ្លាច ត្រឡប់ទៅផ្ទះដែរ ។ បន្ទាប់ពីទាហាន ២២,០០០ បានទៅផ្ទះវិញ នោះពួកសាសន៍អ៊ីស្រាអែលនៅសល់តែទាហានចំនួន ១០,០០០ ប៉ុណ្ណោះ ។
ព្រះអម្ចាស់បានមានបន្ទូលថា ទាហាន ១០,០០០ នាក់ ក៏នៅតែជាចំនួនដ៏ច្រើនដដែល ។ ទ្រង់បានមានបន្ទូលឲ្យគេឌាននាំកងទ័ពចុះទៅផឹកទឹក ។ អស់អ្នកដែលផឹកទឹកនឹងមាត់របស់ពួកគេផ្ទាល់ នឹងត្រូវបញ្ជូនទៅផ្ទះវិញ ។ អស់អ្នកដែលផឹកទឹកដោយប្រើដៃរបស់ពួកគេអាចបន្ដនៅបាន ។ ឥឡូវនេះ មាននៅសល់ទាហានតែចំនួន ៣០០ នាក់ប៉ុណ្ណោះ ។
នៅចុងបញ្ចប់ ពួកសាសន៍អ៊ីស្រាអែលបានត្រៀមខ្លួនជាស្រេចដើម្បីច្បាំង ។ ព្រះអម្ចាស់បានបង្ហាញគេឌាន ពីរបៀបដើម្បីយកឈ្នះលើពួកសាសន៍ម៉ាឌាន ។ គេឌានបានប្រាប់កងទ័ពរបស់លោកឲ្យប្រើត្រែ និងចន្លុះដើម្បីបំភ័យពួកគេ ។ សំឡេង និងពន្លឺភ្លើងបានធ្វើឲ្យពួកសាសន៍ម៉ាឌានភាន់ភាំងយ៉ាងខ្លាំង រហូតដល់ពួកគេចាប់ផ្ដើមប្រយុទ្ធនឹងគ្នាទៅវិញទៅមក ។ បន្ទាប់មក ពួកគេបានស្រែក ហើយបានរត់ចេញអស់ ។
ដោយសារគេឌានបានទុកចិត្តលើព្រះអម្ចាស់ នោះពួកសាសន៍អ៊ីស្រាអែលបានយកឈ្នះលើកងទ័ពសាសន៍ម៉ាឌានដ៏ធំ ដោយសារទាហានតែ ៣០០ នាក់ប៉ុណ្ណោះ ។ ព្រះអម្ចាស់បានរំដោះប្រជាជនអ៊ីស្រាអែល ។