« ម៉ូសេនៅលើភ្នំស៊ីណាយ » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« ម៉ូសេនៅលើភ្នំស៊ីណាយ » ដំណើររឿងព្រះគម្ពីរសញ្ញាចាស់
និក្ខមនំ ១៩–២០; ២៤; ៣១–៣៤; ចោទិយកថា ៤–៧
ម៉ូសេនៅលើភ្នំស៊ីណាយ
ការជួយប្រជាជនឲ្យចងចាំដល់ព្រះអម្ចាស់
ម៉ូសេ និងពួកសាសន៍អ៊ីស្រាអែលបានធ្វើដំណើរឆ្លងកាត់ទីរហោស្ថាន ។ ពួកគេបានមកដល់ភ្នំមួយដែលមានឈ្មោះថា ភ្នំស៊ីណាយ ។
ម៉ូសេបានឡើងទៅលើភ្នំដើម្បីទូលទៅព្រះអម្ចាស់ ។ ព្រះអម្ចាស់បានមានបន្ទូលប្រាប់ម៉ូសេថា ទ្រង់ចង់មានបន្ទូលទៅកាន់ពួកសាសន៍អ៊ីស្រាអែលប្រទល់មុខគ្នា ។
ពួកសាសន៍អ៊ីស្រាអែលបានមកឯជើងភ្នំស៊ីណាយ ហើយព្រះអម្ចាស់បានបណ្ដាលឲ្យមានពពកយ៉ាងក្រាស់នៅជុំវិញភ្នំនោះ ។ ព្រះអម្ចាស់គង់នៅក្នុងពពកនោះ ។ ទ្រង់បានមានបន្ទូលទៅពួកសាសន៍អ៊ីស្រាអែល ហើយបានប្រទានដល់ពួកគេនូវក្រឹត្យវិន័យទាំងឡាយ ។ ភ្នំនោះក៏កក្រើករំពើក នៅពេលទ្រង់មានព្រះបន្ទូល ។
និក្ខមនំ ១៩:១៦–១៩; ២០:១–១៧; ចោទិយកថា ៤:១២–១៣, ៣៣; ៥:៤–៥
ពួកសាសន៍អ៊ីស្រាអែលមានការភ័យខ្លាច ។ ពួកគេបានសូមឲ្យម៉ូសេទូលទៅព្រះអម្ចាស់ ដើម្បីឲ្យម៉ូសេអាចប្រាប់ពួកគេ នូវអ្វីដែលព្រះអម្ចាស់សព្វព្រះទ័យឲ្យពួកគេធ្វើ ។
ម៉ូសេបានយកអើរ៉ុន និងចាស់ទុំសាសន៍អ៊ីស្រាអែលចំនួន ៧០ នាក់ឡើងទៅលើភ្នំ ដើម្បីទទួលបានការបង្រៀនរបស់ព្រះអម្ចាស់បន្ថែមទៀត ។ ព្រះអម្ចាស់បានបង្ហាញព្រះកាយដល់ពួកគេ ។
បន្ទាប់មក ព្រះអម្ចាស់បានមានបន្ទូលទៅម៉ូសេឲ្យទុកពួកចាស់ទុំចោលសិន ហើយឡើងទៅលើភ្នំកាន់តែខ្ពស់ជាងនេះ ។ ម៉ូសេបានគោរពតាម ។ ព្រះអម្ចាស់បានប្រើព្រះអង្គុលីរបស់ទ្រង់ ដើម្បីចារឹកក្រឹត្យវិន័យ និងបទបញ្ញត្តិរបស់ទ្រង់នៅលើបន្ទះថ្ម ។ អស់រយៈពេល ៤០ ថ្ងៃ ព្រះអម្ចាស់បានបង្រៀនម៉ូសេអំពីរឿងរ៉ាវជាច្រើន ។
ខណៈពេលដែលម៉ូសេនៅលើភ្នំស៊ីណាយ នោះប្រជាជនអ៊ីស្រាអែលបាននឿយហត់នឹងការរង់ចាំលោក ។ ពួកគេបានប្រាប់អើរ៉ុនឲ្យធ្វើរូបសំណាកឲ្យពួកគេថ្វាយបង្គំ ដូចជាអ្វីដែលពួកគេបានធ្វើនៅស្រុកអេស៊ីព្ទ ។ អើរ៉ុនបានប្រមូលមាសរបស់ពួកគេទាំងអស់ ហើយធ្វើរូបសំណាកកូនគោមាស ។
ពួកសាសន៍អ៊ីស្រាអែលបានថ្វាយបង្គំរូបកូនគោមាស និងបានធ្វើយញ្ញបូជា ។ ពួកគេបាននិយាយថា គឺជាកូនគោមាសដែលបានរំដោះពួកគេចេញពីស្រុកអេស៊ីព្ទ មិនមែនព្រះអម្ចាស់នោះទេ ។
ព្រះអម្ចាស់បានជ្រាបថា ពួកសាសន៍អ៊ីស្រាអែលកំពុងថ្វាយបង្គំរូបសំណាក ហើយបានភ្លេចទ្រង់ ។ ទ្រង់បានបង្គាប់ឲ្យម៉ូសេត្រឡប់ទៅវិញ ហើយប្រាប់ប្រជាជនឲ្យប្រែចិត្ត ។
ម៉ូសេបានចុះពីលើភ្នំស៊ីណាយវិញ ហើយបានឃើញពួកសាសន៍អ៊ីស្រាអែលកំពុងថ្វាយបង្គំរូបកូនគោមាស ។ លោកមានការខកចិត្តជាខ្លាំង ។ ប្រជាជនមិនទាន់បានត្រៀមខ្លួនរួចរាល់ដើម្បីគោរពតាមក្រឹត្យវិន័យ និងបទបញ្ញត្តិដែលព្រះអម្ចាស់បានចារឹកឲ្យនៅឡើយទេ ។ ម៉ូសេបានបំបាក់បន្ទះថ្មនោះ ហើយបានបំផ្លាញរូបកូនគោមាសចោល ។ លោកបានជួយឲ្យពួកសាសន៍អ៊ីស្រាអែលប្រែចិត្ត ហើយចងចាំដល់ព្រះដ៏ពិតប្រាកដរបស់ពួកគេ ។
ម៉ូសេបានសូមឲ្យព្រះអម្ចាស់អភ័យទោសដល់ពួកសាសន៍អ៊ីស្រាអែល ហើយធ្វើការសន្យាជាមួយនឹងពួកគេជាថ្មីម្ដងទៀត ។ ម៉ូសេបានសន្យាថានឹងដឹកនាំ ហើយបង្រៀនពួកគេ ។
ព្រះអម្ចាស់បានបង្គាប់ឲ្យម៉ូសេធ្វើបន្ទះថ្មថ្មី ហើយត្រឡប់មកភ្នំស៊ីណាយវិញ ។ ព្រះអម្ចាស់បានធ្វើការសន្យាថ្មីមួយជាមួយនឹងពួកសាសន៍អ៊ីស្រាអែល ហើយបានប្រទានដល់ពួកគេនូវក្រឹត្យវិន័យដប់ប្រការរបស់ទ្រង់ ។